2010–2019
“Le Ngak el Ngar, Me Kom Dirrek el mo Ngar”
October 2012


“Le Ngak el Ngar, Me Kom Dirrek el mo Ngar”

Eleng Ngii, mengii el Osobeled, el Jesus Kristo, me a ike el reng er kid ra chelbuul, klengit el reng, a mo oberekakl el ngii a morngii a deureng er kid.

Ak ngeasek el misionari el ngara beluu er a Chile, ea kldemek me a ngak a mlo kebetech ma ta el teuid a rechedal telungalek er tial branch. A chedil a mlei er a bek el sandei lobengterir a rengelekel. Aki ulemdasu el kmo te meketeketang elchedal a Ikelesia. Sesei el sandei ruriul ea ki mocha medengei el kmo tirka dirkak el metecholb.

A ki di mle mereched el mo er tial telungalek e ulengit me ki bo molisechakl er tir. A chedam a dimlak a klemeriar reng er ngii eng di dimlak a ultekengel kirel osisechakl el mora telungalek er ngii.

A Sister Ramirez a kmal mle mereched el suub aikal suobel. Ng mle semeriar el mesuub aikel rokui el osisechakl el ki mulsisechakl. A ta el kesus er a ki mosaod el kirel a techolbechelid er a retolechoi, ea ki ulisechakl el kmo a remekekerei el ngalek a klikiid e diak lousbech er a techolbechelid. A ki ulengit er ngii el mo menguiu er a babier er a Moroni:

“Morrenges, ak melekoi er kau el kmo tiakid el tekoi a bo molisechakl er ngii—ouchelreng me a techolbechelid el mo er tirkel mla mo medengei a rengrir e sebechir el meruul a klengit;oi, molisechakl er a roungalek me bo louchel a rengrir er a kngterir e bo el metecholb, e lengai a rengrir el mo er iou el mo uaia remekekerei el ngalek, e tir a mo suobel tir me a remekekerei el ngelekir.

“Ea remekekerei el ngelekir a diak el ousbech er a ouchelreng, me a techolbechelid. Kamosang, a techolbechelid a ngara ouchelreng el mo churrengelii a llach el kirel a ngbetel a klengit.

“Eng di a remekekerei el ngalek a ngar er a Kristo, el di mla uaisei er a uchelel a beluulechad; le lak el uaisei, ea Dios olab el mo er a ta me a tang el Dios, e dirrek el mo ngodech el Dios, el mengull e ra rehcad; le te telang el mekekerei el ngalek a mla mad el dirkak el metecholb !”1

Uriur er a longuiu er tial bades, ea Sister Ramirez a longelang. Ng mlo rrau a a rengmam. Me a kuleker, “Sister Ramirez, ngarngii a ki bla mdelii malechub ea ki mla rullii el tomellii a rengum?”

Ng dilu, “Ng, diak, e Elder, ng dirkak a ngera el mtemellii. Elolem el rak er a memong eak milchelii a ngalek el sechal. Ng mlad ruchei er a le metecholb. A prist a dilu el kmo ngii el dirkak el nguu a techolbechelid me chelecha eng mora limbo el mora ulebongel. Ng elolem el rak el kurusii el ngara ringel. Uriur er a kungui er tial bades, e ak medengei lokiu a klisichel Chedaol Reng el kmo ng klemerang. Ak melchesuar a klou el berraod el mengubet er ngak, ea ikang a lengelel a deureng.”

Ak mlo melbedebek osischeklel a Profet Joseph Smith, el millekoi el kirel tial osisechakl: “A Rubak a ngoiteterir a rebetok, uldimukl er a retolechoi, me luchul el chiis er a chechelingaol reng ra chad, me a mekikiongel me a mekngit er tial beluulechad; te kmal mle iimis el klikiid, kmal klebokel, er tial beluulechad; maleuaisei, a dungil omtab er ngii, eng diak el kired el ngara klengit el reng ng bai deureng el tir a cheroid er a cheraro, e kid a lmuut el mo mesterir.”2

Uriur er a elolem el rak le kurursii el ngara ringel, ea klemerang el osisechakl, a mlocholt lokiu a oubeltikereng el Chedam er a Babeluades lokiu a ngar el profet, el mlo uchul a budech el mo er ngikal kurusii el redil. Msall e kuuchais, a Sister Ramirez me tirkel ngelekel el eai a rekrir el mo er bab a miltecholb.

Ak medengei er a kuluches el mora telungalek er ngak, louchais er a omereng el saul er a renguk el kirel a klemedengei er tiang me a lmuut el bebil er a bleketakl e mekreos el klemerang er a ebangkelio er a Jesus Kristo. Ng mla melcheluches er a uldesuek el kirel aikal klemerang el osisechakl el kmo ng mekera e lmuut el mei er ngak er a ta er a klebesei e mo moterekokl el klengeltengat er a Dios.

Ng soak el mengedecheduch el kirir tirkel mla mad a ngelekeir e oker er a ker el kmo, “Ngera me ngak?” Malechub e ko moumededenger er a klaumerang er kemiu er a Chedam er a Babeluades. Nglunguchek me lokiu a klisichel Chedaol Reng, e bol sebechek el meskemiu a telkib er a urunguliu, budech, me a klemedengei. Ng moktek er ngak el mo dongu el meskemiu a ngeso el kirel a klaumerang er kemiu er a Chedam er a Babeluades, el ngii a medengei a rokui el tekoi e mechikid me kede sosieb er ongarm me bol sebeched el mo medengelii e doubeltikelreng el mor Ngii e bo dodengei el kmo a lak Ngii eng diak de ngerang.

Se er a Ongeru el buil er a 1990, ea ongedei el ngelekam el sechal el ngii ongelolem el ngalek a mlechell. A ki milngeklii el Tyson. Ng mle klebokel el ngalek el sechal, me a telungalek a uledkeu er ngii er a rengrir me a bedengir. A rubekul me a ruchedal a mle chemat erngii. A ki rokui el ulemdasu el kmo ng kot el klebokel el buik el mla mechell.

A Tyson er a le eai el bilel, eng mirkeklii a telkib el chalk el biltik er ngii er a carpet er a ulaol. Tial chalk a siliseb er a omorkolel a Tyson, meng mlo diak louteliil. A obekul a kilderii el mei er tial rebab er a blimam, loldiu el melekoi el kmo, “Ngkal ngalek a diak louteliil, ng diak el sebechel louteliil.” Me a ki mocha msa CPR e omekedong er a 911.

Ng di mle mereched a ambelans el mei e nguu a Tyson el mora ospitar. A ki ngara delmerab el mengiil, e milluluuch el kmal lolengit er a Dios el kirel ongasireng. Ng mlo meketeket, ea toktang a tobeda el mei er tial delmerab e dula el kmo, “Mousubes. Ng mla mo diak a ngera el sebeched el rullii. Ng diak morreched e mkedmeklemiu.” E sola merael.

Tia er a ki msiseb er a delmerab le bla er ngii a Tyson, ea ki milsa ngika el deureng er a rengmam el diak longitengtik. Ng kora uaia le ngarngii a llomes el meliuekl erngii. Ng kmal diliich e klikiid.

Tiaikid ea ki mlo omelchesiu el uaia lekea belkul amoktek er a klengar kemam. Aki mekera ki bo mosaod el mo er tirka el bebil er a rengelekam el kmo a Tyson a dikea luut el me remei?

Ak mo mesaod er tial teletael el oba sel kuk di uldesuek. A bechik me a ngak a dilak el soiseb er tial meringel el ongarm, eng di ngak a metitur el mesaod aikel lomelchesiu a chedil meng diak kulasm el mo mesaod.

Ng meringel el kusaod aikel betok el blo kumelchesiu er tiaikid el taem er a klengar ngak. Oumesingd el taem eak mlo omelchesiu el uaia kngara chelsel a mekngit el berrous el locha di telkib el taem eak bekiis e tial mekngit el berrous a mla remiid. Betok el klebesei el dimlak bok bad. Ak blechoel mekiis a le osoi e merorael aikal delmerab, el omes me tirkal bebil er a rengelekam a ungil ngara selbechakl.

Ak mlo omelchesiu a mekngit el kirek. Ak mlo omelchesiu el telmellek. Ng mle kngtik. Ngak a demal; e mle kirek el kerekikl el omecheliu er ngii. A ltang mle sebechek el rullii a kmo ngerang. Bebil er a taem er chelechal sils, el lluich me a eru el rak ruriul, ea ikaikid el kumelchesiu a me soiseb er a renguk, e kirek el mereched el choroid e le lak eng sebechel tomellak.

Tal buil ruriul er a secherel a Tyson, eak mle chadecheduch ngak me a Elder Dean L. Larsen. Ng kmal mle ungil lorrenges er ngak, me a kmal mereng a sulel er a tekingel me a beltikelreng er ngii. Ng dilu el kmo, “A kumdasu ea Rubak a diak el soal mengelbus er kau el kirel a kodellel a ngelekem.” Ak mlo melchesuar a beltkil a rengul a Demak er a Babeluades lokiu a ngellitel el mesiungel.

Eng di, a mekngit el uldasu a millemolem el mei er a uldesuek, eak mocha omelchesiu el kesib a renguk. Tia diak el ungil! A Dios ngera me ng uaisei er ngak? Ngera me ngak? Ngera ak mla tomellii el kirel tiang? Ak dirrek el mlo omelchesiu el kesib a renguk er a rechad el millasem el mengelaod er kemam. Ak medengei tekingir a resechelimam el kmo, “Ak kmal medengei omomelchesiu.” E ngak a melekoi er a renguk el kmo, “Ng kmal diak a klemedengei er kau el kirel a kumelchesiu. Bai bom cheroid er ngak.” Di mle telkib eak mo medengei el kmo sel dil kid el chubkid eng sebechel tomellid. Ak mlo merur el di ngak lomdasu a mekngit el kirir a resechelimam el millasm el olngeseu er kemam.

Tiaikid el kumelchesiu er a mekngit, ngasechereng, di ngak el chubkak, eak milluluuch lolengit me a renguk lemengodech. Me ngokiu a kmal chedaol teletael, ea Rubak a milskak a beches el reng, meng uaisei el dirk mle meringel er ngak, eng di a osengek a mlengodech. Ak mlo medengei el kmo ng diak a ngera el mla mo dibus er ngak ng bai klengeltengaat a medechel alsekum ak mo blak a renguk.

A klengar ngak a mocha mengodech, e mocha sebechek lomes el bedul uchei, e dikea kumes er a klengit el reng er chelii. A kuuchais el kmo tial klengar a diak lulebongel. A belurir a redeleb a mera el ngarngii. A osischeklir a reprofet el kirel a klengar ruriul er a kodall a klemerang. Tial klengar a di tal bakes el bedul sel omerael el mora Chedam er a Babeluades.

A Tyson a melemolem el klou a belkul er a telungalek er kemam. Me a chelsel aikal rak eng klebokel el bla ki mesang a chubechub me a blekokeuii er a Chedam er a Babeluades, el mla mechikemam el telungalek me a ki mla omelchesiu er a Tyson er a klengar kemam. A kuuchais el kmo a kateng a kmal meliliut. Aikel osisiu el domelchesiu el uaia klaumerang, beltikelreng, me a uldekial a telungalek a diak el ngemed sel le tobed a rebetik er a rengud er tial klengar el mo er sel bitang; ng bai kmal mo chachisois.

Bebil er a taem ea rechad oker, “Ng mle uangera klemengetel eng mlo diak momdasu er ngii?” A klemerang, ng diak el sebechem lobes er ngii el di merekmo omluut el mo dmak kau me tirkel mla mo dibus el betik er a rengum. Ng diak el sebechek el mo nguu a cherrungel el deureng el di merekmo ki mluut el mo dmak er sel tutau er a Kot el Okiis er a Kodall.

“A Rubak a ulechotii el mora Joseph el kmo a chad a reng ea klekedellel a diak a ulebengelel, ea reng me a klekedellel a diak el kakeakl el mo nguu a cherrungel el deureng;

“Ele a le kakeakl ea chad a diak el sebechel mo nguu a cherrungel el deureng.”3

Eng di chelechal taem, el uaia osischeklel Osobel, eng sebeched el melemolem el ngara deureng.4

Ak mla mo medengei el kmo sel meringel, el ua lak el sebechel motekau el ringel a sebechel mo kebekakl alsekum kede obult el mora Chedam er a Babeluades e olengit er Ngii ongelaod lokiu a Uldesuel; a Ngelekel, el Jesus Kristo; me a Ongelaod er Ngii, el Chedaol Reng.

Ng meral klou el klengeltengat er a klengar kid. Ng diak el sal chelebuul omko ng diak bol mekngit a rengud sel le mad a ngeleked? Ng dmeu a renguk er a Demak er a Babeluades el Ngii a mechikid me kede mo ngara dmolech el beltikelreng el mora ulebongel. A kuureng a saul el kirel a telungalek el mora ulebongel. A kuureng a saul el Ngii a mla lmuut el lochotii a uldasu er mo suobel lokiu a re ngar el profet er Ngii.

Ke melatk sel mngara kemeldillel a betik er a rengum, sel momelchesiu er ngii er a rengum sel morolang er a olekull e mobult lomes er a kahol—el omdasu el soal lobuu a rengum.

A kuuchais el kmo Ngii a uchul, ngii el Osobel el Jesus Kristo, ea ikel klengit el reng, klesabisi, me a klekurusii a ta er a klebesei eng mo klou el deureng. A kuuchais el kmo ng sebeched el ultuil er Ngii er a Tekingel kmo:

“Ng diak bechikemiu me lak ongolodiu: Ak mei er kau.

“Oi ng di telkib el taem, el beluulechad a diak lesekak; eng di kemiu a mesekak: le ngak el ngar, me kom dirrek el mo ngar.”5

A kuuchais el kmo, el uaia ikel ngara chelsel a Olisechakl er a Ebangkelio er Ngak,k “sel dultuil er a Tngakireng er a Jesus Kristo, e Ngii a mo ngosukid el otekangel ongarm, secher, me a ringel. Ng sebeched el mo mui er a deureng, budech, me a ongelaod. Aikel rokui el diak lungil besul er a klengar a sebechel mo ungil mesmechokl lokiu a Tngakireng er a Jesus Kristo.”6

A kuuchais el kmo sel klebokel, el tutau er a Kot el Okiis er a Kodall, ea rebetik er a rengum me ngak a mekiis er a debull el ngii a blel yaksok er Ngii a Rubak e kid a mo nguu a mui el deureng. E le Ngii el ngar, e tir me kid a dirrek el mo ngar. El ngara ngklel a Jesus Kristo, amen.