In Oruh Kapwack Pwacye ke Alu uh in Fohlohkohnma Mempucr Suhkwac Alu

Ke mahlwem ekahsr tari ac mwet kol ke alu uh ahkkahlwemye yohk ke enenuh nuh ke akiyac kapwack ke pihsen mempucr fokoko ke Alu uh, use nohfohn mwet ma insese in eis ac karihngihn olwelah ac akwuck liyeyuckyang ac moulkihn eklac yohk luhn insiyac oacna ke ahkuhtweyucki sel Alma (liye Alma 5:14). Sie sin inkacnek oasr kalmeyac ac yohk srihpac in akiyac kapwack pwacye ke Alu uh pa in ohsun ac fohlohkohnma mwet ma pacptaislac tari ac oruh ke ohiyacn suhkwac alu, ke wacngihn mwe insewowo ac akwuck liyeyuckyang uh. Ke kunohkohn lasr kais sie—forfor luti kuh luti yurin sucu, Mwet luti ke Sacnri Skul, pisap, pahpah, ninac, kuh Mwet Wal Luhlahp—kuht nuh kwewa kuh in srihke ke oruh in pain molwelah ke inkacnek oasr kalmeyac se. Sahflahiyac ah, use mwet nuh kwewa—weacng sucu lasr, mwet tiac wi alu uh, suhkwac alu, mwet orekma koluk—ke Kraist in eis akwuck liyeyuckyang uh pa kunohkohn wolacna ma kuht nuh kwewa akacsruhi kac.

Sie lututacng in Sacnri ke yac 30 somlah ah, ke nga tuh kuhlwacnsap ke prestuhnsi se luhn Stek, tacluhfon se tuhkuh yurin sie sin pisap oaru lasr. El ahkuhtweyac lah ward se lal ah sana puhseni mwet kac oruh wacngihnlac kunohkohn oasr kalmeyac el kuh in sang nuh sin mempucr nwacsnwacs nuh kwewa. Nguhsr se lal nuh sesr ah pa kuht in orwaclihk ward sac. Ke tuhpanyuck ahkkweyeyucklac se uh, kuht sulaclah ke kunohkohn luhn sie prestuhnsi luhn stek lah kuht ac som nuh ke ward sac ac pahngon tahmtahel ac tamuhlwel wolacna, nwacsnwacs uh in oruh misineri luhn stek.

Mwet se ahktolu nga muhtwacta nuh yohroh ah pa tuhlihk muhtwacn fuhsr se wi lutlut luhlahp se we ah. Tukun kuht sramsram ke kihtinn pacl ah, nga sang kunohkohn nuh sel in oruh sie misineri. Oasr mihsaclihk se ke kihtin pacl ah. Na el fahk, “Prestuhn, kom tiac etuh lah nga tiac fokoko ke Alu uh?”

Tukun kihtin pacl luhk ma nga mihslac ah, nga fahk, “Moh, nga tiacna etuh lah kom tiac fokoko.”

El topuk, “Nga tiac fokoko ke Alu ke yac na puhs.” Na el fahk, “Kuh kom tiac etuh lah ke kom muhtuhn alu lac uh, tiacwihna fihsracsr in fohlohkoh?”

Nga topuk, “Moh. Ward lom uh muhtwacwacack ke ao 9:00 ke lututacng. Kom tuhkuh nuh lohm in alu uh, ac kom wi kuhtlac.”

El topuk, “Moh, tiac arlac fihsracsr. Kom elyahkihn ma puhkantwen. Kom elyahkihn fin mwet se pwacngohk nuh sum kuh kom fin ac muhkwena muhta ac tiac akihlenyuck ke pacl in miting an. Ac kom elyahkihn lah kom ac luhngseyuck ac suc e oruh kawuck sasuc se lom uh.”

Ke sronin muhta kahk lihkihn tuhpahl ah, el tahfwelah, “nga etuh lah ninac ac pahpah tuhmuhk ah pruhe keik ke yac puhs in fohlohkihnyucme nuh ke Alu uh.” Na tukun kihtin pacl ma mihsaclihk ac, el fahk, “Mahlwem tolu somlah ah nga pruhe in sokwack puhlaik, kuh, ac inkacnek se in fohlohkoh nuh ke mukwikwi uh.” Na el siyuck, “Prestuhn, kuh kom nuhnkuh muh kunohkohn se inge kuh in pa top nuh ke pruhe ah?”

Muhtuhk muhtwacwacack luhluhyak ke nga topuk ah, “Nga luhlahlfongi lah Leum el topuk pruhe lom ah.”

El tiac insese muhkwena ke kunohkohn sac; el orwaclah misineri na wowo se. Ac nga etuh na pwacye lah el tiac use engan yohk nuh sel muhkwena tuhsruhk nuh sin pahpah ninac kiyacl ah ac kuh pac nuh sin mwet ke sucu sahyac ah.

Oasr kuhtuh ma nga etwaclah kuh ahkacsmakihnyeyuck ke ma se inge ac lohlngohk ma oacna:

• Nga etwaclah lah mempucr suhkwac alu pucspucs ma oasr mwet wolacna lalos ma sikuck muhtuhnte ke lwen nuh kwewa ngihsre sin Leum ke kahsruh in pain molwelah mwet wolacna lalos.

• Nga etwaclah lah tiac arlac fihsracsr kuh wo nuh sin sie mempucr suhkwac alu in fohlohkoh nuh ke Alu uh. Elos enenuh kahsruh. Elos enenuh tahpuhkyuck. Elos enenuh mwet in lohacng nuh selos.

• Nga etwaclah lah oasr mempucr suhkwac alu suc srihke ac insese in sokwack inkacnek se in fohlohk nuh ke mukwikwi uh.

• Nga etwaclah lah puhs mempucr suhkwac alu ac kuh in sruok kunohkohn uh fin siyuckyuck.

• Nga etwaclah lah mempucr suhkwac alu se enenuh in orek wo ac in liyeyuck oacna tuhlihk mukul ac muhtwacn nuhtin God.

Yac pucspucs nuh mihsenge nga nuhnkuh ke ohiyacn lohlngohk se inge ma ac kuh in sikyak nga fin ac ohsun nuh sel ke ohiyacn suhkwac alu lal. Ngwac lwelah kowos in pa nuhnuhnkuh uh.

Sifil fohlohkohnma pa kwacna ip yohk srihpac se ke orekma luhn Leum uh. Ke fohlohkohnma mempucr suhkwac alu uh pa kunohkohn se luhn mempucr nuh kwewa uh, mwet sruok Aaronic ac Melchizedek Pristut uh oasr kunohkohn se lalos in kol mwet sahyac nuh ke orekma se inge. Sahflahiyac ah, pa kalmeyacn kuhlwacnsap luhn pristut uh—use mwet nuh kwewa nuh ke olwelah fuhlwact; use mihslac, engan, ac yohk srihpac.

Ke Puk luhn Mormon an, kom ac esamwack ke Alma Fuhsr el konwacack lah mwet Zoram loesaclihk liki Alu uh, el orwaclah un mwet kol ke alu uh in pain molwelah mwet inge. Ke elos apkuhranyang nuh ke ma kuneyucki lalos, Alma el ngihsre sin Leum ke kahs inge:

Alma el pruhe tuh Leum lacn lwelah nuh selos in kuh in orwaclah in sifil usaclosme nuh ke God ke Kraist.

El fahk nuh sin Leum lah nguhnalos sacohk ac siyuck Sel in sang nuh selos kuh ac lahlmwetmwet tuh elos in sifil use tamuhlwel wiyaclos nuh Yohrohl (liye Alma 31:34–35; ahkuhtweyac wo weacng).

Mahlwem ekahsr somlah ah tukun nga ohsun yurin mwet tuhfahna mempucrlac, mempucr suhkwac alu ac mempucr ma fohlohkihnyuckme, mukul se suc matwuck tuhkuh nuh yuruk ac fahk, “Nga sie mwet ma suhkwac alu ke moul luhk nohfohn. Nga fahsr liki Alu uh ke nga fuhsr ah. Tuhsruhk inge nga fohlohkoh, ac nga wi muhtwacn kiyuck uh orekma ke tempuhl.”

In lwelah elan etuh lah ma nuh kwewa WO, top luhk ah ohinge: “Ke ma se wolac uh, na ohiyac na fohn sac oacwac muh wo.”

El topuk, “Moh, ma nuh kwewa tiac wo. Nga fohlohk nuh ke Alu uh, tuhsruhk wacngihnlac nohfohn tuhlihk nuhtihk ac nuhtin nuhtihk . Ac nga inge loh ke wacngihnlac luhn nuhtin nuhtin nuhtihk—nohfohnna wacngihnlac liki Alu uh. Ma nuh kwewa tiac wo.”

Ke sucu lasr uh oasr sie mwet mahtuh lasr welah Alu uh fin acn Europe ke pacl met ah ke Alu uh. Sie tuhlihk mukul ac muhtuhn alu lac. Nga ac tahmtahel Edgley tuh srihke in suk tuhlihk muhtuhn alu nuhtin mwet mahtuh se inge.

Fihsrwacsr nuh sihk ac muhtwacn kiyuck ah in ahksahfyelah ma ingacn ke fihl ohnkohsr tohkoh ah ac ke kotaiyac fal, e kuh in oasr 3,000 mwet ke sucu sac wacngihnlac. Ingena palye fihl luo sahyac. E kuh in wacngihnlac sun 20,000 nuh ke 30,000 ke tuhlihk nuhtin Pahpah Lucng.

Kunohkohn in pain molwelah se pa sie mwe luti emet ke Alu uh.

Mwet Lahngo el fahk muh kuht enenuh in esam lah nguhn nuh kwewa yohk srihpac nuh sin God.

Leum, Mwet in Molwelah lasr kweok ke misac luhn mahno ac ke ngal luhn mwet nuh kwewa, elosnuh kwewa in kuh in auliyak ac tuhkuh nuh yohrohl. …

Mwet Lahngo el fahk lah kuht fin orekma ke lwen nuh kwewa lasr uh in luti auliyak uh nuh sin mwet sahyac ac use sie na mwet ah nuh Yohrohl, e fah oasr engan luhlahp lasr nuh sin mwet sacn ke tohkohsrahi lal Pahpah (liye D&C 18:10–11, 15; ahkuhtweyac wo weacng)

Oasr wo ohiyac luhk in pain molwelah mempucr suhkwac alu ekahsr ke moul luhk uh. Inge ke nga kahsruh fohlohkohnma sie nuh ke mukwikwi luhn Alu uh, Nga tiac motkwelah sie nguhna; Nga liye fihl ohnkohsr, itkohsr, kuh puhs liki—tausin ke nguhna. Na nga nuhnkuh ke ma suhmuhslah uh: Mwet Lahngo el fahk muh kuht fin use sie na mwet ah nuh Yohrohl, e fah yohk engan lasr (liye D&C 18:15).

Nuh sin Mwet Sap Lal, Leum el fahk, “Pwacye kosrwacni uh yohk, ac puh mwet in orekma” (Mattu 9:37). Mwet orekma uh tiac enenuh in puh. Oasr mwet sruok pristut kuh in orekma, nwacsnwacs ac miliacn ke mempucr luhngse orekma ke Alu uh ke acn nuh kwewa facluh uh. Kuht orwaclah kaunsucl luhn ward, u luhn pristut, U luhn Muhtwacn in Kahsruh, ac kuhtuh u sahyac nuh kwewa nuh ke kunohkohn in fohlohkohnma mempucr suhkwac alu. Molwelah nguhna uh pa orekma se ma Mwet Lahngo el pahngon kuht nuh kwewa in oruh uh.

Ke muhtwacwacackiyacn sramsram luhk uh nga fahk ke pruhe soko Alma el oruh ke el ac mwet weluhl ah som in molwelah Mwet Zoram ah. Ke Mweun Ahkluo ah solse 500 U.S. ac mwet fin acn sac ma kahsrwelos ah sruhuh lun acn in kapihr se. Ke srihpen kweok ac elyah lalos, un solse U.S. 100 sollac in som pain molwelah mwet kaclpous ac. Tukun u sac orekwacni ac, mwet kol sac ahkuhtweyac nuh seltahl ohinge: “Ekuh se inge kowos sun mwet in kol alu lowos an, sikuck muhtuhnte, ac olwelah nuh sin God lah kom fin srackna moul, kom ac fah tiac lwelah sie sin mwet inge in sifil kweok.” (Liye Hampton Side, Ghost Soldiers: The Forgotten Epic Story of World War II’s Most Dramatic Mission [2001], 28–29.) Pain molwelah wo se inge pa pain molwelah ke kweok luhn mahno ac moul facluh uh. Kuh kuht enenuh in sepuhlaik ke kuhiyacsr in pain molweloslac suc kuh in kweok ke ma sikyak ke ip luhn nguhn ac ma pahtpaht uh? Kuh kuht enenuh in otwelah in srihk nuh sin Leum?

In kaliyac, otwelah lasr uh ke mempucr ke Alu luhn Kraist pwacyetuhkuh ke ma pwacye ma Leum el kweok kacsr kais sie—mwet tiac mempucr, mempucr suhkwac alu, finne mwet orekma koluk, ac mwet nuh kwewa ke sucu lasr sifacna. Nga luhlahlfongi muh kuht kuh in use mwet tausin nuh ke engan, mihs, ac wolacnaiyacn wosasuc uh, ac tausin siofok, finne miliacn, ke fihl tok lalos uh. Nga luhlahlfongi muh kuht kuh in orwaclah wo mweyen pa inge Alu luhn Leum uh, ac ke moul nwacsnwacs luhn pristut lasr uh ac mempucr lasr uh, kuht pahngonyuck in orwaclah wo. Nga fahk ahkpwacye sacn nuh suwos ke inen Jisus Kraist, amen.