2010–2019
Kajjitōk ippān Mijinede ro! Er Remaron̄ Jipan̄ Eok!
Oktoba 2012


Kajjitōk ippān Mijinede ro! Er Remaron̄ Jipan̄ Eok!

Aolep mijenede ro, reddik im rūtto, rej jerbal kōn kōjatdikdik eo wōt n̄an kōm̧m̧an bwe mour en em̧m̧anļo̧k n̄an armej ro jet.

Ro jeiū im jatū jitōb bōro, im ro m̧ōtta, kōm̧ij lewaj am iakwe im karuwainene n̄an kom̧ kajjojo. Eļap ad m̧ōņōņō kōn kōjjeļļā eo an Būreejtōn Thomas  S. Monson jibbon̄ in, eo ej ukōt diktata in iiō n̄an jerbal in mijenede n̄an 18 n̄an likao ro im 19 n̄an jiron̄ ro. Jen kālet in, elōn̄ļo̧k iaan jodikdik ro ad remaron̄ lan̄lōn̄ kōn kōjeram̧m̧an ko an juon mijen.

Ruo iiō ko rem̧ootļo̧k im kajoor im bar kapene ilo jibbon̄ in, Būreejtōn Monson eaar kwaļo̧k “bwe aolep likao eo erreo, maron̄ aikuj m̧aanjabpopo n̄an jerbale juon mijen. Jerbal in mijenede ej juon eddo an priesthood—juon jerbal eo Irooj ej kōtmenik kōj ro raar leļo̧k n̄an er eļap.”1 Bar juon eaar kōmeļeļeik bwe jejtōr ro reddik, juon mijen ej juon kālet eruwainene bōtaab ejjab juon eddo. Im bar juon alen eaar karuwaineneik elōn̄ ļo̧k mijenede ro rerūtto n̄an jerbal.

M̧aanjebpopo n̄an juon mijen eaorōk. Juon mijen ej juon m̧akūtkūt ejjeļo̧k wōnāān n̄an jerbal n̄an Anij im aolep armej. Jipan̄ eo an mijenede ro rej jeram̧m̧an jen joortoklik ko aer make. Ro jinen im jemān, baam̧le ko, ro m̧ōttād, im ro rej jipan̄ļo̧k General Missionary Fund eo barāinwōt maron̄ jipan̄. Aolep mijenede ro, ro reddik im rūtto, rej jerbal kōn wōt kōm̧m̧anm̧anļo̧k mour n̄an ro jet.

Jokālet eo n̄an jerbale juon mijen enaaj kareel mejānkajik in jetōb eo an mijenede eo, ļeo ak lio pālele, im ro ineer n̄an epepen ko rej itok. Juon ikdelel n̄an jerbal ej juon piktokin waļo̧k in an juon oktak, erreo, im m̧aanjebpopo.

Ilo jarlepju in eļap ipeļaakin laļ in, elōn̄ iaami rej jab membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata im rejeļā jidik wōt kōn kōj im mijenede ro ad. Kom̧ij ron̄jake ak alooje kweilo̧k eo eļap kōnke kom̧ kōņaan jeļā eļapļo̧k kōn Mormon ro, im ta eo mijenede ro ad rej katakin. Ilo ami ekkatak eļapļo̧k kōn kōm̧, kom̧ naaj loe bwe ewōr ippam ejja aorōk ko wōt ippami. Kōm̧ij rōjan̄ kom̧ n̄an kōjparok aolep men ko rem̧m̧an im m̧ool, innām lale eļan̄n̄e kom̧ maron̄ kalōn̄ļo̧k. Ilo laļ in eobrak kōn apan̄ ko, jej aikuj jipan̄ jān iien n̄an iien. Kabun̄, m̧ool eo n̄an indeeo, im mijenede ro ad rej menin aikuj n̄an jipan̄ in.

Mijenede ro ad reddik rej to̧rto̧re m̧aanļo̧k aer jikuuļ, jerbal, jerā, im jabdewōt men ko jodikdik ro rerūtto ekkā aer kōm̧m̧ane ilo tōre in mour in. 18 n̄an 24 allōn̄ ko, ilo jidik iien rej joļo̧k n̄an kōm̧m̧ane bar juon men, kōn ikdelel eo em̧wilaļ ippāer n̄an jerbal n̄an Irooj.2 Im jet iaan mijenede ro ad rej jerbal n̄e relukkuun in rūtto. Ijeļā bwe baam̧le ko aer rej jeram̧m̧an. Ilo baam̧le eo am make, ruwalitōk rej jerbal kiiō āinwōt mijenede ro rej jerbal aolep raan—jilu nejū leddik, ļōm̧aro pāleer, juon jibū leddik, im juon jibū ļaddik.

Jet iaami remaron̄ bwilōn̄ kōn āt eo Mormon. Ej juon et bajjōk n̄an kōj. Ejjab lukkuun āt eo etam, lukkuun jeļā kajjeem̧ āinwōt Mormon ro. Naan in ej itok jān juon bok in jeje ko rekwojarjar jeļā kake āinwōt Bok in Mormon eo.

M̧ool in etan Kabun̄ eo ej Kabun̄ eo an Jisōs Kraist im Armej ro Rekwojarjar ilo Raan-ko Āliktata. En̄in ej ekar bar ejaak in Kabun̄ eo an Jisōs Kraist m̧okta. Ilo iien mour eo An, E eaar ejaake Kabun̄ eo An. E eaar kūr Rijilōk ro, Jiljilimjuonn̄oul ro, im ritōl ro jet n̄an ro E eaar leļo̧k mālim an priesthood eo n̄an jerbal ilo Etan.3 Ālkin Kraist im Rijilōk ro An raar mej, armej raar ukōt kain̄i ko im katak eo. Kabun̄ eo m̧okta im priesthood eo eaar jako. Ālkin Juon Tōre in Maroklep, im ium̧win tōl an Jemedwōj Ilan̄, Jisōs Kraist, eaar kōjepļaaktok Kabun̄ eo An. Kiiō ebar mour, bar jepļaaktok, im ej jerbal ium̧win tōl eo ekwojarjar An.4

Jej ļoor Irooj Jisōs Kraist im katakin kōn E. Jejeļā bwe ālkin anjo̧ eo An eaiboojoj ioon mej, Irooj eo eaar jerkakpeje eaar waļo̧kļo̧k n̄an rijilōk ro An elōn̄ iien ko. Eaar m̧ōn̄ā ippāer. Eaar etetal ippāer. M̧okta jen Wanlōn̄ļo̧k eo An Āliktata, Eaar kajjitōk ippāer n̄an “Ilo̧k … im kōm̧m̧an ri aelōn̄ ko otemjej bwe ren ri kaļora, im peptaij er ilo etan Jema im Nejin im Jetōb Kwōjarjar.”5 Rijilōk ro raar eo̧ron̄ kōmeļeļe in. Raar bar āinwōt kūr ioon ro jet n̄an jipan̄ er kakūrm̧ool ennaan in an Irooj.

Rainin, ium̧win tōl jen rijilōk im rikanaan ro raan kein, ejja kajjitōk in wōt eaar etal n̄an mijenede ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Mijenede rein rej jerbal ilo elōn̄ļo̧k jen 150 laļ ko. Āinwōt ribōk jikin Irooj Jisōs Kraist, rej kajjieon̄ kakūrm̧ol ennaan in ekwojarjar—kar kōkāāl ilo raan kein ad jen Irooj Make—n̄an bōk tarlep in gospel eo n̄an likin im kōjeram̧m̧an mour ko an armej jabdewōt jikin.6

Mijenede ro repād ilo aer jodikdik ak im̧aan in 20 jima iiō ko ilo iaļ ko an Irooj. Ak rej bōk kōjeram̧m̧an kōn menin letok ko—āinwōt kajoor eo an Jetōb Kwojarjar, iakwe eo an Anij, im naan in kam̧ool ko an m̧ool eo—men kein rekōm̧m̧an bwe ren rijilōk ro rekajoor an Irooj. Rej kwaļo̧k nuuj ko rem̧m̧an an gospel eo me enaaj bōktok lan̄lōn̄ eo em̧ool im m̧ōņōņō eo ejjeļo̧k jem̧ļo̧kin n̄an aolep ro rej eo̧ron̄ ennaan eo aer. Im ilo elōn̄ kōtaan ko, rej kōm̧mane menin ilo juon laļ im juon kajin ejjab aer.

Mijenede ro rej kajjieon̄ ļoor Jisōs Kraist ilo jim̧or naan im kōm̧m̧an. Rej kwaļo̧k kōn Jisōs Kraist im kōn Pinmuur eo An. 7 Rej katakin jepļaaktok eo em̧ool an Kabun̄ eo an Kraist etto jen rikanaan eo kein kajuon an Irooj, Joseph Smith.

Kom̧ kar bōlen iioon er m̧okta, ak bōlen elļo̧k jān, mijenede ro am. Aō kōjatdikdik ej bwe kom̧ jamin naaj mijak er ak naaj ekkatak jān er. Remaron̄ erom juon kein jipan̄ jilkintok jān lan̄.

Eaar waļo̧k n̄an Jerry, juon em̧m̧aan in Protijen epād ilo 60 jim̧a iiō rūttoon, eo ej jokwe ilo Meza, Arizona. Jemān Jerry eaar juon rūkaki in Baptist; jinen eaar juon rūkaki in Methodist. Juon raan Pricilla eo m̧ōttan Jerry eaar kwaļo̧k ippān juon en̄jake eaar en̄jake jān mej eo an ajri eo nejin ilo juon iien kōļo̧tak im juon iien jepel ekōmetak eaar waļo̧k jidik iien tokālik. Kakkōt āinwōt juon m̧am̧a eo ejjeļo̧k ippān, Pricilla eaar wōr emān nejin ajri, jilu leddik im juon ļaddik. Ke ej kwaļo̧k en̄jake in ippān Jerry, eaar kwaļo̧k buruwōn bwe eaar ļōmņak in bōk mour eo an make. Kōn aolep kajoor im iakwe, Jerry eaar maron̄ loe ilo e, eaar kajjieon̄ jipan̄ e meļeļe bwe mour eo an ewōr aorōk in. Eaar kajjitōk ippān n̄an etal n̄an kabun̄ eo an, ak Pricilla eaar kōmeļeļeiki bwe eaar meļo̧kļo̧k Anij.

Jerry eaar jab jeļā ta n̄an kōm̧m̧ane. Tokālik, tōre eo ej wuttidikdiki wut ko ilo jikin kallib eo an, em̧m̧aan in etōmak eaar jar n̄an Anij kōn tōl. Ke eaar jar, eaar ron̄ juon ainikien ilo kōļmenļo̧kjeņ eo an ej ba, “Bōjrak ļaddik raņ ioon baajkōļ ko.” Jerry, eaar jidik pok, ļōmņak ta meļeļein men eo. Ke ej kejōkļo̧kjeņ kōn waļo̧k in, eaar reilōn̄ļo̧k ilo iaļ eo im lo ruo likao rej ekkōņak jōōt mouj im tae rej baajkōļ tok n̄an m̧weo im̧ōn. Kar bwilōn̄ kōn “waļo̧k,” in eaar lale aer baajkōļļo̧k. Innām, ememej jekjek eo eaar kōm̧m̧an menin an m̧akūtkūt, eaar lam̧ōj, “Hey, kom̧iro, jouj bōjrak! Ij aikuj kōnaan n̄an kom̧iro!”

Kōn juon pok bōttab ekam̧ōņōņō, likao ro raar bōjrak. Ke rej kepaak, Jerry eaar kile bwe raar ekkōņak name tag ko rej kwaļo̧k kadkadier āinwōt mijenede ro ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata. Jerry eaar kalimjōk er im ba, “Menin emaron̄ jidik oktak, ak iaar jar im kar jiron̄ n̄an ‘kabōjrak ruo ļaddik ioon baajkōļ ko.’ Iaar reilo̧k n̄an iaļ eo, im ijin kom̧ro. Komiro maron̄ ke jipan̄ eō?”

Mijenede ro raar ettōn̄ dikdik im ba, “Aaet, ijeļā kōm̧ maron̄.”

Jerry eaar kōmeļeļeik etke eaar inepata kōn Pricilla. Ejjab etto mijenede ro raar ioon Pricilla, ajri ro nejin, im Jerry. Raar kōnono kōn unin mour in im karōk in indeeo eo an Anij n̄an er. Jerry, Pricilla, im ajri ro nejier raar eddōkļo̧k ilo tōmak jen jar em̧ool, aer katak kōn Bok in Mormon, im iakwe jemjerā ippām membōr ro an Kabun̄ eo. Kajoor eo ekadede kōn tōmak ilo Jisōs Kraist ippān Jerry eaar kajoorļo̧k. Pere eo an Pricilla im ļōmņak ko n̄an kilaba raar oktak n̄an kōjatdikdik im lem̧ōņōņō. Raar peptaij im erom membōr ro an Kabun̄ eo ear jepļaaktok an Kraist.8

Aaet, mijenede ro remaron̄ jipan̄ ilo elōn̄ wāween ko. N̄an waanjon̄ok, jet iaami remaron̄ kōņaan jeļā eļapļo̧k kōn rūtto ro ami. Kom̧ maron̄ jeļā āt ko etan ro jinemi im jememi im emān ro jibumi im jim̧aami, ak ta kōn ruwalitōk epepen in jibum̧i im jim̧aami? Kwojeļā ke āt ko etaer? Kom̧ kōņaan ke jeļā eļapļo̧k kōn er? Kajjitōk ippān mijenede ro! Remaron̄ jipan̄ kom̧!9 Emōkaj aer deļo̧n̄e rekoot in menmenbwij kileplep eo am an Kabun̄ eo an Jisōs Kraist im Armej ro Rekwojarjar ilo Raan-ko Āliktata.

Jet iaami rej membōr ak rejjab kwaļo̧k aer bōk koņaer. Am iakwe Irooj im emakijkij in roolļo̧k n̄an Kabun̄ eo An. Ak kom̧ij jab jeļā ewi wāween jinoe. Ij ļōm̧ņak bwe kom̧in kajjitōk ippān mijenede ro!10 Remaron̄ jipan̄ kom̧! Remaron̄ barāinwōt jipan̄ jen katakin ro nejim̧ rejitōn bōro. Kōm̧ im mijenede ro rej iakwe kom̧ im kōņaan in bōktok lan̄lōn̄ im meram eo an gospel eo ilowaan mour ko ami.

Jet iaami remaron̄ kōņaan jeļā ewi wāween n̄an eļļā ioon an̄ūrlep ak mour eaitokļo̧k im lan̄lōn̄ kōn ājmour em̧m̧an. Kajjitōk ippān mijenede ro! Remaron̄ jipan̄ kom̧! Ekkatak ko make ļo̧k rej kwaļo̧k bwe, āin juon kumi, an membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata rej juon ājmour in kumi in armej. Jon̄ok ko kōn aer mej repād ilubwilijin eo ediktata im aetokan aer mour eļapļo̧k jān jabdewōt ripoot ilo jabdewōt kumi kar ekkatak kaki ilo juon iien eaitok.11

Jet iaami remaron̄ en̄jake bwe mour eboub im m̧ōkaj, ilo en̄jake ko ami rem̧wilaļ kom̧ maron̄ en̄jake juon metak eālij ejjeļo̧k kobban, ejjeļo̧k tōl ak unin. Kajjitōk ippān mijenede ro! Remaron̄ jipan̄ kom̧! Remaron̄ jipan̄ kom̧ ekkatak eļapļo̧k kōn m̧ool in unin mour in—etke kom̧ij pād ijin ioon laļ in im ia kom̧ij etal n̄ane ālkin mej. Kom̧ maron̄ ekkatak ekōjkan an jepļaaktok eo an gospel eo an Jisōs Kraist naaj kōjeram̧m̧an mour eo ami ilōn̄ in men otemjej kom̧ maron̄ kōļmenļo̧kjeņ kake.

Eļan̄n̄e ewōr ami nūrbōktak kōn baam̧le eo ami, kajjitōk ippān mijenede ro! Remaron̄ jipan̄ kom̧! Kōkajoorļo̧k m̧are ko im baam̧le ko ej aorōktata n̄an Armej ro Rekwojarjar ilo Raan-ko Āliktata. Baam̧le ko remaron̄ pād ippān doon n̄an indeeo. Kajjitōk ippān mijenede ro n̄an katakin kom̧ ewi wāween an maron̄ menin n̄an baam̧le eo am.

Mijenede ro remaron̄ barāinwōt jipan̄ kom̧ kōn kōņaan eo ami eļapļo̧k kōn jeļāļo̧kjeņ eo eļapļo̧k. Jetōb an armej rej lukkuun ikdelel n̄an juon tōre. Men̄e m̧ool eo ej itok jān juon science laboratory ak jen madenļo̧k jān Anij, jej pukōt e! Aiboojoj an Anij em̧ool ej jeļāļo̧kjeņ eo.12

Ļapļo̧k in ekkatak ekitbuuj jetōb barāinwōt jeļāļo̧kjeņ ilo ānbwin. Jej kwaļo̧k aorōk eo kōn meļeļe jeje ko rekwojarjar. Ilo juon ekkatak makeļo̧k kar loe bwe Armej ro Rekwojarjar ilo Raan- ko Āliktata raar meļeļe eļap kōn Rikūrijin im Baibōļ eo.13 Eļan̄n̄e kom̧ kōņaan meļeļe eļapļo̧k kōn Baibōļ eo, n̄an meļeļe kōn Bok in Mormon eo, im bōk juon jeļāļo̧kjeņ eļap kōn jemjati an armej im jem̧doon an Anij, kajjitōk ippān mijenede ro! Remaron̄ jipan̄ kom̧!

Elōn̄ iaam̧i ewōr juon an ikdelel eļap n̄an jipan̄ armej ilo aikuj. Kōn ke jej ļoor Jisōs Kraist, Armej ro Rekwojarjar ilo Raan-ko Āliktata rej barāinwōt kipel jen kipel eo ejjab bōjrak. 14 Jabdewōt eo emaron̄ kobatok ippam n̄an jipan̄ riaikuj im bōkļo̧k mour n̄an ro rejelet er jān jorrāān ilo laļ in. Eļan̄n̄e kom̧ aikuj bōk koņaami, kajjitōk ippān mijenede ro! Remaron̄ jipan̄ kom̧!

Im eļan̄n̄e kom̧ kōņaan jeļā eļapļo̧k kōn mour ālkin mej, kōn lan̄, kōn karōk eo an Anij n̄an kom̧; eļan̄n̄e kom̧ kōņaan in jeļā eļapļo̧k kōn Irooj Jisōs Kraist, Pinmuur eo An, im Jepļaaktok eo an Kabun̄ eo An āinwōt kar ejaake m̧okta, kajjitōk ippān mijenede ro! Remaron̄ jipan̄ kom̧!

Ijeļā bwe Anij ej mour. Jisōs ej Kraist eo. Kabun̄ eo an em̧ōj an jepļaaktok. Ilo kajoor, ij jar bwe Anij en kōjeram̧m̧an kajjojo kom̧ im kajjojo mijenede ro ad reaiboojoj, ilo etan Jisōs Kraist, amen.

Kakeememej ko

  1. Thomas S. Monson, “As We Meet Together Again,” Liaona, Nov. 2010, 5–6.

  2. Lale Doctrine and Covenants 4:3.

  3. Lale Matu 10:1; Luke 6:13; 10:1; Epesōs 4:11–12.

  4. Lale Doctrine and Covenants 1:30.

  5. Matu 28:19.

  6. Lale Doctrine and Covenants 68:8; 84:62; 112:28.

  7. Lale 1 Korint 2:2; 2 Nipai 25:26.

  8. Kōnono eo an make jān W. Tracy Watson, kar būreejtōn eo an Arizona Mesa Mission.

  9. Ia eo iaar kwaļo̧k kūr eo n̄an “kajjitōk ippān mijenede ro,” komaron̄ kajjitōk ippān juon m̧ōttam eo ej membōr in Kabun̄ in n̄an jipan̄.

  10. Lukkuun bōk koņaam ippān ro nukum̧, ro m̧ōttam, im ritōl ro an Kabun̄ in renaaj m̧ōņōņō in jipan̄.

  11. Lale James E. Enstrom im Lester Breslow, “Lifestyle and Reduced Mortality among Active California Mormons, 1980–2004,” Preventive Medicine, vol. 46 (2008), 135.

  12. Lale Doctrine and Covenants 93:36.

  13. Lale U.S. Religious Knowledge Survey (Pew Forum on Religion and Public Life, Sept. 28, 2010), 7.

  14. Lale Ram Cnaan, Van Evans, and Daniel W. Curtis, Called to Serve: The Prosocial Behavior of Active Latter-day Saints (University of Pennsylvania School of Social Policy and Practice, 2012); “Mormon Volunteerism Highlighted in New Study” (Maaj. 16, 2012), http://www.mormonnewsroom.org/article/mormon-volunteerism-report; Mormons in America: Certain in Their Beliefs, Uncertain of Their Place in Society (Pew Forum on Religion and Public Life, Jānwōde. 12, 2012), 43; Robert D. Putnam and David E. Campbell, American Grace: How Religion Divides im Unites Us (2010), 444–54.