Kisakis Kouwahlap Ehu sang Koht
Sang Craig C. Christensen
En Presidensi en Isiakan
Ngehn Sarawi kin ehuieng Samatail Nanleng oh Sises Krais, ni eh kin kapwaiahda pwukoah kesempwal oh doadoahk tohrohr kei.
Nan pahr 1994, President Howard W. Hunter lukehki tohn Mwomwohdiso en “koasoanehdi me tehnpas sarawi … en wiahla kilel kesempwal ehu en [atail] wia tohn mwomwohdiso.”1 Ahnsou kis mwuri nan sounpar ohte, kokoudahn Tehnpas Sarawi en Bountiful Utah kaneknekla. Duwehte tohtohn aramas, se kasik sen wahla aht peneinei en iang kapidelong en tehnpaso me pahn wiawih mwohn isimwaso. Se doadoahk kehlail pwe sen kaunopada nait serihkan, oh kapakap ngidingidki pwe ngehno en kak sair loalerail pwe ren wiakihla tehnpas sarawi wasa kesemwpwal ehu nan arail mour.
Ni aht wie patpato wawai nan tehnpas sarawio, I dahkihla uwen kaselel en wiepen kokoudahn tehnpaso, doadoahk pisetik kan, marain en nan wenihmw tok ileile kan, oh songosongen wiepen litepw lingan kan. Soangen wiepen doadoahk koaros nahn tehnpas wet inenen kaselel mehlel.
Ni ei pidelong ohng nan perehn celestial sarawiho, I diarada me nait pwutak keieu tikitik, Ben me sounpar weneu, wie kolokol nehiet. E mwomwen pwuriamwei—mwein e pil ekis masepwehk.
I mwenginingin ieng oh peidek. “Dahme sapwung, Samwe?”
E sapeng, “Ipa, dahme wiewiawih wasaht? I sohte kin kehn soahng wet mahs.”
Ni ahi diarada me ele ehd en nait pwutako ah kehn pepehm en Ngehn Sarawi ni mwohmw kehlail duwehte met, I kelepwkihdi limwah nan tat en tehnpaso. Ni en ekei aramas akan arail alialuh seli limwaht, ngehi oh Ben mwohndipenehki minit kei oh ehukihpene me pid Ngehn Sarawi. I pwuriamweikihla uwen mengei en aht koasoiapene duwen kesemwpwalen ah pepehm kan. Ni aht wie koasokoasoi, eh sansalda mwahu me dahme keieun sairada Ben kaidehn dahme ehkilang ahpw dahme ekehn—kaidehn lingan en wasa me kapil kihtpene ahpw kisin ngihl tikitik en Ngehn en Koht me sairada ah mohngiongo. I ehukihong ih dahme I aledihsang pein ahi mour, ni ansouohte me pwuriamwei en nei serio e kamwakidadahr loalei oh ahi kaping kalahngan mwuledek pwehki kisakis kohwahlap wet sang Koht—kisakis en Ngehn Sarawi.2
Ihs Me Ngehn Sarawi?
Ngehn Sarawi me wia kesilimen en Tapwihko, oh, nin duwe met, duwehte Koht Sahm, oh Sises Krais, E mwahngih atail madamadau kan oh ineng kan en atail mohngiong kan.3Ngehn Sarawi poakepoakeikitail oh kupwurki kitail en peren. Pwehki E ketin mwahngih kasongosong kan me kitail pahn sohpai, E kin ketin kahluwa kitail oh kasukuhlikin kitail dahme kitail anahne wia pwe kitail en kak pwurala oh kousoanla rehn Samatail Nanleng.4
Ni ah weksang Sahm Nanleng oh Sises Krais, me sapwellimaniki kahlap wahu en uduk oh tih, Ngehn Sarawi kahlapki ngehn ehu me kin mahseniong ngenitail kan ni pepehm oh mwohmw kan.5Ni ah wia ngehn ehu, E sapwellimaniki pwukoahn mehnkair kesemwpwal ehu me kin peuse kaudial kan ohng aramas. Nan irehn pwuhk sarawi kan, Ngehn Sarawi pil kin wehwehki Ngehn en Kauno, de Ngehn Sarawi en Inou, de Ngehno.6
Ia en Ngehn Sarawi Eh Pwukoah?
Ngehn Sarawi kin ehuieng Samatail Nanleng oh Sises Krais, ni eh kin kapwaiahda pwukoah kesempwal oh doadoahk tohrohr kei. Inoandehn pwukoah en Ngehn Sarawi iei eh wia sounkadehde en Koht Sahm oh Sapwellime Ieros, Sises Krais,7oh en kasukuhlihkin kitail me mehlel nan soang koaros.8Kadehde sansal me kin peido sang Ngehn Sarawi wia kadehde me uhdahn mehlel sang kadehde me kin kohsang ehu wasa tohror. President Joseph Fielding Smith padahngki me “Ngehn en Koht ni eh kin mahseniong ngehn en aramas sapwellimaniki manaman en peuse mehlel me ngenin oh wehwe mwahu sang mehlel me aramas kin ale sang tohnleng kan.”9
Ngehn Sarawi pil dehde duwen Sounsawaso.10Ni ahnsou me kitail kin lellohng nan kahpwal de ma kitail kin men ese ma Koht kerendo, Ngehn Sarawio kin kak pwekada ngenitail kan, ketkiong kitail koapwoaroapwoar, oh kasukuhlihkin kitail mehn kameleilei kan en wehio11souwesehkin kitail en pehm “sapwellimen Koht popohl, me inenen laudsang uwen atail dehdehki.”12
Sounpar kei samwalahro ni ahnsou me aht peneinei lap pokonpenehr pwe sen tungoal en soutik, ahi pahpao ahpw tepda mwadmwadongehng nait serihkan. E wiakintehieu pwupwidi ni eh sohte mehkot wiawihiong, oh sohte pwand kapelsalehdala. Mwekid sohkasikpe wet kakete wiahla lapalahn kahpwal, ahpw mehlel ohng nait serihkan, pwe re pahn wia peidek kei me se sohte kak sapeng. Ahpw ni aht kihpene nait serihkan, kapakap oh wadek dahme soukohp en nan Pwuken Mormon kan koasoiahki duwen kahrepen mour, Ngehn Sarawio kainsenamwahuih kihtla. Ni mwohmw me apwal en kawehwehda ni kosoai, pasapeng kan meserapahki peido sansal nan aht mohngiong kan. Meleilei me se pehm rahno se sohte kak kawehwehda, ahpw se ese me kadehde me peido sang Ngehn Sarawio sansal oh mehlel.
Ngehn Sarawi wia sounpadahk men oh soun kasalehda me rir kan.13Ni atail kin onop, douloalih, oh kapakapki me mehlel kan en rongamwahuo, Ngehn Sarawio kin kamaraini kitail pwe kitail en kak wehwehkihla mwadang.14E kin elehda pwe me mehlelo en kin ntingidi nan loalatail oh atail mohngiong kan en kak wekila mehlel. Ni atail kin ehukihong me mehlel pwukat rehn atail peneinei kan, rehn iengatail tohn Mwomwohdiso kan, oh rehn kempoakepahtail kan oh mehn mpatail kan, Ngehn Sarawio pil kin wiahla arail sounpadahk pwe E kin kalkalohkiseli iren rongamwahu wet “oh ketkihiohng nan mohngiong en aramas akan.”15
Ngehn Sarawio kin kamwakid kitail en kin souwese mehteikan. Ohngie, ehu mwekid me pid en Ngehn Sarawi eh kin kamwakid aramas en souwese mehtekan iei me wiawih nan en President Thomas S. Monson ah mour nin doken eh kin wie kalkalohkseli, me mahsanih: “I koledier, me nin doken ahi kin wiewia ahi pwukoah kan, me ni ahnsou me kitail kin kehn ngihl tikitiko oh mwadang kapwaiahda kupwure, Samatail Nanleng pahn kahlua atail doadoahk oh kapaiahda atail oh en mehteikan arail mour. Sohte ehu soangen wiewia me I ese me kaperen oh kesemwpwal sang ei kin kapwaiahda malipilip en kisin ngihlo oh diarada me Kauno ketin sapengehr en emen aramas tohror ah kapakap pwehki ahi oke ngihlo.”16
I pahn ehukihda ehu mwekid kehmpoake. Ni ahnsou me President Monson wia emen pisop, E esehda me emen tohn eh wardo, Mary Watson, kapidelong nan imwen wini. Ni eh kohla pwehn tuhwong liho, e esehda me liho iang ekei soumwahu patopato nan pere laud ehu. Ahnsou me ohlo aluhlang Sister Watson, eh kilang emen soumwahu limwah me pitipitte pwaindi moange.
Mwurin en President Monson ah tuhongehr Sister Watson oh kapaiakihda liho kapai en priesthood, E itipehieng, rahnmwahuihla, oh onopada pwe en samwalahr. Ahnsouo mehkot tikitik ahpw kapwuriamwei ahpw wiawih. Met I pahn kapwurehiong dahme President Monson pein mahsanihki mwekid wet:
“I sohla kak mweselda sang, limwahn liho,” e koasoia. “Likamwete mehkot koledier pohn pwopweiet, oh I kehn loaleiet me I wie rongorong mahsen pwukat: ‘Kohla ni peht teio wasa me kisin liho pwainkihdi meseo tehio ahnsou me ke pidelongodohu.’ Ihme I wia. …
“I aluhla ni en soumwahu teio ah pehto, ngei pikir pohn pwopwe oh ni keneinei waikedisang tehi me pwaindier meseho. Meid kapwuriamwei! Lihmenet pil wia emen tohn ahi wardo. I sohte ese me lih menet pil iang wia emen soumwahu nan imwen winio. Ede Kathleen McKee. Ahnsou me se kilang pene, liho koasoaido nan pilen mese, ‘Oh maing Pisop, ahnsou me komw pidelongodohu, I wiahki me ahi kapakap pahn pweidahr pwe komw pahn tuhong ie oh kihong ie kapai. Loaleiet wie perepereniki ahi lemeleme me komw wehwehki me I mihmi me, ahpw ahnsou me komw uhdi ni peht teio, mohngiongiet kihrla, pwe I ese me komw sohte kodohn kilang ie.’
“I ndahiong [Sister] McKee: ‘Sohte katepe ma I sehse me ke mihmi me. Ahpw, ihme kesempwal, Samatail Nanleng mwahngiher me ke kapakap oh peki kapai en priesthood. Iei Ih me ketin kamwakid ie pwe ien kohdo oh kawehla ahmw onopek.”17
Ia Mwomwen en Ngehn Sarawi kin Mahsen ong Kitail?
Kitail koaruhsien kehnehr mehkot sang rehn Ngehn Sarawio, mendahte ma kitail sohte kin kalapw kasawihada. Ni ahnsou me lamalam kamarain kin pwarada nan moangetail, kitail wehwehki me lamalam pwukat mehlel pwehki sang ni pepehm kan en pali ngehn me kin pidelong nan atail mohngiong kan. President Boyd K. Packer padahngki me: “Ngehn Sarawi kin mahsenki ngihl ehu me kumwail kinkehnlaudsang amwail kin rong. … Ni atail kin koasoaia atail kin‘rong’ mwenginingin en Ngehno, pak tohto dahme aramas kin ndahki dahme kin peido rehrail re kin nda, I ahniki pepehm ehu…’.”18Pwe iei ih pepehm pwukat me kin peido sang Ngehn Sarawio me kitail kin esehki dahme Koht ketin kupwurki kitail en wia, pwe iei ihmet, duwen me ntingdier nan pwuhk sarawi, “ngehn en kaudiahl.”19
Ia Wehwehn Alehda Kisakis en Ngehn Sarawi?
Ni ahi kasukuhlih nait pwutak sounpar weneuo, Ben, I medewehda me e kesemwpwal ien kawehwe wekpeseng en dahme eh kehno, iei me wia kapehm sang Ngehn Sarawio, oh kisakis en Ngehn Sarawi, me eh pahn ale mwurin pepdais. Mwohn pepdais, koaros me kin mehlelki oh nsenohki rapahki me mehlelo kak kehn kapehm sang Ngehn Sarawio ni ahnsou kan. Ahpw, ahnsou mwahu en alahle kapai en ehuiong Ngehn Sarawio ahnsou koaros oh kapai unsekkan mweimwei ohngete irail kan me warohng, towe kan me pepdaislahr oh alehier kisakis en Ngehn Sarawio ni kepwilipwildien peh kan sang irail kan me kolokol manaman en priesthood en Koht.
Sang ni kisakis en Ngehn Sarawio, kitail kin alehdi koahiek laud oh kisakis kan en pali ngehn, keirdahn kamarain oh silasil, kaweid mwahu oh inen, oh inou kapai kan me pid kaweliakapwada oh kalapalapala en atail mour nan wehin celestial. Kapai pwukat koaros kohdohng kitail pwehki sang ni atail pein anahne ale oh pwehki sang ni atail men kakainene atail mour en pahrekiong kupwur en Koht oh atail rapahki Sapwellime irehn kaweid poatopoato.
Ni ahi kin tamanda dahme ngehi oh Ben wia nan Tehnpas Sarawi en Bountiful, diren lamalam kaselel kin pwarada rehi. Ehu ire me inenen sansal iei nindoken ahi dahkihla uwen lingan en dahme I kilekilang, kisin serihmen limwahi wie kasakasawih uwen kehlail en dahme eh kekehn nan ah mohngiong. Ni kisin iren ketemen meleileio, I diarada me kaidehnte ien uhdi oh kelepwikdi ahpw I anahne rong pehkiek en Sounkomouro ien wiahla duwen kisin serihmen—karakarak, aktikitik, oh onop en rong kisin, ngihl tikitiko sang Sapwellime Ngehno.
I kadehde duwen ieias mehlel oh kesempwal en pwukoahn Ngehn Sarawio oh me sang ni manaman en Ngehn Sarawio kitail pahn kak wehwehkihla mehlel en mehkoaros. I kadehde me kisakis en Ngehn Sarawio iei me wia sapwellimen Sahm Nanleng kisakis kesempwal oh kouwahlap ong koaros me pahn kohdo rehn Sapwellime Ieroso, pepdaisla ni Mware, oh ale Ngehn Sarawi sang ni eh kasarawihala nan Sapwellime Mwomwohdiso. Me pid mehlel pwukat I wia ahi kadehde ni lengleng sarawi en Sises Krais, ahmen.