“Pwehki Ei Momour, Kumwail Pahn Pil Momour”

Ni aht wie papah ni duwen misineri pwulopwul nan Chile, ngehi oh iengeio tuhweng peneinei ehu me towe meh isimen nan pranso. Nohnohu kin iang sarawi nan wihk koaros iangahki nah serihko. Se wiahki me irail wereilahr nan Mwomwohdiso. Mwurin wihk tohto se diarada me re saikinte pepdais.

Se mwadangete koledi peneineio oh peki ma se kak kohla nihmwarailo oh padahkih irail. Pahpao sohte men iang kasukuhliki rongamwahuo ahpw e sohte uhweng sen padahkih ah peneinei.

Sister Ramirez mwadang koledi padahngko. E ngoangki en esehla koaros padahk me se kihda. Ehu nihsoutiko ni aht koasoakoasoaia pepdais ong seri pwelel kan, se padahngki me seri tikitik kan mwakelekel oh sohte anahne pepdais. Se luke liho en wadek nan pwuken Moroni:

“Kilang, I pahn indahiong uhk me iet me kowe en kin padahngki—Koluhla oh pepdais en wiawi ong irail akan me kak pwukoahki oh kak wiahda dihp; ehi, padahki pahpa oh nohno kan pwe irail en koluhla oh pepdaisala, oh karakarahkala duwehte neirail kisin serihkan, oh irail ahpw pahn komourla iangahki neirail kisin serihkan.

“Oh neirail kisin serihkan sohte anahne koluhla, de pil pepdais. Kilang, pepdaiso iei ong ni koluhla pwe en kapwaiada kosonned akan ong ni lapwapen dihp akan.

“Ahpw kisin serihkan kin momour nan Christ, sangete ni poahsondahn sampah, ma e pahn sohte mehlel, Koht iei Koht en poupali emen, oh pil Koht me kin kak ketin wekila, oh e kin ketin lipilipilki aramas akan; pwe ia duwen, seri depe melahr ni arail sohte kin pepdais!”¹

Mwurin eh wadek ire wet, Sister Ramirez tepida sengiseng. Ngehi oh iengeo pweipweida. I peidek, “Sister Ramirez, mie mehkot se wia de me se nda me kansensuwedihiuk?”

Liho nda, “Oh soh, Elder, ke sohte kasapwungehla mehkot. Sounpar weneu samwalahr I naitikihedi kisin pwutak kis. E mehla mwohn aht kak en pepdaisihala. Nait padreo ndahieng kiht me pwehki serio eh sohte pepdaisla e pahn mihla nan sapwtehn ong palingehn kan kohkohlahte. Erein sounpar weneu wet I kolokolehr nsensuwed oh pepehm en dihp wet. Mwurin ahi wadekada ire wet, I wehwehki sang ni manaman en Ngehn Sarawi me ire wet mehlel. I pehmehr toutou laud ehu pwekpweksang pohi, oh pilen mesen peren mepwukat.”

I tamankihda padahk kan en Soukohpo Joseph Smith, me kihda padahk kaloalamwahu wet: “Kauno kin ketkihsang aramas tohto, pil me pwelel kan, pwe irail en pitisang peirin en aramas, oh nsensuwed oh suwed kan en sampah wet; irail me nohn unsek, nohn kaselel, en momour pohn sampah; eri, ma ih duwen en met, kitail sohte konehng nsensuwed ahpw en peren pwe irail pitisang suwed, oh kitail pahn pwurehng aleiraildi.”²

Mwurin liho eh wie lokolok oh papahtou erein sounpar weneu, padahk mehlelo, me kasalada sang Sahm Nanleng me limpoak sang soukohp ieias emen, wahdo popohl meleilei ong lih nsensuwedla menet. Mwein e dehdehier, ahpw Sister Ramirez oh nah serihkan me sounpar waluh oh mahsang koaros pepdaisla.

I taman ei ntinglahng ei peneineio oh kasalehda kaping me I kehn nan mohngiongi pwehki iren kapehse me I ahniki duwen met oh soangen mehlel kaselel oh dehde duwe met en rongamwahu kopwurupwurdo en Sises Krais. Sohte pak ehu I leme duwen padahk mehlel kaselel wet eh pahn uhd pwurodohngie ehu rahn oh wia ahi wini en Kilead.

I men koasoaieng irail akan me naineki seri me mehlahr oh kihdahr peidek wet, “Dah me ngehiki?” de mwein pil peikasaliki duwen pein omw pwoson Sahm Nanleng me limpoak. E wia ahi kapakap me sang ni manaman en Ngehn Sarawi, I kak sawaskihda ekis pepehm en koapwoaroapwoar, meleilei, oh wehwe. I men sewese kapwurehdo amwail pwoson ong Sahm Nanleng me limpoak me mwahngih mehkoaros oh me kin mweidehng kitail en alehdi kahpwal kan pwe kitail en kak esehla oh poakohng Ih oh en wehwehki me ma sohte Ih sohte kitail mehkot.

Ni Pepweri 4 en 1990, nait pwutak kesilimen oh seri kewenemeno ipwidi. Se kihieng ede Tyson. E wia kisin pwutak kaselel, oh peneinei kasamwohki peh oh mohngiong limpoak. Rie pwutak oh rie serepein kan inen pohliki. Kiht koaros leme me ih kisin pwutak keieu kaselel me ipwidier.

Ansou me Tyson sounpwong waluh e kadalehla kisin lepin chalk me e diarada nan tahto. Kisin lepin chalk-o tengala nan kepin weren Tyson, oh e sohla esingek. Rie pwutak laudo wahdahdo Tyson reht ni posokehn imwato, liklikuwer, “Serie solahr esingek. Serie solahr esingek.” Se tepida koadoahke oh eker nempehn emergency nan USA me iei 911.

Toahktehn emergency kan peidi oh tangahkihla Tyson nimwen winio. Nan imwen winio se awiawih oh wie kapakap ni ngidingid pekpeki Koht en ketkihda manaman sarawi. Mwurin ansou kis me se pehm wia erein mour ehu, toahkteo pidohido reht oh nda, “Mahk. Solahr mehkot se kak wia. Kumwail me wia amwail ansou.” Lih toakteo eri pidohi.

Ni aht pidolong wasa me Tyson wie wonohno, se kilang ih me wia aht peren ni eh uhd solahr mourih. Likamwete mie lingen nanleng me kapil kisin paliwereo. E inenen kaselel oh unsek.

Ni ansouohte se pehm me wehwehn oh kahrepen aht mour imwisekla. Ia duwen aht pahn kak pwuralahng seri teiko oh kawehwe me Tyson sohte pahn pwurodo nihmwo?

I pahn uhd koasoaiahda irair wet sang ni pein ahi pali ni ahi pahn koasoaida imwiseklahn irair wet. Ahi pwoud me duwehte tohnleng patehngie ni aht lelohng irair wet, ahpw I sohte kak koasoaiahda ni itar duwen pepehm en nohno men oh sohte pahn song en wia met.

E inenen apwal ien kawehwe duwen pepehm me I ahniki ansouo nan ei mour. Pali laud en ansouo I pehm me I mih nan ouraman suwed oh me I kereniengehr pahn pirida oh ouraman suwed wet pahn imwisekla. Erein pwohng tohto I sohte meir. I kin kalapw aluseli nan ihmwo, tetehk ma seri teiko koaros nsenamwahu.

Pepehm en dipada inenen kaweiehla. I kehn me ngehi me sapwung. Ngei me dipan. Ngehi me ah pahpa; I konehng en doarehla ih. Ma I wiahte me de ma I wiahte mwo. Ekei pak pil lel rahnwet, sounpar 22 mwuri, pepehm pwukat kin pil waido nan mohngiongi, oh I kin anahne mwadangete kesehsang pwe re kak kaweiehla.

Sounpwong ehu mwurin Tyson eh mehla, I kohla tuhweng Elder Dean L. Larson. E kihiengie ansou mwahu en rongie, oh I pahn kapingki erein sapwellime kaweid oh limpoak. E mahsanih, “I sohte lemeleme me Kauno pahn kupwurki ken pein kaloke pein kowe pwehki mehlahn noumw kisin pwutako.” I uhd pehmada limpoak en Semei Nanleng sang rehn emen sapwellime tohn papah me pilipildahr.

Ahpw, madamadau en dipada kan kin doudoudohte rehi, oh I tepida pehm lingeringer. “Met sohte pwung! Ia duwen Koht eh kak wiaiongie met? Dah me ngehiki? Dah me I wia pwehn alehdi soangen irair duwe met?” I pil kin mwehlong aramas me songosong en kansenamwahuihie. I taman ekei kompoakepaht ahr nda, “I ese duwen amwa pepehm.” I kin lemeleme, “Kumwail sehse kodouluhl dah me I pepehm. Dehr lokaiaiengie.” I pil mwadangete diarada me soangen pepehm duwe mepwukat me pid poakehla pein ngehi pil kin kaluwetehla aramas. I tepida namenengki ahi ahniki soangen madamadau pwukat ong kompoakepahi kan me mentenohn seweseie.

Ni ahi pepehm en dipada, lingeringer, oh poakehla pein ngehi eh tepida kipeiehdi, I kapakapki mohngiongi en kak wekila. Sang ni irair sarawi kei me I ahniki, Kauno ketkihiengie mohngiong kapw, oh mendahte ei loaloid oh wie lokolokte, ahi madamadau wekila. I wehwehkihla me sohte me pirapahsangie mehkot ahpw me mie kapai laud wie awiawihie ma I pahn kak kolokol loaloapwoat.

Ahi mour tepida wekila, oh I tepida kilengla mwowe ni koapwoaroapwoar, oh sohla kilengla mwuri ni pahtou. I kadehde me mour wet kaidehn imwi. Sapwen ngehn mehlel. Padahk kan en soukohp akan me pid mour mwurin mehla mehlel. Mour wet wia sokosok ehu nan atail seiloak pwuralahng Samatail Nanleng.

Tyson wiahte ehu pali kesempwal en aht kisin peneinei. Erein sounpar akan se pil ahniki ansou mwahu en kilang mahk oh kadek en Sahm Nanleng me limpoak, me mweidehng aht peneinei en pehm ni wiepe dehde kan lipwen Tyson. I kadehde me irepen sampah oh sapwen ngehn me menipinip. Pepehm en loaloapwoat, limpoak, oh minimin en nan peneinei sohte kin imwisekla ansou me kompoakapahtail kan kin mweselsang mour wet kohlang mehteio; pepehm pwukat kin laudla.

Ekei pak aramas kin idek, “Ia uwen werei en omw ahpw nsenamwahula?” Ni mehlelo, ke sohte pahn sohla loaloidiki lao kumwail pahn pwurehng patehng kompoakapahmwail kan. I sohte pahn ahniki peren unsek lao se pahn pwurehng tuhpene ni menseng en Iasada Keieuo.

Kauno ketin kasalehiong Joseph me aramas iei ngehn oh me soang pwukat me poatoapoat, oh me ngehn oh paliwar, me kin patpene erein ni kaiasada, kin alehdi unseklahn popohl.

Oh ni ansou me tohrohrpeseng, aramas sohte kak alehdi unseklahn popohl.³

Ahpw mwohn met, duwen me Sounkomouro padahngki, kitail kak wenlahte mwowe ni popohl.⁴

I diaradahr me lokolok oh weirek kak wiahla nsenamwahu ni omw pahn sohpeilahng Semomw Nanleng oh peki Sapwellime kaloalamwahu me kin kohda sang ni Sapwellime koasoandi; Sapwellime Iehros, Sises Krais, oh Sapwellime Soun Kaloalamwahu, me iei Ngehn Sarawi.

Kapai kapwuriamwei kaselel ehu met nan atail mour. Ia uwen pahn kansensuwed ma kitail sohte kin pehm loaloid ansou me neitail serihmen pahn mehla? I kapingkihieng Semei Nanleng me E kin ketin mweidehng kitail en pehm limpoak me loal oh poatoapoat. I kapingki peneinei soutuk kan. I kapingki me E ketin kasaledahr pilahn en komour kaselelo sang Sapwellime soukohp ieias akan.

Tamataman ni omw iang towehda mehlahn emen kompoakapahmw, pepehm en omw mohngiong ni omw mweselsang mehlao oh kilengla mwuri—medemedewe mah mohngiongumw pahn pwalpeseng.

I kadehde me pwehki Ih, atail Sounkomour Sises Krais, pepehm pwukat en nsensuwed, loaloid, oh pahtou pahn ehu rahn duhkihla unseklahn popohl. I kadehde me kitail kak koapwoaroapwoariki Ih oh ansou me E mahsanih:

“I sohte pahn likidmelieikumwailla, ahpw I pahn pwurodo rehmwail.

“Mwurin ahnsou kis sampah wet solahr pahn kilang ie, a kumwail pahn kilang ie. Oh pwehki ei momour, kumwail pahn pil momour.”⁵

I kadehde me, duwen me sansal nan Preach My Gospel, ni atail pahn koapwoaroapwoariki Tomw en Sises Krais, E pahn ketin seweseikitail en powehdi atail kasongosong kan, soumwahu kan, oh weirek. Kitail kak en audaudiki popohl, meleilei, oh nsenamwahu. Koaros me sapahrek nan mour kak en pwungila sang ni Tomw en Sises Krais.”⁶

I kadehdehki me ni menseng kaselel en Kaiasada Keieuo, kompoakapahtail kan koaros pahn kaiasadahsang sousou kan duwen me Pein Kauno inoukio oh kitail pahn ahniki unseklahn popohl. Pwehki E ketin ieias, kitail oh irail pil pahn mour sapahl. Ni mwaren Sises Krais, ahmen.