Pwehda en Papah en Priesthood

Me kerendo I kin wie medemedewe duwen pwukoa malipilip laud riau me I alehdi ni ei kol priesthood nan Mwomwohdiso.

Tepin pwukoa riau wet kohdo ni ei wia dihken men. I kin iang ahi peneinei towe prans en Mwomwohdiso nan Frankfurt, Germany. Se kapaikihda aramas kaselel tohto nan aht kisin prans-o. Emen me wia aht president en prans, Brother Landschulz. I pwungki mehlel ohlo, mendahte eh kin mwomwen mehmehlel ansou koaros, waun, oh pali laud en ansou suhd poh rotorot. I taman ni ei mwahnakapw ei iang kompoakapahi kan kamwakamwaniki duwen aht president en prans eh kin mwomwen style en mahs.

I kin kouruhrki ei kin medewe met pwehki e kakete me irail me pwulopwul kan nan Mwomwohdiso rahn wet pil kin medewe ie nin duwe met.

Ehu Rahn Sarawio, President Landschulz idek ma e kak lokaiahieng ie. Tepin ahi madamadau iei, “Dahme I wiahda sapwung?” Ahi mwahliel mwadangete medewehda soahng tohto me I kakete wiahier me pahn kamwakid koasoaipene wet nanpwungen prans president oh dihken.

President Landschulz lukeiehlong nan ehu kisin perehn kasukuhl—aht imwen sarawio sohte ohpis en prans president loale—oh wasao e kihdohngie pwukoa malipilip en wia president en dihken kan.

“Met iei pwukoa kesempwal ehu,” e nda, oh eri e nsenohki kawehwe kahrepe. E kawehwe dahme ih oh Kauno kasik sang ie oh duwen ei kak alehdi sawas.

I sohte taman pali laud en me e nda, ahpw I taman mwahu pepehm me I ahniki. Ngehn me sarawi sang powe me aude ahi mohngiong ni eh mahsen. I kak pehm me met iei sapwellimen Sounkomouro Mwomwohdiso. Oh I pehm me pwukoa malipilip me e kihdohng ie wia kamarain ieu sang Ngehn Sarawi. I taman ei aluhieisang nan kisin pereo leme me I ekis reireisang mahs.

Kerenieng sounpar 60 doulahr mwurin rahno, oh I kesempwaliki pepehm pwuko en likilik oh limpoak.

Ni ei wie medemedewehdo irair wet, I song en tamanda dihken depe me mihmi nan aht pranso ansouo. Ni uwen me I kak taman, I kamehlele me meh riemen. Ahpw, met mwein lioasoahs likamwalahieu.

Ahpw e sohte nohn kesempwal ma dihken mehmen de ehk emen. I wauniki, oh I men papah ni uwen me I kak oh sohte kansensuwedih ahi prans president de Kauno.

I ese met me president en prans kakete wiewiahte ah doadoahk ni eh kihdohng ie pwukoa wo. E kakete ndahieng ie nan wasahn alu de nan aht mihting en priesthood me ngehi me pahn wia president kapw en pwihn en dihken kan.

Ahpw soh, e nsenohki patehng ie oh seweseie wehwehki kaidehnte dah en ahi doadoahk oh pwukoa kapwo ahpw, me ahpwete kesempwalsang, pwehda.

Met iei mehkot me I sohte pahn manokehla.

Kahrepen soai wet iei kaidehnte en kawehwehda duwen kihda pwukoa malipilip kan nan Mwomwohdiso (ahpw met iei padahk kaselel ehu en duwen wia met ni pwung). E wia karasaras ong ie en manaman en wia kaun en priesthood me kangoang me kin kamwakidada ngehno oh kangoange mwekmwekid.

Kitail anahne en kin alehdi kataman ansou koaros en kahrepe kan en soahng kan me kitail kosonnedieng en wia. Tepin padahk poahsoan kan en rongamwahuo anahne en wia kisehn atail mour, mendahte ma kitail anahne en kapwkapwurehieng pwehn esehla. Met sohte wehwehki me e konehng en wia wadilik de mehkot kapwang. Ahpw, ni atail kin padahk tepin padahk poahsoan kan nan imwatail kan de nan mwomwohdiso, mweidehng atail pereniki momourki rongamwahuo oh kehlail en atail kadehde en wahdo marain, kaloalamwahu, oh peren ong mohngiong en irail akan me kitail kin padahkih.

Sangete dihken me apwtehn kasarawi lel priest lapalap me keieun werei nan pwukoa wo, kitail koaros kolokol me kitail ntingihdi kan en dah me kitail kak oh konehng wia nan atail pwukoa kan en priesthood. Dah kesempwal nan atail doadoahk, oh kitail anahne nsenohkihda. Ahpw iei nan pwehda en papah en priesthood me kitail pahn diarada kehlail, ngoang, oh manaman en priesthood.

Dah en papah en priesthood kin padahkihieng kitail en wia. Pwehda kin kamwakidada ngenitail kan.

Dah kin kapehse, ahpw pwehda —kin wekidala.

Pil ehu malipilip en priesthood me I wie medemedewe kohdohng ie sounpar tohto mwuhr ni ansou me mie pein ahi kisin peneinei. Se pwuralahr Frankfurt, Germany, oh I apwtehn kesepwilda nan ei doadoahk me pahn anahne laud ahi ansou oh doadoahk laud. Nan ansou kediropw wet nan ahi mour Elder Joseph B. Wirthlin kihieng ie pwukoa malipilip en wia president en stake.

Nan ahi kapeideko reh, madamadau tohto tang nan moangeie, ehu iei kapwunod me e kakete sohte ahi ansou ong me anahn nan pwukoa wet. Mendahte ei karakarahngkihla oh kesempwaliki malipilipo, I ekis medewe ma I pahn kak alehda. Ahpw madamadauo mwadangete sarala pwehki I ese me Elder Wirthlin malipilip sang Koht oh me e wiewia doadoahk en Kauno. Dahme I kak wia likin alehda?

Kin mie ansou me kitail anahne sokowei nan rot ni pwoson, koapwoaroapwoarki me Koht pahn kaweid kitail ni atail mwekidki pwoson. Eri I alehda ni peren, ni ei ese me Koht pahn sawas.

Nan tepidahn pwukoa wet, se ahniki ansou mwahu ni duwen stake ehu en alehdi kaiahn sang ekei sounpadahk oh kaun keieu mwahu nan Mwomwohdiso—ohl duwehte Elder Russell M. Nelson oh President Thomas S. Monson kohdo nan aht wasa. Arail padahk duwehte kapai sang nanleng oh kamarain ong kiht. I kolokol te dahme I ntingihdi nan kaiahn pwuko. Ohl pwukat kawehwehieng kiht wehwehn kauwada wehin Koht sang ni kakairada ahn emenemen kadehde oh kakehlailih peneinei kan. Irail seweseikit kilang duwen doadoahngki mehlel kan oh tepin padahk kan en rongamwahuo ong irair kan me se mih loale oh ong ansou me se mih loale. Pwehn nda ni wiepe tohrohr, kaun kamarainda kan seweseikit en kilang pwehda en rongamwahuo, oh eri se anahne wilikada pehn aht seht kan oh tepida doadoahk.

Sohte pwand se tehkada me mie soahng tohto me presidensi en stake kak wia—tohto mehlel, ni mehlel, me ma se sohte koasoanehdi dahme kamarainda sen wia, se kakete katiasang me kesempwal kan. Soahng anahn akan tepida pwarada, kediropwahla dahme se koasoanehdi rehn Ohl oko nan kaiahno. Mie soahng “mwahu” tohto en wia, ahpw kaidehn koaros mwohkan me keieu kesempwal.

Se esehla mehkot kesempwal: pwehki mehkot eh mwahu sohte wehwehki me e konehng en kohieng atail ansou oh neitail mwohni. Atail kemwekid kan, oh koasoandi kan konehng en kemwekid sang oh poahsoankihda pwehda en atail papah en priesthood oh kaidehn sang ni dahme popular ansouo de mehkot me aramas pereniki ansouo. Ma soh, irail kakete kakediropwihkitailsang atail doadoahk, kaluweteikitail, oh elehieng atail kediropwkihla soahng kan me kitail pereniki wia, me pid paliwar de pali ngehn, me sohte wia poahsoan en atail wia tohnpadahk.

Ohl akan, kitail koaros ese me kaunda pein kitail me anahn pwehn nsinsenohkihte soahng kan me katapan me ahniki manaman keieu laud en kalaude atail limpoak ong Koht oh aramas, en kamwakidada nanpwungen pwopwoud kan, kakehlailih peneinei kan, oh kauwada wehin Koht pohn sampah. Duwehte tuhke me kin wah me diren rah oh teh, atail mour kan anahne en kalapw kamwakelda pwehn elehieng atail doadoahngki angitail oh atail ansou pwehn kapwaiada uhdahn atail pwukoa —en “wa mwahu”!¹

Eri ia duwen atail kak ese dahme kitail en pilada? Kitail ahniki pwukoa en koasoanehdi met ong pein kitail. Ahpw, kitail alehdi kosonned en onopiki ni loaloapwoat pwuhk sarawi kan, idawehn mahsen en soukohp akan, oh wiahda met en wia ehu ire en kapakap me pwoson, mehlel, oh poadedi.

Ohl akan, Koht ketin loaloapwoat. Sang Ngehn Sarawi, E pahn ketin mahsenohng atail madamadau kan oh mohngiongitail kan duwen ahl me kitail konehng idawehn ni ehuehu ansou en atail mour.

Ma mohngiongitail kan mwakelekel—ma kitail rapahki kaidehn atail kilohri ahpw kilohri en Koht Wasalapalahpie, ma kitail pahn rapahki en wia kupwure, ma kitail inengieng kapaiada mour en atail peneinei oh aramas—kitail sohte pahn alu kelehpw. Ni duwen President Monson eh kin kalapw katamanohng kitail, “Ni ansou me kitail wia poahngok en Kauno, kitail ahniki pwuhng en alehdi sapwellime sawas.”²

Semomw Nanleng pahn tieng mwohn mesomwen. E pahn mih ni ahmw palimaun oh palimeing, oh Sapwellime Ngehn pahn mih nan mohngiongumw, oh sapwellime tohnleng kan pahn kapil komwi, pwehn utungkomwihda.³

Riei ohl kempoake kan, kapai sarawi sang papah en priesthood kin kohda sang ni atail doadoahk pwerisek, atail kupwuriki tohnmetei oh atail inengieng wia dahme pwung. Kitail wia aramas akan me kin wia oh kaidehn emen en kin wieikitail. Padapadahk kin mwahu, ahpw kapahrek me sohte kin elehieng doadoahk duwehte kisiniei me sohte karakar de pihl me sohte kamed.

Iei nan doadoahkpen padahko me kisiniei en kamwakel en rongamwahuo kin keirda oh manaman en priesthood kin kamwakidada ngenitail kan.

Thomas Edison, ohl me kamarainihki sampah dengki lioal lingan, nda me “katepen iren madamadau ehu kin mie nan eh kin doadoahk.”⁴ Ni wiepe duwe met, padahk en rongamwahuo kin ahpwete kesempwalla ni atail kin doadoahngki.

Kitail sohte konehng mweidehng padahk kan en priesthood en mihmi ni sohte lipwe nan mohngiongitail oh sohte doadoahk nan atail mour. Ma mie pwopwoud ieu de peneinei ieu me anahne doandoarla—mwein kakete pein atail—kitail dehr awihte oh kilang. Ahpw, kitail kalahngan ong Koht pwehki pilahn en peren me iangahki pwoson, koluhla, mahk, oh tepida sapahl kan. Doadoahngki tepin padahk en priesthood pahn elehieng atail warohng ni duwen ohl pwopwoud, ni duwen pahpa, oh ni duwen nein aramas pwutak me wehwehki pwehda en priesthood oh manamanpe en pwurehng koledi oh katengehdi lingan en peneinei poatoapoat kan.

Tiepene lap kin ansou koaros wia ansou mwahu ong kasukuhl oh wiewia. Eri, kitail “kapwaiada mahsen en Koht…[kaidehn] rongorongete.”⁵ Ohl akan, I lukeikumwail en medewe mahsen en sounpapah kan en Koht ni weekend wet. Eri kelepwikihdi. Peki rehn Koht, Samatail Nanleng, en kamarainih amwail madamadau oh sair mohngiongumwail. Peki ni ngidingid rehn Koht kaweid nan amwail mour en ehuehu rahn oh nan amwail pwukoa kan en Mwomwohdiso, oh nan amwail kasongosong kan en ansou kiset. Idawehn kaweid kapehm kan en Ngehno—kedehr kapwande. Ma komw wia koaros mepwukat, I inouki me Kauno sohte pahn kihdi komwi en kelehpw.

Kitail ese me mendahte atail koasoandi kan ahr kin mwahu, soahng koaros sohte kin pweida ni duwen me kitail kin koasoanehdi. Kitail kin sapwungala nan mour nan doadoahk en priesthood. Ekei pak kitail kin pwupwudi oh sohte pweida.

Ni ansou me Kauno kaweid kitail en doulahte ni kanengamah lao kitail unsekla,”⁶ E ketin mwahngih me met kin anahne ansou oh ngoang. En wehwehki pwehda en rongamwahuo oh pwehda en priesthood pahn seweseikitail en kilang kahrepe sarawi en koaruhsiehn met. E pahn kangoangih oh kakehlailih kitail en wia soahng kan me pwung, lella ni ansou me re apwal. Tetehkete tepin padahk poahsoan kan en momourki rongamwahuo pahn kapaikinkitailda marain, eripit, oh kaweid.

“Kitail sou konehng doula nan doadoahk lap wet?”⁷ Ehng, ohl oko, kitail pahn!

Kaweid sang Ngehn Sarawi, kitail pahn kasukuhlsang atail sapwungala kan. Ma kitail pwupwudi, kitail pahn pwurehng uhda. Ma kitail dipekelekel, kitail pahn doulahte. Kitail sohte pahn luwetala; kitail sohte pahn pwilikihdi.

Ni duwen pwihn en ohl pirien lap en priesthood poatoapoat en Koht, kitail pahn kesihnenpene, pwopwe pahrekohng pwopwe, keskesempwaliki tepin padahk kan en rongamwahu kopwurupwurdo en Sises Krais oh papah atail Koht oh aramas ni loaloapwoat oh limpoak.

Riei ohl kempoake kan, I kadehdehiong kumwail rahn wet me Koht Sahm oh Sapwellime Iehros, Sises Krais, ieias. Ira mehlel! Ira ketiket!

Kumwail sohte kelehpw. Samamwail Nanleng kesempwalikin kumwail oh kupwurki kapaiada oh utungkumwailda ni mour pwung.

Koapwoaroapwoarki me Koht mahmahsenohng aramas nan atail mwehi wet. E mahmahsenohng kumwail!

Soukohp Joseph Smith kilangada dahme e kilangada. Mwomwohdiso en Sises Krais en Souleng en Imwin Rahn Akan kopwurupwurdohr sampah sang ni manaman oh mweimwei en Koht Wasalapalahpie.

Ahi kapakap iei me ni duwen irail akan me kol Sapwellime priesthood, kitail pahn ansou koaros kapwaiada pwehda en doadoahk en priesthood oh doadoahngki tepin padahk kan en rongamwahu kopwurupwurdohu en wikidala atail mour oh mour en irail akan me kitail kin papah.

Ni atail wia met, manaman poatoapoat en Tomwo pahn kamine, kamwakele, oh kamwahuiala ngenitail kan oh mwomwatail kan lao kitail wiahla ohl me kitail koasoandi en wiahla. En met I kadehdeh ni lengileng sarawi en Sises Krais, ahmen.