Yaco Mo Tisaipeli Dina

Kivei keda na sa sudrava yani na wai ni veipapitaisotaki ka ciqoma na isolisoli ni Yalo Tabu, eda sa veiyalayalatitaka ni sa lomada sara meda taura na yaca i Jisu Karisito, se da rawa ni kaya, eda sa vakadeitaka meda sa tisaipeli ni Turaga. Eda sa vakavouya na veiyalayalati o ya ena veimacawa ena noda vakayagataka na sakaramede, ka da matanataka na bula-vakatisaipeli o ya ena noda ivakarau ni bula. Na bula-vakatisaipeli vakaoqo a matanataki vakatotoka sara ena veika a yaco wale tikoga oqo e Mexico.

Sa mai dua dina na vula itubutubu totoka vei ira na itikotiko dautei vuata ena vualiku kei Mexico. Era vuavuai vinaka ka sobe na vuata, ka maqusa tiko na yalo ni na dua na tatamusuki levu. Sa tuvanaki rawa sara na kena saumi na dinau, sosomitaki na misini kei na veivuni-kau vuata qase, ka sotavi na gagadre ni tamata yadua me vakataka na saumi ni vuli vei ira na lewe ni matavuvale. Sa laki tuvanaki sara na gade vakayawa vakamatavuvale. Sa dua na ka na kena boletaki vakalevu. Ia, ena yakavi ni Moniti ena mua ni vula o Maji, sa tekivu me liwa kaukauwa mai e dua na cagi cevaruru batabata, ka tekivu me lutu na uca cevata. A lutu tu na uca cevata oqo me yacova sara na tolu na kaloko ena mataka lailai. Ia, ni sa tekivu me takali na o, sa batabata sara na draki. Ena bogi taucoko kei na mataka lailai, a sagai kina me bau vakabulai mada ga e dua na yasani veivuata oqo. A takiveiyaga. Sa batabata sara ga, ka ra sa cevata na vuata. Sa mai sega ni tamusuki ka volitaki na vuata ena yabaki oqo. E kida mai na mataka ni Tusiti vata kei na ca kei na luluqa ni yalo ni sa cawadru laivi na ituvatuva, vakanuinui totoka, kei na kena a tatadrataki oti toka ga ena siga e nanoa.

Au a taura e dua na imeli me baleta na veika rarawa ni mataka ni Tusiti o ya mai vei Sandra Hatch na wati John Hatch, a se imatai ni daunivakasala tiko ena mataveiliutaki ni Valetabu e Colonia Juárez Chihuahua. Oqo e dua na malanivosa ni imeli o ya: “A yadra sara vakamataka lailai o John—volekata toka na 6:30—me gole ki valetabu me raica ke rawa ni sa vakadaroi na soqoni ena mataka o ya. A lesu mai ka kaya ni galala vinaka tu na ikelekele ni motoka kei na gaunisala, ka sa vakadeitaki me sa vakayacori ga. Keirau nanuma ni ra na yaco mai e so na tamata cakacaka e sega tu na nodra veivuata, ka me ra laki tiko taucoko na tamata cakacaka ena soqoni o ya… . A veivakauqeti dina na nodra sa gole mai na tagane, vakaveitarataravi. Era sa mai tiko rawa, ka sega tu mai na moce, ka vakananuma tiko na vakarusai ni nodra veivuata… . Au a vakaraici ira toka ena soqoni ni veivakarautaki, ka voraki vei ira mera yadra tiko. Ia me vaka ni sa rawa me nodra iulubale vinaka o ya mera kakua ni gole mai, ia era a mai tiko rawa. Era a tiko rawa e 38 na tamata ena soqoni (a oso taucoko na soqoni)! Sa qai dua na mataka veivakauqeti dina vei keirau, ka keimami sa vakavinavinakataka na Tamada Vakalomalagi baleti ira na tamata vinaka era cakava na nodra ilesilesi, se cava ga e yaco. Au a vakila ena mataka o ya e dua na yalo e cecere sara. Au a vakadeitaka ni sa marautaka o Koya me kila ni da taleitaka na Nona vale, kau vakila ni o ya sa dua na vanua vinaka meda tiko kina ena dua na mataka dredre vaka o ya.”

E sega ni yaco ga e kea na italanoa oqo ka dina sara ni sa tomani tikoga.

E vuqa vei ira a vakarusai na nodra veivuata a tiko tale eso na nodra tiki ni qele era tea tu kina na isosomi ni kakana ni veivula o ya, me vakataka na boro se bini. Na kakana oqo a rawa ni kauta mai vei ira na ilavo eso, me bau tauri ira toka me yacova na tei vuata ni yabaki mai oqo. Ia, e dua na baraca vinaka se qai vakamatavuvale walega e sega ni tiko e dua tale na nona qele ka sa tadrava tiko e dua na yabaki ni dravuisiga vakailavo. Vei ira na vo ni itikotiko, ni ra sa raica na dredre sa sotava tiko na baraca oqo era sa tucake ga yani vakai ira kei na nodra ilavo, vaqara e dua na tiki ni qele, vakayagataka na nodra misini me vakarautaki na qele, ka solia vua na itei ni boro me teivaka.

Au kilai ira vakavinaka au talanoataka ira tiko. Na noqu kilai ira, au sega kina ni kurabui ena veika era sa mai cakava. Ia vei ira era sega ni kilai ira era na rairai taroga beka e rua na ka, vakatekivu tiko ena vosa cava na vuna. Na cava na vuna mera gole mai kina ki valetabu mera mai vakayacora na nodra ilesilesi ka veiqaravi ni ra sega tu ni moce ena bogi taucoko, ni ra sa qai vakila ni sa cawadru laivi mai vei ira e dua na iwase ni ilavo levu ni yabaki taucoko? Na cava na vuna mera vakayagataka kina na ivovo oqo ni veika vakamareqeti era taukena mera vukea kina e dua e vaqara bula tiko ni o ira mada ga vakai ira era sa sotava tiko na dravuisiga vakailavo?

Kevaka o kila vakavinaka na ibalebale dina ni tisaipeli i Jisu Karisito, ko na qai kila vakaidina na isau ni rua na taro oqo.

Na vakayacori ni veiyalayalati mo tisaipeli i Jisu Karisito sa itekitekivu tiko ni dua na cakacaka ni bula taucoko, ka na sega ni dau rawarawa na kena salatu. Ni da sa veivutunitaka na noda ivalavala ca ka da saga meda cakava na veika e gadreva o Koya meda cakava ka qaravi ira na wekada me vaka na Nona qaravi ira, ena sega ni vakataratutu ni da na vakataki Koya vakalevu cake. Ni da yaco meda vakataki Koya ka duabau kei Koya sa usutu ni inaki kei na lalawa—-ka sa ibalebale donu sara ni bula vakatisaipeli dina.

Ena Nona a tarogi ira na Nona tisaipeli na iVakabula ena Nona sikovi ira ena vanua o Amerika, “Ia a cava na ivalavala sa kilikili kei kemudou?” Ia ni oti, a sauma ga na nona taro, ka kaya, “Au sa kaya vakaidina vei kemudou, mo dou vakataki au” (3 Nifai 27:27).

E sega ni cakacaka rawarawa meda vakataka na iVakabula, vakabibi ena vuravura eda bula tiko kina oqo. Eda sotava tu na veivakataotaki kei na dredre ena veisiga kecega ni noda bula. E tiko na vuna baleta na veika oqo, ni sai koya na inaki taumada ni bula oqo. Eda wilika kina ena Eparama 3:25, “Ia meda vakatovolei ira mada kina, era na muria na veika kece sa vakarota vei ira na Turaga na nodra Kalou se sega.”

Na veitarogi se veivakatovolei oqo era duidui na kena ituvaki kei na kena kaukauwa. Ia ena sega ni rawa vua e dua me biuta na bula oqo me sega ni bula curumi ira. E vakavuqa, meda raica na veivakatovolei me vakataka na yali ni kakana teivaki se cakacaka; ni mate e dua na daulomani; tauvimate; leqa vakayago; vakasama, se lomada; dravudravua; se tawase ni itokani. Ia, se vakacava sara na kena dau rawati toka na sasaga yaga eso e rawa ni dau salavata mai na rerevaki ni dokadoka tawaveivukei, meda dokai vakalevu kina mai vei ira na tamata ka sega ena veivakalagilagi ni lomalagi. Oqo e rawa ni oka kina na nomu kilai vakalevu vakavuravura, kilai raraba, kila vakacakacaka, taledi ni kila-ka se qito, rawa-ka, kei na vutuniyau. Me baleta tiko na veivakatovolei vakaoqo, eso vei keda era na vakasama vata talega kei ira a vakamacalataka o Tevye ena Fiddler on the Roof: Kevaka sa ka vakatani na iyau, “me qai vakamatei au vata kaya na Kalou. Ka meu kakua tale ni bula!”¹

Ia na mataqali veivakatovolei vaka oqo ena rawa ni veivakarerei se domobula sara ka dredre cake me uabaleti mai na kena a dau yaco taumada. Ena sega ni vakatorocaketaki ka vakadinadinataki na noda bula vakatisaipeli ena mataqali veivakatovolei eda sotava, ia ena ivakarau ga ni noda vosota tiko. Me vaka sa vakavulica vei keda o Peresitedi Henry B. Eyring: “Na veivakatovolei cecere ni bula sai koya na laurai ni noda vakarorogo ka muria na ivakaro ni Kalou ena maliwa ni ca-va ni bula. E sega ni noda vorata na ca-va, ia meda digia na dodonu ena gauna e tataba tiko kina. Ia na leqa levu duadua ni bula sai koya na noda sega ni rawata na veivakatovolei oqori, ka sega kina ni rawa meda lesu yani ena lagilagi ki na noda itikotiko vakalomalagi” (“Na Vakavakarau Vakayalo: Tekivu Kusarawa ka Tudei,” Liaona, Nove. 2005, 37–38).

Au doka niu tukadra e 23 na makubuqu. Au dau vakasakita na nodra dau tautauri tiko ki na dina tawamudu, mai na gauna era se qai tubu cake tiko mai kina. Niu vakarautaka tiko mai na vosa oqo, au a kerei ira yadua mera vakauta mai vei au e dua na nodra ivakamacala lekaleka ni ibalebale ni tisaipeli se daumuri Jisu Karisito. Au a ciqoma na totoka ni kena isau mai vei ira taucoko. Ia au gadreva meu wasea vei kemuni na vakasama oqo mai vei Benjamin yabaki walu: “Ni ko sa tisaipeli i Jisu Karisito oya mo na ivakaraitaki. Oya mo na kaulotu ka vakavakarau mo daukaulotu. Oya mo qaravi ira na tamata. Oya mo wilika na ivolanikalou ka dau masu. Oya mo rokova na Siga ni Vakacecegu. Oya mo vakarorogo ki na veivakauqeti ni Yalo Tabu. Oya mo dau laki lotu ka gole ki na valetabu.”

Au duavata kei Benjamin. Na bula vakatisaipeli sa ka ni cakava tiko kei na kena vakavotukanataki. Ni da muria na Nona ivakaro ka qaravi ira na wekada, eda na tisaipeli vinaka cake i Jisu Karisito. Ni da talairawarawa ka solibula ki na Nona lewa ena yaco me noda itokani na Yalo Tabu, sala vata mai kei na veivakalougatataki ni vakacegu, reki, kei na veitaqomaki e salavata tu kei koya na ikatolu ni Lewetolu Vakalou oqo. E ratou na sega ni yaco mai ena dua tani na sala. O koya gona, ni noda solibula ki na Nona lewa ena vukea meda vakataka sara na noda iVakabula. Me tokaruataki, na noda yaco meda vakataki Koya ka duabau kei Koya sa inaki ka ilalavaki cecere—ka sa usutu donu sara ni bula vakatisaipeli dina.

Na bula vakatisaipeli sa ikoya au a raica a matanataki ena Valetabu e Colonia Juárez kei na veiloganitei volekata era vakadeitaka kina na tacida kei na ganeda ena loma ni vakabauta na nodra dina tiko vua na Kalou ka vakakina vakai ira se vakacava sara na veika dredre voravora.

Au vakadinadinataka ni gauna eda talairawarawa kina ki na Nona ivakaro, qaravi ira na tamata, ka solibula ki na Nona lewa, eda na yaco, vakaidina, meda Nona tisaipeli dina. Au sa vakadinadinataka oqo ena yaca i Jisu Karisito, emeni.