អំណោយទានជាព្រះវិញ្ញាណបរិសុទ្ធដែលពុំអាចប្រាប់បាន

ដោយអែលឌើរ ក្រេហ្គ ស៊ី គ្រីស្ទីនសិន

នៃគណៈប្រធាននៃពួកចិតសិបនាក់

រូបភាព

ព្រះវិញ្ញាណបរិសុទ្ធធ្វើការសាមគ្គីភាពដ៏ឥតខ្ចោះជាមួយព្រះវរបិតាសួគ៌ និង ព្រះយេស៊ូវគ្រីស្ទ បំពេញនូវតួនាទី និង ការទទួលខុសត្រូវជាក់លាក់សំខាន់ៗជាច្រើន ។

នៅឆ្នាំ 1994 ប្រធាន ហាវើដ ដបុលយូ ហឹនធើរ បានអញ្ជើញសមាជិកសាសនាចក្រទាំងអស់ឲ្យ « សាងសង់ព្រះវិហារបរិសុទ្ធ ... ជានិមិត្តសញ្ញាដ៏អស្ចារ្យនៃសមាជិកភាព [ របស់យើង ] » ។ ¹ ក្រោយមកក្នុងឆ្នាំនោះ ការសាងសង់ព្រះវិហារបរិសុទ្ធ បោនទីហ្វុល យូថាហ៍ ត្រូវបានសាងសង់រួច ។ យើងដូចជាមនុស្សជាច្រើនដែរ មានចិត្តរំភើបដើម្បីនាំគ្រួសារវ័យក្មេងរបស់យើង ទៅកាន់ពិធីសម្ភោធមុនការឧទ្ទិសឆ្លង ។ យើងបានខិតខំយ៉ាងខ្លាំងដើម្បីរៀបចំកូនៗរបស់យើងចូលព្រះវិហារបរិសុទ្ធ អធិស្ឋានដោយស្មោះ ដើម្បីពួកគេនឹងមានបទពិសោធន៍ខាងវិញ្ញាណ ដើម្បីឲ្យព្រះវិហារបរិសុទ្ធ នឹងក្លាយជាផ្នែកមួយដ៏សំខាន់នៃជីវិតរបស់ពួកគេ ។

ពេលយើងដើរដោយមានគារវភាពក្នុងព្រះវិហារបរិសុទ្ធ ខ្ញុំបានឃើញថា ខ្លួនខ្ញុំកោតសរសើរចំពោះស្ថាបត្យកម្មដ៏ប្រណិត សំណង់ដ៏ស្រស់ស្អាត ពន្លឺចាំងតាមបង្អួចខ្ពស់ៗ និង គំនូរដ៏បំផុសគំនិតជាច្រើនទៀត ។ គ្រប់ទិដ្ឋភាពនៃអគារដ៏ពិសិដ្ឋនេះ គឺពិតជាល្អ ។

ពេលដើរចូលក្នុងបន្ទប់សេឡេស្ទាល ខ្ញុំបានដឹងភ្លាមថា កូនប្រុសពៅរបស់យើងឈ្មោះ Ben ដែលមានអាយុប្រាំមួយឆ្នាំ មកតោងជើងខ្ញុំ ។ គាត់ហាក់ដូចជារសាប់រសល់ -- ប្រហែលជាមានបញ្ហាតិចតួច ។

ខ្ញុំបានខ្សឹបសួរថា « មានរឿងអីហ្នឹង កូនប្រុស ? » ។

គាត់ឆ្លើយថា « ប៉ា តើមានអ្វីកំពុងកើតឡើងនៅទីនេះ ? ខ្ញុំពុំធ្លាប់មានអារម្មណ៍ដូច្នេះពីមុនទេ » ។

ខ្ញុំបានលុតជង្គង់ចុះនៅលើកំរាលឥដ្ឋជិតនឹងគាត់ ដោយទទួលស្គាល់ថា នេះគឺជាលើកដំបូងដែលកូនប្រុសរបស់យើងបានទទួលអារម្មណ៍ឥទ្ធិពលនៃព្រះវិញ្ញាណបរិសុទ្ធ ក្នុងរបៀបដ៏មានអានុភាពមួយ ។ ខណៈដែលអ្នកដើរទស្សនាដទៃទៀតដើរនៅជិតៗយើង នោះ ប៊ែន និង ខ្ញុំ បានចំណាយពេលប៉ុន្មាននាទី នៅជិតគ្នារៀនអំពីព្រះវិញ្ញាណបរិសុទ្ធជាមួយគ្នា ។ ខ្ញុំអស្ចារ្យក្នុងចិត្តដែលយើងអាចពិភាក្សាអំពីអារម្មណ៍ដ៏ពិសិដ្ឋរបស់គាត់ បានដោយងាយ ។ នៅពេលយើងដើរ វាបង្ហាញយ៉ាងច្បាស់ថា អ្វីដែលបំផុសគំនិត ប៊ែន បំផុតនោះគឺពុំមែនជាអ្វីដែលគាត់ បានឃើញ ទេ ប៉ុន្តែជាអ្វីដែលគាត់បានទទួលអារម្មណ៍ --ពុំមែនជាភាពស្រស់ស្អាតនៅជុំវិញយើងទេ ប៉ុន្តែជាសម្លេងតូចរហៀងនៃព្រះវិញ្ញាណនៃព្រះនៅក្នុងដួងចិត្តគាត់ ។ ខ្ញុំបានចែកចាយជាមួយគាត់អំពីអ្វីដែលខ្ញុំបានរៀនពីបទពិសោធន៍ផ្ទាល់ខ្លួនខ្ញុំថា សូម្បីតែការងឿងឆ្ងល់នៃភាពជាក្មេងរបស់គាត់ ក៏បានរំឭកដល់ខ្ញុំអំពីកត្តញ្ញូតាចំពោះអំណោយទានមកពីព្រះ ដែលពុំអាចថ្លែងបាននេះ -- ជាអំណោយទាននៃព្រះវិញ្ញាណបរិសុទ្ធ ។ ²

តើព្រះវិញ្ញាណបរិសុទ្ធជានរណា ?

ព្រះវិញ្ញាណបរិសុទ្ធ គឺជាសមាជិកទីបីនៃក្រុមព្រះ ហើយក៏ដូចជាព្រះវរបិតា និង ព្រះយេស៊ូវគ្រីស្ទ ទ្រង់ស្គាល់គំនិតយើង និង បំណងនៃដួងចិត្តយើង ។ ³ ព្រះវិញ្ញាណបរិសុទ្ធ ស្រឡាញ់យើង ហើយចង់ឲ្យយើងរីករាយ ។ ដោយសារទ្រង់ដឹងអំពីឧបសគ្គដែលយើងនឹងជួបប្រទះ នោះទ្រង់អាចដឹកនាំយើង ហើយបង្រៀនយើងនូវរឿងគ្រប់យ៉ាង ដែលយើងត្រូវធ្វើដើម្បីត្រឡប់ទៅរស់នៅជាមួយព្រះវរបិតាសួគ៌យើងជាថ្មីម្ដងទៀត ។ ⁴

ព្រះវិញ្ញាណបរិសុទ្ធគឺជាតួអង្គវិញ្ញាណដែលមានទំនាក់ទំនងនឹងវិញ្ញាណរបស់យើង តាមអារម្មណ៍ និង ចំណាប់អារម្មណ៍ ពុំដូចជាព្រះវរបិតាសួគ៌ និង ព្រះយេស៊ូវគ្រីស្ទ ដែលមានរូបកាយជាសាច់ និង ឆ្អឹងដ៏រុងរឿងនោះទេ ។ ⁵ ដោយសារទ្រង់ជាវិញ្ញាណ ទ្រង់មានការទទួលខុសត្រូវជាភ្នាក់ងារពិសេស ដែលប្រទានវិវរណៈផ្ទាល់ខ្លួនដល់យើង ។ ជារឿយៗ នៅក្នុងគម្ពីរ ព្រះវិញ្ញាណបរិសុទ្ធ គឺសំដៅទៅលើព្រះវិញ្ញាណបរិសុទ្ធ, ព្រះវិញ្ញាណនៃព្រះ, ព្រះវិញ្ញាណបរិសុទ្ធនៃការសន្យា ឬ និយាយដោយសាមញ្ញថា ព្រះវិញ្ញាណ ។⁶

តើបេសកកម្មរបស់ព្រះវិញ្ញាណបរិសុទ្ធជាអ្វី ?

ព្រះវិញ្ញាណបរិសុទ្ធធ្វើការសាមគ្គីភាពដ៏ឥតខ្ចោះជាមួយព្រះវរបិតាសួគ៌ និង ព្រះយេស៊ូវគ្រីស្ទ បំពេញនូវតួនាទី និង ការទទួលខុសត្រូវជាក់លាក់សំខាន់ៗជាច្រើន ។ គោលបំណងចំបងនៃព្រះវិញ្ញាណបរិសុទ្ធ គឺថ្លែងជាសាក្សីអំពីព្រះជាព្រះបិតា និង ព្រះរាជបុត្រាទ្រង់ ព្រះយេស៊ូវគ្រីស្ទ ⁷ ហើយបង្រៀនយើងនូវសេចក្ដីពិតគ្រប់យ៉ាង ។ ⁸ សាក្សីពិតមកពីព្រះវិញ្ញាណបរិសុទ្ធ ជាសាក្សីច្បាស់លាស់ជាងសាក្សីមកពីប្រភពដទៃទៀត ។ ប្រធាន យ៉ូសែប ហ្វីលឌីង ស្ម៊ីធ បានបង្រៀនថា « ព្រះវិញ្ញាណនៃព្រះ មានបន្ទូលទៅកាន់វិញ្ញាណមនុស្ស មានអំណាច ទំនាក់ទំនងសេចក្ដីពិត ដោយឥទ្ធិពលដ៏មហិមា ហើយមានការយល់ដឹងជាងសេចក្ដីពិត ដែលទំនាក់ទំនងដោយការទាក់ទងផ្ទាល់ខ្លួនជាមួយនឹងតួអង្គពីស្ថានសួគ៌ » ។ ⁹

ព្រះវិញ្ញាណបរិសុទ្ធ គឺត្រូវបានស្គាល់ថា ជាអង្គលួងលោមចិត្ត ។ ¹⁰ អំឡុងគ្រាដែលមានបញ្ហា ឬ អស់សង្ឃឹម ឬ នៅពេលយើងចាំបាច់ត្រូវដឹងថា ព្រះគង់នៅជិតឬទេ នោះព្រះវិញ្ញាណបរិសុទ្ធអាចលើកវិញ្ញាណយើងឡើង ផ្ដល់ក្ដីសង្ឃឹមដល់យើង ហើយបង្រៀនយើង « នូវការណ៍ទាំងឡាយប្រកបដោយក្ដីសុខសាន្ដនៃនគរ » ¹¹ ដែលជួយយើងមានអារម្មណ៍ « ក្ដីសុខសាន្ដនៃព្រះ ដែលហួសលើសពីអស់ទាំងគំនិត » ។ ¹²

ជាច្រើនឆ្នាំកន្លងទៅ នៅពេលគ្រួសារយើងជួបជុំគ្នា សម្រាប់អាហារពេលល្ងាចក្នុងថ្ងៃបុណ្យ ឪពុកខ្ញុំបានចាប់ផ្ដើមលេងល្បែងកំសាន្ដជាមួយនឹងចៅៗជាច្រើនរបស់គាត់ ។ រំពេចនោះ ដោយពុំបានដឹងមុន គាត់បានដួល ហើយបានទទួលមរណភាពទៅ ។ ព្រឹត្តការណ៍ដែលពុំរំពឹងនេះ ក្លាយជារឿងដ៏ទុក្ខសោក ជាពិសេសចៅៗរបស់គាត់ ពួកគេបានសួរសំណួរដែលពិបាកនឹងឆ្លើយ ។ ទោះជាយ៉ាងណា នៅពេលយើងប្រមូលកូនៗរបស់យើងមកជុំគ្នា នៅពេលយើងអធិស្ឋាន ហើយអានពាក្យព្យាការីក្នុងគម្ពីរមរមនអំពីគោលបំណងនៃជីវិត នោះព្រះវិញ្ញាណបរិសុទ្ធ បានលួងលោមចិត្តយើងម្នាក់ៗដោយផ្ទាល់ ។ ចម្លើយដែលយើងស្វែងរកបានប្រាប់យ៉ាងច្បាស់ក្នុងដួងចិត្តយើង តាមរបៀបមួយដែលពិបាកពិពណ៌នាជាពាក្យសម្ដី ។ យើងមានអារម្មណ៍សុខសាន្ដនៅថ្ងៃនោះ ដែលពិតជាហួសពីការយល់ដឹងរបស់យើង ព្រោះតែសាក្សីមកពីព្រះវិញ្ញាណបរិសុទ្ធ គឺច្បាស់លាស់ ពុំអាចបដិសេធបាន ហើយជាការពិត ។

ព្រះវិញ្ញាណបរិសុទ្ធ គឺជាគ្រូបង្រៀន និង ជាអ្នកទទួលវិវរណៈ ។ ¹³ នៅពេលយើងសិក្សា ពិចារណា ហើយអធិស្ឋានអំពីសេចក្ដីពិតនៃដំណឹងល្អ នោះព្រះវិញ្ញាណបរិសុទ្ធ បំភ្លឺចិត្តយើង ហើយពន្លឿនការយល់ដឹងយើង ។¹⁴ ទ្រង់បណ្ដាលឲ្យសេចក្ដីពិតកត់ត្រាជាប់នៅក្នុងព្រលឹងយើង ហើយអាចបណ្ដាលឲ្យមានការផ្លាស់ប្ដូរដ៏ធំកើតឡើងក្នុងចិត្តយើង ។ នៅពេលយើងចែកចាយសេចក្ដីពិតទាំងនេះជាមួយគ្រួសារយើង សមាជិកនៃសាសនាចក្រ និង មិត្តភក្ដិ ព្រមទាំងអ្នកជិតខាងក្នុងសហគមន៍របស់យើង នោះព្រះវិញ្ញាណបរិសុទ្ធ ក្លាយជាគ្រូរបស់ពួកគេផងដែរ ត្បិតទ្រង់នាំសារលិខិតនៃដំណឹងល្អ « ចូលទៅក្នុងដួងចិត្តនៃកូនចៅមនុស្ស » ។¹⁵

ព្រះវិញ្ញាណបរិសុទ្ធ បំផុសគំនិតយើង ដើម្បីជួយបម្រើដល់អ្នកដទៃ ។ ចំពោះខ្ញុំ ឧទាហរណ៍ដ៏ច្បាស់បំផុតនៃការស្ដាប់តាមការបំផុសគំនិតពីព្រះវិញ្ញាណបរិសុទ្ធក្នុងការបម្រើអ្នកដទៃ កើតមកពីជីវិត និង ការបម្រើរបស់ប្រធាន ថូម៉ាស អេស. ម៉នសុន ដែលបាននិយាយថា ៖ « នៅពេលធ្វើនូវការទទួលខុសត្រូវរបស់យើង ខ្ញុំបានរៀនថា នៅពេលយើងស្ដាប់តាមការបំផុសគំនិតដោយស្ងាត់ៗ ហើយធ្វើតាមដោយពុំពន្យាពេល នោះព្រះវរបិតាសួគ៌យើង នឹងនាំជំហានរបស់យើង ហើយប្រទានពរដល់ជីវិតយើង និង ជីវិតអ្នកដទៃ ។ ខ្ញុំពុំដឹងអំពីបទពិសោធន៍ណាដែលផ្អែមល្ហែម ឬ ជាអារម្មណ៍មានតម្លៃជាង ការស្ដាប់តាមការបំផុសគំនិត ដើម្បីដឹងថាព្រះអម្ចាស់បានឆ្លើយតបការអធិស្ឋានរបស់អ្នកដទៃតាមរយៈអ្នកនោះទេ » ។ ¹⁶

ខ្ញុំចង់ចែកចាយបទពិសោធន៍ផ្អែមល្ហែមមួយ ។ ខណៈដែលប្រធានម៉នសុន បម្រើជាប៊ីស្សព លោកបានដឹងថា សមាជិកម្នាក់ក្នុងវួដរបស់លោក ឈ្មោះ ម៉ារី វ៉តសុន គេងនៅមន្ទីរពេទ្យ ។ ពេលលោកទៅសួរសុខទុក្ខគាត់ លោកបានដឹងថាគាត់គេងនៅក្នុងបន្ទប់ធំមួយ ដែលមានអ្នកជម្ងឺដទៃទៀតជាច្រើន ។ ពេលលោកទៅដល់បងស្រី វ៉តសុន លោកបានសំគាល់ឃើញថា អ្នកជម្ងឺនៅជាប់គ្រែនោះយកកំរាលគ្រែមកគ្របលើមុខរបស់គាត់យ៉ាងរហ័ស ។

បន្ទាប់ពីប្រធាន ម៉នសុន បានសួរសុខទុក្ខបងស្រី វ៉តសុន និង ផ្ដល់ពរជ័យនៃបព្វជិតភាពដល់គាត់រួចហើយ លោកបានចាប់ដៃលា ហើយបានរៀបនឹងចាកចេញ ។ ពេលនោះមានរឿងសាមញ្ញ តែអស្ចារ្យមួយបានកើតឡើង ។ ឥឡូវខ្ញុំដកស្រង់មកពីការចងចាំផ្ទាល់របស់ប្រធានម៉នសុន អំពីបទពិសោធន៍នេះថា ៖

« ខ្ញុំពុំអាចចេញពីគាត់ទេ ។ វាហាក់ដូចជាមានដៃដែលមើលមិនឃើញ [ បាន ] ដាក់មកលើស្មាខ្ញុំ ហើយខ្ញុំដឹងក្នុងព្រលឹងខ្ញុំថា ខ្ញុំឮពាក្យទាំងនេះ ៖ ‹ ចូរទៅគ្រែអ្នកជម្ងឺនៅជាប់នោះ ជាគ្រែដែលស្ត្រីតូចម្នាក់គ្របមុខ ពេលអ្នកដើរចូលមក › ។ ខ្ញុំក៏បានធ្វើតាម... ។

ខ្ញុំបានទៅដល់គ្រែរបស់អ្នកជម្ងឺម្នាក់ទៀត ហើយបានគោះស្មារបស់គាត់តិចៗ ហើយទាញកំរាលចេញពីមុខគាត់ដោយប្រយ័ត្ន ។ មើលចុះ ! គាត់ក៏ជាសមាជិកម្នាក់ក្នុងវួដខ្ញុំដែរតើ ។ ខ្ញុំពុំដឹងថា គាត់ឈឺនៅក្នុងមន្ទីរពេទ្យទេ ។ គាត់ឈ្មោះ ខាតធ្លីន ម៉ាក់គី ។ ពេលយើងមើលគ្នាទៅវិញទៅមក គាត់បានស្រែកដោយទឹកភ្នែកថា ‹ ឱ ប៊ីស្សព ពេលលោកដើរចូលតាមទ្វារនោះ ខ្ញុំដឹងថា លោកមកមើលខ្ញុំ និង ប្រសិទ្ធពរខ្ញុំ ជាការឆ្លើយតបចំពោះការអធិស្ឋានរបស់ខ្ញុំ ។ ខ្ញុំរីករាយក្នុងចិត្ត ពេលគិតថាលោកដឹងថា ខ្ញុំទីនេះ ប៉ុន្តែនៅពេលលោកទៅដល់គ្រែមួយទៀត ខ្ញុំសោកសៅ ហើយខ្ញុំដឹងថាលោកពុំមែនមកមើលខ្ញុំទេ › ។

« ខ្ញុំបាននិយាយទៅ [ បងស្រី ] ម៉ាក់គី ថា ៖ ‹ វាមិនសំខាន់ទេ ដែលខ្ញុំមិនដឹងថាអ្នកនៅទីនេះ ។ តែវាសំខាន់ថា ព្រះវរបិតាសួគ៌យើង បានដឹង ហើយថាអ្នកបានអធិស្ឋានដោយស្ងៀមស្ងាត់សុំការប្រសិទ្ធពរនៃបព្វជិតភាព ។ គឺទ្រង់បានបំផុសគំនិតខ្ញុំឲ្យមករកអ្នក ទោះជាអ្នកលាក់មុខក្ដី »។ ¹⁷

តើព្រះវិញ្ញាណបរិសុទ្ធមានបន្ទូលមកកាន់យើងដោយរបៀបណា ?

យើងទាំងអស់គ្នាមានបទពិសោធន៍នឹងព្រះវិញ្ញាណបរិសុទ្ធ ទោះជាយើងពុំបានស្គាល់ជានិច្ចក្ដី ។ នៅពេលគំនិតបំផុសក្នុងចិត្តយើង នោះយើងដឹងថាវាជាការពិត តាមរយៈអារម្មណ៍ខាងវិញ្ញាណ ដែលចូលក្នុងចិត្តយើង ។ ប្រធាន ប៊យដ៍ ឃេ ផាកកឺ បានបង្រៀនថា ៖ « ព្រះវិញ្ញាណបរិសុទ្ធ មានបន្ទូលដោយសម្លេងមួយ ដែលអ្នក មានអារម្មណ៍ដឹង ច្រើនជាងអ្នក ស្ដាប់ឮ ... ។ ពេលយើងនិយាយអំពី ‹ ការស្ដាប់ › ការខ្សឹបប្រាប់នៃព្រះវិញ្ញាណ ជាញឹកញាប់ មនុស្សម្នាក់ពិពណ៌នាអំពីការបំផុសគំនិតខាងវិញ្ញាណដោយការនិយាយថា ‹ ខ្ញុំមាន អារម្មណ៍ ... ›» ។ ¹⁸ គឺតាមរយៈអារម្មណ៍ដ៏ពិសិដ្ឋទាំងនេះ មកពីព្រះវិញ្ញាណបរិសុទ្ធ ដែលយើងអាចដឹងនូវអ្វីដែលព្រះចង់ឲ្យយើងធ្វើ ត្បិតរឿងនេះ បានថ្លែងនៅក្នុងគម្ពីរថា « គឺជាវិញ្ញាណនៃវិវរណៈ » ។ ¹⁹

តើវាមានន័យយ៉ាងណា ដើម្បីទទួលអំណោយទាននៃព្រះវិញ្ញាណបរិសុទ្ធ ?

នៅក្នុងការបង្រៀនដល់ ប៊ែន ជាកូនប្រុសអាយុប្រាំមួយឆ្នាំរបស់យើង ខ្ញុំគិតថា វាសំខាន់ដើម្បីពន្យល់ពីភាពខុសគ្នារវាងអ្វីដែលគាត់មានអារម្មណ៍ ជាឥទ្ធិពលនៃព្រះវិញ្ញាណបរិសុទ្ធ និងអំណោយទាននៃព្រះវិញ្ញាណបរិសុទ្ធ ជាអ្វីដែលគាត់នឹងទទួលបន្ទាប់ពីបុណ្យជ្រមុជទឹក ។ មុនពេលបុណ្យជ្រមុជទឹក អស់អ្នកស្វែងរកសេចក្ដីពិតដ៏ស្មោះត្រង់ និង អស់ពីចិត្តទាំងអស់ អាចទទួលអារម្មណ៍ឥទ្ធិពលនៃព្រះវិញ្ញាណបរិសុទ្ធពីមួយគ្រាទៅមួយគ្រា ។ ទោះជាយ៉ាងណា ឱកាសដើម្បីទទួលភាពជាដៃគូនៃព្រះវិញ្ញាណបរិសុទ្ធខ្ជាប់ខ្ជួន និង ភាពពេញលេញ នៃពរជ័យដែលទាក់ទងទាំងអស់ គឺមានសម្រាប់តែសមាជិកដែលសក្ដិសម និង បានទទួលបុណ្យជ្រមុជទឹក ដែលទទួលអំណោយទានព្រះវិញ្ញាណបរិសុទ្ធ តាមរយៈការដាក់ដៃលើ ដោយអ្នកទាំងឡាយដែលកាន់សិទ្ធិអំណាចបព្វជិតភាពរបស់ព្រះប៉ុណ្ណោះ ។

តាមរយៈអំណោយទាននៃព្រះវិញ្ញាណបរិសុទ្ធ យើងទទួលបានអំណាច និង អំណោយទានខាងវិញ្ញាណបន្ថែម ទទួលបានវិវរណៈ និង ការការពារកើនឡើង ទទួលបានការដឹកនាំ និង ការណែនាំយ៉ាងខ្ជាប់ខ្ជួន ហើយទទួលបានពរជ័យដែលបានសន្យានៃការញែកចេញ និង ភាពលើកតម្កើងនៅក្នុងនគរសេឡេស្ទាល ។ ពរជ័យទាំងអស់នេះ ត្រូវបានប្រទានឲ្យជាលទ្ធផលនៃបំណងប្រាថ្នាផ្ទាល់របស់យើង ដើម្បីទទួលយក និង កើតមាន នៅពេលយើងរៀបជីវិតរបស់យើងតាមឆន្ទៈរបស់ព្រះ ហើយស្វែងរកការដឹកនាំដ៏ខ្ជាប់ខ្ជួនរបស់ទ្រង់ ។

នៅពេលខ្ញុំគិតអំពីបទពិសោធន៍របស់ខ្ញុំជាមួយកូន ប៊ែន នៅក្នុងព្រះវិហារបរិសុទ្ធ បោនទីហ្វុល យូថាហ៍ ខ្ញុំមានអារម្មណ៍ និង ចំណាប់អារម្មណ៍ដ៏ផ្អែមល្ហែមជាច្រើន ។ ការចងចាំដ៏ច្បាស់មួយ ដែលខ្ញុំមាន គឺនៅពេលខ្ញុំផ្ដោតទៅលើភាពអស្ចារ្យនៃអ្វីដែលខ្ញុំអាចមើលឃើញ ប៉ុន្តែកូនតូចនៅជិតខ្ញុំ ស្គាល់អារម្មណ៍ដ៏មានអំណាចក្នុងដួងចិត្តគាត់ ។ ជាការរំឭកដ៏ទន់ភ្លន់ ខ្ញុំមិនត្រឹមតែត្រូវបានអញ្ជើញឲ្យឈប់ ហើយលុតជង្គង់ចុះតែប៉ុណ្ណោះទេ ប៉ុន្តែក៏ឲ្យស្ដាប់ការហៅរបស់ព្រះអង្គសង្គ្រោះដើម្បីក្លាយដូចជាកូនក្មេង-- រាបសារ ទន់ភ្លន់ និង ត្រៀមខ្លួនជាស្រេចដើម្បីស្ដាប់សម្លេងតូចរហៀងនៃព្រះវិញ្ញាណរបស់ទ្រង់ផងដែរ ។

ខ្ញុំថ្លែងជាសាក្សីនៃភាពពិតរស់រវើក និង បេសកកម្មដ៏ទេវភាពរបស់ព្រះវិញ្ញាណបរិសុទ្ធ ហើយថា តាមរយៈព្រះចេស្ដានៃព្រះវិញ្ញាណបរិសុទ្ធ នោះយើងអាចស្គាល់សេចក្ដីពិតគ្រប់យ៉ាង ។ ខ្ញុំថ្លែងទីបន្ទាល់ថា អំណោយទាននៃព្រះវិញ្ញាណបរិសុទ្ធ គឺជាអំណោយទានដ៏មានតម្លៃ និង ពុំអាចកាត់ថ្លៃបានរបស់ព្រះវរបិតាសួគ៌ ចំពោះមនុស្សទាំងអស់ ដែលនឹងមករកព្រះរាជបុត្រា ដើម្បីទទួលបុណ្យជ្រមុជទឹកក្នុងព្រះនាមទ្រង់ ហើយទទួលព្រះវិញ្ញាណបរិសុទ្ធ តាមរយៈពិធីបញ្ជាក់ នៅក្នុងសាសនាចក្រទ្រង់ ។ ខ្ញុំថ្លែងជាសាក្សីផ្ទាល់អំពីសេចក្ដីពិតដ៏ពិសិដ្ឋទាំងនេះ នៅក្នុងព្រះនាម នៃព្រះយេស៊ូវគ្រីស្ទ អាម៉ែន ។