Se el Ngera Uchul me a Ngerang er a Omesiou er a Priesthood

Ak dirk melbedebek el kirel a eru el meklou a belkul okedong el kngilai ngak el oba priesthood er a Ikelesia.

A kot el okedong a mlei er a taem el ngak a deacon. Ngak me a telungalek er ngak a mle chedal a branch er a Ikelesia er a Frankfurt, Germany. Aki mle ngeltengat el mle betok a rungil chad er tia el kekerei el branch er kemam, el ta er tir a merredel er a branch, el Brother Landschulz. A kmal mle chemat er ngii, luldimukl er a teletelel el ko er a kmal mle blak a rengul, e kmal ultebechel, e mle blechoel bleiull er a chedelekelek el bail. Ak melbedebek er a dirk ngeasek el buik el blechoel loungelakel er a resechelik el kmo ng kmal mechut a bilel a merredel er a branch er kid.

A ko er a mo ocherechur sel kumdasu er tia er chelechang e le ng kmal sebecherir a rengeasek er a Ikelesia er kid el locha omes er ngak er a osisiu el teletael.

A ta el Sandei, e a President Landschulz a ulelengit el soal lomes er ngak. A mle kot luldesuek a kmo, “Ngera ak rirelii el mekngit?” Ak mlo melcheluches a uldesuek el kirel a betok el tekoi el sebechek el riruul me a branch president a mocha dengchokl e kim chadecheduch.

A President Landschulz a ngilikak el soiseb er a kekerei el delmerab—tia el ikelesia er kemam a dimlak a kekerei el obis er a merredel—e tiaikid e ng mocha meskak okedong el mo merredel er a chelechad er a deacon.

“Tia a klou a belkul el ngerachel,” ngii a dilung, e mocha smodii el kmo ngera uchul. Ng silodii el kmo ngera ike el ngii me a Rubak a mengerechir ngak e mekera a le ngesukak.

Ng diak debedek a rokui el lullekoi, e ng di ak dobedebek a blo kumelchesiu. Ak mlo omelchesiu er a cheledaol, el chedaol Reng er tia er a longedecheduch. Ak mlo omelchesiu el kmo tiang a Ikelesia er a Osobel. E mlo omelchesiu el kmo a okedong el bla el beskak a ulekiu Chedaol Reng. Ak mirrael el tuobed er tia el delmerab e omelchesiu er ngak el telkib ngarbab.

Ng mocha kmeed el okolem el rak er tiaikid el sils, e a kmal dirk dobedebek a ike el kulmelchesiu er a klaumerang me a beltik el reng.

Se er a kulbedebek er tia el teletael, e ak melasm el melbedebek el kmo te kmal mle tela el deacons a mla er tia el branch er kemam er tiaikid el taem. Sel kulbedebek, e a kuumerang el kmo te di mle terung. E ng di, tia locha di kulechel er ngii.

Tia dimlak a kmal belkul er ngak a di ble el chimo el deacon malechub a ble el betok. Ak ulemelchesiu er a chetengakl, e mle soak el mesiou el mo er se el tkul er bab el sebechek el diak temellii a rengul a merredel er a branch er ngak malechub a Rubak.

Ak mocha medengei el kmo ngika el merredel er a branch a mle sebechel di mekedongak el diak a kmal belkul a longedecheduch er ngak el kirel tia el deruchall. Ng mle sebechel di kmu er ngak er a ikrel a delmerab malechub a miting er a priesthood el kmo ngak a beches el merredel er a chelechad er a deacon.

E ng di, ng chiloit a temel lobengkek e ngosukak el diak di bo kudengei el kmo ngera kirek el meruul me a beches el ngerchelek e ng di, a sel klou a belkul a se el, ngera uchul.

Ng teletael el diak kubes er ngii.

A kerbai er tia el cheldecheduch a diak di el sodii el kmo ng mekera okedong er a Ikelesia (e ng di tia mle klou a belkul el mei er ngak el kirel a meral teletelel). Tiang a suobel el kirel a mesisiich el omerreder er a priesthood el lokerengii a chad e rullii el mo oureor.

Kid a kired el mo bekelatk el kirel aike el ngii a moktek er a tekoi el bla de modurch el mo meruul. Aike el betengel osischeklel ebangkelio a kirel mo telengtengil a klengar kid, el belkul a kmo ng kired el muut el suub. Ng diak el belkul a kmo tia el teletael a kired el di omelekel er ngii me le uaia de ko er a mesikang. Ng bai, se el dolisechakl aike el dodai er a osisechakl er a rekeblid malechub a ikelesia, e a klemeriar reng er kid el oltirakl er a ebangkelio me a klisichel a klaumerang er kid a meskid a llomes, budech me a deureng el mo er a rechad el dolisechakl er tir.

Me ngar er a ngike el beches el deacon el mo er a meketeketang el ngarbab el priest, e ngar er ngii a beldeklel aike el ngerang el ngerchelel a sebeched e kired el meruul er a ngercheled er a priesthood. Aike el ngerang a meklou a belkul, e kired el kudmokl. E ng di ngokiu aike el ngera uchuler a omesiou er a priesthood a de betik er a klemeriar reng, soad, me a klisiichel a priesthood.

Angerang er a chelsel omesiou er a priesthood a olisechakl aike el kired el meruul. E a ngera uchul a rullid el mo semeriar.

A ngerang a osischeklid el kmo ng mekera doruul, e a ngera uchul a ngodechii osenged er a ngercheled.

A ta er a okedong er a priesthood el meketeketang el kulbedebek er ngii a mlei er ngak er a betoke el rak e ruriul er a bocha kuungalek. Aki liluut el melukl el mo er a Frankfurt, Germany, e ngak a kmal dirk ngiluu a ngar er bab el deruchall er a urerek el klou el temek a lenguu. Chelsel tia el kmal kosekodel el taem er a klengar ngak, ea Elder Joseph B. Wirthlin a milkedongak el mo merredel er a stake.

Chelsel a cheldecheduch el obengkel, e ng betok el tekoi a siliseb er a uldesuek, el ta er ngii a sebek reng er ngak el kmo ng locha mo diak a temek el kirel tia el okedong. Me ng uaisei el mle chetengakl el okedong, e a ko er a mlo melatk el kmo ng sebechek el kongei er ngii. E ng di ng mle kekerei el uldasu e le ak mle medengei el kmo a Elder Wirthlin a mlokedong er a Dios e ngii a meruul a urerel a Rubak. Ngera sebechek el rulii er a bai di kengei?

Ngar er ngii a taem e ng kired el di mo ultuil er a klaumerang er kid el diak desal mui el medengei omerelled, el ansing er kid el kmo a Dios a mo onger e mekrolid e ng kired el ultuil er a klaumerang er kid. Me a kilengei, el medengei el kmo a Dios a mo mekrolak.

A mle uchelel tia el ngerchelek, e ng mla er ngii a techellam el stake el ngmai a bebil er a osisechakl er tirke el ngarbab el sensei e oungerachel er a Ikelesia—el uaia Elder Russell M. Nelson me a President Thomas S. Monson a mlei er sel ki mngarngii. A osischeklir a uaia blel klengeltengat er a babeluades el omekellomes er kemam. Ak dirk olab a tekoi el ngak a liluches er a taem er tiaikid el omesuub. Tirka el Odam a milskemam aklemedengei el kirel a belkul okedecherul me a omelisiich er a rengedel a Dios lokiu a klaumerang er kemam me a omelisiich er a telungalek. Tiaikid e ng mlo sebechemam el medengei el kmo a ki mekera e oltaut aika el osischeklir er a Ikelesa er tiaikid el taem. Ng belkul a kmo, tirka el mellomes el oungerachel a ulsischeklemam er se el ngera uchuler a ebangkelio, me a kimo cha imuil a chimal a bilam e mocha oureor.

E ng di, ng dimlak el meketeket e a ki mocha medengei el kmo ng betok el ungil tekoi a sebechel meruul er a stake presidency—kmal betok, e le mera er ngii, omko ng dimlak el mekedmokl, e ng locha mlo diak a ngera el sebechemam el rulii. A bebil er a teletael a dilubech, el melibas er a moktek er a tekoi el mlosisechakl lokiu a Rodam. Ng mle betok a “ungil” tekoi, e ng di ng diak el rokui el tekoi a meklou a belkul.

A ki silubii a klou a belkul el suobel: se el klemerang er a kmo ngera el ungil a diak el blechoel klebech el moktek er a temed me a ike el ngar er ngii er kid. A omeruul, uldasu, me a moktek a kirel ultuil er a dodai lokiu se el ngera uchul er a chelsel omesiou er a priesthood. E le alsekum e ng diak, e ng mo diak a belkul a urered, klisiched, e kuk kmal di mo omdasu el kirel a chedaol tekoi el doruul, el ngii a ungil, e ng di ng sebechel diak el moktek er a otirekled.

Rodam, kede medengei el kmo ngokiu a dechal a rengud eng mo sebeched el mes a ike el meklou a belkul el ngii a mo smisichii a beltikelreng el mo er a Dios me a rebebil er kid, omeksemeriar a chelebechiil, melisiich a telungalek, e meleketek er a rengedel a Dios er a beluulechad. El di ua bekerodech el kerrekar el betok a rechelel me a llel, e a klengar er kid ousbech el dongedmokl er ngii me bodo taut a klisiched me a temed el mo remuul a ike el moktek er kid—el mo “meridm a ungil rodech.”!¹

Me ke de mekera e medengelii a dolilt er ngii? A dersta er kid a ngercheled el oterkeklii tiang el mei er kid. Ke de mla modurch el mo kudmeklii tia el okiu a blak el reng el omesubel chedaol llechukl, me a otireklel a tekingel a reprofet, e rullii el mo mui er a klauemrang, e blak el reng, el nglunguuch.

Rodam, a Dios a blak a rengul. Ngokiu Chedaol Reng, e Ngii a mengedecheduch er kid er a uldesued me a rengud el kirel a rael el doltirakl er ngii er a bek el bakes er a klengar er kid.

Alsekum e ng bliochel a rengud—alsekum e ng diak dosiik a klebkall el mei er kid ng bai klebkall el mo er a Dios el olab a bek el Klisiich alsekum e ke de osiik er a Soal, alsekum meng soad el omekngeltengat er a telungalek er kid me a re bebil er kid—e ng diak bo decheloit el di mo kid el tang. El uaia President Monson el blechoel lomeklatk er kid, “Alsekum e ke de meruul a urerel a Rubak, e ng kired el ngmai a ngeso er a Rubak.”²

A Demam er a Babeluades a mo “okiu medam. [Ngii] a mo ngara kadikm me a katur, e a Chedaol Reng er [Ngii] a mo ngara rengum, e a reanghel er [Ngii] a mo iliuekl er kau, e sobecheklau.”³

Rodam, a klengeltengat er a omesiou er a priesthood a ultuil er a blak el reng er kid, el kongei el mo tonget a rokui, me a klemeriar reng er kid el meruul a melemalt. Mei mel kid a mo oureror e bai lak bode morimel el mo oureor. A olisechakl a di ungil, e ng di a kemanget el osisechakl e diak a ngera el relii el uaia ngau el diak a kleldelel malechub a ralm el diak el lokerur a chederreng.

Se el de bo er a chesemel osisechakl e sel mengikiid el klisichel ebangkelio a mo klou a le relii el mei er kid e a klisichel a a priesthood a meklemesii a rengud.

A Thomas Edison, el ngii a mle kot el chad el rulii a tama er a dengki, a dilu el kmo “a uldasu a di klou a belkul alsekum e ng usbechall.”⁴ Osisiu el teletael, a osisechakl er a ebangkelio a mo meklou a belkul alsekum e ke de oltirakl.

Ng diak el kired el mechei osisechakl er a priesthood me lak louedikel er a rengud e lak doltaut er a klengar kid. Alsekum meng ngar ngii a rebechiil malechub eng telungalek el ousbech a ngesou—me a locha bebil er kid—me lak dongiil e domes. E bai, doureng a sulel a Dios er a uldasu er a deureng el ngii a ulsiseb er ngii a klaumerang, ouchel reng er a kngtid, klausubes, me a omekbeches. Otutel osisechal er a priesthood a mo mesa ngerachel er a mo bechiil, e mo chedam, e ngalek el medengelii a ngera uchuler a priesthood me a klisichel el mo nguu e kudmeklii sel klebekelel me a cheledolel a diak a ulebengelel el telungalek.

A Klou el Ongdibel a blechoel ungil taem el dorrenges e meruul. Mei e bo “doltirakl a tekoi,… e lak di dorrenges el merekong.”⁵. Rodam, ak siotai er kemiu el mo orrenges a tekingir a remesiungel a Dios er chelechang el sandei. E bo moutubaruach. E moker er a Dios, el Demad er a Babeluades, el mo meklemesii a uldesuem el retechii a rengum. Molengit er Ngii me lomekrael er kau er a bek el sils, me a ngerchelem er a Ikelesia, me a omelasem el chom chelbabangel er chelechang. Moltirakl er a odbechel Chedaol Reng—e lak mongetekek er ngii. Se el bo muaisei, e ak yaksok el kmo a Rubak a diak el chitau me di bo el kau el tang.

Ke de medengei el kmo ng diak el iior er a kmal ungil moktek, ele tekoi a bebil e ng diak el mekedmokl er sel moktek er kid. Ke de remuul a chelbirukel er a klengar kid me a urered er a priesthood. Ea le bebil e kede mesibas e ruebet.

A Rubak er a le du er kid el mo “melemolem el ngara kllou el reng el di merekmo bo de cherrungel,” ⁶ e Ng ouchais el kmo ngokiu a kemanget el taem me a duch el reng. Momedengei aike el ngera uchul er a ebangkelio me a ike el ngera uchul er a priesthood a ngosukid el mes a chedaol moktek er a ika el rokui. Ng oldubech er a rengud e meskid a klisiich el mo meruul a melemalt el tekoi, ngii me a le meringel a rokui el tekoi. Se el dolemolem el ngara ike el dodai er a osisechakl er a ebangkelio e kede mo ngmai a klengeltengat er a llomes me a ulekrael.

“Me ng diak bai dolemolem er tia el klou el moktek?”⁷ Oi, e rodam, ke de mong!

Me sel dultuil er a Chedaol Reng, e ke de suub a subeled er a ike el cheleuid er kid. E a de rebet, e ke de mekiis e lmuut el melemolem. E a bo de mesaul e ke de di melemolem. Ng diak de tuchakl; e diak de kimer.

Me kid el ngara mesisiich el klodam er a diak a ulebengelel priesthood er a Dios, e ke de dmak el dechor, el katerturk ongelngeled, el moktek er kid a ngara ike el dodai er a osisechakl er a mla moluut el ebangkelio er a Jesus Kristo e mesiou er a Dios er kid me a rebebil loba blak el reng me a beltik el reng.

Rodam er ngak, a kuuchais er kemiu er chelecha el sils el kmo a Dios el Chedam me a Ngelekel Sechal, el Jesus Kristo, a ngar. Tir a kmal merang! Tir a ngarisei!

Ng diak dil kau el tang. A Demam er a Babeluades a omekerreu er kau e soal el omekngeltengat e omekrael er kau er a llemalt.

Bo modengei el kmo a Dios a mengedecheduch el mo er a rechad er chelechal taem. Ngii a mo mengedecheduch er kau!

A Profet Joseph Smith a milsang a lilsang. A Ikelesia er a Jesus Kristo er a Uriul-klebesei el Santo a mla moluut el mei er a beluulechad lokiu a klisiich me a ngerachel er a Mesisiich el Dios.

A nglunguchek a kmo kid el oba priesthood er Ngii, bo de kaukledem e doureor el kirel a ngera uchul er a omesiou er a priesthood e dolemolem el ngara ike el dodai er a osisechakl er a mla moluut el ebangkelio el ngii a mesisiich a klisichel el mult a klengar kid me a klengar er tirke el dosiou er tir.

Se el bo deuaisei, e a klisichel a Tngakireng a mo mengikiid er kid, omekbeches, e smisiich a reng er kid me a blekerdeled el mol muut er se el de turk er sel ngii a kired el mo er ngii. Aikang a kulekoi el ngara chedaol el ngklel a Jesus Kristo, amen.