Poen blong From Wanem long Saed blong Prishud Seves

I no longtaem i pas mi bin stap tingting long tufala bigfala koling we mi bin kasem olsem wan we i kasem prishud insaed long Jos.

Faswan long ol koling ia, i kam taem mi bin wan dikon. Mi bin go, wetem famle, long branj blong Jos long Frankfet, Jemani. Mifala i bin gat blesing blong gat plante gudfala pipol long smol branj blong mifala. Wan i branj presiden blong mifala, Brata Landsuls. Mi bin laekem hem tumas, nomata i luk se oltaem hem i series, ofisol, mo oltaem i dresap long wan dak sut. Mi tingbaot taem we mi bin stap olsem wan yang man, mi stap mekem fani wetem ol fren blong mi abaot olfala stael blong branj presiden blong mifala.

I mekem mi laf blong tingting long hemia naoia, from se hem i posibol se ol yut blong Jos tedei oli lukluk mi long semfala wei ia nao.

Long wan Sandei, Presiden Landsuls i bin askem mi sapos hem i save toktok wetem mi. Fas tingting blong mi i, “Wanem nao mi mekem i rong?” Maen blong mi wok hariap mo i raonem plante samting we ating mi bin mekem, we i save givim insperesen blong gat branj presiden-dikon toktok ia.

Presiden Landsuls i invaetem mi long wan smol klasrum—japel blong mifala i no gat wan ofis blong branj presiden—mo long ples ia hem i givim wan koling long mi blong stap olsem presiden blong kworom blong ol dikon.

“Hemia i wan impoten posisen,” hem i talem, mo hem i tekem taem blong hem mo talemaot from wanem. Hem i bin eksplenem wanem we hem mo Lod i wantem mi blong mekem, mo olsem wanem bae mi kasem help.

Mi no tingbaot tumas samting we hem i talem, be mi tingbaot gud olsem wanem mi bin filim. Wan Spirit we i tabu mo i kam long heven i bin fulumap hat blong mi taem hem i stap toktok. Mi save filim se hemia i Jos blong Sevya. Mo mi bin filim koling we hem i givim i kam tru long Tabu Spirit. Mi tingbaot se mi bin wokbaot i go aotsaed long smol klasrum ia, mi filim mi tolfala moa bitim bifo.

Kolosap 60 yia i pas nao, stat long dei ia, mo mi stap holemtaet gud yet ol filing ia blong tras mo lav.

Taem mi stap tingtingbak long eksperiens ia, mi stap traem blong tingbaot se hamas dikon i gat insaed long branj blong mifala long taem ia. Long tingting blong mi, mi biliv se i bin gat tu. Be ating namba ia i ova tumas.

Be hemia i no wan samting long mi se i gat wan dikon o twelef. Mi bin filim se mi gat ona, mo mi bin wantem blong wok long ful paoa blong mi mo no mekem branj presiden o Lod i harem nogud.

Mi luksave naoia se, branj presiden bae i save mekem samting olbaot nomo taem hem i bin singaotem mi long posisen ia. Hem i save talem nomo long mi aotsaed long klasrum, o long taem blong prishud miting blong mifala, se mi mi niu presiden blong kworom blong ol dikon.

Be no. Hem i bin spendem taem wetem mi, mo i bin helpem mi blong andastanem wanem nao wok blong mi mo niu responsabiliti blong mi, be moa impoten long hemia, hem i bin eksplenemfrom wanem.

Hemia wan samting we bae mi neva fogetem.

Poen blong stori ia, i no blong soemaot nomo olsem wanem oli stap givimaot ol koling insaed long Jos (nomata hemia i wan gudfala eksampol long mi, long stret fasin blong mekem samting ia). Hemia i wan lesen long saed blong strong paoa blong prishud lidasip we i wekemap spirit mo i givim insperesen blong tekem aksen.

Oltaem, i gat nid ia blong mekem yumi tingbaot bakegen ol stamba risen we oli no save finis, biaen ol samting we God i komandem yumi blong mekem. Ol stamba gospel prinsipol, oli nid blong kam stap insaed long laef blong yumi, iven sapos i minim blong lanem ol samting ia bakegen mo bakegen. I no minim se wok ia, i blong lanem samting baehat o mekem i kam nating. Be, taem yumi tijim ol stamba prinsipol insaed long hom blong yumi o insaed long jos, letem faea blong glad blong gospel ia mo faea blong testemoni i tekem i kam, laet, gud filing mo glad insaed long hat blong olgeta ia we yumi tijim olgeta.

Stat long ol dikon we oli jes odenem i go kasem hae pris we i moa senia, yumi evriwan i gat ol lis blong wanem yumi save mekem mo mas mekem long ol prishud responsabiliti blong yumi. Ol wanem samting oli impoten long wok blong yumi, mo yumi nidim blong go mekem. Be hem i insaed long ol poen blongfrom wanem blong prishud seves, we yumi faenem faea, strong filing, mo paoa blong prishud.

Poen blong wanem blong prishud seves i tijim yumi wanem blong mekem. Be poen blong from wanem, i givim insperesen long sol blong yumi.

Poen blong wanem i givim save, be poen blong from wanem i jenisim fasin.

Wan nara prishud koling we mi bin stap tingting long hem, i bin kam long mi plante yia afta, taem mi gat famle blong miwan. Mifala i bin muv i gobak long Frankfet, Jemani, mo mi jes kasem wan niu posisen long wok we i askem bigfala taem mo tingting blong mi. Long taem blong bisi taem ia blong laef blong mi, Elda Josef B. Witlin i bin givim wan koling long mi blong stap olsem stek presiden.

Long taem blong intaviu blong mi wetem hem, plante tingting i gotru long maen blong mi, mo wan smol wari blong mi we i no save kamaot i we ating bae mi no gat taem blong givim long koling ia. Nomata mi bin filim tingting i stap daon mo ona blong kasem koling, mi tingting smol taem sapos bae mi akseptem. Be i jes wan tingting we i spid i pas nomo from se mi bin save se Elda Witlin, God i singaotem hem mo hem i bin stap mekem wok blong Lod. Bae mi mekem wanem moa? Mi mas akseptem nomo.

I gat ol taem, we yumi mas putum wan leg i go long tudak, wetem fet, mo trastem se God bae i putum wan strong graon andanit long leg blong yumi taem yumi mekem olsem. Mo olsem ia nao mi bin akseptem wetem glad, mo wetem save se God bae i putum wan rod i stap.

Long stat blong wok ia, mifala i bin gat spesel janis, olsem wan stek, blong kasem trening we i kam long sam long ol bigfala tija mo lida blong Jos—ol man olsem Elda Rasel M. Nelson mo Presiden Tomas S. Monson. Tijing blong olgeta i olsem smol ren we i foldaon long heven i kam daon mo i wan insperesen long mifala. Mi gat yet ol not we mi bin raetemdaon long taem blong ol trening ia. Ol Brata ia oli bin givim visen blong wanem nao mining blong stanemap kingdom blong God i kam strong moa tru long fasin blong bildimap ol testemoni blong wanwan mo mekem ol famle oli kam strong moa. I helpem mifala blong save luk hao blong yusum kaonsel trutok mo ol prinsipol blong gospel folem stret situesen blong yumi mo folem stret taem blong yumi. Blong talem long wan nara wei, ol lida wetem insperesen oli bin helpem mifala blong luk poen blong from wanem, blong gospel mo mifala i bin rolemap sot long han blong mifala mo go wok.

I no longtaem i pas, mifala i bin luksave se i bin gat fulap gud samting we wan stek presidensi i save mekem—plante tumas, we, sapos mifala i no putum ol fas samting blong wok from, bae mifala save mestem blong mekem ol impoten samting. Kwestin blong wanem i kam faswan i kam antap, i sendembak mifala i gobak long visen we ol Brata oli bin serem. I bin gat plante “gudfala” samting blong mekem, be i no evriwan i moa impoten.

Mifala i bin lanem wan impoten lesen: wan samting we i gud, oltaem, hem i no wan risen we i gud inaf blong spendem taem mo risos blong yumi long hem. Ol aktiviti, ol niu tingting, mo ol plan, oli mas kam long insperesen tru long prishud seves mo i mas stanap antap long stamba poen blong, from wanem, blong prishud seves blong yumi, be i no from sam flas fasin o intres blong tedei. Sapos no, oli save spolem hadwok blong yumi, yusum flatem paoa blong yumi, mo mekem yumi fas insaed long ol intres blong yumiwan, long saed blong spirit o blong wol, we oli no ol stamba wok blong stap wan disaepol.

Ol Brata. Yumi evriwan i save se yumi nidim blong disiplinim yumiwan blong stap lukluk nomo long ol poen we oli gat moa paoa blong mekem lav blong yumi long God mo nara man i kam antap, blong mekem mared i laef, blong mekem famle i strong moa, mo blong bildimap kingdom blong God long wol. Olsem wan frut tri wetem fulap branj mo lif, laef blong yumi i nidim blong yumi katkatem klinim blong mekemsua se yumi yusum paoa mo taem blong yumi blong mekem tru stamba tingting i hapen—“blong givim frut!”¹

Mekem se, olsem wanem nao yumi save wanem blong jusum? Wanwan i gat responsabiliti blong faenemaot hemia yumiwan. Be, yumi gat komanmen blong gat strong tingting blong stadi long ol skripja, blong mekem folem ol toktok blong profet, mo mekem i kam wan taem blong prea wetem fet we i fulap, i series mo yumi mekem wetem ful tingting.

Ol brata. God i fetful. Tru long Tabu Spirit, bae Hem i toktok long maen mo hat blong yumi long saed blong rod we yumi mas folem long wanwan taem blong laef blong yumi.

Sapos hat blong yumi i klin evriwan—sapos yumi no lukaotem glori blong yumiwan, be glori blong God we I Gat Olgeta Paoa, sapos yumi lukaotem blong mekem tingting blong Hem, sapos yumi wantem blesem laef blong famle blong yumi mo ol narafala man—bae yumi no save wokbaot yumiwan. Olsem we Presiden Monson i talem long yumi plante taem, “Taem yumi stap mekem wok blong Lod, yumi gat raet blong kasem help blong Lod.”²

Papa blong yufala long Heven bae i go long fored blong yufala. Bae Hem i stap long raet han blong yufala mo long lef, mo Spirit blong Hem bae i stap insaed long hat blong yufala, mo ol enjel blong Hem bae oli stap raonabaot long yufala, blong leftemap yufala.³

Ol dia brata blong mi, ol tabu blesing ia blong prishud seves blong yumi oli kam taem yumi stap hadwok, yumi glad blong mekem sakrifaes, mo yumi wantem blong mekem wanem we i raet. Yumi nao, yumi mas tekem aksen be i no blong oli tekem aksen long yumi. Blong prij, i gud, be ol toktok we i no lidim man blong tekem aksen oli olsem ol faea we i no mekem samting i hot, o wota we i no save stopem tosta.

Hem i taem yu putum long praktis wanem doktrin i talem, we bae i mekem faea blong gospel we i klinim man bae i gro mo paoa blong prishud i mekem sol blong yumi i laef.

Tomas Edison, man we i fulumap wol wetem laet we i saen strong, i bin talem se “praes blong wan tingting i stap long fasin blong yusum tingting ia.”⁴ Long semmak wei, doktrin blong gospel i kam moa impoten taem yumi yusum.

Yumi no mas letem ol doktrin blong prishud oli silip nating insaed long hat blong yumi mo no stap yusum long laef blong yumi. Sapos i gat wan mared o famle we i nid blong sevem—ating hemia blong yuwan—yu no wet mo luk wanem bae i hapen. Be, talem tangkyu long God from plan blong stap glad we i tekem fet, fasin blong sakem sin, fogivnes, mo ol niu stat. Taem yu yusum doktrin blong prishud, bae i mekem yu kwalifae olsem ol hasban, papa, mo boe, we i andastanem poen blong from wanem blong prishud mo paoa blong hem blong karembak mo holemtaet gud mo tabu fasin blong famle we i no save finis.

Jeneral konfrens, oltaem, i wan gudfala taem blong stap harem mo stap mekem samting. Nao, bae yumi stap olsem man blong mekem samting be i no man blong harem samting nomo.⁵ Ol brata. Mi invaetem yufala blong tingting long ol toktok we ol wokman blong God oli bin talemaot long wiken ia. Afta, nildaon. Askem God, Papa blong yumi long Heven blong givim laet long maen blong yufala mo tajem hat blong yufala. Askem strong long God blong i lidim yufala long evri dei laef, insaed long ol Jos responsabiliti blong yufala, mo ol stret jalenj blong yufalawan, long naoia. Folem ol toktok blong Spirit—yufala i no wet. Sapos yufala i mekem evri hemia, mi promes se Lod bae i no livim yu wokbaot yuwan.

Yumi save se nomata ol gudfala tingting blong yumi, ol samting oli no go olsem we yumi plan long hem. Yumi mekem ol mistek long laef mo long prishud seves blong yumi. Wanwan taem, yumi mestem rod mo yumi no kasem wanem yumi wantem.

Taem Lod i talem long yumi blong gohed wetem fasin blong save wet longtaem kasem taem yumi kam stret evriwan.⁶ Hem i stap talemaot ia nao se i tekem taem mo strong tingting blong stap gohed. Taem yumi andastanem from wanem gospel mo from wanem prishud, bae i helpem yumi blong luk tabu stamba tingting blong evri samting. Bae hem i givim yumi strong tingting mo paoa blong mekem ol raet samting, nomata oli had. Blong stap lukluk nomo long ol besik prinsipol blong laef folem gospel, bae i blesem yumi wetem klia tingting, waes tingting mo daereksen.

Olsem wanem? Bae yumi no gohed blong mekem bigfala gud wok ia?⁷ Yes ol brata. Bae yumi mekem!

Wetem Tabu Spirit we i stap lidim yumi, bae yumi lanem samting aot long mistek blong yumi. Sapos yumi foldaon, bae yumi girap. Sapos yumi stop smol, bae yumi gohed. Bae yumi neva gat tu tingting; bae yumi neva givap.

Olsem wan strongfala grup blong ol brata blong prishud blong God we i no gat en, bae yumi stanap tugeta, solda i fas long solda, yumi lukluk nomo long ol prinsipol blong gospel we i kambak blong Jisas Kraes, mo yumi wok blong God mo ol narafala man wetem glad hat, wan strong tingting mo wetem lav.

Ol dia brata blong mi. Mi testifae long yufala tedei se God Papa mo Pikinini blong Hem, Jisas Kraes, Tufala i laef. Tufala oli ol tru man! Tufala i stap ia!

Yufala i no stap yufalawan. Papa blong yufala long Heven i kea abaot yufala mo i wantem blong blesem mo leftemap yu long stret mo gud fasin.

Yufala i mas save se God i stap toktok long man, long taem blong yumi tedei. Bae Hem i toktok long yufala!

Profet Josef Smit i bin luk wanem we hem i bin talem se hem i bin luk. Jos blong Jisas Kraes blong Ol Lata-dei Sent i kambak long wol tru long paoa mo atoriti blong God we I Gat Olgeta Paoa.

Prea blong mi, i we, olsem ol man we yumi kasem prishud blong Hem, bae yumi stap oltaem blong mekem samting folem from wanem blong prishud seves mo bae yumi yusum ol prinsipol blong gospel we i kambak jenisim laef blong yumi mo laef blong olgeta we yumi stap wok blong olgeta.

Taem yumi stap mekem olsem, paoa blong Atonmen we i no gat en bae i mekem yumi tabu, i klinim yumi, mo mekem Spirit mo fasin blong yumi i kam gud moa taem bae yumi kam ol man we yumi mas kam olsem. Long hemia, mi testifae long tabu nem blong Jisas Kraes, amen.