Avea ma ni Matua Lelei

Sa ou tini taunuu i se itu faapitoa i le taumafanafana lenei—sa aulia ai lo’u aso fanau lona 90. A e aulia taimi iloga o lou olaga, e aoga ma taua ai le tomanatu i mea na tutupu ma aafiaga o aso ua tuanai. O outou talavou o loo faalogologo mai po o faitauina lenei lauga atonu tou te le maofa tele i le 90 tausaga o le olaga, ae o le vaitaimi na ou fanau ai, o le ola i se taimi umi faapenei sa manatulia o se ausiga maoae tele. O aso uma lava ou te faafetai ai i le Tama Faalelagi mo le faamanuiaina o a’u i se olaga tulu’i.

Ua tele naua mea ua suia talu mai ona ou ola. Ua ou vaaia le atinaega o le vaitau o pisinisi ma le vaitau o faamatalaga. O le gaosiga o taavale, ma telefoni ma vaalele o fatufatuga maoae na o le talutalufou o lo’u olaga. O aso nei, o le auala tatou te maua, faasoa, ma faaaoga ai faamatalaga ua toeitiiti lava o aso uma e sui ai. I lo’u matua lea ua i ai, ou te maofa lava i le televave o suiga o le lalolagi lea tatou te nonofo uma ai. O le tele lava o fatufatuga o aso nei e faaosofia ai le mafaufau i o latou faamoemoega e faalelei atili ai o tatou olaga.

I suiga televavave uma o loo tutupu i o tatou autafa, matou te tatalo faatauanau ma galulue ina ia mautinoa ia tumau tulaga faatonuina o le talalelei a Iesu Keriso. O nisi lava o ia mea ua i ai i se tulaga faaletonu o le galoma atu. O le tumutumu o le lisi o nei tulaga faatauaina ma, faapea ai ona avea ma sini taulamua a le fili, o le paia o le faaipoipoga ma le totonugalemu o le taua o aiga. Latou te tuuina mai se taula ma le uafu saogalemu o se aiga lea e mafai ai e fanau taitoatasi a se Tama Faalelagi agalelei ona uunaia mo le lelei ma maua tulaga faatonuina e faavavau.

O lo’u lava aiga, sa tulimatai atu i le faamanatuina o lenei vaega iloga o le 90 tausaga o lo’u olaga, sa amata ona latou fesoasoani mai ia ou manatua ma talisapaia ia aafiaga o lo’u olaga umi. Mo se faataitaiga, sa aumai ma faasoa mai e le tama teine a la’u fanau nisi o tusi sa ou tusilimaina i o’u matua lea ua toeitiiti 70 tausaga ua mavae mai le nofoaga sa ou galue ai o se malini i le motu o Saipani i le Pasefika i le taimi o le Taua Lona II a le Lalolagi.

Sa faapitoa le tosina o la’u vaai i se tasi o tusi. O se tusi sa ou tusia i lo’u tina ina ia ona tatalaina ma faitauina i le Aso o Tina o le 1945. Ou te fia faasoa atu ni isi o vaega ma le faamoemoe o le a outou silafia ai o le a ou faafetai ai pea i lo’u tama ma lo’u tina agalelei mo lesona sa ou aoaoina mai i a laua aoaoga i le aiga. O o’u matua o le faataitaiga sili lea ou te manatua o ni matua lelei o e sa la faia ma faamuamua aupito maualuga le la faaipoipoga ma le tausia lelei o le la fanau.

Sa amataina la’u tusi mo le Aso o Tina i le 1945 e faapea:

“Tina Pele,

“O le fa tausaga ua mavae sa ou i ai i se tulaga le manuia o le faaaluina o le Aso o Tina i se mea mamao lava mai ia te oe. O tausaga taitasi sa ou manao ai e faatasi ma oe ma ta’u atu ia te oe lo’u alofa tele ma lo’u manatu tele atu ia te oe, ae talu ai o lenei foi ua le toe mafai, o le a ou faia ai le isi mea e tau latalata atu i ai le lelei ma auina atu o’u mafaufauga e ala i le meli.

“O le tausaga lenei e sili atu nai lo o isi lava, ua ou iloa ai le tulaga ua faia e le i ai o se tina sili ona lelei ia te a’u. Muamua lava, ua ou misia nai mea laiti sa masani ona e faia mo a’u. Soo se taimi lava ou te ala ae ai i le taeao, ou te le popole lava pe maua so’u ofutino mama ma ni totini mama. Na pau lava le mea sa ou faia o le toso o le pusatoso ma ou maua i ai. I taimi o taumafataga, sa ou iloa i taimi uma o le a ou maua se mea ou te fiafia i ai na saunia i le ala sili na mafai ai. I le po sa ou iloaina lava o le a ou maua ni ieafu mama i luga o lo’u moega ma se aofaiga talafeagai o ie ina ia ou maua ai le mafanafana. O le nofo ai i le fale o le mea moni sa o se fiafiaga sili lea.”

Ina ua ou faitau i parakalafa muamua nei e lua o le tusi, sa ou te’i ona o le ootia o lona faaupuga. E masalo o le nofo ai i se faleie ma le moe i totonu o se ta’inamu i luga o se moega o tolauapiga ua toe oo atu ai ou mafaufauga i lo’u aiga sili ona faapitoa.

Sa faaauau la’u tusi i lo’u tina:

“Ae e sili atu le loloto o le mafaufau atu ia te oe ona o le faataitaiga sa e faia mo a’u. O le olaga sa matuai fiafia lava mo i tatou o se aiga o lea sa matou mananao ai e mulimuli i ou tulagavae, ia faaauau pea ona oo i lea lava fiafia e tasi sa fai mo tatou i aso a o matou laiti. Sa e faaavanoaina i taimi uma se taimi e ave ai le aiga i le auala o vaipapa, ma sa matou talitonu ia te oe e te faia soo se mea mai le a’e i mauga i le taaalo faatasi ma i matou i se polo. Lua te le’i o lava na o oulua ma Tama i ni tafaoga. O taimi uma lava sa oulua o ma ave le aiga. O lenei la ua ou le i ai i le aiga, ou te fiafia lava e talanoa i taimi uma e uiga i lo’u olaga faaleaiga aua sa matuai fiafia lava. E le mafai ona ou liliuese mai au aoaoga i le taimi nei aua o a’u amioga o le a atagia ai lou tagata. O le olaga o se luitau tele lea ia te a’u ia ou agavaa e ta’u o se atalii o Nora Sonne Perry. E ese lo’u mitamita i lenei igoa, ma ou te faamoemoe o le a ou agavaa ai pea mo lea igoa.

“Ou te faamoemoe e aulia atu le tausaga a sau ua ta toe faatasi e faaali atu ia te oe ia taimi lelei ua ou fuafuaina e faaali atu ia te oe i le Aso o Tina mo le fa tausaga ua te’a.

“Ia faamanuia le Alii ia te oe mo mea lelei uma sa e faia mo lenei lalolagi faigata.

“Alofaaga tele, Tom”¹

A o ou toe faitauina la’u tusi, sa ou toe tomanatu foi i le agaifanua a le aiga, le uarota, le siteki, ma le nuu lea sa ou ola a’e ai.

O le agaifanua ua faauigaina o le ituaiga olaga e ola ai ni tagata. O loo i ai se agaifanua tulaga ese o le talalelei, o se ta’ui o tulaga faatauaina ma faamoemoega ma faiga ua masani ai tagata uma o Le Ekalesia a Iesu Keriso o le Au Paia o Aso e Gata Ai. O lenei agaifanua o le talalelei, po o se ituaiga olaga, e sau mai le ata o le faaolataga, o poloaiga a le Atua, ma aoaoga a perofeta soifua. E faaalia i le ala tatou te tausia ai o tatou aiga ma ola ai o tatou olaga taitoatasi.

O le aoaoga muamua lava ia Atamu mo lona tiutetauave i le olaga nei o loo maua i le Kenese 2:24: “O le mea lea e tuua ai e le tane lona tama ma lona tina, a e faatasi ma lana avā: ona avea ai lea o i laua ma tino e tasi.”

O le tuufaatasia o se alii ma se tamaitai ina ia faaipoipoina faalemalo ma faaletulafono ua le gata o le tapenaga mo tupulaga o le lumanai e mautofi i le fogaeleele, ae e faapea foi ona aumaia ai le olioliga sili ma le faamalieina lea e mafai ona maua i lenei aafiaga i le olaga nei. E faapitoa le moni o lenei mea pe a folafola atu e le mana o le perisitua se faaipoipoga ia le gata i le olaga nei ae mo le faavavau atoa foi. O fanau e fananau mai i faaipoipoga faapena ua i ai le puipuiga lea e leai se isi lava nofoaga e maua ai.

O lesona e aoaoina i totonu o le aiga e matua lelei ua faateteleina le taua i le lalolagi i aso nei, lea ua matuai taatele ai faatosinaga a le fili. E pei ona tatou iloa, o loo taumafai o ia e ‘ati ma faatamaia le faavae tonu o lo tatou lalolagi—o le aiga. I auala taufaasese poto ma fuafuaina lelei, ua ia osofaia ai le tuuto atu i le olaga faaleaiga i le lalolagi atoa ma ta’ufaatauvaaina ai le agaifanua ma feagaiga a tagata faamaoni o le Au Paia o Aso e Gata Ai. E ao i matua ona faamausali aoaoga i totonu o aiga o se tiutetauave aupito sili lea ona paia ma taua. E ui o isi faalapotopotoga e pei o le lotu ma aiga e mafai ona fesoasoani i matua e “aoao ia le tama [po o le teine] e tusa ma lona ala” (Faataoto 22:6), o le iuga o lenei tiutetauave e taoto tonu lava i matua. E tusa ai ma le fuafuaga sili o le fiafia, o matua lelei ua tuu atu i ai le tausiga ma le atinaega o fanau a le Tama Faalelagi.

I la tatou tausiga mataina faamatua, e tele ni auala e mafai e matua lelei ona maua ai le fesoasoani ma le lagolago latou te manaomia e aoao atu ai le talalelei a Iesu Keriso i a latou fanau. Sei ou fautuaina atu ni mea se lima e mafai ona fai e matua e fatu ai ni agaifanua malolosi atu faaleaiga:

Muamua, e mafai e matua ona tatalo faatauanau, ole atu i lo tatou Tama Faalelagi e fesoasoani ia latou alolofa, malamalama, ma taiala le fanau ua Ia auina mai ia i laua.

Lua, e mafai ona fai a latou tatalo faaleaiga, suesueina o tusitusiga paia, ma afiafi faaleaiga, ma talisua faatasi ma faifaisoo pe a mafai, ia avea ai le talisuaga i le afiafi o se taimi o talanoaga ma le aoaoina o tulaga faatauaina.

Tolu, e mafai ona faamanuiaina tele matua mai upegafesootai lagolago a le Ekalesia, talanoa ma faiaoga o a latou fanau i le Peraimeri, taitai o le autalavou, ma au peresitene o vasega ma korama. O le talanoa ma i latou o e ua valaauina ma vaetofia e galulue ma a latou fanau, e mafai ai e matua ona tuuina atu ni faamalamalamaga e talafeagai ai e uiga i manaoga faapitoa ma patino o se tamaitiiti.

Fa, e mafai ona faasoa atu e le aunoa e matua a latou molimau ia latou fanau, faatautino i latou e tausi poloaiga a le Atua, ma folafola atu faamanuiaga ua folafola mai e lo tatou Tama Faalelagi i Ana fanau faamaoni.

Lima, e mafai ona tatou faatulagaina o tatou aiga e faavae i luga o ni tulafono faaleaiga ma ni faamoemoega e manino, ma faigofie, tu ma masani lelei faaleaiga, ma “alamanuia o le aiga,” lea e i ai i tamaiti ni tiutetauave ma mafai ona maua ai ni alauni ina ia latou aoao ai ona paketi, sefe, ma totogi sefuluai i tupe latou te mauaina.

O nei fautuaga mo le fatuina o ni agaifanua faaleaiga malolosi atu e galulue soosootauau ma le agaifanua a le Ekalesia. O a tatou agaifanua malolosi faaleaiga o le a avea ma se puipuiga mo a tatou fanau mai “u fanafanamu a le fili” (1 Nifae 15:24) ua tamau i o latou agaifanua faaletupulaga, i agaifanua o faafiafiaga ma tagata lauiloa, i agaifanua a viiga ma faaeaea, ma le agaifanua a le Initoneti ma ala o faasalalauga lea o taimi uma latou te feitaia’i i ai. O le a fesoasoani ia agaifanua malolosi faaleaiga i a tatou fanau ia “ola i le lalolagi” ae aua le avea “ma ni o le lalolagi” (Ioane 15:19).

Na aoao mai Peresitene Iosefa Filitia Samita: “O le tiute o matua o le aoao o a latou fanau i nei mataupu faavae faaola o le talalelei a Iesu Keriso, ina ia latou iloa le pogai e tatau ai ona latou papatiso ma ia mafai ona latou musuia i o latou loto se manao e faaauau pea ona tausi poloaiga a le Atua pe a uma ona papatisoina i latou, ina ia mafai ona latou toe foi atu i lona afioaga. Outou o o’u uso ma tuafafine lelei, tou te mananao i o outou aiga, o a outou fanau; tou te mananao ia faamauina i o outou tama ma tina na muamua atu ia te outou … ? Afai o lea, ia ua tatau ona e amata aoao atu i talaane o le moega pepe. E tatau ona e aoao atu e ala i faataitaiga faapea ma le faatonuga.”²

Fai mai le folafolaga i le aiga:

“O le tane ma le ava ua i ai se tiutetauave paia e alofa ma tausi e le tasi le isi ma a la fanau. ‘O fanau o le tofi lea mai le Alii’ (Salamo 127:3). Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia faaletino ma le faaleagaga, ma ia aoao i latou e alolofa ma feauaunaa’i, ia tausia poloaiga a le Atua ma avea ma tagatanuu usiusitai i tulafono i soo se mea latou te nonofo ai. …

“… I le fuafuaga paia, e tatau ona pulefaamalumalu tama i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga. O le uluai matafaioi a tina o le faafaileleina lea o a latou fanau. O nei matafaioi paia e ao i tama ma tina ona fesoasoani le tasi i le isi o se paaga tutusa.”³

Ou te talitonu e ala mai i le fuafuaga paia ua faamamafaina mai ai le tiute faaletina o le faafaileleina ma le aoaoina o le augatupulaga o loo sosoo mai. Ae e matagofie tele le vaaia o tane ma ava o e ua galulue faatasi i se faiga faapaaga moni lea latou te miloa faatasi ai o latou faatosinaga ma fesootaiga lelei e uiga i a latou fanau ma i a latou fanau.

O le osofaiga a le amioleaga e faasagatau mai ia tatou fanau ua sili atu le poto ma lē ma nai lo se isi lava taimi. O le fausia o se agaifanua malolosi faaleaiga e faaopoopo ai se isi faavae o le puipuiga mo a tatou fanau, e talitali ai i latou mai faatosinaga a le lalolagi.

Ia faamanuia le Atua ia te outou tina ma tama lelei o Siona. Ua Ia tuuina atu i la outou tausiga ia Ana fanau e faavavau. I le avea ai ma ni matua tatou te faipaaga, ma aufaatasi foi ma le Atua, i le faataunuuina o Lana galuega ma [Lona] mamalu i Lana fanau. O lo tatou tiute paia o le fai o le mea silisili tatou te mafaia. Ou te molimau atu ai i nei mea i le suafa o Iesu Keriso, amene.