2010–2019
Keirda Mehlel en Mwomwohdiso sang ni Kapwurehdo Aramas
April 2012


Keirda Mehlel en Mwomwohdiso sang ni Kapwurehdo Aramas

Doarehla aramas iei doadoahk me Sounkomouro malipehkin kitail koaros en wia.

Nan sounpwong kan me apwtehn imwisekla mie laudlahn kangoangpen anahnepen “keirda mehlel” nan Mwomwohdiso, en wahdohng koaruhsiehn me kupwurki en alehda oh kolokol inou sarawi kan oh tiahk sarawi kan oh en momourki wekideklahn mohngiong ni duwen me Alma koasoaia (tehk Alma 5:14). Ehu wiepe keieu katapan en kairada keirda mehlel Mwomwohdiso iei en nsenohkihda oh doarehla irail akan me pepdaislahr ahpw me wie mihmiseli nan irair en sohte kalapw towe, oh sohte kin paieki kapai kan oh tiahk sarawi kan en komour. Sohte lipilipil dah atail pwukoa malipilip kan—sounpadahk en ni ihmw de pas, sounpadahk en Santi Sukuhl, pisop, pahpa, nohno, de Kaun Lapalap—koaruhsiehn kak iang sewese doadoahk en doarehla aramas ni wiepe me katapan. Pwehki, wahdo koaros—atail peneinei, irail me sohte wia towe, me sohte kalapw towe, me dipan akan—ong Krais pwehn alehdi tiahk sarawi kan en komour iei pwukoa sarawi me kitail koaros ahnikipene.

Ehu Rahn Sarawi sounpar 30 samwalahro, ni ahi wie papah nan presidensi en stake, se alehdi delepwohn sang emen nait pisop loaloapwoat. E kawehwe me uwen ah ward eh mwadang keirda e sohlahr kak kihda pwukoa malipilip katapan ong towe kan koaros me warohng. Ah pekipek ong kiht iei me sen kihpeseng ah ward-o. Ni aht awiawih pekipeko en kamanaman, kiht presidensi en stake koasoanehdi en pwarek ward-o oh malipe koaros lih oh ohl kaselel pwukat en wia misineri en stake.

Mweinele kesilimen en aramas me I tuhwong iei lih pwulopwul men me wie suksukuhl nan university wasao. Mwurin aht koasoakoasoai kisin ansou kis, I kihda pwukoa malipilip ong ih en wia misineri. Ansou kis sohte me lokaia. Ih eri nda, “President, komw sohte mwahngih me I sohte kin kalapw towe Mwomwohdiso?”

I sohte lokaia oh mwurin ansou kis, I nda, “Soh, I sohte ese me ke sohte kin kalapw towe.”

E sapengki, “Sounpar kei me I solahr kin nohn towe Mwomwohdiso.” Ih eri nda, “Komw sohte ese me ni ansou me komw sohla nohn towe, e sohte mengei en pwurodo?”

I sapengki, “Soh. Kaudok en ahmw ward kin tepida kuloak 9:00 nimenseng. Komw kin pidolongodo, eri komw iang kiht.”

E sapengki, “Soh, E sohte mengei duwe men. Komw pahn kin pwunodiki soahng tohto. Komw pahn kin pwunodiki ma mie me pahn kasamwoh komwi de ma komw pahn mwohd kelehpw oh sohte me tehk komwi nan mihting kan. Oh komw pahn pwunodiki ma aramas pahn pwungkinkomwi oh ihs me pahn wia kompoakapahmw kapw.”

Ni pilen mese ahr wie kerekerdi pohn sepehkan, E doula, “I ese me ahi nohno pahpa kin wie kapakapkinie erein sounpar tohto pwehn kapwureiehdo nan Mwomwohdiso.” Eri murin ansou ieu me sohte me lokaia, E nda, “Erein sounpar siluh I wie kapakapki I en ahniki soupeikasal, kehlail, oh wiepe en pwurodo.” Ih eri idek, “President, komw sou leme me pwukoa malipilip wet kakete wia pasapengpen kapakap pwuko?”

Pilen mesei tepida ker ni ahi sapengki, “I kamehlele me Kauno ketin sapengehr ahmw kapakap.”

Liho alehda pwukoa malipilipo ahpw kaidehn ihte; e wiahla misineri kaselel men. Oh I koapwoaroapwoarki me E wahdo peren laud kaidehn ongete pein ih ahpw pil ong ah pahpa nohno oh mweinte towe teikan en ah peneinei.

Soahng tohto me I esehla sang kapeidek wet oh mehteikan me duwehte:

  • I esehla me towe kan me sohte kin kalapw towe kin mie me poakohng irail me kin kelepwukihdi rahn koaros irail kapakap pekipeki Kauno en sawas doarehla me re poakohng kan.

  • I esehla me E sohte nohn mengei de soanamwahu ong emen towe me sohte kalapw towe en pwurodohng nan Mwomwohdiso. Irail anahne sawas. Irail anahne utuht. Irail anahne petehk.

  • I esehla me kitail nainiki towe kan me sohte kin kalapw towe me songosong oh inengieng diar ahl en pwurodohng towtowe.

  • I esehla me tohto towe kan me sohte kin kalapw towe pahn kapwaiada pwukoa malipilip ma pekipek kohieng irail.

  • I esehla me towe me sohte kin kalapw towe ahniki pwuhng en petehk duwe koaros oh ni duwen sapwellimen Koht me limpoak pwutak de serepein.

Nan sounpar akan kohkohdo I kin medewe duwen kapeidek me I ahniki rehn liho eh pahn imwila ma I lokaiahieng duwen mehmen me solahr kin kalapw towe. I mweidehng kumwail en pein teneki.

Kapwurehdo aramas kin ansou koaros wia pali kesempwal en doadoahk en Kauno. Ni doadoahk wet eh wia pwukoa en towe koaros, irail akan me kol Priesthood en Aaron oh Melkisedek ahniki pwukoa en tieng oh kaunda. Pwehki, iei met doadoahk en papah nan priesthood—en wahdo aramas koaros ong nan inou sarawi kan me kin kalapalapiala; wahdo popohl, peren, oh pepehm ong pein emen me e kesempwal.

Sang nan Pwuken Mormon, komw pahn taman ansou me Alma me Pwulopwulo diarada me mehn Zoram kan pwupwulahsang Mwomwohdiso, E kauwada pwihn ehu en song en kapwurehdo aramas pwuko. Ni arail sohpai arail pwukoao, Alma patohwanda pekipek wet ong Kauno ni lokaia pwukat:

Alma kapakapki Kauno en mweidehng irail en pweida nan pwukoa en pwurehng kapwurehdo aramas ong Koht nan Krais.

E patohwanohng Kauno me ngenirail kan kesempwal oh me tohtohn irail wia riarail; eri E peki Reh en ketkihieng irail manaman oh eripit pwe irail en kak kapwurehdohng Kauno riarail kan (tehkAlma 31:34–35; lipw tohrohr kapatapatehng).

Sounpwong kei samwalahro mwurin mihting ieu rehn towe kapw oh towe kan me sohte kin kalapw towe, ohl emen me apwtehn kin pwurodo sarawi me ahi dih kohdo oh ndahieng ie, “Ngehi emen me sohte kalapw towe pali laud en ahi mour. I salongasang Mwomwohdiso ni ahi pwulopwul. Ahpw I pwurodohr, oh I kin doadoahk nan tehnpas sarawi rehn ahi pwoud.”

Pwe ien kehsehki me soahng koaros mwahu, ahi pasapengo duwe met: “Mehkoaros mwamwahu te me imwila mwahu.”

E sapengki, “Soh, mehkoaros sohte mwamwahu te. I pwurodohr nan Mwomwohdiso, ahpw nei serihkan oh neirail serihkan koaros salongasangiehier. Oh I kilikilangehr met salongalahn nein nein nei serihkan—koaros salongasang Mwomwohdiso. Mehkoaros sohte mwamwahu te.”

Nan aht peneinei mie ohl emen me towehla Mwomwohdiso nan Europe ni Mwomwohdiso eh kapw. Emen nah pwutak sohla kalapw towe. Ngehi oh Sister Edgley songosongehr en diarada wahwahn aramas menet me sohte kin kalapw towe.

E mengei ong ahi pwoud oh ngehi sen kapata me nan dih weneu mwuri, kakete towe 3,000 en peneinei wet me salongala. Met kapatahieng dih riau powe. Salongala wo kakete lel 20,000 de 30,000 en Sapwellimen Samatail Nanleng serihkan.

Pwukoa en doarehla kohsang ni ehu padahk sarawi keieu poahsoan en Mwomwohdiso.

Sounkomouro mahsanih me kitail konehng taman me aramas koaros kesempwal mehlel ong Koht.

Kauno atail Soundoar lokolongki pwoula ni paliwar oh weirek en aramas koaros, pwe aramas koaros en kak koluhla oh kohdo Reh. …

Sounkomouro mahsanih me ma kitail pahn doadoahk erein atail mour oh padahk koluhla ong mehteikan oh wahdo emen te aramas ong Ih, kitail pahn ahniki peren lap rehn aramaso nan wehin Sahmo (tehk D&C 18:10–11, 15; lipw tohrohr kapatapatehng).

I ahniki ansou mwahu nan ahi mour en kapwurehdo ekei towe kan me sohla kalapw. Met ni ahi kin kapwurehdo emen ong Mwomwohdiso, I sohte kin kilangete emen aramas—I kin kilang dih weneu, isuh, de tohtohsang—kid en aramas. Oh eri I kin medewe iren pwuhk sarawio, Sounkomouro mahsanih me ma kitail wahdo emen te aramas ong Ih, kitail pahn ahniki peren laud (tehk D&C 18:15).

Ong Sapwellime Wahnpoaron Akan, Kauno mahsanih, “Mehlel pwe rahket me inenen laud, a tohndoadoahk kan me malaulau” (Madiu 9:37). Tohndoadoahk kan sohte anahne malaulau. Mie rehtail kid en me kolokol priesthood me warohng oh koahiek oh rar en towe en Mwomwohdiso me ngoang nan pali kan koaros en sampah. Kitail ahniki pwihn kan en konsel, pwihn kan en priesthood, pwihn kan en Pwihn en Sawas en Lih, oh pwihn teikan me wie doadoahk oh pwukoahki en kapwurehdo aramas. Doarehla aramas iei doadoahk me Sounkomouro malipehkin kitail koaros en wia.

Ni tepin ahi kasalada wet I koasoaia kapakap me Alma kihda ni ansou me ih oh ienge kan doula nan doadoahk en doarehla mehn Zoram kan. Nan Mahwin Keriau en Sampah mweinele sounpei 500 en US oh tohn wasao me kin sewese irail wie sensel. Pwehki arail wie lokolok oh mie nsenohn ren doandoarla, pwihn ehu en sounpei 100 en US pilipilda en doarehla sounpei sensel pwuko. Mwurin irail pwukan me tohnmeteikihda doadoahko pokonpene, me kaun irailo kaweidkih irail nin duwe met, “Nisoutik wet kumwail tuhwong amwail kaun kan en mwomwohdiso, kumwail kelepwukihdi, oh kehkehlikohng Koht me erein eh pahn miehte angin mour rehmwail, kumwail sohte pahn mweidehng emente ohl pwuko en doudoula nan lokolok lella pil kisinansou kis.” (See Hampton Sides, Ghost Soldiers: The Forgotten Epic Story of World War II’s Most Dramatic Mission [2001], 28–29.) Doadoahk pweida wet iei en doarehla aramas sang lokolok en paliwar oh sampah. Kitail en ahniki soupeikasal me tikitiksang met nan atail doadoahk en doarehla irail akan me kak lokolongki irair kan me pid pali ngehn oh me poatoapoat? Kitail konehng en wiahda inou en ngoang me pahn tikitiksang met ong Kauno?

Ni keimwsek, atail loaloapwoaat ni duwen towe kan en Sapwellimen Krais Mwomwohdiso mehlel, tepisang mehlel wet me Kauno ketin lokolongki emenemen kitail—me saikinte iang towe, me sohte kalapw towe, lella me dipan, oh towe kan koaros nan pein atail peneinei. I kamehlele me kitail kak wahdo kid kei ong peren, oh popohl, oh mwahu en rongamwahuo, oh lopw kan, lella rar kan, en kadaudokarail kan. I kamehlele me kitail kak pweida pwehki met iei sapwellimen Kauno Mwomwohdiso, oh sang ni atail priesthood oh atail wia towe, kitail malipilipiong en pweida. I kihda ahi kadehde ong kumwail ni mwaren Sises Krais, ahmen.