2010–2019
O Le Aisea o le Auaunaga Faaleperisitua
Aperila 2012


O Le Aisea o le Auaunaga Faaleperisitua

O le malamalama i le aisea o le talalelei ma le aisea o le perisitua o le a fesoasoani ai ia i tatou ia iloa le faamoemoega paia o nei mea uma.

Ou te matua faatauaina lava lenei avanoa matagofie ua feiloai ai ma le usoga a le perisitua ma olioli faatasi ai ma outou i le ofoofogia ma le matagofie o le talalelei a Iesu Keriso. Ou te faamalo atu i lo outou faatuatua, i a outou galuega lelei, ma la outou amiotonu tumau.

Ua ia i tatou uma se sootaga tutusa lea ua tatou maua ai le faauuga i le perisitua a le Atua mai ia i latou ua faatuatuaina i le pule paia o le perisitua ma le mana. E le o se faamanuiaga itiiti lena mea. O se tiutetauave paia.

O Le Mana o le Aisea

Talu ai nei lava sa ou mafaufau ai i ni valaauga taua se lua sa ou mauaina o sē umia le perisitua i le Ekalesia.

O le valaauga muamua o nei valaauga na oo mai a o avea au ma se tiakono. Sa matou auai ma lo’u aiga i le paranesi a le Ekalesia i Frankfurt, Siamani. Sa faamanuiaina i matou i le tele o tagata lelei i la matou paranesi laitiiti. O le tasi o o matou peresitene o le paranesi, o Uso Landschulz. Ou te matua faamemelo ia te ia, e ui sa foliga mai i taimi uma e pāū, e le faasamasamanoa, ma o le tele o taimi e suti paauli ai lava o ia. Ou te manatua a o avea au ma se alii talavou matou te talasua ai lava ma au uo i le pasiā o sitaili a lo matou peresitene o le paranesi.

E oso ai lava lo’u fia ata i le taimi nei aua e matua mafai lava e le autalavou a le Ekalesia i le taimi nei ona vaai mai ia te au i se ala foi faapena.

I se tasi Aso Sa, sa fai mai ai Peresitene Landschulz pe mafai ona ma talanoa.

O lo’u manatu muamua lava, “Pe o le a sa’u mea ua sese?” Sa vave ona ou mafaufau solo i le tele o mea sa ou faia na mafai ai ona musuia lea talanoaga a le peresitene o le paranesi ma se tiakono.

Sa valaaulia au e Peresitene Landschulz i se tamai potu aoga—sa leai se ofisa o le peresitene o le paranesi i lo matou falesa—ma o iina sa ia tuu mai ai se valaauga ia te au e avea o se peresitene o le korama a tiakono.

“O se tofiga taua lenei,” sa ia fai mai ai, ona ia faaalu lea o lona taimi e faamatala mai ai le mafuaaga. Sa ia faamatala mai le mea sa la faamoemoeina ma le Alii mai ia te au ma le auala o le a ou maua ai le fesoasoani.

Ou te le manatuaina le tele o mea sa ia fai mai ai, ae ou te manatua lelei o’u lagona. Sa faatumulia lo’u loto i se Agaga e paia ma faalelagi a o ia saunoa mai. Sa mafai ona ou lagonaina o le Ekalesia lenei a le Faaola. Ma sa ou lagonaina o le valaauga ua ia tuu mai sa musuia e le Agaga Paia. Na ou manatuaina lo’u savali mai i fafo o lena tamai potu a’oga ma le lagona ua fai si ou umī atu nai lo le taimi muamua.

Ua toetoe atoa le 60 tausaga talu mai lena aso, ma ou te faapelepele pea i nei lagona o le faatuatuaina ma le alofa.

A o toe mafaufau i tua i lenei aafiaga, sa ou taumafai ai e manatua pe toafia ni tiakono na i ai i le matou paranesi i lena taimi. I lo’u manatua lelei ai, ou te talitonu e toalua. Peitai, pei lava ua ou matua faatelea lena mea.

Ae e le i afaina tele ia te au pe sa toatasi le tiakono pe sefululua, sa ou lagona le faamamaluina, ma sa ou manao e auauna i le mea e gata ai lo’u tomai ne’i le fiafia lo’u peresitene o le paranesi po o le Alii.

Ua ou iloa nei sa mafai lava ona tau ina tuu mai e le peresitene o le paranesi le valaauga e aunoa ma se mafaufau tele i ai ina ua ia valaauina au i lenei tofiga. Sa mafai lava ona tau ina ia ta’u mai ia te au i le alasavali po o le taimi o a matou sauniga perisitua o au o le peresitene fou o le korama a tiakono.

Ae, sa ia faaaluina le taimi faatasi ma au ma fesoasoani mai ia te au ia ou malamalama e le gata i le o le a o lo’u tofiga ma le tiutetauave fou ae, o le mea e aupito sili ona taua, o le aisea.

O se mea lena o le a le galo lava ia te au.

O le uiga o lenei tala e le na ona faamatala mai o le auala e tuu atu ai valaauga i le Ekalesia (e ui o se faataitaiga matagofie lea ia te au i le ala talafeagai e fai ai). O se lesona lenei i le mana faaosofia o le taitaiga faaleperisitua lea e fagua ai le agaga ma musuia ai ni faatinoga.

E manaomia ona faamanatu mai pea ia i tatou ia mafuaaga e faavavau o i tua atu o mea ua poloaiina i tatou e fai. O mataupu faavae autu o le talalelei e manaomia ona lalagaina i o tatou olaga, e tusa lava pe o lona uiga o le aoaoina pea lava pea. E le faapea la o lenei faagasologa e tatau ona fai ai pea lava, e oo foi ina pasiā. Ae, pe a tatou aoao atu uluai mataupu faavae i o tatou aiga po o i le lotu, ia avea le sulu o le naunautai e ola i le talalelei ma le afi o le molimau e aumai ai le malamalama, mafanafana, ma le olioli i loto o i latou tatou te aoaoina.

Mai le tiakono fou faatoa faauuina i le faitaulaga sili aupito sinia, ua tofu i tatou ma ni lisi o mea e mafai ma e tatau ona tatou faia i o tatou tiutetauave faaleperisitua. E taua le o le a i la tatou galuega, ma e manaomia ona tatou faatinoina. Ae o totonu o le aisea o auaunaga faaleperisitua tatou te iloa ai le afi, naunautaiga, ma le mana o le perisitua.

O le o le a o le auaunaga faaleperisitua ua aoao ai i tatou po o le a le mea e fai. O le aisea e musuiaina o tatou agaga.

O le o le a e ta’u maia, ae o le aisea e liuaina.

O Le Anoanoai o Mea “Lelei” e Fai

O le isi valaauga faaleperisitua sa ou mafaufau ai lava na ou maua i le tele o tausaga mulimuli ane ina ua fai lo’u lava aiga. Sa matou toe foi atu i Frankfurt, Siamani, ma faatoa ou maua lava se siitaga i le galuega lea sa manaomia ai se tele o lo’u taimi ma le gauai i ai. I le vaitaimi pisi lea o lo’u olaga, sa tuu mai ai e Elder Joseph B. Wirthlin se valaauga ia te au e avea o se peresitene o le siteki.

I le taimi na ia faatalanoaina ai au, sa tele ni manatu na fetuleni mai i lo’u mafaufau, ae le gata i lea o le popole ma le atuatuvale ina nei le maua so’u taimi e pei ona manaomia ai e lenei valaauga. E ui sa ou lagona le faamaulalo ma le faamamaluina e le valaauga, ae sa tau mafaufau pe mafai ona ou taliaina. Ae sa na o sina mafaufauga puupuu aua sa ou iloa na valaauina e le Atua ia Elder Wirthlin ma o loo ia faia le galuega a le Alii. O le a se mea e mafai ona ou faia nai lo le taliaina?

E i ai taimi e ao ona tatou faia ai ni mea i le faatuatua e aunoa ma le iloaina o taunuuga, ma le talitonuga o le a tuu mai e le Atua ni tali ma taitaiga pe a tatou faia i le faatuatua. Ma o lea sa ou taliaina ai ma le fiafia, i le iloaina o le a saunia mea uma e le Atua.

I le popofou o lenei tofiga, sa faamanuiaina ai matou o se siteki e maua ni aoaoga mai nisi o faiaoga silisili ma taitai i le Ekalesia—o tamalii e pei o Elder Russell M. Nelson ma Peresitene Thomas S. Monson na malaga mai i le matou eria. O a latou aoaoga sa pei o le sau mai le lagi ma se uunaiga mo i matou. O loo ia te au pea ni faamatalaga sa tusitusi i taimi o nei aoaoga. Na tuu mai e nei Usoga ia i matou le vaaiga mamao o le uiga ia faamautuina le malo o le Atua e ala i le fausiaina o molimau patino ma faamalolosia aiga. Sa latou fesoasoani mai ia i matou ia iloa le auala e faaaoga ai ia upumoni ma mataupu faavae o le talalelei i o matou tulaga patino mo o matou taimi patino. I se isi faamatalaga, sa fesoasoani mai ia taitai musuia ia i matou ia iloaina le aisea o le talalelei, ma sa tatau ai ona afe i luga lima o o matou ofu ma ō loa e galulue.

E le i leva ae matou iloaina sa tele mea na mafai e se au peresitene o le siteki ona fai—o le mea moni, sa tele naua pe ana fai matou te le i faatutuina ni mea faamuamua musuia, semanu e ono misi ia i matou ia mea taua. O le faamaeaina o mea faamuamua na amata ona manu a’e, na aveesea ai lo matou tulimatai atu i le vaaiga mamao na faasoa mai e le Usoga. Sa tele mea “lelei” e fai, ae e le o na mea uma sa sili ona taua.

Sa matou aoaoina se lesona taua: o le mea moni faapea ua lelei se mea, e le lava lena mafuaaga e manaomia ai o tatou taimi ma punaoa. O a tatou gaoioiga, galuega fuafuaina, ma fuafuaga e tatau ona musuia ma mauaa i le aisea o la tatou auaunaga faaleperisitua ae le o soo se faiga feilafi po o mea o loo fiafia i ai i lena taimi. A leai, e mafai ona faalavelave na mea i a tatou taumafaiga, faavaivaia lo tatou malosi, ma noatia ai tatou i a tatou lava mea e fiafia i ai, faaleagaga pe faaletino, ia e le o i ai i le totonugalemu o le avea ai ma soo.

Uso e ua tatou iloa uma e manaomia le loto pulea e tumau ai le taulai i mea o loo i ai le mana silisili e faateleina ai lo tatou alolofa mo le Atua ma uso a tagata, faaolaolaina o faaipoipoga, faamalolosia o aiga, ma le fausiaina o le malo o le Atua. E pei lava o se laau fua e anoanoai ni lala ma lau laau, e faapena foi ona manaomia e o tatou olaga ona teuina soo ia mautinoa ai tatou te faaaogaina lo tatou malosi ma le taimi e ausia ai lo tatou faamoemoega moni—ina ia “fua mai i ni fua lelei”!1

E Le o Tuua Na o Oe

E faapefea la ona tatou iloa le mea e filifili? Ua tofu i tatou ma le tiutetauave e fuafua ai lenei mea mo i tatou lava. Peitai, ua poloaiina i tatou ia suesue ma le maelega i tusitusiga paia, gauai atu i upu a perofeta, ma ia faia o se mataupu o tatalo anoa ma le tuuto e faatumulia i le faatuatua.

Uso e, e faamaoni lava le Atua. E ala mai i le Agaga Paia, o le a Ia fetalai mai ai i o tatou mafaufau ma loto e faatatau i le ala e tatau ona tatou mulimuli ai i vaega taitasi o o tatou olaga.

A mama o tatou loto—afai tatou te le saili so tatou lava mamalu ae o le mamalu o le Atua Silisili ese, a tatou saili e fai Lona finagalo, a tatou mananao e faamanuia ia olaga o o tatou aiga ma uso a tagata—o le a le tuua lava e savavali na o i tatou. E pei ona faamanatu mai pea e Peresitene Monson ia i tatou, “Pe a tatou i ai i le galuega a le Alii, ua tatou agavaa mo le fesoasoaniga a le Alii.”2

O lo outou Tama Faalelagi “o le a … alu muamua atu i o outou luma. O le a i ai [o Ia] i lo outou lima taumatau ma lo outou agavale, o le a i ai [Lona] Agaga i o outou loto, ma si’o faataamilo outou e [Ana] agelu e sapasapai outou i luga.”3

O Le Mana o le Faia

Ou uso pele, o faamanuiaga faalelagi mo auaunaga faaleperisitua e faagaoioia e a tatou taumafaiga maelega, lo tatou naunautaiga e ositaulaga, ma lo tatou manao e fai le mea sa’o. Ia avea i tatou ma e e galulue ae ia le tau faamalosia. E lelei le tala’i atu, ae o lauga e le tata’i atu ai i ni faatinoga e pei lava o ni afi e aunoa ma se vevela po o se vai e le faamalieina ai le galala.

O le ola ai i aoaoga faavae e mumu tele ai le afi faamama o le talalelei ma mumusaesae ai o tatou agaga i le mana o le perisitua.

O Thomas Edison, le tagata lea na uluai faia le moli sesega i le lalolagi, sa fai mai “o le taua o se manatu e faalagolago lea i lona faaaogaina.”4 I se ala talitutusa lava, e sili ona taua tele atu aoaoga faavae o le talalelei pe a faaaogaina.

E le tatau ona tatou faatagaina ia aoaoga faavae o le perisitua e taatitia ma le le aoga i o tatou loto, ma lē faaaogaina i o tatou olaga. Afai o loo i ai se faaipoipoga po o se aiga o loo manaomia ona laveai—atonu o i tatou lava—aua nei o tatou faatalitali ma vaavaai. Ae, ia tatou faafetai atu i le Atua mo le fuafuaga o le fiafia lea e aofia ai le faatuatua, salamo, faamagaloga, ma amataga fou. O le faaaogaina o aoaoga faavae o le perisitua o le a agavaa ai i tatou e avea o ni tane, o ni tamā, ma ni atalii o e e malamalama i le aisea o le perisitua ma lona mana e toe tapue ai ma malupuipuia le matagofie ma le paia o aiga e faavavau.

E masani lava o konafesi aoao o se taimi lelei lea mo le faalogo ma fai. O le mea lea ia avea i tatou “ma ē anaana i le upu, a e aua le na ona faalogologo i ai.”5 Uso e, ou te valaaulia outou ia mafaufau i upu na tautalagia e auauna a le Atua i le faaiuga o lenei vaiaso. Ona e alu ifo lea i ou tulivae. Ole atu i le Atua, lo tatou Tama Faalelagi, e faamalamalama lou mafaufau ma pa’i atu i lou loto. Aioi atu i le Atua mo le taitaiga i o outou olaga i aso taitasi ma i o outou tiutetauave faale-Ekalesia, ma o outou luitau patino i lenei taimi. Mulimuli i uunaiga a le Agaga—aua le faatuai. A e faia nei mea uma, ou te folafola atu o le a le tuua oe e le Alii e te savali na o oe.

Faaauau i le Onosai

Ua tatou iloa e tusa lava pe o a o tatou faamoemoega, e le agai pea mea e tusa ai ma a tatou fuafuaga. Tatou te faia mea sese i le olaga ma i a tatou auaunaga faaleperisitua. Mai lea taimi i lea taimi tatou te tautevateva ai ma lē taunuu.

Ina ua apoapoai mai le Alii ia i tatou ia “faaauau pea i le onosai seia faaatoatoaina i [tatou],”6 o loo Ia faailoa mai e umi se taimi e alu ai, atoa foi ma le faapalepale. O le malamalama i le aisea o le talalelei ma le aisea o le perisitua o le a fesoasoani ai ia i tatou ia iloa le faamoemoega paia o nei mea uma. O le a tatou maua ai le uunaiga ma le malosi e fai ai mea sa’o, e tusa lava pe faigata. O le faatumauina o le taulai atu i mataupu faavae autu o le ola ai i le talalelei o le a faamanuiaina ai i tatou i le alofa mama, poto, ma le taitaiga.

“Pe tatou te le ō atu pea ea i lenei galuega sili?”7 Ioe, uso e, o le a tatou o atu pea!

E ala i le taialaina e le Agaga Paia, o le a tatou aoao mai a tatou mea sese. Afai tatou te faia ni mea sese, o le a tatou agai pea i luma. Afai tatou te vaivai, o le a tatou o pea. O le a tatou le faalotolotolua lava; o le a tatou le fiu.

I le avea ai ma se usoga o le perisitua e faavavau a le Atua, o le a tatou tutu faatasi, soosootauau, ma taulai atu i mataupu faavae o le talalelei toefuataiina a Iesu Keriso ma auauna atu ma le lotofaafetai i lo tatou Atua ma uso a tagata i le tuuto ma le alofa.

O Loo Soifua le Atua!

Ou uso pele, ou te molimau atu ia te outou i lenei aso o loo soifua le Atua le Tama ma Lona Alo, o Iesu Keriso. E moni lava i La’ua! O loo i ai i La’ua iina!

E le o tuua na o outou. E popole lo outou Tama o i le Lagi ia te outou ma finagalo e faamanuia ma faatumau outou i le amiotonu.

Ia mautinoa o loo fetalai mai le Atua i tagata i o tatou aso. O le a Ia fetalai atu ia te oe!

Sa vaai le Perofeta o Iosefa Samita i mea na ia saunoa na vaai i ai. Ua toefuatai mai le Ekalesia a Iesu Keriso o le Au Paia o Aso e Gata Ai i le lalolagi e ala i le mana ma le pule a le Atua Silisili ese.

O la’u tatalo i le avea ai ma ē umiaina Lana perisitua, o le a tatou galulue faatasi i le aisea o le auaunaga faaleperisitua ma faaaoga ia mataupu faavae o le talalelei toefuataiina e liua ai o tatou olaga ma olaga o i latou o loo tatou auauna i ai.

A tatou faia lea mea, o le a faapaiaina, faamamaina, ma faaleleia e le mana lemafuatiaina o le Togiola o tatou agaga ma uiga seia oo ina avea i tatou ma tagata e ao ona avea ai i tatou. Ou te molimau atu ai i nei mea i le suafa paia o Iesu Keriso, amene.