Pe Na Aoga?

I le aluga o lenei konafesi ma isi fonotaga talu ai nei,¹ sa toatele i tatou sa tau mafaufau, pe o le a se mea e mafai ona ou faia e fesoasoani ai e fausia le Ekalesia a le Alii ma vaai i le tuputupu a’e moni i le mea o loo ou ola ai?

I lenei taumafaiga ma isi taumafaiga aupito taua, o la tatou galuega aupito taua e i ai pea lea i taimi uma i totonu o o tatou lava fale ma aiga.² O totonu lava o tatou aiga lea ua faavaeina ai le Ekalesia ma o loo tupu ai le tuputupu ae moni.³ E tatau ona tatou aoaoina a tatou fanau i aoaoga ma mataupu faavae o le talalelei. E manaomia lo tatou fesoasoani ina ia latou maua le faatuatua ia Iesu Keriso ma saunia i latou mo le papatisoga pe a valu o latou tausaga.⁴ E tatau ona tatou faamaoni ia i tatou lava ina ia mafai ona latou iloa a tatou faataitaiga o le alofa mo le Alii ma Lana Ekalesia. O le a fesoasoani lenei mea i a tatou fanau ina ia lagona le fiafia i le tausiga o poloaiga, fiafia i totonu o aiga, ma auauna atu ma le agaga faafetai i isi. I totonu o o tatou aiga, e tatau ona tatou mulimuli i le mamanu sa tuuina mai e Nifae ina ua faapea mai:

“Ua matou galulue maelega … e faatauanau atu ai ia matou fanau … ia talitonu ia Keriso, ma ia faalelei ma le Atua. …

“… Ua matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo e uiga ia Keriso, ma ua matou tusitusi foi e tusa ma a matou valoaga, ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala.”⁵

Ua tatou galulue ma le maelega ina ia aumaia nei faamanuiaga ia tatou fanau e ala i lo tatou auai faatasi ma i latou i le lotu, faia o afiafi faaleaiga, ma le faitauina faatasi o tusitusiga paia. E faia a tatou tatalo faaleaiga i aso uma, talia valaauga, asiasi i e mama’i ma ua tuua toatasi, ma faia nisi mea e ta’u atu ai i a tatou fanau tatou te alolofa ia i latou ma e tatou te alolofa i lo tatou Tama Faalelagi, o Lona Alo, ma le La Ekalesia.

Ua tatou talatalanoa ma vavalo atu e uiga ia Keriso pe a tatou tuuina atu se lesona i le afiafi faaleaiga pe saofafai faatasi ma se tamaitiiti ma ta’u atu i ai lou alofa mo ia ma lau molimau e uiga i le talalelei toefuataiina.

Ua mafai ona tatou tusi atu e uiga ia Keriso e ala i le tusiina o ni tusi ia i latou ua o ese atu. O le a faamanuiaina uma faifeautalai o loo faamisiona, atalii ma afafine o i le militeli, ma i latou tatou te alolofa i ai i tusi tatou te tusiina. O tusi mai le aiga e le na o ni imeli faatotope. O tusi moni o le a tuuina atu ai se mea moni e mafai ona taofia, mafaufau i ai, ma faapelepele i ai.

Tatou te fesoasoani atu ia tatou fanau ina ia faalagolago i le Togiola a le Faaola ma ia iloa le faamagaloga a le Tama Faalelagi e ala i le faaalia o le alofa ma le faamagaloga i o tatou foi tulaga faamatua. O lo tatou alofa ma le faamagaloga e le gata o le a aumaia faalatalata ai a tatou fanau ia i tatou ae o le a fausia ai lo latou faatuatua i le iloaina e alofa lo latou Tama Faalelagi ia i latou ma o le a Ia faamagaloina i latou pe a latou taumafai ia salamo ma faia le mea sili ma ia lelei atili. O le a latou faalagolago i lenei upumoni aua ua latou maua ni aafiaga o lenei lava mea mai o latou matua faalelalolagi.

O le faaopoopo atu i le galuega o le a tatou faia i totonu o o tatou lava aiga, lea sa aoao mai ai Nifae faapea “matou te galulue maelega e … faatauanau atu ai ia matou fanau … uso foi, ia talitonu ia Keriso, ma ia faalelei ma le Atua.”⁶ I le avea ai ma se tagata o Le Ekalesia a Iesu Keriso o le Au Paia o Aso e Gata Ai, ua tofu i tatou ma se faamanuiaga ma se tiutetauave o le faasoa atu o le talalelei. O nisi o i latou o e manaomia le talalelei i o latou olaga e lei avea ma ni tagata o le Ekalesia. O nisi sa tatou i ai faatasi muamua ae ua mananao e toe lagonaina lena fiafia sa latou mauaina ao latou taliaina le talalelei i se taimi ua mavae atu o o latou olaga. E alofa le Alii i tagata uma o e lei mauaina le talalelei faapea foi ma le tagata o loo ua toe foi mai ia te Ia.⁷ E leai se afaina ia te Ia faapea foi ma i tatou. O le galuega lava e tasi. E taua agaga, po o a lava o latou tulaga, e taua lena mea i lo tatou Tama Faalelagi, Lona Alo, faapea ma i tatou.⁸ O le galuega a lo tatou Tama Faalelagi ma Lona Alo o le “aumaia o le tino ola pea ma le ola faavavau”⁹ o Ana fanau uma, e tusa lava po o a o latou tulaga o i ai nei. O lo tatou faamanuiaga o le fesoasoani lea i lenei galuega maoae.

Sa faamalamalama mai e Peresitene Thomas S. Monson le auala e mafai ai ona tatou fesoasoani atu: “O o tatou aafiaga faafaifeautalai e tatau lava ona faafou. E le lava le na o le nonofo ma mafaufau i aafiaga ua mavae atu. Ina ia lagonaina le faatumauina, e tatau lava ona faaauau pea ona faasoa atu le talalelei i le auala moni ma le auala masani.”¹⁰

O le galuega o le faasoa atu o le talalelei i le auala moni ma le auala masani ma i latou tatou te popole ma alolofa i ai o le a avea ma se galuega ma le fiafiaga o o tatou olaga. Sei ou faamatalaina atu ia te outou ni aafiaga faapea se lua.

Sa ola ae Dave Orchard i le Aai o Sate Leki, ma o le toatele o ana uo o ni tagata o le Ekalesia. Sa avea i latou ma ni faatosinaga lelei ia te ia. E le gata i lea, ae sa valaaulia soo o ia i gaoioiga e taitai o le Ekalesia i lo latou nuu. Sa valaaulia foi o ia e ana uo. E ui lava e lei auai o ia i le Ekalesia i lena taimi, ae sa faamanuiaina lona olaga tuputupu ae e ala i faatosinaga a ni uo lelei a le AAG faatasi ai ma ni gaoioiga na lagolagoina e le Ekalesia. Ina ua mavae lona ulufale atu i le kolisi, sa ia siitia ese atu mai lona aiga, ma o le toatele o ana uo sa o e faamisiona. Sa ia misia a latou faatosinaga i lona olaga.

O se tasi o uo a Dave mai le aoga maualuga sa i ai lava i le fale. Sa feiloai lenei uo i vaiaso uma ma lona epikopo i se taumafaiga e toe faatulaga lona olaga ina ia mafai ona ave se misiona. Sa la potu faatasi ma Dave, ma e pei o se tulaga moni ma le masani ai, sa la talanoa i le mafuaaga e le i alu ai sana misiona ma le mafuaaga o loo la talanoa soo ai ma le epikopo. Sa faaalia e lenei uo lona agaga faafetai ma le faaaloalo i lona epikopo ma le avanoa e salamo ai ma auauna atu ai. Ona ia fesili lea ia Dave pe fia sau la te o i le isi faatalanoaga. Oka se valaaulia! Peitai i le talaaga o le la faigauo ma tulaga o i ai, sa avea o se mea moni ma masani ai.

Sa ioe Dave ma amata ai foi ona la feiloai ma le epikopo. Na oo atu lenei mea i le filifiliga a Dave e feiloai i faifeautalai. Sa ia maua se molimau i le moni o le talalelei, ma faatulaga ai loa se aso mo lona papatisoga. Sa papatisoina Dave e lona epikopo, ma o le tausaga na sosoo ai, sa faaipoipo ai Dave Orchard ma Katerina Evans i le malumalu. E toalima le la fanau aulelei. O Katerina o lo’u tuafafine laitiiti lea. Ou te faafetai pea ai lava i lenei uo lelei faapea, ma se epikopo lelei, lea sa aumaia Dave i totonu o le Ekalesia.

Ao talanoa Dave e uiga i lona liua ma tuuina atu lana molimau e uiga i nei mea sa tutupu, sa ia fesili mai ai, “Pe na aoga? Pe na aoga taumafaiga uma a uo ma taitai o le autalavou faapea ma lou epikopo, i aluga o tausaga, ina ia papatiso ai le na o le toatasi o se alii?” Sa tusi lona lima ia Katerina ma lana fanau e toalima ma fai mai, “Mo lo’u toalua lava ia ma le ma fanau e toalima, o le tali o le ioe.”

Soo se taimi lava e faasoa atu ai le talalelei, e le “na o le toatasi o se alii.” Soo se taimi lava e tupu ai se liua po o se tasi ua toe foi mai i le Alii, o se aiga lea ua faasaoina. Ina ua matutua le fanau a Dave ma Katerina, sa latou taliaina uma le talalelei. E toatasi le la tama teine ma ni tama se toalua ua maea misiona ma e toatasi lea faatoa maua mai lona valaauga e faamisiona i le Misiona a Alpine e Tautala-Faasiamani. Ua uma ona faaipoipo i le malumalu le au matutua e toalua, ma o le uii o loo aoga i le taimi nei i le aoga maualuga, ma o loo faamaoni i soo se itu. Pe na aoga? Ioe, sa matuai aoga lava.

Sa auai Sister Eileen Waite i le konafesi faalesiteki lea sa lauga ai Dave Orchard e uiga i lona liua. O le taimi o le konafesi atoa, na pau lava le mea sa ia mafaufau i ai o lona lava aiga aemaise lava lona uso o, Michelle, lea ua leva ona alu ese mai le Lotu. Ua tatala le faaipoipoga a Michelle ma o loo taumafai e tausi lana fanau e toafa. Sa lagona e Eileen le lofituina e auina atu ia [Michelle] se kopi o le tusi a Elder M. Russell Ballard O La Tatou Sailiga mo le Fiafia, faatasi ai ma lana molimau, lea sa na ia faia. O le vaiaso lava lea na sosoo ai sa ta’u atu ai e se uo ia Eileen lona lagona e tatau ona ia faafesootai atu ia Michelle. Sa tusi atu lenei uo ia Michelle, faasoa atu lana molimau ma faaali atu lona alofa ia te ia. E a, e ese le matagofie o le auala e masani ona galue ai le Agaga i le toatele o tagata ina ia fesoasoani atu i se tasi o manaomia le fesoasoani?

Ua mavae na taimi. Sa valaau atu Michelle ia Eileen ma faafetai atu mo le tusi. Fai mai a ia ua amata ona ia iloaina le leai o se tulaga faaleagaga i lona olaga. Sa ta’u atu e Eileen ia te ia e na te mautinoa lava o le a na ia mauaina le toafilemu lea o loo ia sailia i totonu o le talalelei. Sa ia ta’u atu lona alofa ia te ia ma e manao ina ia fiafia. Na amata ona faia e Michelle ni suiga i lona olaga. E lei leva ae ia feiloai atu i se alii lelei e malosi i le Ekalesia. Sa la faaipoipo ma i le tausaga na sosoo ai sa faamauina i laua i le Malumalu o Ogden Iuta. Talu ai nei lava, sa papatiso ai lana tama tama e 24 tausaga.

Mo isi o le aiga o Michelle, ma isi uma e lei iloa e moni lenei Ekalesia, ou te valaaulia outou ina ia manatunatu ma le agaga tatalo pe moni le Ekalesia. Faataga lo outou aiga ma uo ma faifeautalai e fesoasoani atu. A outou iloa e moni, o mai tatou auai faatasi e ala i le laasia o lena lava sitepu o le olaga.

E lei tusia le faaiuga o lenei tala, peitai o faamanuiaga ua uma ona tuuina atu i lenei tamaitai matagofie faatasi ai ma lona aiga ona o i latou e alolofa ia te ia ma sa latou faatinoina se uunaiga i se tulaga moni ma e masani ai ma faasoa atu a latou molimau ma valaaulia o ia e toe foi mai.

Sa ou mafaufau tele i nei aafiaga e lua. O se alii talavou se toatasi o le sa galue e toe faatulaga lona lava olaga ae sa ia fesoasoani atu i se isi alii talavou o le sa sailia le upumoni. O se isi tamaitai sa ia faasoa atu lana molimau ma lona faatuatua i lona uso ua 20 tausaga talu ona alu ese mai le Ekalesia. Afai o le a tatou tatalo ma aioi atu i le Tama Faalelagi po o ai e mafai ona tatou fesoasoani i ai ma folafola atu e faatino ni musumusuga ua Ia tuuina mai ia i tatou ma ta’u mai ia i tatou pe faapefea ona tatou fesoasoani atu, o le a Ia taliina a tatou tatalo ma o le a avea i tatou ma meafaigaluega i Ona aao e faia Lana galuega. O le faatinoina o le alofa e ala i musumusuga na tuuina mai e le Agaga ua avea o se mafuaaga o se suiga tele.¹¹

A o outou faafofoga mai i nei aafiaga o le tulaga moni ma masani ai o le faasoa atu o le talalelei ia i latou tou te alolofa i ai, o le toatele foi o o outou na maua foi se aafiaga e pei ona maua e Eileen Waite. Mafaufau i se tagata sa tatau ona e aapa atu i ai ma le valaaulia e toe foi mai pe faasoa atu ia te ia ou lagona e uiga i le talalelei a Iesu Keriso. O la’u valaaulia o le faatino lea, e aunoa ma se faatali, o na musumusuga. Talanoa i lau uo po o se tagata o le aiga. Fai i se auala moni ma e masani ai. Faaali atu ia i latou lou alofa ia i latou faapea ma le Alii. E mafai ona fesoasoani faifeautalai. O la’u fautuaga e tutusa lelei lava ma Peresitene Monson lea na ia tuuina atu i le tele o taimi mai lenei lava pulelaa: “Aua nei tolopoina se uunaiga.”¹² Pe a outou faatinoina se uunaiga ma faia i le alofa, matau a o faaaogaina e lo tatou Tama Faalelagi lou naunautaiga ia galue e faia se vavega i lou olaga faapea ma olaga o tagata e te alofa i ai.¹³

Ou uso e ma tuafafine pele, e mafai ona tatou fausia Lana Ekalesia ma tagai i le tuputupu ae moni a o tatou galulue i le aumaia o faamanuiaga o le talalelei i o tatou aiga ma i latou tatou te alolofa i ai. O le galuega lenei a lo tatou Tama Faalelagi ma Lona Alo. Ou te iloa o loo soifua i Laua ma e tali mai a tatou tatalo. Afai tatou te galulue i na uunaiga, ma faatuatua i lo Laua tulaga gafatia e faia ai se vavega, o le a tutupu ni vavega ma o le a suia olaga. I le suafa o Iesu Keriso, amene.