Blong Kam Ol Gudfala Papa mo Mama

I Kam long Elda L. Tom Peri

Blong Kworom blong Olgeta Twelef Aposol


L. Tom Peri
I gat plante wei we ol gudfala papa mo mama oli save kasem help mo sapot we oli nidim blong tijim gospel blong Jisas Kraes long ol pikinini blong olgeta.

Mi kasem wan spesel step long laef long sama ia—mi kasem 90 yia blong mi. Taem yu kasem sam step long laef blong yu, hem i help mo yu lanem fulap samting taem yu tingtingbak long ol samting we i bin hapen mo ol eksperiens blong bifo. Yufala, ol yang pipol, we i stap lisin o ridim toktok ia, ating bae yufala i no sapraes wetem wan laef we i kasem 90 yia, be long taem we mi mi bon, blong laef longtaem olsem, i wan bigfala ajivmen. Evri dei, mi talem tangkyu long Papa long Heven blong blesem mi wetem wan longfala laef.

Plante samting i bin jenis long taem we mi laef. Mi bin luk divelopmen blong taem blong indastri, mo taem blong infomesen. Ol hip blong trak we oli bildim, telefon, mo plen, oli ol bigfala samting we man i mekem taem mi yangfala. Tedei, ol wei we yumi faenem, serem mo yusum infomesen, i jenisim plante samting evri dei. Long olfala yia blong mi, mi sapraes long wol ia we i jenis kwiktaem we yumi evriwan i stap long hem. Plante niufala samting tedei, i mekem tingting blong yumi i wok bigwan mo wantem se i mekem laef blong yumi i gud moa.

Tru long evri jenis we i stap hapen kwik raon long yumi, yumi stap prea strong mo wok blong mekemsua se ol valiu blong gospel blong Jisas Kraes oli stap strong. Sam long olgeta, oli stap finis long denja blong oli go lus. Faswan antap long lis blong ol valiu ia, mo i fas poen blong enemi i agensem, i tabu fasin blong mared, mo bigfala ples blong famle. Oli givim wan angka mo wan sef ples long hom, long ples we wanwan pikinini blong wan Papa long Heven we i gat lav i save kasem help blong mekem gud mo kasem ol nara valiu we i no save finis.

Famle blong mi, we oli stap tingting long selebresen blong 90 yia olsem wan mak long laef blong mi, oli stat blong helpem mi blong tingbaot mo glad long ol eksperiens blong longfala laef blong mi. Eksampol, nis blong mi i putum tugeta mo serem wetem mi, plante leta we mi bin raetem long papa mo mama blong mi, kolosap 70 yia i pas finis, taem mi stap long Marin long aelan blong Saepan long Pasifik long taem blong Wol Wo 2.

Ae blong mi i fas long wan long ol leta ia. Hem i wan leta we mi bin raetem long mama blong mi blong hem i openem mo ridim long Dei blong Ol Mama long yia 1945. Mi wantem serem sam pat wetem yufala, wetem hop ia se bae yufala i luk from wanem bae mi talem tangkyu from papa mo mama from ol lesen we mi bin lanem aot long ol tijing blong olgeta long hom. Papa mo mama blong mi oli stret eksampol we mi tingbaot abaot ol gudfala papa mo mama, we tufala i bin putum mared blong tufala, mo stret fasin blong kea long ol pikinini, olsem wan samting we i kam faswan long evri samting.

Leta blong mi blong Dei blong Ol Mama i stat olsem:

“Dia Mama,

“Long ol las fo yia, mi no bin gat janis ia nating blong spendem Dei blong Ol Mama wetem yu. Evri yia, mi bin wantem stap wetem yu mo talem long yu hamas mi lavem yu mo hamas mi tingting long yu, be from se i no posibol, bae mi mas mekem samting we mi save mekem mo sendem ol tingting blong mi tru long leta.

“Long yia ia, bitim eni narafala yia, mi luksave se wanem nao i mekem blong gat wan gudgudfala mama. Faswan, mi misim ol smol samting we yu bin stap mekem blong mi. Taem mi kamaot long bed long moning, mi no nid blong wari se bae mi faenem wan klin sot mo ol klin stokin. Mi openem kabod nomo mo bae mi faenem. Long taem blong kakae, mi save se oltaem bae mi faenem wan samting we oli kukum i gud. Long naet, oltaem mi save se bae mi faenem ol klin kaliko long bed blong mi, mo hamas blanket mi nidim blong mi hot gud. Blong stap long haos, i oltaem wan gudfala taem.”

Taem mi ridim ol fas tu paragraf blong leta, fastaem mi sapraes long ol filing we mi raetemdaon. Ating from se mi stap long wan tenet mo silip andanit long moskito net long wan kamp, i mekem se mi tingtingbak long spesel hom blong mi.

Leta blong mama blong mi i gohed:

Be mi gat bigfala tingting long yu from eksampol we yu givim long mi. Laef i bin gud tumas long yumi olsem wan famle, mekem se mifala i bin wantem folem rod blong yu, blong gohed blong gat semfala glad ia we mifala i gat taem mifala i yangfala. Oltaem, yu stap faenem taem blong tekem famle i go wokbaot long hil, mo mifala i save se bae yu mekem eni samting, olsem klaem long hil go kasem blong plei balong wetem mifala. Yu mo Papa i neva go holidei yutufalawan. Famle i stap oltaem wetem yu. Naoia, mi stap longwe long hom, mo oltaem mi laekem blong tokbaot laef long hom from se i bin gud tumas. Laef i wan bigfala jalenj long mi wetem tingting se mi mi inaf blong oli singaotem mi boe blong Nora Soni Peri. Mi mi praod long taetol ia, mo mi hop se bae, oltaem, mi naf blong tekem nem ia.

“Mi hop se nekis yia, bae mi stap wetem yu blong soemaot long yu gudfala samting we mi stap plan blong soem long yu long Dei blong Ol Mama long ol las fo yia.

“Bae Lod i blesem yu from evri gudfala samting we yu bin mekem long trabol wol ia

“Wetem lav blong mi, Tom.”1

Taem mi stap ridim leta ia bakegen, mi stap tingtingbak long kalja blong famle, wod, stek, mo komuniti we mi bin groap long hem.

Kalja, oli talem se i olsem wei blong laef blong wan pipol. I gat wan spesel gospel kalja, wan set blong ol valiu mo samting we yumi mas mekem, mo ol praktis blong evri memba blong Jos blong Jisas Kraes blong Ol Lata-dei Sent. Gospel kalja ia, o wei blong laef ia, i kam long plan blong fasin blong sevem man, ol komanmen blong God, mo ol tijing blong ol profet we oli laef. Hem i kamaot long wei we yumi lukaotem ol famle blong yumi, mo long laef blong wanwan long yumi.

Fas tijing we i go long Adam long saed blong responsabiliti blong hem long wol ia, i stap long Jenesis 2:24: “Taswe, oltaem man i mas aot long papa mo mama blong hem, i mas go joen wetem woman blong hem, nao tufala bambae i kam olsem wan bodi nomo.”

Blong man mo woman i joen tugeta folem loa mo loa blong God, i no blong rere nomo from ol fiuja jeneresen blong kam long wol, be tu, i karem kam, bigfala glad mo harem gud we yumi save faenem long eksperiens blong wol ia. Hemia i tru taem ol paoa blong prishud oli talem se wan mared i blong taem naoia mo blong ol taem we i no save finis. Ol pikinini we oli bon insaed long ol mared ia, oli gat sekiuriti we oli no save faenem long nara ples.

Ol lesen we gudfala papa mo mama i tijim insaed long hom oli kam impoten tumas long wol tedei, taem we paoa blong enemi i stap go olbaot. Olsem we yumi save, hem i stap traem blong spolem mo katemaot fandesen blong sosaeti blong yumi—we i famle. Long ol kleva wei we i haed gud, hem i stap atakem komitmen blong man long famle laef raon long wol, mo i stap daonem kalja mo ol kavenan blong ol fetful Lata-Dei Sent. Long semtaem we ol nara grup, olsem jos mo skul i save givhan long papa mo mama blong “tijim gud pikinini blong yu long fasin we i stret blong hem i folem taem” (Ol Proveb 22:6), responsabiliti ia i stap nao long papa mo mama. Folem bigfala plan blong stap glad, hem i long ol gudfala papa mo mama nao we oli givim wok ia blong kea mo developem ol pikinini blong Papa long Heven.

Long bigfala wok blong yumi olsem papa mo mama, i gat plante wei we ol gudfala papa mo mama oli save kasem help mo sapot we oli nidim blong tijim gospel blong Jisas Kraes long ol pikinini blong olgeta. Bae mi givim faef tingting we papa mo mama i save yusum blong krietem ol famle kalja:

Faswan, papa mo mama i save prea strong, mo askem Papa blong yumi we I No Save Finis blong helpem olgeta blong lavem, andastanem, mo lidim ol pikinini we Hem i sendem i go long olgeta.

Nambatu, oli save gat famle prea, skripja stadi, mo famle haos naet mo kakae tugeta oltaem sapos i posibol, mo mekem taem blong kakae i wan taem blong storian mo tijim ol valiu.

Nambatri, ol papa mo mama oli save kasem ful sapot long Jos netwok, taem oli toktok wetem ol Praemeri tija blong ol pikinini blong olgeta, ol yut lida, mo ol klas mo kworom presidensi. Taem oli toktok wetem olgeta we oli singaotem olgeta mo setem olgeta apat blong wok wetem ol pikinini blong olgeta, ol papa mo mama oli save givim stret help blong wan pikinini folem stret nid blong hem.

Nambafo, ol papa mo mama oli serem testemoni blong olgeta oltaem wetem ol pikinini blong olgeta, oli komitim olgeta blong obei ol komanmen blong God, mo promesem ol blesing we Papa blong yumi long Heven i promes long ol fetful pikinini blong Hem.

Nambafaef, yumi save oganaesem famle blong yumi folem ol klia, simpol famle rul mo gol, ol gud famle tradisen mo kastom, mo “famle ekonomi,” taem ol pikinini oli gat ol responsabiliti long haos mo oli winim smol mane blong mekem se oli save lanem blong yusum wan bajet, sevem mane, mo pem taeting long mane we oli winim.

Ol tingting ia, blong krietem ol famle kalja we oli moa gud, i go wetem kalja blong Jos. Ol famle kalja blong yumi we i kam strong moa, bae i protektem ol pikinini blong yumi long ol “spia blong faea blong enemi,” (1 Nifae 15:24) we i tekem rus blong hem tru kalja blong ol fren, entetenmen mo sta kalja, kaon mo raet kalja, mo Intanet mo media kalja we oli stap luk evri taem. Strong famle kalja bae i helpem ol pikinini blong yumi blong “stap insaed long wol” mo no kam “pat blong wol” (Jon 15:19).

Presiden Josef Filding Smit i tijim: “Hem i diuti blong papa mo mama blong tijim ol pikinini blong olgeta long ol prinsipol blong gospel blong Jisas Kraes we i sevem laef, blong mekem se bae oli save from wanem oli mas kasem baptaes, mo blong oli gat, insaed long hat blong olgeta, wan tingting blong wantem gohed blong obei long ol komanmen blong God afta we oli baptaes, blong oli save kambak stap wetem God. Yufala ol gudfala brata mo sista blong mi. Yufala i wantem ol famle blong yufala, ol pikinini blong yufala; yufala i wantem sil long ol papa mo mama blong yufala … ? Sapos yes, nao yufala i mas stat blong tij taem oli bebi yet. Yufala i mas tij tru long eksampol, mo tu long saed blong ol prinsipol.”2

Ofisol toktok i go long wol long saed blong famle i talem:

“Hasban mo waef,tufala i gat wan strong mo tabu wok blong lavem mo lukaotem gud wanwan long tufala mo ol pikinini blong tufala. ‘Ol pikinini ya blong yumi, hemia wan presen we Hae God i givim long yumi’ (Ol Sam 127:3). Ol papa mo mama oli gat wan tabu wok blong lukaotem gud pikinini blong olgeta wetem lav mo fasin blong stap stret oltaem, mo blong givim long olgeta ol samting we oli nidim long saed blong spirit mo long saed blong bodi, blong tijim olgeta blong lavem mo givim seves long wanwan long olgeta, blong folem ol komanmen blong God, mo blong kam olsem ol sitisen we oli folem ol loa blong kantri we oli laef long hem.

“… Folem plan blong God, ol papa oli mas lidim ol famle blong olgeta wetem lav mo fasin blong stap stret oltaem. Oli gat wok ia tu, blong luk se ol famle blong olgeta i gat proteksen mo evri samting we oli nidim long laef. Ol fas wok blong wan mama hem i blong fidim ol pikinini blong tufala long saed blong spirit mo long saed blong bodi. Long ol tabu wok ia, papa mo mama, tufala i mas helpem wanwan long tufala, olsem we tufala i semmak.”3

​Mi biliv se i plan blong God se wok blong wan mama i blong fidim mo tijim nekis jeneresen. Be hem i gud tumas blong luk ol hasban mo ol waef we oli wok wan olsem ol patna, mo tufala i joenem paoa blong tufala mo tufala i toktok gud abaot ol pikinini blong tufala, mo long ol pikinini blong tufala.

Ol strong atak blong ol nogud fasin agensem ol pikinini blong yumi i haed moa mo i moa strong bitim bifo. Taem yumi bildimap ol famle kalja we oli strong moa, hemia i ademap wan moa blanket blong protektem ol pikinini blong yumi, mo blokem olgeta long ol fos blong wol ia.

God i blesem yufala ol gudfala mama mo papa long Saeon. Hem i givim long kea blong yufala, ol pikinini blong Hem we i no save finis. Olsem papa mo mama, yumi kam patna, mo joen wetem God, blong mekem wok blong Hem mo glori blong Hem i kamtru long medel blong ol pikinini blong Hem. Hem i tabu diuti blong yumi blong mekem bes blong yumi. Long hemia, mi testifae, long nem blong Jisas Kraes, amen.

Show References

  1.  

    1. Leta blong Dei blong Ol Mama we L. Tom Peri i sendem i go long mama blong hem, we hem i bin sendem taem hem i bin stap long Saepan, mo deit blong hem i 3 Mei 1945.

  2.  

    2. Joseph Fielding Smith, insaed long Conference Report, Oct. 1948, 153.

  3.  

    3. “Famle: Wan Ofisol Toktok I Go Long Wol,” 35538 852 moEnsign, Nov. 2010, 129.