“Pokitan Ngang mi Manau, Ami Oupwe Pwan Manau”

Nupwe ngang ua misineri non Chile, am mei chienei aua churi fumon chon eu famini non am we pranch. Ewe In mi fafan iteitan kapach nimon noun kewe. Am mi pwisin mefi pwe ra choni ei Mwichefel me inet, nge am mi mairu ne kaeo pwe esap ir memper non ach mwichefel.

Aua ennetin atapwan ne tingor am aupwe tongeni afanafaner non imwer. Ewe Sam ese mochen kaeo, nge ese pwan oput am aupwe churi ewe famini.

Sister Ramirez a men tipachem o muttir non an kaeo. A men mochen kaeo ekkewe kapasen anonganong non am kewe nesson.Non eu kunionen, am mi kaeo ussun ewe angangen patataisi monukon aua aitir pwe ekkewe kukkun mi nimenimoch o ese wor namwotan ar patatais. I a aneani seni ewe Puken Moroni:

“Nengeni, ua apasa ngonuk pwe ei mettoch kopwe afanafana–aier me paptais ngeni ekkewe ir mi poroingau non netiper, ir mi muttir tupungeni ar repwe pwan for tipis; ennet, pwan afanafana ekkewe sam me in repwe pwan aier me paptais, iwe, repwe atekisona netiper usun chok nour kewe kukkun semirit, iwe, repwe pwan fiti nour kewe kukkun semirit ne manau.

“Iwe, nour kewe kukkun semirit resap mo pwan aier are paptais. Nengeni, ewe paptais a fis pokiten a wor ewe aier pwe epwe pwonueta ekkewe annuk ren ewe omusomusen tipis.

“Nge ekkewe kukkun semirit ir mi manau non Kraist, seni chok nom me mwen an epwe fisita fonufan; pwe are esap iei ussun, iwe ewe Kot esap I emon Kot napanap are Koten feinfeino chok, esap wor asamonun me ren aramas pun a fen chommong ekkewe kukkun semirit ran mano rese mo paptais!”¹

Mwirin an aneani ekkana wokisin, Sister Ramirez a poputa ne kechiw. Am me chienei ause weiweiti. Ua eisini “Sister Ramirez, me aua for are apasa om kopwe osukosuk ren?”

A apasa pwe ap, “Elter ese wor met ke for. Non ekkewe onu ier mi wor emon nei at. A ma me mwen an epwe patatais. Nuem we prist a erenikem pwe pokitan an ese patatais I ese tongeni tonong non nang. Non ekkewe onu ier ngang mi mwarei na metek non ai ekieki. Iei ai anea na wokisin ngang mi sinei me ren ewe Ngun mi Fel pwe mi ennet. Ua mefi ussun ika ua ngaseno. Iei kechiw non ai pwapwa.”

A chemeto kapasen ewe Soufos Joseph Smith: Ewe Samon a angei seni kich chommong, tori pwan ekkoch nemonukoner, pwe repwe su seni mettochingauen ei fonufan; ir mi nimenimoch, ir mi tong, nap seni ei fonufan. Iwe sipwe pwapwaseni ar tou seni tipis, ekkisano repwe nom rech. ²

Mwirin onu ier fan riafou me metek ese tongeni wes, ewe kapas ennet, minne Semach won Nang a pwarata me ren emon soufos, a echipa ei fefin. Ennet, Sister Ramirez me noun kewe ra patatais.

Ua chechemeni ai mak taropwe ngeni ai famini non ai kinisou fan itan niwinsefaniton chommong ennet me auchea o fat non ewe kapas allimen Kraist. Use mo achangei ifa amwararen ei nongonong epwe niwinsefan ngeniei non fansoun mwach me epwe winiti ai feioch me minen chikar seni Kot.

Ua mochen kapas ngeni ekkewe mi wor emon nour mi poutuno o kapas eis ngeni nang, “Pwata ngang?” Are ra tipemwaremwar ar nuku non Semach won Nang. Amo ika pwe seni pechekunen ewe Ngun mi Fel, upwe wato och kinamwe, nuku, o weweiti. Ua men mochen ai upwe emon chon aninis non an Semach won Nang angangen aniwinsefaniton om nuku non Semach won Nang, ion mi sinei mettoch meinisin o mut ngeni kich fansounen manauach pwe sipwe kaeo ussun I o tongei I o weweiti pwe ika esap punun I, kich sise manau.

Non February 4 non 1990, nuem aunumonen at o aonumonen noun a uputiw. Aua eita ngeni Tyson. A men atoch o aua fakkun tongei. Pwin me feffinan kewe ra men pwapwaiti. Aua ekieki pwe mi unusoch.

Nupwen a wanu maraman a waromi efoch chalk minne a kuna non ewe pun. A nom non chioran o ese tongeni ngasangas. Pwin we watte a wata rem o puchor non osukosuk “koko ese ngasangas, koko ese ngasangas. Am mi kokkori piwin o poputa ne fori met an epwe tongeni ngasangas ren.

Chon piwin ra war o uwei Tyson ngeni piwin. Non nenien witiwit am mi soposopono non am iotek netipetekisonen netipem an epwa chikar. Mwirin och fansoun ewe toktor a tonong rem o erenikem, “Omusano. Ese wor met am mi tongeni fori. Oune asoso tori ami mi moneta.” Iwe a tou.

Nupwen am mi tonong non ewe rum aua kuna ewe ennetin pwapwan manauem, nge mi ma. Ennet ussun ita mi saramaram. A ennetin nimenimoch.

Non chok na autun ua mefi ussun ita manauem epwe wesino. Ifa ussun am aupwe tongeni niwiniti neum kewe o achocho ne aweiwei ngenir pwata Tyson esap pwan feito neimw.

Iei upwe kapas fan itei chok non ai aporausa ei tutunap. Am me punuei aua mefi ei mettoch ngeni ennet, ese naf ai kapas ne uau ekkewe memef non netipen punuei, iwe usap pwan sotuni.

Ese tufich ai upwe awewe ekkewe chommong memef non na autun non manauei. Ennet ua ekieki pwe ua chok anchangei ekkei mettoch o ua mochen pwata pwe epwe wes. Non fitu pwin, use annut. Ua chok kukkumos fetan non imwem pi pwe ekkewe nimon neum mi kinamwe.

Ua men mengiringir non nguni. Ennet use kinamwe. Ussun ika ua nimengau. Ngang semen atewe ua tipis non ai use tumunu. Iei mwirin 22 ier ua chuen mefi ekkei mettoch non netipei nge ua atouauer seni pokiten use nuku mi och.

Eu maram me mwirin an mano ngang ua interfiu ren Elter Dean L. Larsen. A ausening ngeniei o ua ennetin kinisou ren an kapas fono o an tong. A apasa “Ewe Samon ese mochen om kopwe metek ren manon noum we at. Ua mefi an Semach won Nang tong me ren emon non chon angang.

Ina mo, ekkewe sokkun ekiekin riaffou mi chuen nom rei o ngang ua song. Pwata Kot a tongeni ina ngeniei. Pwata ngang? Met ai foffor Kot epwe efeingauaei? Ua pwan song ren ion mi sotuni ne echipakem. Ua chechemeni chienem kewe ra apasa “Ua sinei met ka mefi.” Ua ekieki “ap kese sinei met ua mefi. Su seniei.” Ei sokkun ekieki mi chok pwan efeingauaei. Ua sau ren ekkewe ekieki mingau ua mefi fan iten chienem kewe.

Ua mefi sau, song, o pwan och ekiekingau ra mochen nemeniei, nge ua iotek pwe netipei epwe siwin. Ewe Samon a fang ngeniei eu netip mi fo, o ikamo ua chuen metek o metip manauei a siwin. Ua kaeo pwe Kot ese sona seni, nge epwe efeiochuei ika ua nukuchar non ai anneasochis.

Manauei a siwin o ua neneno mwei non nuku, use chuen neneno mwiri non rochopwak. Ua sinei pwe ei manau esap muchanon manauach. Ewe nenien ngun mi ennet. Kapasen ekkewe soufos ussun manauach mwirin ei manau mi ennet. Iei kich mi chok fetan non ach sipwe niwiniti Semach won Nang.

Tyson mi chuen emon chon am famini. Am mi ennetin kinisou ren an Semach won Nang umoumouch o kichioch pun a mut ngeni am famini ne mefi ngunun Tyson. Ua pwarata pwe ewe nenien ngun ese kan touau. Ekkewe memefen tong non famini o aninnisfengen rese much ika emon ach famini a ma, nge ra fen pechekunono

Fan ekkoch emon epwe apasa a ifan taman om ka riaffouni manon Tyson? Ennet upwe ekkis riaffouni tori fansoun am mi chusefan non tong. Ai pwapwa esap unus tori am aupwe chusefan non ewe Aewin Manausefanita.

“Ewe Samon a pwarata ngeni Joseph pwe kich aramas mi ngun, o sipwe uren pwapwa;

Nge ika ewe inis mei ngun mi aimufesen, ach pwapwa esap unus.³

Nge, tori na fansoun sipwe fetan mwech non pwapwa.⁴

Ua kaeo pwe ewe netipechou o metek epwe witini pwapwa ika ka kunungeni Semach won Nang o tingor an echip epwe nom wom ren ewe kokkotun pwapwa; Noun we, Jises Kraist; me ewe Ngun mi Fel.

Mwa met ren ei feioch non manauach. Sipwe wesen umwes ika emon nouch a ma, nge sise netipechou. Ua men kinisou ren seman won Nang o an mut ngenikich ach sipwe tongfengen feinfeino. Ua kinisou ren famini esemuch. Ua pwan kinisou pwe a pwarata ewe kokkotun manau esemuch me ren nour kewe soufous.

O chechemeni ika a wor mi ma non om famini, ekkewe mettoch ka mefi non netipom, ussun ika netipom epwe tatakis om ka nengeni ar pworen peias.

Ua pwarata pwe pokitan I ach Chon Amanau Jises Kraist, ekkewe memefin netipechou, tipemwaremwar o rochopwak epwe kuf ren ewe saram mi unus. Ua pwarata pwe sia tongeni nuku non an kapas:

“Usap su sonuk. Upwe feito reom.

“Ekkisano chok chon fonufan resap kunaei, nge ami oupwe kunaei, iwe pokitan om kunaei, oupwe pwan manau.”⁵

Ua pwarata pwe ussun met mi mak non Preach my Gospel,“ren ach apinukunuk non ewe Achesefan an Jises Kraist, I epwe anisikich non ach sossot, semwen are metek. Sipwe uren pwapwa, kinamwe, o echip. Mettoch meinisin epwe punguno ren ewe Achasefanen Jises Kraist.”⁶

Ua pwarata pwe non sorotanen ewe Aeuian Manausefan, ekkewe sia tonger repwe pwata seni ekkewe peias ussun met mi pwon me ren ewe Samon o sipwe uren pwapwa. Pokitan I a manau, ir pwan kich sipwe pwan manau. Non itan Jises Kraist, amen.