Tarogi Ira na Daukaulotu! E Rawa ni ra Vukei Iko!

Mai vei Elder Russell M. Nelson

Ena Kuoramu ni iApositoo Le Tinikarua


O ira kece na daukaulotu, gone kei na qase, era veiqaravi ena dua ga na inaki oya me na vinaka cake na bula vei ira tale eso na tamata.

Kemuni na taciqu, ganequ, kei kemuni na itokani, keimami vagolea yani na neimami iloloma kei na veikidavaki vei kemuni yadua. Eda marau vakalevu ena veika sa mai kacivaka ena mataka nikua o Peresitedi Thomas S. Monson, sa veisau kina na iyalayala e ra ni yabaki ni veiqaravi vakadaukaulotu ki na 18 vei ira na cauravou kei na 19 vei ira na goneyalewa. Mai na lalawaka oqo, sa lewe levu kina na noda itabagone era na marautaka na veivakalougatataki ni kaulotu.

Ena rua na yabaki sa oti ka vakadeitaki tale vaqaqa ena mataka nikua, e kaya kina o Peresitedi Monson “ni sa dodonu vei ira kece na cauravou bula kilikili ka tu vinaka na nodra bula me ra vakavakarau ni laki veiqaravi vakadaukaulotu. Na veiqaravi vakadaukaulotu e itavi ni matabete–e dua na icolacola e namaka na Turaga vei keda ka da sa mai itaukei ni veika lelevu.”1 E vakamacalataka tale vei ira na goneyalewa, ni kaulotu e ka marautaki ia e sega ni ilesilesi. Ka veisureti talega me na vuqa na veiwatini qase me ra veiqaravi.

Sa ka bibi na vakavakarau ki na kaulotu. Na kaulotu e dua na ivalavala ni veiqaravi tawasaumi vua na Kalou kei na kawatamata. Era tokona na sasaga oqori o ira na daukaulotu mai na nodra dui ilavo maroroi. E rawa talega ni ra veivuke kina na itubutubu, matavuvale, itokani, kei ira na dausoli-ka ki na iLavo Raraba ni Kaulotu. O ira kece na daukaulotu, gone kei na qase, era veiqaravi ena dua ga na inaki oya me na vinaka cake na bula vei ira tale eso na tamata.

Na vakatulewa ni qaravi kaulotu ena tarā cake na nona icavacava vakayalo na daukaulotu, na watina, kei ira na nodrau kawa ena veitabatamata mai muri. Na gagadre ni veiqaravi sa ivatuka ni nona saumaki mai, bula kilikili, kei na tuvakarau e dua na tamata.

Ena iwiliwili ni tamata vakaitamera ena vuravura raraba oqo, e vuqa vei kemuni o ni sega ni lewena na Lotu i Jisu Karisito ni Yalododonu Edaidai ka lailai sara na ka o ni kila me baleti keimami kei ira na neimami daukaulotu. O ni tiko eke se o ni vakarorogo tiko mai baleta na nomuni vinakata mo ni kila eso tale na ka me baleti ira na Momani kei na veika era vakavuvulitaka na neimami daukaulotu. Ni o ni vulica eso tale na ka me baleti keimami, o ni na raica ni levu sara na veika vivinaka eda tautauvata kina. Keimami vakayaloqaqataki kemuni mo ni maroroya na veika kece e vinaka ka dina ka qai raica kevaka e rawa ni da vakaikuritaka. Ena vuravura oqo ka vakasinaiti tu ena veibolebole, eda na gadreva na veivuke ena veigauna eso. Na lotu, na dina tawamudu, kei ira na neimami daukaulotu era sa tiki bibi sara ni veivuke oqori.

O ira na neimami daukaulotu itabagone era biuta vakatikitiki na vuli, cakacaka, vakaitau, kei na veika kece tale era dau cakava na cauravou kei na goneyalewa ena nodra gauna ni bula oqo. Ena loma ni 18 ki na 24 na vula era na biuta tu mai vakawawa ena vuku ni gagadre titobu me ra qarava na Turaga.2 Eso vei ira na neimami daukaulotu era laki veiqaravi ni ra sa qase sara toka. Au kila ni na vakalougatataki na nodra matavuvale. Ena neitou matavuvale, e walu era veiqaravi tiko oqo vakadaukaulotu tudei—e tolu na luvei keirau yalewa, ira na dui watidratou, dua na makubui keirau yalewa, ka dua na makubui keirau tagane.

Eso beka ena vakataroga me baleta na yaca Momani. Oqori na yaca buli vei keimami. E sega ni yacai keimami dina, e dina ni keimami kilai raraba tu ena Momani. Na yaca oqori e kau mai ena dua na ivolanikalou tabu ka yacana na iVola i Momani.

Na yaca dina ni Lotu na Lotu i Jisu Karisito ni Yalododonu Edaidai. Oqo na tauyavutaki tale ni Lotu taumada i Jisu Karisito. Ni a lako voli e delai vuravura, a tauyavutaka na Nona Lotu. A kacivi ira na iApositolo, Vitusagavulu, kei ira na iliuliu tale eso ka solia vei ira na dodonu ni matabete me ra cakacaka ena Yacana.3 Ni mai takali na Karisito kei ira na Nona iApositolo, era sa qai veisautaka na tamata na cakacaka vakalotu kei na ivunau. Sa yali na Lotu taumada kei na matabete. Ni sa oti na Gauna ni Butobuto, ena ruku ni nona veiliutaki na Tamada Vakalomalagi, a qai vakalesuya tale mai ko Jisu Karisito na Nona Lotu. Sa bula tale tu ena gauna oqo, sa vakalesui mai, ka cicivaki tiko ena nona veidusimaki vakalou.4

Keimami muria na Turaga o Jisu Karisito ka vakatavuvulitaki Koya. Eda kila ni sa oti na Nona qaqa lagilagi mai na mate, a rairai na Turaga sa vakaturi cake vei ira na Nona tisaipeli ena vica na gauna. A kana vata kei ira. A lako vata kei ira. Ni bera na iotioti ni Nona Kau Cake, a lesi iratou me ratou “lako … ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu.”5 Eratou a muria na iApositolo na ivakaro ko ya. Eratou kacivi ira talega eso me vukei iratou ena kena vakayacori na ivakaro ni Turaga.

Nikua, ena ruku ni nodra veiliutaki na iapositolo kei na parofita ni gauna oqo, sa vagolei kina na ivakaro vata oqori vei ira na daukaulotu ni Lotu i Jisu Karisito ni Yalododonu Edaidai. Era veiqaravi na daukaulotu oqori ena sivia na 150 na matanitu. Ni ra matataka na Turaga o Jisu Karisito, era segata me ra vakayacora na ivakaro vakalotu oya—sa vakavoui ena noda gauna oqo mai vua na Turaga Vakataki Koya—me kau yani ki na veivanua na taucoko ni kosipeli ka me vakalougatataki na bula ni tamata ena veivanua kecega.6

O ira na daukaulotu ena mua ni yabaki tinivakacaca se itekivu ni 20 vakacaca era se gone ena veika ni vuravura. Ia era sa vakalougatataki ena veisolisoli—me vaka na kaukauwa ni Yalo Tabu, na loloma ni Kalou, kei na ivakadinadina bula—oqori era sa yaco kina me ra Nona mata yaloqaqa na Turaga. Era wasea na itukutuku vinaka ni kosipeli ka na kauta mai na reki dina kei na marau tawayalani vei ira kece era rogoca na nodra itukutuku. Ena vuqa na gauna era laki vakayacora ena dua na vanua kei na vosa era vulagi kina.

Era segata na daukaulotu mera muri Jisu Karisito ena vosa kei na ivalavala. Era vunautaki Jisu Karisito kei na Nona Veisorovaki.7 Era vakatavuvulitaka na kena Vakalesui mai na nona Lotu makawa na Karisito mai vua na Nona imatai ni parofita ena gauna oqo na Turaga, o Josefa Simici.

O sa na rairai sotavi ira beka ena dua na gauna e liu, se dau vakawaleni ira tu beka ga na neimami daukaulotu. Sa noqu vakanuinui ni ko na sega ni rerevaki ira, ia mo ni vuli ga mai vei ira. E rawa ni ra ivurevure ka talai mai lomalagi kivei kemuni.

A yaco vei Jerry na ka oqori, e dua na lewe ni lotu Protestant vakaturaga ka yabaki 60 vakacaca ka vakaitikotiko mai Mesa e Arizona. Na tamai Jerry e italatala ni Baptist; ka italatala ni Wesele o tinana. Ena dua na siga a wasea vei Jerry o Pricilla, na nona itokani voleka, na mosi a vakila ena mate ni luvena ena gauna a se qai sucu walega kina kei na veisere vakamosiyalo ka a yaco ni oti ga vakalailai oya. Na dredre ni bula vakatina lewedua, e va na luvei Pricilla–tolu na yalewa ka dua na tagane. Ni dolava na yalona vei Jerry, a vakatusa ni a sa vakasamataka tiko me kunati koya. Ena kaukauwa taucoko kei na loloma e rawata o Jerry, a tovolea me vukei koya me kila deivaki ni nona bula e ka vakamareqeti. A sureti koya me lako mai ki na nona lotu, ia e vakamacalataka o Pricilla ni sa oti na nona vakanuinui vua na Kalou.

A sega ni kila o Jerry na ka me cakava. E muri, ni sui senikau tiko ena nona lomanibai, a masu na tamata vakabauta oqo vua na Kalou me liutaki koya. Ni masu tiko, a rogoca e dua na domo ena nona vakasama ni kaya, “Tarovi rau na gonetagane dau vodo basikeli.” A vaqaqa o Jerry ena veilecayaki se cava na ibalebale ni ka oqo. Ni se vakasamataka tiko na veivakauqeti oqo, e a rai yani ki gaunisala ka raici rau e rua na cauravou vakasote vulavula ka vakaneketai ni rau vodo basikeli tiko va-ka ki nona vale. Ena nona kurabuitaka na ka e yaco “kusarawa oqo,” a vakaraici rau tu ga ka rau mani lako siviti koya. Ia, ni qai kila ni gadrevi vua me cakava e dua na ka, a kaci yani, “Ei, kemudrau, yalovinaka, drau tu mada vakadua! Au vinakata meu vosa vei kemudrau!”

Ena kurabui kei na mata tarotaro, erau a tu vakadua na cauravou. Ni rau toro voleka mai, e qai raica o Jerry ni rau vakaitokaniyaca ka vakatakilakilataka ni rau daukaulotu ni Lotu i Jisu Karisito ni Yalododonu Edaidai. E raici rau o Jerry ka kaya, “Ena rairai rogorogo matalia beka oqo, ia au a masu tiko ka tukuni vei au meu ‘tarovi rau na gonetagane vodo basikeli.’ Au rai cake yani ki gaunisala, drau sa tu mai kina. E rawa beka ni drau vukei au?”

Erau matadredredre na daukaulotu, ka kaya e dua, “Io, au vakabauta ni rawa.”

E vakamacalataka o Jerry na dre-dre vakatubu lomaleqa e sotava tiko o Pricilla. Sega ni dede rau sa sotavi Pricilla, kei iratou na luvena, kei Jerry. Eratou veivosakitaka na inaki ni bula kei na nona inaki tawamudu na Kalou me baleti iratou. E tubu na nodratou vakabauta o Jerry, Pricilla, kei iratou na luvena, ena masu ni yalodina, nodratou vulica na iVola i Momani, kei na veitokani loloma mai vei ira na lewe ni Lotu. Sa qai kaukauwa cake ga na nona vakabauti Jisu Karisito o Jerry. Sa tavuki na yalo vakatitiqa kei na vakanananu ni kukuna nei Pricilla ki na yalo vakanuinui kei na vakacegu. Eratou a mani papitaiso ka yaco me lewe ni Lotu vakalesui mai i Karisito.8

Io, e rawa ni ra veivuke ena vuqa na sala na daukaulotu. Me vaka oqo, eso beka vei kemuni ena vinakata mo ni kilai ira vakavinaka na tubumuni. O na rawa ni kilai ira na nomu itubutubu kei ira na tubumu ki na ikava ni itabatamata, ia vakacava o ira na tubumu ena walu na itabatamata? O kila beka na yacadra? O vinakata beka mo kilai ira vakavinaka cake? Tarogi ira na daukaulotu! E rawa ni ra vukei iko!9 E rawarawa na nodra raica na ivola ni kawa vakaitamera ena Lotu i Jisu Karisito ni Yalododonu Edaidai.

Eso vei kemuni o ni lewenilotu ia o ni sega ni vakaitavi tiko ena gauna oqo. O ni lomana na Turaga ka dau nanuma vakalevu mo ni lesu tale mai ki na Nona lomanibai. Ia o ni sega ni kila me tekivu vakacava. Au vakatura mo ni tarogi ira na daukaulotu!10 E rawa ni ra vukei iko! E rawa talega ni ra veivuke ena nodra vakavulici na nomuni daulomani. O keimami kei ira na daukaulotu keimami lomani kemuni ka gadreva me keimami kauta lesu mai na reki kei na rarama ni kosipeli ki na nomuni bula.

Eso beka vei kemuni ena vinakata me kila na sala me na vakadruka kina e dua na veivakatotogani se me bula balavu ka marautaka na ituvaki ni bula vinaka. Tarogi ira na daukaulotu! E rawa ni ra vukei iko! Sa vakadinadinataki ena veivakadidike yadua ni, vakailawalawa, o ira ena Lotu i Jisu Karisito ni Yalododonu Edaidai era tamata bulabula. E tu sara i ra na ivakarau ni nodra mate ka ra tamata bula balavu, me vaka a ripotetaki ena veilawalawa kece era vakadikevi ena loma ni dua na gauna balavu e Amerika.11

Eso beka vei kemuni e nanuma ni sa rui osooso na bula ka vakaogaoga, ia ena boto ni lomamu o vakila ni lala tu, sega ni vakaibalebale se vakainaki. Tarogi ira na daukaulotu! E rawa ni ra vukei iko! E rawa ni ra vukei iko mo vulica vakalevu cake na inaki dina ni bula—na cava o mai tiko kina e vuravura kei na vanua o na lako kina ni o mate. E rawa ni o vulica na sala me vakalougatataka kina na nomu bula na kosipeli vakalesui mai i Jisu Karisito ka me sivia na veika kecega e rawa ni o vakasamataka ena gauna oqo.

Kevaka e tu na nomu lomaleqa ena vuku ni nomu matavuvale, tarogi ira na daukaulotu! E rawa ni ra vukei iko! Sa ka bibi sara vei ira na Yalododonu Edaidai na vaqaqacotaki ni bula vakawati kei na matavuvale. E rawa ni tawamudu na bula vakamatavuvale. Kerei ira na daukaulotu me ra vakavulica vei iko na iwalewale me na rawata kina na nomu matavuvale.

E rawa talega vei ira na daukaulotu mera vukei iko me baleta na gagadre ni vakarabailevutaki ni nomu kila-ka. Na yalo ni tamata e gadreva tu na veivakararamataki. Se lako mai na dina ena dua na volau ni vakadidike se mai na ivakatakila ni Kalou, eda vakasaqara! Na lagilagi dina ni Kalou na vuku.12

Na tubucake ena vuli e oka kina na kila-ka vakayalo vakakina na kila-ka vakayago. Eda tukuna tiko na bibi ni kena kilai na ivolanikalou tabu. Ena dua na vakadidike se qai oti walega, e kunei kina ni o ira na Yalododonu Edaidai era kila-ka vakalevu duadua me baleta na vakabauta Vakarisito kei na iVolatabu.13 Kevaka o vinakata mo kila vakavinaka cake na iVolatabu kei na iVola i Momani, ka vakarabailevutaka na nomu kila-ka me baleta na bula vakaveitacini vakatamata kei na bula vakatama va-Kalou, tarogi ira na daukaulotu! E rawa ni ra vukei iko!

E vuqa vei kemuni e tu vua na gagadre me vukei ira na tamata era vakaleqai tu. Baleta ni keimami muri Jisu Karisito, o ira na Yalododonu Edaidai era dau nanamaki talega ki na sasaga ni veicuqeni vaka oya.14 E rawa ni ko mai duavata kei keimami ena nodra vukei na vakaleqai ka vakakina na vakarautaki ni veivuke vei ira era gadreva ena veileqa tubukoso ena veivanua kecega e vuravura. Kevaka o via vakaitavi, tarogi ira na daukaulotu! E rawa ni ra vukei iko!

Kevaka o via kila vakalevu cake na veika me baleta na bula ni oti na mate, baleta na lomalagi, baleta na ituvatuva ni Kalou me baleti iko; kevaka o via kila vakalevu cake na Turaga o Jisu Karisito, na Nona Veisorovaki, kei na Vakalesui mai ni Nona Lotu me vaka na kena tauyavutaki taumada, tarogi ira na daukaulotu! E rawa ni ra vukei iko!

Au kila ni bula tiko na Kalou. O Jisu na Karisito. Sa vakalesui mai na Nona Lotu. Au masuta vagumatua na Kalou me vakalougatataki kemuni yadua kei ira yadua na noda daukaulotu talei. Ena yaca i Jisu Karisito, emeni.

Show References

  1.  

    1. Thomas S. Monson, “Ni Da Mai Sota Tale,” Liaona, Nove. 2010, 5–6.

  2.  

    2. Raica na Vunau kei na Veiyalayalati 4:3.

  3.  

    3. Raica naMaciu 10:1; Luke 6:13; 10:1; Efeso 4:11–12.

  4.  

    4. Raica naVunau kei na Veiyalayalati 1:30.

  5.  

    5.  Maciu 28:19.

  6.  

    6. Raica na Vunau kei na Veiyalayalati 68:8; 84:62; 112:28.

  7.  

    7. Raica na 1 Korinica 2:2; 2 Nifai 25:26.

  8.  

    8. Veitaratara yadua mai vei W. Tracy Watson, na peresitedi e liu ni Tabana ni Kaulotu na Arizona Mesa.

  9.  

    9. Ena vanua au sa biuta kina na malanivosa ni veisureti me ra “tarogi na daukaulotu,” e rawa talega ni o kerea e dua na nomu itokani e lewena na Lotu me vukei iko.

  10.  

    10. Era na marau talega me ra veivuke na wekamu, nomu itokani, kei ira na iliuliu ni Lotu.

  11.  

    11. Raica na James E. Enstrom kei na Lester Breslow, “Lifestyle and Reduced Mortality among Active California Mormons, 1980–2004,” Preventive Medicine, vol. 46 (2008), 135.

  12.  

    12. Raica naVunau kei na Veiyalayalati 93:36.

  13.  

    13. Raica na U.S. Religious Knowledge Survey (Pew Forum on Religion and Public Life, Sepi. 28, 2010), 7.

  14.  

    14. Raica na Ram Cnaan, Van Evans, Daniel W. Curtis, Called to Serve: The Prosocial Behavior of Active Latter-day Saints (University of Pennsylvania School of Social Policy and Practice, 2012); “Mormon Volunteerism Highlighted in New Study” (16 ni Maji, 2012), http://www.mormonnewsroom.org/article/mormon-volunteerism-report; Mormons in America: Certain in Their Beliefs, Uncertain of Their Place in Society (Pew Forum on Religion and Public Life, 12 ni Janu., 2012), 43; Robert D. Putnam kei David E. Campbell, American Grace: How Religion Divides and Unites Us (2010), 444–54.