Diak el Mesaod el Sengk er a Dios

Mla er a Elder Craig  C. Christensen

Ngara Omerreder er a Seventy


A Chedaol Reng a oreor el dmak el cherrrungel lobengkel a Chedam er a Babeluades me a Jesus Kristo, el meruul a ikel betok e meklou a belkul el ureor me a ileakl el ngerachel.

Sera 1994, a President Howard  W. Hunter a milengemdaol er a rokui el chad er a Ikelesia el mo “omuchel el nguu a templo … mel kot el ungil lolangch er a klechelid er tir.”1 A urirul er a osisu el rak, ea omekedecherur a Templo er a Bountiful Utah a mlo merek. A rebetok el di uai kemam, a mle semeriar el ngoititerir a ngeask el telungalek er kemam el mo oldingel er a chelsel er a uchei er a le chedolii. Aki mle meringel mengetmokel er a rengelekam el mo soiseb er a chelsel a templo, e meluluuch me bo el lolechesuar er a Chedoal Reng me luchul me a templo bo el klou a belkul er a chelsel a klengar er tir.

Ma ki morael el ngara omenguul er a chelsel a templo, e ngak a miltik er ngak el chemat er a tial meang el okedecherul tial blai, el kmal mle ungil meruul, me a dichel a sils el melidiich el me tmuu er a meklou el mado, me a dirrek el mengas a reng el sunga el telcherakl. A rokui el telengtengil tial chedaol blai a meral mle klebokel.

Ma ki msisb er a delmerab er a celestial, ak mlo medengelii ngika el ngelekek el sechal, elolem a rekil Ben, a ulurekd er a ochik. Ngika mle bekikt—e locha mle simbai.

“Ngera telemall, e Rungalek?” ak mlengululau er ngii.

“Papa,” eng milkoi, “Ngera ngar ngii er tiang? Ng dirkak a tang me kumelchesiu el uaisei.”

Ak mlo medengeii el kmo tia ketengel a ngelekek el sechal el mo melchesuar er a mesisiich el klisichel a Chedaol Reng, e ak mocha outubuach el obengkel. Me a rechad a merael meliuekl er kemam, ea Ben me a ngak a chiloit a sesel bung, el kaiuekeed, el mesuub el teru el kirel a Chedaol Reng. Ak mle mechas a renguk leng mle beot er kemam el mesaod er tia el ongasireng el lolechesuar er ngii. Ma ki mchadecheduch, ng mlo bleketakel el kmo sel kmal mle ongasireng el mora Ben a diak el ngerang milsang e bai ngerang milechesuar—diak el ikel sebeched el mes el klebokel e bai sel chelelakl, e kekerei el ngor er a Chedaol Reng el mla er a chelsel a rengul. Ak kuluchais er ngii a ak mblak suub er a kuk klengar er ngak, el luldimukel a teletelel el mla meskak a beches el urungulek el kirel a omereng el saul er tial diak el mesaod el sengk er a Dios—sengk er a Chedaol Reng. 2

Ng Techa a Chedaol Reng?

A Chedaol Reng a ongedei el chedal a Kledios, me a leuaisei, eng uaia Dios el Chedam me a Jesus Kristo, el Ngii a medengei a uldesued me a urungulel a rengud. 3 A Chedaol Reng a betik a rengul er kid e soal kid a bol deu a rengud. Leng medengei a ongarm el kid a mo chemau, Ngii a sebechel el omekrael e olsisechakl er kid a rokui el tekoi el kired el meruul el mo uchul e kede lmuut el mo kiei lobengkel a Chedam er a Babeluades. 4

Ng diak el uaia Chedam er a Babeluades me a Jesus Kristo, el tir a ngar er ngii a meang el bedengir er a tech me a chiuis, ea Chedaol Reng a reng el mengedecheduch el mo er a reng er kid lokiu a dolchesuar ma ikel tekoi el mei er a uldesued. 5 Le ngii el reng, e ngar er ngii a tokubets el urelel el uaia le donguu me a uchul a chad a ngmai a ocholt. Ngara chedaol llechukl, ea Chedaol Reng a blechoel lomekedong er ngii el kmo ng Reng er a Rubak, Chedaol Reng ra Telbiil, me a lechub eng Reng. 6

Ngera Urerel a Chedaol Reng?

A Chedaol Reng a oureor el dmak el cherrrungel lobengkel a Chedam er a Babeluades me a Jesus Kristo, el meruul a ikel betok e meklou a belkul el ureor me a ileakl el ngerachel.. A kmal ngerchelel a Chedaol Reng a ochotii a sioning er a Dios el Chedam me a Ngelekel, Jesus Kristo,7 e dirrek el mo olsisechakl er kid a klemerang er a rokui el tekoi. 8 A merang el sioning el mla er a Chedaol Reng a ochotii a lmuut el kmal mesisiich el sioning el diak debetik er ngii er ker. A President Joseph Fielding Smith a ulsisechakl el kmo “a Reng er a Dios el mengedecheduch el mora reng er a chad a ngar er ngii a klisichel el ocholt a klemerang el kmal bedochel e mo ungil medengei a klemerang el medung lokiu a chad ma lechub eng chad el mlodurch er a babeluades el mei.”9

A tara ngklel a Chedaol Reng a Mengelaod.10 Chelsel a taem er a ringel me a uldikel ma lechub a kuk sel kired el mo medengei el kmo a Dios a kmeed, ea Chedaol Reng a sebechel smisiich a reng er kid, meskid a ungil omelatk e dirrek el olsisechakl er kid “a tekoi er a budech er a renged,”11 el lolengeseu er kid el mo melchesuar er a “ budech er a Dios, el ngii chengelakl er a rokui el klaumedengei. ”12

Ng betok el rak er a memong ea klou el telungalek er ngak a mlo kldibel el kirel a belsoil er a ungil klebesei, ea demak a ulemuchel lousekool a klekool el lobenterir a rengelekir a rengelekel. Ng di mle mereched el keberuul, el ruebet el metilech e di mle mereched el suebek a telil. Tia el bkais chemrungel a mle sebechel kerior, tokubets el mora rengelekir a rengelekel, luchul e te mo omdasu a ker el meringel a donger. Eng di, aki uleker er a rengelekam mei iliuekl er kemam, e moluluuch e menguiu er a tekingel a profet er a Babier er a Mormon el kirel a belkul a klengar, e a Chedaol Reng a milngelaod er a dersta er kemam. A ik el ngii a mle meringel el dosaod loeak a cheldecheduch, a mlo nger el bleketakel er a rengmam. A ki mlo melchesuar a budech er sel sils el mera lengelakl er a klaumedengei er kemam, e a sioning er a Chedaol Reng a mle ulterkokl, diak do mededengei er ngii, e klemerang.

A Chedaol Reng a olisechakl e olecholt. 13Sel dosuub, e melbedebek, e meluluuch er kirel a osisechakl ra ebangkelio, ea Chedaol Reng a mo omekellomes er a uldesued e dirrek el mo okisii a klaumedengei er kir. 14 Ng rulii ma klemerang el losisechakl a meluches er a uldesued me rengud el mo cherechar e dirrek el rulii a klou el ngodech er a chelsel a rengud. Sel douchais a ika el klemerang lobengterir a telungalek er kid, me a rebebil er a chedal a Ikelesia, me a resechelid me a tonari el ngara beluu, e a Chedaol Reng a mo omuchel sensei er tir, le Ngii a cheltekiil er a klemechel a ebangkelio “el mora rengrir a rengelekir a a rechad.” 15

A Chedaol Reng a mukrolid el mo tuobed el mo mesiou er a rebebil. A kuk ngak, e sel bleketakl el lokesiu el mengai sel derengesii a ngerel a Chedaol Reng lokiu omesiou er a rebebil a mengai er a klengar me a osisecheklel a President Thomas S. Monson, el dilung el kmo: “Sel doruul a ikel ngercheled, e ak mla subii el kmo sel derengsii a kekerei el ngor e do tireklii e rulii el diak el meioud, e a Chedam ra Babeluades a mo omekrael a bekesel ochid e mo mekngeltengat a klengar er kid me a klengar ra rebebil. Ng diak ak kudengelii el teletael lmuute el klebokel me a lechuub eng lmuut el meringel chad el bo molchesiu el rongesii e mo tireklii a ngor e mometik el kmo a Dios a ulenger er a nglunguchel a tara chad lokiu kau.”16

Ak mo ouchais er a tara ungil cheldecheduch. Sera President Monson el bishop, ng mlo medengei el kmo a tara chad er award er ngii, el Mary Watson, a ngara osbitar. Sera bo loldingel er ngii, eng mlo medengei el kmo ngii me a rebebil er a resmecher a kiliei er a klou el delmerab. Sera le bocha er a Sister Watson, eng milsang a ta er a smecher el tonari el mle mereched el nguu a bar el dokedekii a btelul.

A uriul er a President Monson er a lomes er a Sister Watson and milsang a priesthood blessing, e ulurkedii a chimal, millemesumech er ngii er a longetmokel er ngii el merael. E a kekerei eng di meang el tekoi a dilubech. Ak mo melekoi a tekingel a ikel President Monson el kirel tial omeruul:

“Ak mlo diak el sebechek el merael mo cheroid er bita er ngii,” ng dilung. “Ng uaia lebla er ngii a chimal a chad el [uaia] le ngara olengchelek, e ak mlo melchesuar er a renguk el lorenges a ikal el tekoi: ‘Bo er sel tara bet el ngar er ngii ngikel kekerei el redil el dilkedii a medal sera bemtuu.’ Mak mlong. …

“Ak mlo dechor er a bita er a dukelel, e mekokak el meleuodeu er a onglengellel e mekokak el kursii tial berul el melnget er a medal. A uisekeang! Ngika, a dirrek, el chad er a ward er ngak. E ngak a dimlak kudengei el kmo ngara osbitar. A ngklel a Kathleen McKee. Me a medemam el kasues, e ngii a longelang e ouchais el kmo, ‘E, Bishop, se er a bemtuu er a chesimer, e ak mlo medengei el kmo a ngluluchek a mlo nger le kemei el me omes e omekngeltengat er ngak. Ng kmal mlo ungil a renguk sel kudengei el kmo ke mle medengei el kmo ak ngar er tiang, e ke merael el mlo er sel tara bet, meng di mlo meualch a renguk, le ak mlo medengei el kmo ng dimlak komei el me omes er ngak.’

“Ak dilu er a [Sister] Mckee: ‘Ng diak a belkul a le dimlak kudengei el kmo ke ngar tiang. Ng klou a belkul, dirrek, el kmo a Chedam ra Babeluades a mle medengei e dirrek el kau a miluluuch el kirel a klengeltengat er a priesthood. Ngii a rirelak me ak mermang el diak kulturk.”17

Ng Mekera a Chedaol Reng a lo Ngedecheduch er kid?

Kid el rokui a mla melchesuar er a Chedaol Reng, e diak de belechoel el metebengii. Sel el ngar ngii a ungil uldasu el mei er a uldesued, e kid a mo medengei el kmo klemerang lokiu a domelchesiu el mla er a chelid el mera rengud. A President Boyd K. Packer a mla olsisechakl: “A Chedaol Reng a mengedecheduch lokiu a ngor el kau a kmal mo melchesuar er a omrengesii. … Sel do lekoi er a ‘mrengesii’ a ngerel a Chedoal Reng, ke de blechoel el mesaod er a ngor el mla er a chelid el melkoi el kmo, ‘Ng ngarngii kulemelchesiu er ngii … ’.”18 Ng okiu a ika el chedaol el domelchesiu el mla er a Chedaol Reng el kid a mo medengei a soal a Dios a deruul, el tia kid, ngelluches era chedaol llechukel el kmo, “ng reng er a ocholt. ”19

Ngera Belkul a mo Nguu a Sengk er a Chedaol Reng?

Sera kulisechakl er a elolem a rekil el ngelekek, er a Ben, eng mle klou a belkul ak kuochotii a klekakerous er a lomelchesuar, el ngii a odbechel Chedaol Reng, me a sel sengk er a Chedaol Reng, el ngii a mo nguu er a uriul er a metecholb. A uchei er a techolb, e a rokui el melemalt e bliochel a rengul el rechad el osiik er a klemerang a sebecherir el mo melchesuar sel klisiich el Chedaol Reng obang er a kakerous el taem. Eng di, a techall el mo nguu a Chedaol Reng meng di merekong el chelmengem e dirrek el mo nguua cherrungel el rokui el telengtengil a klengeltengat adi mo er tirkel remekedung, el mla metecholb e nguu a sengk er a Chedaol Reng lokiu a omor er a chim er tirkel obang a deruchall er a priesthood er a Dios.

Ng ngokiu a sengk er a Chedaol Reng, e kid a ngmai a chachisois el duch me a sengk er a Reng, ng mai a betok el ocholt ma ulekerreu, ulekrael ma omesmechokl, me a dirrek el klengeltengat er a telbiil er a omengedaol me a diak a ulebengelel el klengar er a rengedel a celestial. A ika el rokui el klengeltengat a chomngai lukiu a soal a rengul el mo melai e dirrek el kid a mo ng mai a klengar er kid el mo otireklii sel rengul a Dios e blechoel el osiik er a Ulekerreuil.

Sel kulbedebek er a temek lo bengkel a Ben er a chelsel a Templo er a Bountiful er a Utah, eng kmal betok a ungil kumelchesiu me a uldasu el mei er a uldesuek. A ta er ak debedebekii sera ak ngelomell er a klebokel ues, e a kekerei el ngalk el mle dechor er a bita er ngak a mlo melchesuar er a mesisiich el lomelchesiu el mlo er a rengul. Tia a ulemeklatk, er ngak el mlo rulak el mo chelellakl e mo otubaroach er riou e ak dirrek el mo otireklii a tekingel a Osobel el mo uaia kekerei el ngalek—loba ngariou el reng, delodau, e keltmokel el mo rongesii a chelelakl e kekerei el ngor el mla er a Reng er Ngii.

Ak sioning er a merang el ngar me a chedaol mission er a Chedoal Reng e dirrek le ngoeak a klisichel Chedaol Reng, e kau a mo medengelii a klemerang er a rokui el tekoi. Ak sioning er a Chedaol Reng el meringel el chad e diak el mesaod el sengk er a Chedam er a Babeluades el mora rokui el tir a mei er Ngii el Ngelekel, e mo metecholb el ngara Ngklel, e dirrek el mo nguu a Chedaol Reng lokiu a omengedaol er a Ikelesia er Ngii. Aikang el chedaol el klemerang ak sioning el ngara ngklel a Jesus Kristo, amen.

Show References

  1.  

    1. Howard  W. Hunger, er a Jay   M. Todd, “President Howard   W. Hunger: Fourteenth President of the Church,” Ensign, July 1994, 5; see also Howard W. Hunter, “The Great Symbol of Our Membership,” Tambuli, Nov. 1994, 3; Ensign, Oct. 1994, 2.

  2.  

    2. Mesa Doctrine and Covenants 121:26.

  3.  

    3. Mesa Alma 12:7; 18:16–18; Doctrine and Covenants 6:15–16.

  4.  

    4. Mesa 2 Nephi 32:5.

  5.  

    5. Mesa Doctrine and Covenants 130:22.

  6.  

    6. Mesa Lukas 4:1, 18; 11:13; Johanes 1:33; Efesus 1:13; Mesa Doctrine and Covenants 88:3.

  7.  

    7. Mesa 2 Nephi 31:18; 3 Nephi 28:11; Mesa Doctrine and Covenants 20:27.

  8.  

    8. Mesa Moroni 10:5.

  9.  

    9. Joseph Fielding Smith, Mesa Doctrines of Salvation, comp. Bruce R. McConkie, 3 vols. (1954–56), 1:47–48.

  10.  

    10. Mesa Johnes 14:26; Mesa Doctrine and Covenants 35:19.

  11.  

    11. Mesa Doctrine and Covenants 36:2.

  12.  

    12.  Filipi 4:7.

  13.  

    13. Mesa Lukas 12:12; 1 Korinth 2:13; Mesa Doctrine and Covenants 50:13–22; Teachings of Presidents of the Church: Joseph Smith (2007), 132–33.

  14.  

    14. Mesa Doctrine and Covenants 11:13.

  15.  

    15.  2 Nephi 33:1.

  16.  

    16. Thomas S. Monson, “Peace, Be Still,” Liahona me a Ensign, Nov. 2002, 55.

  17.  

    17. Mesa Thomas  S. Monson, “Christ at Bethesda’s Pool,” Ensign, Nov. 1996, 18–19.

  18.  

    18. Boyd K. Packer, “Personal Revelation: The Gift, the Test, and the Promise,” Liahona, June 1997, 10; Ensign, Nov. 1994, 60.

  19.  

    19.  Mesa Doctrine and Covenants 8:3; mesa el dirrek bades 2.