Efuh ke Kuhlwacnsap luhn Pristut

Nga tuhfahna nuhnkuh ke pahng etweyuck luo nga eis ke nga sruok pristut ke Alu uh.

Pahng se met ke pahng inge tuhkuh ke nga tuh tikin ac. Nga ac sucu luhk uh wi pracns se ke Alu uh fin acn Frankfurt, Germany. Ahkinsewowoyeyuck kuht ke mwet na wowo puhs ke pracns srihsrihk se lasr ah. Sie pa prestuhn luhn pracns se lasr ah, Tamuhlwel Landschulz. Nga mweluhl na pwacye, el finne srihke in sang kuhiyacl, mahngol ke pacl nuh kwewa, ac pacl nuh kwewa nuknuk sralsral fohn. Nga esam ke nga tuh mukul fuhsr se ahksruhksruhk nuh sin kawuck luhk ke atac mahtuh prestuhn luhn pracns lasr ah oacna ah.

Nga isrucn ke nga nuhnkuh kac pacl inge mweyen kuh in sikyak lah mwet fuhsr ke Alu uh mihsenge inteinyuc oacna ke liye luhk ah.

Sie Sacnri ac, Prestuhn Landschulz el siyuck lah el kuh in sramsram nuh sihk. Ma se emet nga nuhnkuh ah pa, “Meac nga oruh tahfonglac uh?” Nuhnak luhk ah suhlahklahk nuhnkuh ke ma puhs nga orwaclah ma kuh in moklweack sramsram inmahsrlon sie prestuhn luhn pracns-nuh sin-sie tikin.

Prestuhn Landschulz el suliyuclac nuh lun kihtin kuhlahsrum—wacngihn ohfohs luhn pisap ke lohm in alu lasr ah—ac insac el orwaclah pahng se nuh sihk in kuhlwacnsap ke prestuhn ke u luhn tikin.

“Kuhlwacnsap na yohk srihpac se pa inge,” el fahk, na el eis pacl lal ac ahkuhtweyac lah efuh. El ahkuhtweyac ma el ac Leum soanweyuc kac ac lah ngwac kuh in eis kahsruh fuhkah.

Nga tiac esam kuhtuh ma el fahk ah, tuhsruhk nga esam wo puhla luhk ah. Nguhn Muhtahl, nwacklah insiyuck ke el sramsram ah. Nga kuh in puhla lah ma luhn Mwet Lahngo pa Alu se inge. Ac nga puhla lah pahng se el pahngonyuc kac ah mokleyuck sin Nguhn Muhtahl. Nga esam ke nga illac liki kihtin kuhlahsrum sac ah puhla muh nga loesaclihk kuhtuh liki met ah.

Apkuhran in yac 60 somlah ke lwen sac me, ac nga srwack sacohkkihn puhla luhn luhlahlfongi ac luhngse inge.

Ke nga nuhnkuh pacl sac ke puhlakihn se inge, nga srihke in esamwack lah tikin ekahsr na pwacye ke pracns se lasr ah ke pacl sac. Fin pwacye esam luhk uh, nga luhlahlfongi muh tikin luo. Tuhsruhktuh, pihsac se kuh in oruh laheslah na yohk se.

Tuhsruhk wacngihn na pwacye ma kac finne tikin sie kuh singucul luo, nga ahkfuhlwactye, ac nga luhngse kuhlwacnsap ke kuhiyuck ac tiac ahktoasrye oacna sie prestuhn luhn pracns luhk kuh Leum.

Nga akihlen ingena lah prestuhn luhn pracns kuh in srokackuhnlah mukwikwi sac ke ma el nuhkuh ah ke el pahngonyuc nuh ke orekma se inge. El kuh na in fahkma ke yen in forfor kuh ke miting luhn pristut lasr uh lah nga pa prestuhn sasuc ke u luhn tikin uh.

Sahyacna, el sislah pacl yuruk ac kahsrweyuc in tiac kahlwem muhkwena lah meac orek ke ma kunuck ac kunohkohn sasuc luhk ah tuhsruhk, yohk srihpaciyac kuhtuh pa, efuh.

Pa sie ma nga fah tiac kuh in muhlkihn.

Kalmacn fahk se inge tiac arlac in ahkuhtweyac ohiyacn tahfuh pahng uh ke Alu uh (ne ohinge pa inge lesin wolacna se ke ohiyac fal in orek kac uh). Pa mwe srihkasrak se ke kuh mokleyuck ke ohiyacn kolyuck luhn pristut ma okasack nguhn ac mukwikwi luhngseyuck.

Enenuh in ahkacsmakihnyeyuck kuht pacl e nuh kwewa ke srihpac luhn ma pahtpaht ke ma sapkihnyuck nuh sesr in oruh. Ip yohk ke wosasuc uh enenuh in oasr ke moul lasr uh, kuht finne e kalweni na in lutlut na lutlut kac. Tiac kalmac pa ohiyac se inge enenuh luhmah kuh wacngihn engnweyac. Tuhsruhk, ke kuht luti ip yohk uh lun lohm sesr kuh ke alu uh, lwelah fihlen insacnweacng luhn wosasuc an ac fihrihr luhn fahkwack luhlahlfongi in tohlwack, fihsrihk, ac engan nuh ke insiyacn mwet kuht luti an.

Sin tikin tuhfahna ahkmuhsralah nuh ke prist fuhlwact mahtuh an, kuht kwewa oasr tahk ke meac kuht kuh ac enenuh in oruh ke kunohkohn luhn pristut uh. Ma ke meac an yohk srihpac ke orekma lasr uh, ac kuht enenuh in wi kac. Tuhsruhktuh oasr ke efuh ke kuhlwacnsap luhn pristut ma kuht konwacack mokleyuck, luhngse, ac kuh luhn pristut.

Meac ke kuhlwacnsap luhn pristut luti ma kuht in oruh uh. Efuh an mokle nguhn lasr uh.

Meac ahkuhtweyac, tuhsruhktuh efuh ekuhllah.

Sie pahng sahyac luhn pristut suc nga nana nuhnkuh kac tuh utuckuh nuh sihk ke yac puhs tok ke oasr sucu luhk sifacna ah. Kuht tuh fohlohk nuh Frankfurt, fin acn Germany, ac tuhfahna kihluckihnyuckyak nga ke orekma luhk ah suc enenuh yohk pacl ac lohacng luhk uh. Ke puhlan pacl na kahfofo se ke moul luhk inge, Elder Joseph B Wirthlin el kunweyucwi ke sie pahng in oruh prestuhn luhn stek sac.

Ke kihsen siyuck in lohlngohk lal nuh sihk ac, puhs ma oan in nuhnak luhk uh, sie suc tiac srihk selos pa fosrngah se muh e wacngihn pacl luhk ma orekma se inge enenuh uh. Nga ne ahkfuhlwactye pahng uh, nga nuhnkuh kac kihtin pacl ah lah ngwac ahokiyac. Tuhsruhktuh nuhnak na suhlal se mweyen nga etuh lah Elder Wirthlin el pahngonyuck sin God ac el oruh orekma luhn Leum. Meac nga kuh in oruh sahyacn ahokiyac?

Kuhtuh pacl uh kuht enenuh in oruh ke luhlahlfongi tiac etuh, luhlahlfongi lah God El fah kol kuht in acse enenuh lasr ke kuht oruh ma El sapkihn nuh sesr uh. Ac nga engan in arulacna inseselac kac, etuh lah God El fah kahsrweyuc.

Ke lwen e met ke kunohkohn se inge ah, tuh wo ohiyacsr in oruh se stek in eis ahkpah sin kuhtuh mwet luti na suhmaht ac mwet kol luhn Alu uh—mukul ma oacna Elder Russell  M. Nelson ac Thomas S. Monson elos tuhkuh nuh ke eria se lasr. Luti lalos ah oacna mwe insewowo tuhkuh lucng me ac mwe mokleyuck se nuh sesr. Srwackna oasr yuruk ma nga tuh suhmuhslah ke pacl in ahkpah lasr ah. Tamuhlwel wiyacsr inge use aruhrruhma se ke kalmeyacn akiyac tohkohsrahi luhn God ke muhsahiyen fahkwack luhlahlfongi la sifacna ac ahkfukokoye sucu uh. Elos kahsrwe kuht liye ohiyac in kapsra ma pwacye ke wosasuc ac ip yohk uh nuh ke ohiyac lasr ac ke kais sie pacl. In ahkuhtweyac ke sie inkacnek sahyac, mwet kol mokleyuck uh luti nuh sesr ke efuh ke wosasuc uh, na kuht enenuh in tuhkweni akacsruhi.

Ac tiac paht met liki kuht konwacack lah puhs ma na prestuhnsi luhn stek se kuh in srihke in oruh—puhkantwen, pwacyena, lah kuht fin tiac akiyac ma yohk srihpac mokleyuck uh, kuht kuh in ahsrwelah in oruh ma yohk srihpac uh. Ahksahfyelah ma yohk srihpac uh muhtwacwacack yohkwaclihk, ekuhllah lohacng lasr ke aruhrruhma se Tamuhlwel ah akacsruhi kac. Oasr ma “wowo” puhs in orek, tuhsruhk tiac ma nuh kwewa oasr srihpac na pwacye.

Kuht etwaclah sie lesin yohk srihpac: ma na pwacye se lah ma se fin wo tiac pacl nuh kwewa fal srihpac sacn in eis pacl ac kahsruh lasr. Mukwikwi lasr, lwemlwem lasr, ac plwacn lasr enenuh in mokleyuck kac ac akwucki ke efuhke kuhlwacnsap luhn pristut lasr uh ac tiac ke atac kuh kena sun ke pacl sacn uh. Sahyacna, elos kuh in ahkkolukye oruh lasr, ahkmuhnahsye kuhiyacsr, ahklohyekuhtlac ke mwe pwacr lasr sifacna, ke ip luhn nguhn ac mahno, lah tiac pa yohk srihpac ke ohiyacn mwet tuhma lutlut uh.

Tamuhlwel, kuht etuh lah in sifacna karihnngihn uh enenweyuck in tu kuh ke ohiyac ma oasr kuh yohk in ahkyohkye luhngse lasr nuh sin God ac mwet wiyacsr uh, sang moul nuh ke pahyuck, kuh nuh ke sucu, ac muhsahi tohkohsrahi luhn God. Oacna fukun sahk soko ma mahtol luhn lah ac sra kac, kuht enenuh in eslah ma lusrohngtwen ke moul lasr uh in ahkpwacyei lah kuht orekmakihn kuhiyacsr ac pacl in ahkfalye srihpac pwacye—in “orwaclah fahko wowo”!¹

Na kuht ac etuh fuhkah ma kuht in sulwaclah uh? Ma kunacsr kais sie in sifacna sulwaclah. Tuhsruhktuh, sapkihnyuck kuht in oaru in lutlut ke ma suhmuhslah, lohacng nuh sin mwet pahluh, ac orwaclah tuh in pruhe sesseslah ke luhlahlfongi, oruh in pwacye, moniyuck se.

Kuht fin oruh ma inge, God El etuh. Sin Nguhn Muhtahl me, Elac fah sramsram nuh ke nuhnak lasr ac insiyacsr ke inkacnek soko kuht enenuh in ukwe ke kais sie ip ke moul lasr uh.

Insiyowos fin nwacsnwacs—kuht fin tiac suk muhkwena ma ac wo nuh sesr sifacna tuhsruhk ma ac wo luhn God Fuhlwact, kuht fin suk in oruh luhngse Lal, kuht fin kena in ahkinsewowoye moul luhn sucu lasr ac mwet wiyacsr uh—kuht ac tiac muhlkihnyuck lac. Oacna ke Prestuhn Monson el kwacna ahkacsmakihnye kuht kac, “Ke kuht oruh orekma luhn Leum uh, kuht fal nuh ke kahsruh luhn Leum.”²

Pahpah tomowos Inkuhsrao el fah tu ye motowos. Elac fah muhta ke lwacpo lacyot ac lacsac lowos an, ac Nguhn Lal fah oan insiyowos, ac lupufacn Lal fah wi kowos ac karihngihn kowos.³

Tamuhlwel sacohk wiyuck, mwe insewowo wolacna nuh ke kuhlwacnsap ke pristut uh mokleyuckyak ke moniyuck lasr, inseselac lasr in kihsaci, ac kena lasr in oruh ma pwacye uh. Lwelah in kuht pa oruh kac uh ac in tiac orek nuh sesr. Luti uh wo, tuhsruhktuh luti ma tiac kol nuh ke oruh uh oacna sie e wacngihn fihlac kuh kof ma tiac kuh in tilokihnyac maluh.

Ke kuht moulkihn mwe luti inge uh, kuh luhn wosasuc uh yohkwaclihk ac kuh luhn pristut ahkkweye nguhnasr.

Thomas Edison, mwet se ma orwaclah kahlwem ke sahrom uh, fahk lah “yohk srihpen luhn mwe nuhnak uh oasr ke orekmakinyuck.”⁴ Ke sie ohiyac oacna, mwe luti luhn wosasuc uh sacohki ke orekmakihnyuck uh.

Kuht tiac enenuh in lwelah mwe luti luhn pristut uh in oan tiac mokleyuck ke insiyacsr ac tiac moulkihnyuck ke moul lasr uh. Fin oasr sie pahyuck kuh sucu ma enenuh kahsruh—sahp finne lasr sifacna—lwelah kuht in tiac sano ac liye. Likina, lwelah kuht in kuloh nuh sin God ke plwacn in molwelah ma weacng luhlahlfongi, auliyak, nuhnak muhnahs, ac muhtwacwacack sasuc uh. Orekmakihn mwe luti luhn pristut fah oruh kuht in fal in ekihn mukul pahyuck, ekihn pahpah, ekihn tuhlihk mukul suc kahlwem lah efuh ke pristut ac kuh la in sifil sruokyac ac karihngihn kahto ac muhtahllacna luhn sucu ma pahtpaht uh.

Toeni luhlahp luhn alu uh wo pacl nuh kwewa ke kwewana in lohng ac oruh kac. Ke ma inge, lwelah kuht “in …mwet orekma ke kahs an, ac tiac mwet lohng muhkwena.”⁵ Tamuhlwel, nga ngihsre kowos in nuhnkuh ke kahs sruhmuhnyuck sin mwet kuhlwacnsap luhn God ke sahflahiyacn wik se inge. Na sikuckmuhtuhnteyak. Siyuck sin God, Pahpah tuhmasr Inkuhsrao, in ahkkahlwemye nuhnak lowos an ac ahkenganye kowos. Ngihsre sin God ke kolyuck ke moul lowos pengana lwen, ke kunohkohn luhn Alu lowos, ac ke kain ma upac lowos ke pacl se inge. Ukwe pihrihkyuck luhn Nguhn Muhtahl—nimet ikolyac. Kowos fin oruh nohfohn ma inge, nga olwelah lah Leum lac tiac lwelah kowos in muhkuh.

Kuht etuh lah kuht ne srihke kuhiyacsr, tiac pacl nuh kwewa e wi plwacn uh. Kuht tahfonglac ke moul in srihke lasr uh ac ke kuhlwacnsap luhn pristut uh. Kuhtuh pacl uh kuht tikuckuclwack ac ikori.

Ke Leum El kahsrwe kuht in tahfwelah in muhtweng uh nuh ke kuht wolac uh,⁶ El ahkkahlwemye lah kuht enenuh in tuhpan ac mongfihsrwacsr. Kahlwem lah efuh kuht moulkihn wosasuc uh acefuh ke pristut uh e kahsrwe kuht in liye srihpac wolacna kac nohfohn uh. Ac fah use nuh sesr mokleyuck kuh in oruh ma pwacye uh, finne ke pacl eltahl upac uh. Lohacng nuh ke ip yohk fihsrwacsr ke moulkihnyacn wosasuc uh fah ahkinsewowoye kuht ke kahlwem, lahlmwetmwet, ac srihsrsrihsr.

Kuh kuht e tiac ahkwot nuh met ke srihpac na yohk se?”⁷ Ahok, tamuhlwel, kuht tuhfah!

Kolyuck sin Nguhn Muhtahl, kuht fah etwaclah ke tahfonglac lasr. Kuht fin ikori, kuht fah tuyak. Kuht fin muhnahslah, kuht fah ahkwot nuh met. Kuht fah tiac wetok; Kuht fah tiac fuhlweack.

Oacna ohiyacn tamuhlwel fokoko ke pristut ma pahtpaht luhn God, kuht fah tuhkweni tu, siskac siskac, lohacng nuh ke ip yohk ke fohlohkyak luhn wosasuc luhn Jisus Kraist ac tarilacna in kuhlwacnsapuh God lasr ac mwet wiyacsr ke oaru ac luhngse.

Tamuhlwel sacohk wiyuck, nga fahkwoht nuh suwos mihsenge lah God ac Wen Nahtuhl, Jisus Kraist, moul. Elos pwacye! Elos oasr!

Kowos tiac muhkuh. Pahpah Lucng El luhngse kowos ac kena ahkinsewowoye ac kahsrwe kowos in suwohswohs.

Luhlahlfongi lah God El sramsram nuh sin mwet uh ke pacl inge. Elac sramsram nuh suwos!

Joseph Smith el liyacack ma el fahk muh el liye ah. Alu luhn Jisus Kraist luhn Mwet Luhlahlfongi ke Lwen-sahflah fohlohkihnyuckyak nuh facluh ke kuh ac suwohs luhn God Fuhlwactlacna.

Pruhe luhk uh pa in oacna mwet sruok pristut Lal uh, kuht ac tuhkweni orekma kac lah efuh ke kuhlwacsap luhn pristut ac orekmakihn ip yohk ke wosasuc fohlohkihnyuckyak se in ekuhllah moul lasr ac moul luhn mwet kuht kuhlwacnsapuh.

Ke kuht oruh ohinge uh, kuh wacngihn sahflahiyac ke Iwaclah uh fah ahknwacsnwacsyeyucklac, owolac, ac lihklihki nguhnasr ac ohiyacsr ne ke kuht oruh mukul ma enenuh in oruh kac uh. Ke ma inge nga fahkwack ke ine muhtahl luhn Jisus Kraist, amen.