Lak Ko Medakt er a Blakelreng, Klisiich, me a Omeruul

Mlara Bishop Gary E. Stevenson

Omerreder er a Bisop


Bom klikiid el uai tirkel erul telael el soldau el mo blak a rengmiu el mesisiich loba priesthood.

Chelechal kesus eak mengedecheduch er a rengeasek el sechal loba Aaronic Priesthood, el kldibel el meliuekl er a beluulechad er tial miting er a priesthood. A kuuchais er kemiu er a cheldecheduch el ngara Babier er a Mormon el mesaod er a Helaman me a eru el telael el soldau er ngii. Tial chedaol llechukl a meskid a llomes el kirel a blekerdelir tirkal ngeasek el sechal rr a uchelel—e suobel lekor kemiu, a rengeasek er a uriul-klebesei. Ak mo dulii a kmal soak el bades el kmo tirka kmal mle mekekerei el sechal, e mle bekeu el kirel a blakelreng ma klisiich me a omeruul. E diak dil tiang el merekong,—tirka uleba klemerang er a bek el taem er a ikel le bla er ngii.”1 Blakelreng, klisiich, omeruul, me a klemerang—ng kmal ungil blekeradel!

Ng soak el me a mesaod el kirel sel kot el blekeradel el smodeterir: “mesisiich er a blakelreng.” A denguu er ngak e tia smodii a klaumerang er tirkal ngeasek el chad el bekeu el meruul a llemalt, malechub eng uai kel lolekoi a Alma el kmo, “te dechor el sioning ra Dios ra ngii dil taem … ra rokui el basio.”2 Tirkal erul telael el soldau a mle betok aikel taem lochotii a blakelreng. A dersta er kemiu meng dirrek el morngii a taem er a klengar kemiu el kiriu lochotii a blakelreng. A sechelik, er a John, a ulechais er ngak a teletael dilubech er a klengar ngii.

Sesei el rak er a memong ea John a le kilengei er ngii el mora ta er a merael chisel daingak er a Siabal. Ng mo teloi er a rebebil er a rengalek er a skuul er a kakerous el beluu lobengterir a rebebil er a kmal ungil ngalek er a skuul el meliuekl er a beluulechad. A rebebil a siliseb loureng el mo dmolech a klemedengei er tir er a siukang me a omelekoi, ea rebebil a ulemes er ngii el uaia le did el kirel a techall er a ureor er a beluu er a Siabal, eng di tir el rokui a tilobed er a ungil klengar er a rekeblirir el mo ngara omesuub er a ta er a beluu.

Uriul er a le kerd a John eng ulberk a tekoi er a delongelir tirkal ngalek er a skuul el kirel a ungil klebesei el mo er ngii. Sel kesus, ea John me a reteru el sechelei a mlo er tial basio.

Uriur er a le ngara elevator el mor tial basio, ea John me a resechelil a ulemdid a terebel el mocha er bebul tial blai e mocha chadecheduch tir me tirkal bebil er a rechad. A lorael mocha osoi, ea teletael a mlengodech. A cherrodech, klou el ongak, me a rrom a mlo klou, me a John a uaia blo lak el soal tial teletael. E di mle kiul, a chad el mocha omechobech er tirkal ngalek er a skuul el mo klou el chaibibeob el melatk a omesterir a marijuana me lolokou. A John a mlo mekngit osengel e dula er tirkal teru el sechelil el kmo ng mla mo taem el lorael. Meng uaia le mlotuub, le ta er tir a dilu el kmo, “John, ng kmal beot—ker di dechor er a chaibibeob, e sel bol temed e ker di nguu lodersii er ngkel ta er a chad e diak dolokou er ngii. Seikid eng diak de sal mo ongengael er a rebek el chad a dorael.” Ng meral kora mle beot a lomes er ngii a John, eng di dimlak el melemalt. Ng mle medengei el kmo ng kirel ouchais er a moktek er ngii e rullii. Tiaikid eng mocha smisichii a rengul el mlo diak el medakt e dula er tir el kmo sel sorir el meruul er ngii, eng di ngii a merael. A chimo ra sechelil a di kiliei e mlo teloi er tirkal ngara chaibibeob; e ngika el chimong a ulekiuellel a John el metengel er a terebel el mora elevator. Ng mlo mechas a rengrir, ele tia er a lobok a chesmerel a elevator, ea rebulis er a Siabal a orreched e merael mora bebul tial blai. A John me a sechelil a ngosecha er a elevator e merolang.

Tia er a ltoech a rebulis er bebul a terebel, e tirkal el ngalek er a skuul a di mle mereched el ngmai aikal mekngit el kar el metech e riou me lak el mudechem. Uriul er a lededesii tial terebel, e tirka, el bulis a ulemechobech er a rebek el chad e dilu er tir me lodars a chimorir. E sola tirkal bulis a merael, loudersechimo tir e melungel a bechos me a belngel a chedngelel chimorir. Tirkel rokui el ulerreked a marijuana, a lullokou er ngii me a lak, a di mlo telechakl, e kmal mlo meringel a kelebsengel. Tirkel rokui, el ngalek er a skuul el mlara chado er tial blai a mle kubir er a ikel skuul le bla er ngii ea rechad el mle uchul a usbechellel aikal mekngit el kar a mlotaut er a llach e mlodik el tuobed er a beluu er a Siabal. Urungulir er a skuul, rak el longedmokl er tir, me a techall er a ureor er a beluu er a Siabal a miltemall er a di chelsel a kedeb el taem.

Msall e kuuchais el kmo ngera dilubech el mo er tirka el tedei el sechelei. Ngkel sechelei el di kiliei er bebul a chado a mle kubir er a daingak er a Siabal el ngii a kmal mle meringel loureor el kirel e mle kirel lmuut el mo remei. Ngkel sechelei el mirrael lobengkel a John er sel kesus a rirekir a omesubel er a Siabal e millemolem el mlo nguu a degree er ngii er a eru el merael chisel daingak er a Beluu er a Merikel. A urerel a mle uchul eng liluut el mora Asia, el dmeu a rengul kirel a ungil urerel. Ng mel muut er chelechal sils eng melemolem loureng a sulel a John er a blakelreng el okesiu er ngii. Ea domes er a John, ea klungiaol el mlora klengar ngii a kmal betok el diak lobasech. A temel mlara Siabal a mlo uchul a ungil chebechiil me a cherellir a reteru el ngelekel sechal. Ng kmal ungil besul el chad er a siobai e kmal dirk mlengai el mo sensei er a ta er a daingak er a Siabal. Omomdasu eng locha mle sebechel mengodech a klengar ngii omko ng dimlak a blakelreng er a rengul el merael mo er cheroid er sel omilil er sel kesus er a beluu er a Siabal.3

Rengeasek el sechal, ngarngii a taem, e ko mo uaia John, el kiriru lochotii a llemalt me a blakelreng er a mederir a rebesechiu, el ta ko mo motuub e mo merur el kirel. Osisiu, chelechal beluulechad, el betok a mekngit el osongel el mchelebangel, el ngara rua tibi. A beches el klekedall el ngii a ngarngii a klungiolel a dirrek el mla er ngii ongetikaik er a chelsel el dimlak leues tirkel telcheroll ruchei er kemiu. A omesuub a mla metik el kmo a rengeasek er chelechal taem a diak dil chelebangel onegtikaik er a skuul te dirrek el chelebangel ongetikaik er a melidiul. Ng ouchais el kmo tirkel ngeasek el tir a ulemes a teletael er a omelim el rrom me a usbechellel a mekngit el kar er a rua internet a edei el mora euang a techellir el mo ousbech a rrom ma mekngit el kar. Meng dilchel a tekoi er a ikal omesuub, ea mle US Cabinet Secretary a dilu el kmo: “A omesuub er chelechal rak a ochotii a beches el mesisiich el ongetikaik er a retelbasech—el ongetikaik er a beches el klekedall. A ongetikaik er a beches el klekedall a chengelakl er a di sechelil a ngalek me a tirkel dak el milil. Ng soiseb e ra blai me a delmerab er a ngalek lokiu a internet.”4A olchotel a llemalt er a blakelreng a sel mereched el metir malechub eng diak de betir. A remisionari a mla mosisechakl er sel babier er a Molisechakl er a Ebangkelio er Ngak, .“Aikel molilt el mo omdasu ma moruul sel dil kau el tang e oumerang el kmo ng diak a chad el mesekau a mesisiich el telkelel a kldung er kau.”5 Bol blak a rengum! Bo mesisiich! “Bom dechor er a chedaol basio e lak ko mesim.”6

Rengeasek el sechal, ak yaksok el kmo a Rubak a mo melisiich er kemiu. “Ele Dios a dimlak el beskid a reng er a dakt; ng bai klisiich.”7 Ngii a mo meskemiu a ngkediu el kirel a blakelreng me a llemalt el omerelliu—lobengkel a deureng. Tiaikid el balkelreng a olchotel a klaumerang er kemiu er a Jesus Kristo ma Tngakireng er Ngii, ma nglunguchiu, me a otireklemiu er a llechul.

A President N.  Eldon Tanner a dilu el kmo: “A chimol ngeasek el buik el ngara maori er a skuul a sebechel mo mesisiich el klungiaol er a rebebil. A chimol chad el ngara tim er a football, malechub a maori ra skuul, malechub sel teloi er a ldak loureor el chad, lokiu a otireklel er a ebangeklio, e mengull er a priesthood lobang, e mesebechakl er a llemalt, a sebechel uchul a betok el klungiaol. Ke blechoel mo blil a mekngit lomelekoi me a otuub luldimukl er tirkel loumerang osisiu el tekoi el uai kau, eng di te mo mengull er kau el kirel a llemalt el moruul. Molatk el kmo a Osobel meng mlodechelakl, mlotuub, miltub, e mlekerus ele ngii el dimlak el mesim er a klaumerang er ngii. Ke locha mla mo chelellakl e omdasu el kmo ng locha ngera dilubech omko ngii a dilu el kmo, ‘Tia, ngera ng rullii?” e chilitii a ngerchelel? Kid ng soad el kimer, a lechub eng soad el mo blak a rengud el mesiou el diak el iior er a ikel ultok me a mekngit el ngara beluulechad? Mei e bo de bekeu el mo dechor e bo de mucherangel el meral, mesisiich el oltirakl er a Kristo.”8

Ak siotai er kemiu el mo klikiid el uaia tirkel erul telael el soldau el mo blak a rengmiu el mesisiich loba priesthood. Molbedebek, aikel moruul, sel bor ngii, aikel momes a mo teletelel a klechad er kau. Ng soam el mo ngerang? Bom klikiid el deacon, klikiid el sensei, e klikiid el prist. Mkedmeklau el mo klikiid el kirel aikel medechel el chedaol ruoll er chelechal taem el mo sebechem el ta ra klebesei e ke nguu a Melchizedek Priesthood. Tiaikid a rael ra llemalt el uchul a chedaol ngeso el mei er kid. A Rubak a mla kmo, chelsel a chedaol ruoll, ea klisichel a kledios a mocholt.”9

A roungalek, me a roungerachel er a priesthood, me a mla mulaoch el meklou a belkul el debetik er a babier er a Ngerachel el mo er a Dios me a Mo er a Klisichir a Rengeasek a mo omekrael er kemiu er a roliu.

A President Thomas S. Monson a dirk millekoi el kmo:

“A mo uchul a ungil omelilt er a [uldasu], eng usbechall a blakelreng—el blakelreng el kmo ng diak, blakelreng el kmo oi.

“A kulengit er kemiu me moterkeklemiu er chelechang … el diak, mtouchakl er sel rael el bedul a moktek er kid: el ngii a diak a ulebengelel klengar lobengkel a Demad er a Babeluades.”10

Meng di uai tirkel eru el telael soldau el kilengei er a okedong er a merreder er tir, el Helaman, ete ulechotii a blakerreng el diak el medakt, me kemiu meng sebechiu osisiu el teletael sel moltirakl er a okedong er a profet, el President Thomas S. Monson.

Kemiu el ngeasek el ngelekek loba Aaronic Prieshood, ak mo mengesimer lochotii a klaumerang er ngak er a Dios el Chedam me a Jesus Kristo me a tekingel a Joseph Smith: El milngelechel er kid me dolemolem er tial klou a belkul moktek. Ng dilu el kmo ng kired lomakes el bedul uchei e diak dobeteteluut, bol blak a rengud, e dorael mo mesisiich!”11 El ngara ngklel a Jesus Kristo, amen.

Show References

  1.  

    1.  Alma 53:20.

  2.  

    2.  Mosiah 18:9.

  3.  

    3. Cheldecheduch el mildung.

  4.  

    4. Joseph  A. Califano, Jr., miltik e oungerachel ra National Center on Addiction and Substanec Abuse er a Columbia University, tilobed el chais el kirel a, www.casacolumbia.org.

  5.  

    5.  Preach My Gospel : A Guide to Missionary Service (2004), 118.

  6.  

    6. Mesa Doctrine and Covenants 87:8.

  7.  

    7.  2 Timoti 1:7.

  8.  

    8. N. Eldon Tanner, “For They Loved the Praise of Men More Than the Praise of God,” Ensign, Nov. 1975, 74–75.

  9.  

    9. Mesa Doctrine and Covenants 84:20.

  10.  

    10. Thomas S. Monson, “The Three Rs of Choice,” Liahona ma Ensign, Nov. 2010, 68.

  11.  

    11. Mesa Doctrine and Covenants 128:22.