Te hi‘oraa a te mau peropheta no ni‘a i te Sotaiete Tauturu: Faaroo, utuafare, tauturu
Na Julie B. Beck
Peresideni rahi no te Sotaiete Tauturu tei haamauruuruhia
Faaroo, utuafare e tauturu—na teie e toru na ta‘o ohie roa e faaite mai nei i te hi‘oraa a te mau peropheta no te mau tuahine o te Ekalesia.
I te mau matahiti i ma‘iri a‘enei, ua farii au i te faaûruraa ia paraparau pinepine no ni‘a i te Sotaiete Tauturu—ta’na mau opuaraa e to’na huru,1 te faufaa o to’na aamu,2 ta’na ohipa e to’na apitiraa i te mau episekopo e i te mau pŭpŭ Autahu‘araa a Melehizedeka.3 Mai te mea ra e, e mea faufaa roa i teie nei ia faatumu i te tahi mana‘o i ni‘a i te hi‘oraa a te mau peropheta no ni‘a i te Sotaiete Tauturu.4
Mai ta te mau peropheta a te Fatu i haapii tamau noa i te mau peresibutero e i te mau tahu‘a rahi i ta ratou mau opuaraa e ta ratou mau ohipa, ua faaite atoa mai ratou i ta ratou hi‘oraa no te mau tuahine o te Sotaiete Tauturu. Ia au i ta ratou parau, e mea papû maitai e, te mau opuaraa a te Sotaiete Tauturu o te faarahi ïa i te faaroo e i te parau ti‘a, haapaari i te mau utuafare e i te mau nohoraa, e ia imi e ia tauturu i te feia nava‘i ore. Faaroo, utuafare, e tauturu—na teie e toru na ta‘o ohie roa e faaite mai nei i te hi‘oraa a te mau peropheta no te mau tuahine o te Ekalesia.
Mai te haamataraa o te Faaho‘i-faahou-raa mai, ua faaite te mau peropheta i te faufaa no te mau tuahine ia amui hope roa i roto i te ohipa a te Fatu. Ua faaite mai ratou i ta ratou hi‘oraa no ni‘a i te mau tuahine puai, te faaroo e te mana‘o rahi, tei maramarama i to ratou faufaa e to ratou tumu mure ore. A faati‘a ai te Peropheta Iosepha Semita i te Sotaiete Tauturu, ua parau oia i to’na peresideni matamua ia « peresideni e ona i ni‘a i teie sotaiete, ma te haapa‘o i te feia vĕvĕ, te pahonoraa i to ratou mau hinaaro, e te haapa‘oraa i te mau ohipa huru rau a teie faanahonahoraa ».5 Ua feruri oia i ni‘a i teie pŭpŭ mai « te hoê sotaiete maitai roa, tei faataa-ê-hia i te mau ino atoa o te ao nei ».6
Ua haapii atu o Brigham Young, te piti o te peresideni o te Ekalesia, i to’na na tauturu e i te Pŭpŭ no te Tino Ahuru Ma Piti Aposetolo ia parau i te mau episekopo ia « Vaiiho i te mau tuahine ia faanahonaho i te mau Sotaiete Tauturu a te mau vahine i roto i te mau paroita e rave rahi », Ua na ô faahou oia, « e mana‘o paha te tahi e e ohipa faufaa ore teie, e ere râ ».7
I muri mai, ua parau te peresideni Joseph F. Smith e, taa ê atu i te mau pŭpŭ o te ao nei, tei « haamau-taata-hia aore râ haamau-vahine-hia », te Sotaiete Tauturu, ua « haamau-hanahana-hia te Sotaiete Tauturu, ua haamana-hanahana-hia, ua faataa-hanahana-hia e te Atua.8 Ua parau te peresideni Joseph Fielding Smith i te mau tuahine e, ua horo‘ahia « te mana e te mana faatere no te rave e rave rahi mau mea rarahi ».9 Ua parau oia, « E melo outou no te taatiraa rahi roa‘e a te mau vahine i te ao nei, te hoê faanahonahoraa tei riro ei tufaa faufaa rahi no te basileia o te Atua i ni‘a i te fenua nei e tei opuahia e tei faaohipahia no te tauturu i to’na mau melo haapa‘o ia noaa ia ratou te ora mure ore i roto i te basileia o to tatou Metua ».10
E mana faaûru aano
I te mau matahiti atoa, e rave rahi hanere tauatini tuahine e feia apî tamahine o te riro nei ei tuhaa no teie « haamenemeneraa rahi a te mau tuahine ».11 E i muri iho, noa’tu te vahi e orahia e te hoê tuahine, e noa’tu te vahi ta’na e tavini, e tape‘a noa oia i to’na ti‘araa melo e to’na taatiraa i roto i te Sotaiete Tauturu.12 No te faufaa rahi o te Sotaiete Tauturu, ua faaite te Peresideniraa Matamua i to’na hinaaro ia haamata te feia apî tamahine i ta ratou faaineineraa no te Sotaiete Tauturu na mua roa a tae‘ahia ai to ratou matahiti i te 18.13
E ere te Sotaiete Tauturu i te hoê faanahonahoraa. E tuhaa mana râ te reira no te Ekalesia a te Fatu tei faataa-hanahana-hia e te Atua » no te haapii, no te haapaari, e no te faaûru i te mau tuahine i roto i ta ratou opuaraa no ni‘a i te faaroo, te utuafare, e te tauturu. Ua riro te Sotaiete Tauturu ei hoê huru oraraa no te mau tuahine Feia Mo‘a, e to’na mana faaûru, e purara ïa i rapae roa i te hoê piha haapiiraa i te Sabati e aore ra, i rapae roa i te hoê putuputuraa. Te pee nei te reira i te hoho‘a o te mau pĭpĭ vahine tei tavini i piha‘i iho i te Fatu ia Iesu Mesia e i Ta’na mau Aposetolo i roto i Ta’na Ekalesia i tahito ra.14 Ua haapiihia mai ia tatou e, « E faaheporaa no te hoê vahine ia huti mai i roto i to’na oraraa te mau viretu e faaitoitohia e te Sotaiete Tauturu mai te faaheporaa no te mau tane ia patu i roto i to ratou mau oraraa te mau hoho‘a no te huru taata tei faaitoitohia e te autahu‘araa ».15
A faanahonaho ai te Peropheta Iosepha Semita i te Sotaiete Tauturu, ua haapii atu oia i te mau tuahine e, ua titauhia ia ratou ia « haamaitai i te feia vĕvĕ » e « ia faaora i te mau varua ».16 I roto i ta ratou hopoi‘a no te « faaora i te mau varua », ua horo‘ahia te mana i te mau tuahine ia faati‘a e ia haa i roto i te hoê faanahoraa haamaitairaa. Ua faataahia te peresideni matamua no te Sotaiete Tauturu no te vauvau i te mau papa‘iraa mo‘a, e te amo noa nei â te Sotaiete Tauturu i te hopoi‘a faufaa ia haapii atu i roto i te Ekalesia o te Fatu. A parau ai Iosepha Semita i te mau tuahine e, e faaineine te pŭpŭ Sotaiete Tauturu ia ratou no te farii i te mau « fana‘oraa, te mau haamaitairaa e te mau horo‘a o te Autahu‘araa »,17 ua haamaramaramahia’tura ia ratou te ohipa a te Fatu no te faaoraraa. Te faaoraraa i te mau varua o te pororaa ïa i te evanelia e te raveraa i te ohipa misionare. O te rave-atoa-raa ïa i te ohipa hiero e te aamu utuafare. O te imiraa i te mau rave‘a atoa ia ti‘amâ i te pae varua e i te pae tino.
Ua parau o Elder John A. Widtsoe e, te horo‘a nei te Sotaiete Tauturu i te« Haamamaraa i te vêvê, tamaruraa i te ma‘i ; faaitiraa i te feaa, faaitiraa i te ite ore, faaitiraa i te mau mea atoa o te faataupupû i te oaoa e te haereraa i mua o te vahine. Aue ïa ohipa faahiahia e ! »18
Ua faaau te peresideni Boyd K. Packer i te Sotaiete Tauturu mai te hoê « papa‘i paruru ».19 Na te hopoi‘a o te parururaa i te mau tuahine e to ratou utuafare e faarahi i te auraa o te ohipa haapa‘oraa e te utuuturaa a te mau tuahine hahaere, e e faaiteraa te reira no to tatou hinaaro ia haapa‘o i te mau fafauraa ta tatou i rave i mua i te Fatu. I roto i to tatou ti‘araa ei « utuutu i te feia e vai ra i roto i te fifi e i te feia tei roohia i te ati », te rave amui nei tatou i te ohipa e te mau episekopo no te haapa‘oraa i te maitai o to tatou mau taata i te pae varua e i te pae tino atoa.20
Ua parau te peresideni Spencer W. Kimball « E rave rahi mau tuahine o te ora ra i roto i te mau ahu mutumutu—te mau ahu varua mutumutu. E ti‘a ia ratou ia oomo atoa i te mau ahu nehenehe, te mau ahu varua… E haamaitairaa na outou ia haere i roto i te mau fare e ia taui te mau ahu i te mau ahu mutumutu ».21 Teie te hi‘oraa ta te peresideni Harold B Lee i faaite mai. Ua parau oia e: « Aita anei outou e ite ra e, no te aha te Fatu i horo‘a ai te hopoi‘a i te… Sotaiete Tauturu ia hahaere i teie mau fare ? No te mea taa ê atu i te Fatu iho, aita e taata i roto i [te] Ekalesia tei ia’na te mana rahi a‘e no te faaûru, te ite hope a‘e i te aau e i te oraraa o teie mau taata ».22
Te paturu nei te peresideni Joseph F. Smith i te mau tuahine o te Sotaiete Tauturu e i to ratou mau ti‘a faatere, ma te parau e, aita oia i hinaaro « ia ite i te mahana e pee ai ta tatou mau Sotaiete Tauturu, aore râ e amui atu ai e e ere atu ai i to ratou iho ti‘araa na roto i te ano‘iraa’tu i teie mau faanahonahoraa… tei haamauhia e te mau vahine ». Te hinaaro nei oia i te mau tuahine ia « arata‘i i te ao e ia arata‘i ihoa râ i te mau vahine o te ao, i roto i te mau mea roo maitai, i roto i te mau mea atoa mai to te Atua huru, te mau mea atoa o te faateitei e o te tama i te mau tamarii a te taata nei ».23 Te haapapû nei teie parau a‘o ta’na i te titauraa ia haapae i te mau peu, te mau tumu parau, te mau raveraveraa, e te mau huru, e i reira e apo mai ai te mau raveraa e tu‘ati i ni‘a i te mau opuaraa a te Sotaiete Tauturu.
E roaa i te feia faatere e imi nei i te heheura ia haapapû e, te mau putuputuraa, te mau haapiiraa, te mau ohiparaa, e te tautooraa a te Sotaiete Tauturu, te faatupu ra ïa i te mau opuaraa i faati‘ahia ai te Sotaiete Tauturu. Te autaea‘eraa, te auhoaraa, e te tahoêraa, e riro atura ïa te reira ei hopearaa au roa no te tavini-amui-raa e te Fatu i roto i Ta’na ohipa.
Faatupuraa i te hi‘oraa a te mau peropheta
Aita i maoro a‘enei ua haapapû mai te peresideni Thomas S. Monson e to’na na tauturu e, « ua faaho‘i faahou mai te Fatu i te îraa o te evanelia na roto i te Peropheta Iosepha Semita e ua riro te Sotaiete Tauturu ei tuhaa faufaa roa no taua faaho‘iraa mai ». No te haapapû i to ratou hinaaro ia faahereherehia te « faufaa ai‘a hanahana » a te Sotaiete Tauturu, ua nenei e ua opere te Peresideniraa Matamua na te ao atoa nei i te buka ra Te mau Tamahine i roto i to’u Basileia: Te Aamu e te Ohipa a te Sotaiete Tauturu. I ni‘a i te mau api o teie buka, e ite tatou i te mau hoho‘a e te mau hi‘oraa o te mau tuahine e te mau taea‘e i te rave-apiti-raa i te ohipa i roto i te utuafare e i roto i te Ekalesia, e e nehenehe ta tatou e haapii mai i te mau parau tumu no ni‘a i te parau e, o vai tatou, eaha ta tatou e ti‘aturi nei, e eaha te ti‘a ia tatou ia paruru. Ua faaitoitohia tatou na te Peresideniraa Matamua ia tai‘o i teie buka faufaa roa e « ia faati‘a i te mau parau mau mure ore e te mau hi‘oraa maitai ia haamaitai i to [tatou] oraraa ».24
Ia afaro maitai ana‘e te mau tuahine i ni‘a i te mau opuaraa a te Sotaiete Tauturu, ei reira te hi‘oraa a te mau peropheta e tupu ai. Ua parau te peresideni Kimball, « Te vai nei te hoê puai i roto i teie faanahonahoraa [no te Sotaiete Tauturu] tei ore i faaohipa hope-roa-hia no te haapuai i te mau utuafare no Ziona e no te paturaa i te Basileia o te Atua eita te reira e tupu e tae noa’tu i te taime e noaa’i i te mau tuahine e te autahu‘ara te orama no te Sotaiete Tauturu ».25 Ua tohu oia e « Te rahiraa o te tupuraa rahi e tae mai i te Ekalesia i te mau mahana hopea nei e tae mai ïa no te mea e rave rahi o te mau vahine maitai o te ao nei (tei roto ia ratou te hoê hiaai i te varuaraa) o tei huti-rahi-hia mai i roto i te Ekalesia. E tupu ïa te reira ia faaite ana‘e te mau vahine o te Ekalesia i te parau-ti‘a e te papûraa i roto i to ratou mau oraraa e ia hi‘o-ana‘e-hia te mau vahine o te Ekalesia, e mau vahine taaê e te huru ê i roto—i te mau rave‘a oaoa, i te mau vahine o te ao nei ».26
E oaoa rahi to’u no te hi‘oraa a te mau peropheta no ni‘a i te Sotaiete Tauturu. Mai te peresideni Gordon B. Hinckley, « Ua papû ia’u e aita’tu e faanahonahoraa i te mau vahi atoa o te nehenehe e tapiri atu i te Sotaiete Tauturu o teie Ekalesia ».27 Tei ia tatou te hopoi‘a i teie nei ia faatano ia tatou i ni‘a i te hi‘oraa a te mau peropheta no ni‘a i te Sotaiete Tauturu a imi ai tatou i te faarahi i te faaroo, i te haapaari atoa i te utuafare, e i te horo‘a ho‘i i te tauturu.
E opani au na roto i te mau parau a te peresideni Lorenzo Snow: « Ua î te ananahiraa o te Sotaiete [Tauturu] i te fafauraa. A tupu ai te Ekalesia i te rahi, e rahi ïa to’na faufaa, e e rahi atu â to’na puai no te hamani maitai i to mutaa ihora. Ahani e amui paatoa mai te mau tuahine no te paturu i te sotaiete, e faatupu ïa te reira i te hoê ohipa puai e e riro ïa te reira ei haamaitairaa tamau no te Ekalesia ».28 I te mau tuahine o te tauturu nei ia tupu te basileia o te Atua, ua parau oia e, « e ia rave ana‘e outou i teie mau ohipa, e nehenehe atoa ïa outou e fana‘o i te upooti‘araa o te ohipa e i te faateiteiraa e te hanahana ta te Fatu e horo‘a i Ta’na mau tamarii haapa‘o maitai ».29 Te faaite atoa nei i to’u iteraa papû no teie hi‘oraa na roto i te i‘oa o Iesu Mesia ra, amene.