2010–2019
M’uthaen’ u fithik’ e Athamgil, ngo Gelingraed ngo Pasig
October 2012


M’uthaen’ u fithik’ e Athamgil, ngo Gelingraed ngo Pasig

Mu tem ni rayog ni ngam rrin’ ni boed fapi l’agruw mira’ay i salthaw ni yaed ba athamgil ni yaed e pi priesthood ni yaed ba yul’yul’.

Biney e balayal’ e gube thamiy ni baga’ ni ngug weliy ni boed e bishop ngak e pi pumo’on ni fal’ yangren, picha’an nibe koel fare Aaronic Priesthood, nikan kunuy nga ta’abang u dakean e fayleng ni fan ko biney e mo’olung ko general priesthood. Gube weliy ngomed ba chep u lan fare Babyor ku Mormon nibe weliy mornga’agen Heleman nge l’agruwi biyu’ i salthaw rok. Biney e chep nib thothup e ran nangfan rogon e pi pumo’on nem ni fal’ yangren ni kab kakrom—ban’en nib mangil ni fan ngom, pumo’on ko tin tomur e rran. Nggog e bin ni guba adag e chep nib thothup: “Ma yaed gubin ni pagael nib fel’ yangren, ma rib m’uthaen’raed u fithik’ e athamgil, ngo gelingraed ngo faraed pasig; machane musap gaed, dawori mus aray—yaed bogi pagael ni yaed ba yul’yul’ u gubin e ngiyal’ u fithik’ gubin ban’en.”1Athamgil, ngo gelingiy ngo pasig, nge riyul’—e ban’en ni rib mangil!

Gu ba adag ni ngug tiyan’ug ko bin somm’on e n’en nibe weliy mornga’agen raed: “m’uthaen’raed u fithik’ e athamgil.” Gag rog, ma biney e be weliy e gelngin nib alamrin e mich rok e pi pumo’on ney ni fal’ yangren ni ngar rrin’ed e n’en nib mataw’, fa napan ni weliy Alma ni, “ngam pired ni gimed e mich rok’ Got ni gubin e ngiyal’… nge gubin yang.”2 Bukun e pin’en nike buch ko fapi l’agruwi biyu’ i salthaw ni yaed be athamgil. Ra bagmed ma kubay e n’en nike buch u lane yafas rom u fithik e athamgil. Ba fagar rog i, John, e weliy ngog mornga’agen reb e n’en nike buch rok u lane yafas rok ni aram rogon.

Bukun e duw nike thimur, me un John ko ba university u Sapan nib mangil. Ma mang bang ko program ko bitir ni gathi bee’ nu rom ni yaed boech e bitir nib cheg nag u dakean e fayleng. Boech e kar uned u fithik e athap ni ngar nanged fan e yilen nge thin nu rom nib fal’ rogon, ma boech e yaed be sap ngay ni boed ni ban’en ni ra ayuweg raed ni ngar murwel gaed u Sapan, machane yaed gubin e kar suled nga tabinaew ko biroraed e nam.

Napan ni taw John ni dani n’uw napan, ma ra non bee’ ko ba madnom u dakean e chig ko na’un ni gin nima ma’thuk e bitir nga ta’abang—rayog ni nge un bee’ ngay fa’anra ba adag ni ngan mukun nga ta’abang ni ngan nangey. Ra nep nem me yag l’agruw e fagar ngak John mar raned ko ra gin’em.

Napan ni yibe yan u lan e elevator ko bin tha’abi tolang e floor ko fare na’un, me leak John nge tafagar rok ba kanawo’ ni yaen ko tawo’ nibe sar nga dakean e chig man tabab i ma’thuk ko boech e gidii’. Ta’aboch ko re nep nem me thil rogon fare n’em. Lungay, ga’ngin langan e musik, nge rom ni yibe unum e ke gel, me kikireb rogon John. Me tabab bee’ i yarmiy e gidii’ u but ngan fal’eg ba lulbuy nib ga’ ni ngan ser nag e maruwana. Me kikireb rogon John me yoeg ko fare gal fagar rok ni ngar chuw gaed. Me fulweg bagyow nib mak’ring langan, “John, biney e ba moem—kemus ni gadaed ra paer ko fare lulbuy, ma napan ni ke taw ngodaed, ma gadaed pi’ ngak bee’ ni dabin thoey. Iraram rogon ma dabin tamra’ niged gadaed ni ngad chuw gaed u powchen e gidii’.” Ba moem langan e biney ngak John, machane dani mangil rogon. Manang ni nge yoeg rogon e tafiney rok me mithmith. Ta’aboch riy me athamgil me yoeg ngorow ni rayog ni ngar rrin’ew rogon ni yow ba adag, machane ir e nge chuw. Bagyow e paer nge un ko fare sabal; ma bagyow e un ngak John ngar sulow nga but ko fare tawo’ iyan ko fare elevator. Mar gin’ gow ngay, ni maab fare elevetor, me yib e polis nu Sapan riy nga waen mar pas niged row, ngar thimur gaed, mar gurgur niged yaed ngar ranoed nga dakean e chig. John nge fagar rok e ranow ko fare elevator mar chuw gow.

Napan ni taw fapi polis nga lang ko fare tawo’, me gurgur fapi gidii’ ngar n’aged fapi drug nga wuru’ e chig ya ngeyog ni dabin koel raed. Napan nimu’ i tuluf raed u dakean fare chig, machane, fapi polis e ri laniyaen niged gubin fapi cha’ u dakean fare chig ma ra bee’ man nog ngak ni nge ki’yag l’agruwi pa’ nga m’on. Me arame yaen fapi polis ko fare layn, ni yibe faraboen pa’ raed nge buguli pa’ raed. Gubin e picha’an nike koel fare marijuana, demtrug ko ke thoey fa danga’, e kan tay nib kireb, ma bo’or e magawon nike yibe nga pulwon. Chuchgur ni gubin, fapi gidii’ nikar magay gaed u dakean fare chig e kan taleg raed ko skuul. Picha’an ni be pi’ e drug e kan tay raed ni yaed e kar fal’eged e oloboch ma kan chuweg raed u dakean yu Sapan, ni dabkiyog ni ngar suled u lan bukun e duw. Tin ni yi ba adag ni ngan rrin’ ni fan e skuul, urngin e duw ni kan fal’eg rogoy, nge murwel ni rayog ni nge yag u Sapan e daki m’ag.

Ere nggog ngomed e chiney e n’en nike buch ko fare dalipi fagar ney. Fare fagar nike paer u dakean e chig e kan taleg ko fare university u Sapan ni kari murwel nib alamrin ni nge thap ngaram ma ke sul nga tabinaew. Fare fagar nike un ngak John kar chuw gow u rom e kar mu’ nigew e skuul u Sapan ma ke yag e degree ngorow ni yow reb ko fapi bitir ni tha’abi cheg nag u Mariken. Murwel rok e ke fulweg nga Asia, ko gin ni falfalen’ ko murwel rok ni rib falel’. Ke paer nib falfalen’ ke taw ko biney e rran ni bachane e athamgil rok John e wo’ rok. Ma John, pi magawon rok u lane yafas rok e bo’or ni ngan tha’eg. Ngiyal’ ni bay u Sapan ko re duw nem ma ke mabgol nib falfalen’ ma l’agruw e bitir rok nib pagal. Ke mang bee’ nib businessman nib cheg nag ma kafini mang e professor u university u Sapan. Mu tafiney niged rogon e yafas rok ni ra thil fa’anra dani athamgil ni nge chuw ko fare party ko ra nep nem u Sapan.3

Pi pumo’on ni fal’ yangren, bay e ngiyal’ napan ni, gara boed John, ni gara dag e athamgil rom u fithik e mangil napan nibe yaliyem e pi tafagar rom nge pi magawon ni ra yib ngom nge tamra’. Machane, ko biney e rran, ma gabe yaen u fithik e magawon, nge tin ban’en nibe yib ngom ni nge kireb nigem. Technology e ni bay rogon nima pi’ e magawon ni dawori nang e pi yangar um’on rom. Kan pir’eg e chiney ni gathi kemus nibe yib e lumel ko pi fal’ yangren nibe leam nib gel ni gubin e rra u skuul machane ku arragon ni yibe yus nag e internet. Ke m’ug ni pi fal’ yangren e kar macham gaed ko ching nag fa drug ni yibe guy ko network e dalip nge mada’ ko aningeg yay ni yibe use nag e rom fa drug. Kan noeg ko fare survey, ni reb e secretary u Mariken e ga’ar: “Survey ko biney e duw e bin bi’ech e nib gel e fagar nibe towasor ngom—nib gel e towasor. Towasor e kuma buch ko fare fagar ko fare bitir nge pi bitir ni yaed be cheg ngoraed. Ma suguy e tabinaew nge Internet u lane senggil ko fare bitir.”4Athamgil nikan dag nib mataw’ baga’ ni ra kireb fa’anran click fa dabin click. Kan fil ko pi tamachib u lane Machib Nag E Gospel Rog,“N’en ni gara leam nag mag rrin’ napan ni go’gur ma ba mich u wun’um ni dariy bee’ nibe sap e ba measure ko n’en nib mangil rom.”5Mu athamgil! Mu gel nigem! “Mu sak’iy ko gin nib thothup, ma dam chuw riy.”6

Pi pumo’on ni fal’ yangren, gube micheg nag ni ra ayuwegnem Somoel. “Kan nthothup nike pi’ Got ngodad e dar ma ngongliydad ni ngad rusgad; machane Kan Nthothup rok e ma pi’ gelngidad.”7Ra pi’ e tawa’ath ngom ni fan ko athamgil rom nge pangim nib mataw’—u fithik e falfalen’. Binem e athamgil e pow ko mich rom ngak Yesus Kristus nge Bayul Rok, nge meybil rom, nge pi motochiyel ni gabe fol riy’.

Ke ga’ar President N. Eldon Tanner: “Reb e pagal nib bitir u skuul e rayog ni nge yag e tin mangil ban’en ngak. Reb e pumo’on nib fal’ yangren e bay tim ko football, fa skuul, fa fithik e tafagar rok e rayog ni, gospel ni ngan paer u fithik, me tay fan e priesthood rok, me paer ko tin mataw’ ban’en, me rrin’ e tin mangil ban’en. Baga’ ni yibe ogtharanem ma be kireb nigem e picha’an ni picha’an ni gimew nga biyang e ra daram nigem demtrug ko yibe tay fam ni gabe rrin’ e n’en nib mangil. Machane mu tay fam riy ni fare Tathapeg e kan gafgow nag, kan kireb nag, kan thuw nga dakean, man li’ ngem’ ni bachane ni dani nonon napan niyibe thin ngak. Bay e ngiyal’ ni kam tal mag leam nag ko mang e ra buch fa’anra ke mo’owaer me ga’ar, ‘Oh, dariy fan e biney e ban’en?’ me chuw ko mo mission rok? Gimed ba adag ni ngum waer gaed, fa gimed ba adag ni demtrug gelngin e tagan u fayleng ma gimed e pi tapigpig nib mangil? Ngad athamgil gaed nga rrin’ed e n’en nib riyul’, man mang e pi gachalpen Kristus.”8

Gube piningmed ni ngam paer ni gimed ba mataw’ ni rogon ni rrin fapi l’agruwi biyu’ i salthaw ni ngan athamgil nib mangil ni yibe koel fare priesthood. Tafineymed ko, mang e ngam rrin’, uw e ngam man ngay, nge mang e gara guy ni ngam mang. Mini’ e gaba adag ni ngam mang? Deacon ni ngam mang nib mataw’, tafanow nib mangil, priest nib mangil. Mu dugliy e n’en ni ngam rrin’ ni ngeyog e bin migid e gam’ing ngom ko bin mangil e yangar ni nge yag fare Melchizedek Priesthood ngomed. Biney e kanawo’ ko tin mataw’ ni ra feek iyib e ayuw nib thothup. Fare gelngin Got e m’ug u lane pi gam’ing ko fare Melchizedek Priesthood.9

Galabthir, pi toygang’ ko priesthood, nge pi n’en nib mangil e ram pir’egned u lane pamphlet romed ko Duty to Godand For the Strength of Youthe ra ayuwegmed iyan.

Kafini yoeg President Thomas  S. Monson ni:

“Mu dugliy e [n’en ni ngam rrin’] nib mangil rogon, athamgil e ra tu’uf—mu athamgil ni ngam moeg e danga’, mu athamgil ni ngam moeg e arrogon. …

Gube wenig ngomed ni ngam rrin’ed … e chiney, ni damul gaed ko fare kanawo’ ni ra feek daed iyan ko n’en ni kad dugliyed: yafas nib manechubog ni gadad bay ko Chitamangdad nu Tharmiy.”10

Boed fapi l’agruwi biyu’ i salthaw ni kar rrin’ed e n’en nike yoeg e toygang’ roraed, Heleman, mar yarameg e athamgil roraed, kurayog romed ni ngam rrin’ed nib ta’aborogn ni ngam laked e toygang’ romed ni profet, i President Thomas  S. Monson.

Pi cha’an nibe koel fare Aaronic Priesthood ni fal’ yangren, nggu ning ni nggog e mich rog ni Got ni Chitamangiy nge Yesus Kristus nge thin rok Joseph Smith nike yoeg ngodaed ningad dareb u u fithik e biney. Ke yoeg ni thingar darod nga m’on ma gathi nga tomur, ngeyog e athamgil, man yan nga m’on ko victory.11U dakean fithngan Yesus Kristus, amen.

Notes

  1. Alma 53:20.

  2. Mosiah 18:9.

  3. Chep nikan noeg ko cha’an nibe non.

  4. Joseph A. Califano, Jr., founder nge chairman emeritus ko fare National Center on Addiction and Substance Abuse at Columbia University, nike yoeg mornga’agen fare research, casacolumbia.org.

  5. Preach My Gospel: A Guide to Missionary Service(2004), 118.

  6. Muguy ko Doctrine and Covenants 87:8.

  7. 2 Timothy 1:7.

  8. N. Eldon Tanner, “For They Loved the Praise of Men More Than the Praise of God,” Ensign,Nov. 1975, 74–75.

  9. Muguy ko Doctrine and Covenants 84:20.

  10. Thomas S. Monson, “The Three Rs of Choice,” Liahona,Nov. 2010, 68.

  11. Muguy ko Doctrine and Covenants 128:22.