Erom juon Rikirijin Eļapļo̧k an āinwōt Kraist

Jen Elder Robert D. Hales

Jen Doulul eo an Jon̄oulruo Rijilōk ro


En̄in ej kūr eo an Kraist n̄an aolep Rikirijin rainin: “Kwon najrik ļaam̧ ko aō. … Kwon najdik Aō sip”

Ta meļeļe in n̄an erom juon Rikirijin?

Juon Rikirijin ewōr an tōmak ilo Irooj Jisōs Kraist, bwe E ej lukkuun Nejin Anij, kar jilkintok jān Jemen n̄an en̄taan kōn jerawiwi ko ad ilo jerbal in iakwe eo eļaptata jejeļā kake āinwōt Pinmuur eo.

Juon Rikirijin ej tōmak bwe kōn jouj eo an Anij Jemen im Nejin, Jisōs Kraist, jemaron̄ ukweļo̧k, jeorļo̧k an ro jet bōd, kōjparok kien ko, im jolet mour indeeo.

Naan eo Rikirijin ej meļeļe in bōk iood etan Kraist. Jej kōm̧m̧ane menin kōn peptaij im bōk menin letok eo an Jetōb Kwojarjar kōn likūt pā ko ioon, jān ro rej kabwijer mālim in priesthood eo An.

Juon Rikirijin ejeļā bwe ilo aolepān bwebwenato ko, rikanaan ro an Anij kar iien otemjej kam̧ool kōn Jisōs Kraist. Ejja Jisōs in wōt, Jemedwōj Ilan̄ kar itok ippān tok, waļo̧k n̄an Rikanaan Joseph Smith ilo iiō eo 1820 im kōjepeļaktok ko̧jpeļ eo im kajutak Kabun̄ eo An m̧oktata.

Kōn jeje ko rekwojarjar im kam̧ool eo kōn Joseph Smith, jejeļā bwe Anij, Jemedwōj Ilan̄, ewōr juon ānbwiin in kanniōk im di eaiboojoj im weppān. Jisōs Kraist ej Nejin Jitōnbōro Emake wōt ilo kanniōk. Jetōb Kwojarjar ej juon nememe in jetōb eo jerbal eo an ej n̄an kam̧ool kōn Jemen im Nejin. Doulul in Anij ej jilu armej ro roktak im jeno̧lo̧k, juon wōt ilo jibadbad.

Kōn katak kein āinwōt pedped eo an tōmak eo ad, emaron̄ ke wōr pere ak iakwelel bwe jej Rikirijin? Aaet n̄an aolep Rikirijin, juon kajjitōk elemwaan ej pād wōt: kain Rikirijin rōt kōj? Ilo bar juon wāween, ekōjkan ad jerbale iaļ eo ad n̄an ļoor Kraist?

Ļōmņak ippa kōn en̄jake eo an ruo Rikirijin rikaļoor:

“Im ke Jisōs ej etetal iturin lom̧aļo in Galili, Ej lo ruo jimjān jimjatin, Saimōn etan Piter, im Andru jatin, rej door ok eo ilojet; bwe rieon̄ad erro.

“Im Ej ba n̄an er, Kom̧ro ļoor eō, im Inaaj likūt kom̧ro rieon̄ad armej.

“Im em̧ōkaj aer ilo̧k jān ok ko aer im ļoor E.”1

Āinwōt Rikirijin ro rainin, ewōr ad iien em̧m̧an n̄an jerbal ilo ejjeļo̧k rum̧wij, m̧ōkaj, im kije, āinwōt kar Piter im Andrew: “Im em̧ōkaj aer ilo̧k jān ok ko aer, im ļoor E.”2 Em̧ōj bar kūr kōj n̄an door ok ko ad, n̄an joļo̧k kōņaan ko an laļ in, m̧anit ko, im iminene ko. Kūr kōj barāinwōt n̄an meļo̧kļo̧k jerawiwi ko ad. “Ke [Jisōs] ej ān̄inn̄in tok jar eo n̄an Ippān … , im ba n̄an er, Jabdewōt eo ekōņaan ļoor eō, en karmejete e make, bōk an debwāāl, im ļoor Eō.”3 Karmejete kōj make jān m̧wil nana ej ijjino an ukweļo̧k, eo ej bōktok juon oktak in bōro ekajoor m̧ae iien jān jab “bar itok n̄an in kōm̧m̧an.”4

Oktak in, ņae etan oktak, epidodo wōt kōn Rilo̧mo̧o̧r eo. Jisōs eaar kallim̧ur: “Eļan̄n̄e armej rej itok n̄an Eō Inaaj kwaļok n̄an er aer m̧ōjņo … ; im Aō jouj ebwe n̄an aolep armej ro rej kōttāik er Im̧aō; bwe eļan̄n̄e rej kōttāik er Im̧aō, im wōr aet tōmak ilo N̄a, innām Inaaj kōm̧m̧an mennin m̧ōjņo̧ ko ren erom kajoor n̄aner.”5 Ilo ad kāāl ilo Kraist, lukkuun piktok ko ad eoktak im ejako ad kōņaan ro̧o̧l n̄an iminene ko ad m̧okta.

Mekarta, Rikirijin ro retiljek renaaj iien otemjej jeram̧m̧an n̄an en̄jake apan̄ ko im inepata ko. N̄e idajon̄jon̄ in kōkōm̧anm̧anļo̧k kein rej itok, jemaron̄ kapo n̄an bar ro̧o̧l n̄an iminene ko ad etto. Ālkin Debwāāl eo an Rilo̧mo̧o̧r eo, Eaar waļo̧k n̄an kōrā ro im jiron̄ er bwe rijilōk ro renaaj loe E ilo Galili. Ke Piter, Rijilōk eo eto an pād, kar ro̧o̧l n̄an Galili, eaar barāinwōt ro̧o̧l ļo̧k n̄an ta eo eaar jeļā—n̄an ta eo eaar em̧m̧an an kōm̧m̧ane. “Ij ilen eo̧n̄ōd,”6 eaar kōmeļeļeik, im bōk jeet iaan rikaļoor ro Ippān.

Ilo m̧ool, Piter im ro jet raar eon̄ad aolepān bon̄ōn eo ejjeļo̧k koņaer ek. Jibbon̄ōn eo juon Jisōs eaar waļo̧k ilo perijet im kūr er jān ene, “Door ok ko [ami] anbwijmaron̄.” Jon em̧ōkaj an kile ainikien Rilo̧mo̧o̧r eo, im Piter ejidimkij an keļo̧k n̄an dān eo im aaō n̄an parijet. Rijilōk ro me raar pād wōt ilo wa eo raar ļoor naan in kōmeļeļe ko An im m̧ōkaj in kar lo ok ko aer raar obrak im lutōkļo̧k.7

N̄an Rikirijin ro me em̧ōj aer oktak n̄an iminene ko aer etto, jatiljek, ļōmņak kōn waanjon̄ak eo etiljek an Piter. Jab karum̧wijļo̧k. Ron̄jake im kile ainikien an M̧aajta eo ikkūr. Innām jab karum̧ijm̧ij bar ro̧ol n̄an E im bōk kōjeram̧m̧an ko An rellōn̄ juon alen.

Ke rikaļoor ro raar bar wōnāneļo̧k n̄an parijet, raar lo juon kōjota in ek im pilawe. “Kom̧win itok im m̧ōn̄ā,”8 Rilo̧mo̧o̧r eo eaar kūr er. Ke Eaar najdik er, Eaar kajjitōk ippān Piter jilu alen, “Saimōn nejin Jon, kwoj yokwe Eō ke? Ke Piter eaar kwaļo̧k an iakwe, Rilo̧mo̧or eo ejabenejej n̄an e, “Kwon najdik ļaam̧ ko Aō. … Kwon najdik Aō sip.”9

En̄in ej kūr eo an Kraist n̄an aolep Rikirijin rainin: “Kwon najdik ļaam̧ ko aō. … Kwon najdik Aō sip”—kwaļo̧k ko̧jpeļ eo aō ippān ro reddik im rūtto jim̧o̧r, ļōn̄aj, kōjeram̧m̧an, kaenōm̧m̧an, kōketak, im kalōk er, eļaptata ro rej ļōmņak im tōmak eoktak jān kōj. Jej najdik ļaam̧ ko An ilo kapijuknen ko ad kōn ewi wāween ad mour kōn ko̧jpeļ eo: kōjparok kien ko, jar, ekkatak jeje ko rekwojarjar, im kwaļo̧k iakwe eo An. Jej najdik an sip ilo Kabun̄ in ilo ad jerbal ilo doulul ko an priesthood eo im radik ko. Im jej najdik An sip ilo aolepān laļ in kōn erom Rikirijin n̄an ro rūturid, kōjerbal m̧atin kabun̄ eo erreo an loļo̧k im jerbal n̄an lim̧aro emej pāleer, ejjeļo̧k jemeer, rijeram̧ōl, im aolep ro rej pād ilo aikuj.

N̄an elōn̄, kūr eo ej n̄an juon Rikirijin emaron̄ āinwōt ļap, em̧ool tōr jān jon̄an. Bōtaab jej jab aikuj mijak ak en̄jake likjab. Rilo̧mo̧o̧r eaar kallim̧ur bwe Enaaj kōm̧m̧an bwe jān maron̄ kōm̧m̧an jerbal eo An. “Ļoor eō,” Eaar ba, “im I naaj likūt kom̧ rieon̄ad armej.”10 Ilo ļoor E, Ej kōjeram̧m̧an kōj kōn menin letok ko, tōļan ko, im kajoor eo n̄an kōm̧m̧an Ankilan, eo ekōm̧m̧an bwe jān eddōkļo̧k jān kōm̧m̧an eļapļo̧k jān ta eo kiiō jej kōm̧m̧ane im kōm̧m̧ane men ko jejjan̄in kar kōm̧m̧ani m̧okta. Emaron̄ meļeļe in kwaļo̧k ko̧jpeļ eo ippān ro rūturid, lo̧mo̧o̧ren ro me rejōbwābwe ilo jetōb, jerbale juon mijen elikieo, jerbal ilo tampeļ, kōkkajiririk juon ajri ewōr utam̧we ānbwinin, iakwe juon eo ejōbwābwe, kōjparok eo m̧ōttad enan̄inmej, niknik ilo jab meļeļe ko, ak en̄taan ilo kaen̄taanan. Ej meļeļe in kōpooj kōj make n̄an uwaake kūr eo An jān ba: “Inaaj ilo̧k ijo kwon kōņaan bwe in ilo̧k ie ļo̧k; Inaaj ba ta eo kwoj kōņaan bwe in ba; Inaaj kōm̧m̧ane ta eo kwon kōņaan bwe in kōm̧m̧ane; Inaaj erom ta eo kwoj kōņaan bwe in erom.”11

N̄an erom eo Jemedwōj Ilan̄ ekōņaan bwe jān erom, jej ļoor Jisōs Kraist. Ij kam̧ool bwe E ej wōnm̧aaņļo̧k wōt ilo kūr kōj n̄an ļoor E. Eļan̄n̄e kwoj kab tōn katak kōn kallim̧ur in Rikirijin eo an Armej ro Rekwojarjar ilo Raan-ko Āliktata ak eļan̄n̄e kwoj jan̄in lukkuun bōk kuņaam̧ ilo Kabun̄ eo im kōņaan ļoor E bar juon alen—jab mijak! Rikaļoor ro kein kajuon an Rilo̧mo̧o̧r eo raar aolep membōr kāāl an Kabun̄ eo, rioktak kāāl tok n̄an ko̧jpeļ eo An. Jisōs eaar kijenmej ilo katakin kajjojo iaer. Eaar jipan̄ er kakūrm̧ool eddo ko aer. Eaar kūr er ro M̧ōttan im likūt mour eo an kōn er. Im em̧ōj kadede An kar kōm̧m̧ane ejja in wōt n̄an kwe im n̄a.

Ij kam̧ool bwe kōn iakwe im jouj eo An ejjeļo̧k jon̄an, jemaron̄ Rikirijin ro reierļo̧k wōt Kraist. Ļōmņak kōn m̧wil kein an Kraist. Ekōjkan ad kōkajoorļok er ilo kōj make?

Iakwe eo āinwōt an Kraist. Rilo̧mo̧o̧r eaar kaorōk aolep. Jouj im tenkwadik n̄an aolep, Eaar door ratimjuonn̄oul-im-ratimjuon n̄an pukōt juon ,12 bwe “em̧ōj bwini koļan [bōrad] … otemjeļo̧k”13 n̄an E.

Tōmak āinwōt an Kraist. Kōjekdo̧o̧n kapo ko, mālijon̄ ko, im kaentaanan ko, Rilo̧mo̧o̧r eaar lōke Jemedwōj Ilan̄ im kālet n̄an tiljek im pokake n̄an kien ko An.

Karmejete āinwōt an Kraist. Ilo aolepān mour eo An Rilo̧mo̧o̧r eo eaar leļo̧k aolepān iien eo An, kajoor eo An, im āliktata, kōn Pinmuur eo, eaar leļo̧k E make bwe aolep ajri ro nejin Anij ren maron̄ jerkakpeje im wōr aer iien em̧m̧an n̄an jolet mour indeeo.

Kea eo āinwōt an Kraist. Āinwōt Risamaria eo em̧m̧an, Rilo̧mo̧o̧r eaar wōnm̧aanļo̧k wōt n̄an pukōt n̄an lo̧mo̧o̧ren, iakwe, im najdik armej ro Ipeļaakin, jekdo̧o̧n ta m̧anit eo aer, utiej bōro, ak jekjek.

Jerbal in jipan̄ eo āinwōt an Kraist. Men̄e itōk jān juon aibōj laļ, kōmat ek kein m̧ōn̄ā, ak kwaļ nee ko rōbūn̄aln̄al, Rilo̧mo̧o̧r eo eaar joļo̧k raan ko An jerbal n̄an ro jet—jipan̄ ro rōm̧ōk im kōkajoorļo̧k ro rōm̧ōjņo̧.

Kijenmej āinwōt an Kraist. Ilo būrom̧ōj im en̄taan eo An make, Rilo̧mo̧o̧r eo eaar kōttar Jemān. Kōn kijenmej eo n̄an kōj, Ej kōttar kōj ilo kijenmej n̄an ad kili ta eo ejim̧we im jepļaak n̄an kapijuknen.

Aenōm̧m̧an āinwōt an Kraist. Ilo aolepān jerbal in kwaļo̧k eo An Eaar kōketak meļeļe im lelōn̄ tak aenōm̧m̧an. Eļaptata ibwilijin rikaļoor ro An, Eaar katakin bwe Rikirijin ejjab maron̄ jum̧ae Rikirijin ro jet, jekdo̧on oktak ko aer.

Jeorļo̧k bōd āinwōt an Kraist. Eaar katakin kōj n̄an kōjeram̧m̧an ro me rej kajirere kake kōj im kar kwaļo̧k n̄an kōj wāween eo kōn jar bwe ro me raar debwāāl E ren jeorļo̧k aer bōd.

Oktak eo āinwōt an Kraist. Āinwōt Piter im Andrew, elōn̄ rej kile m̧ool eo an ko̧jpeļ eo ilo iien eo wōt rej ron̄jake. Rej m̧ōkaj in oktak. N̄an jet emaron̄ aitokļo̧k. Ilo juon revelesōn kar letok kōn Rikanaan Joseph Smith, Rilo̧mo̧o̧r eaar katakin men ko me rej an Anij rej meram, im armej eo ej bōk meram eo im wōnm̧aanļo̧k wōt ilo Anij ej bōk eļapļo̧k meram, im bwe meram eo ej meramļo̧k im meramļo̧k m̧ae raan eo eweppān,”14 raan eo eweppān an oktak eo ad. Jisōs Kraist ej meram eo im Ripinmuur eo an laļ in; E ej Jetōb eo an m̧ool.15

Niknik n̄an jem̧ļo̧k eo āinwōt an Kraist. Ilo aolepān raan ko An, Rilo̧mo̧o̧r eaar jab ebbwer ilo kōm̧anm̧an ankilaan Jemen ak wōnm̧aanļo̧k wōt ilo jim̧we, em̧m̧an, jouj, im m̧ool n̄an jem̧ļo̧k in mour wabanban eo An.

Men kein rej jet iaan m̧wil ko an ro me rej ron̄jake im ļoor ainikien Rilo̧mo̧o̧r eo. Āinwōt juon iaan rikam̧ool ro An rejeno̧lo̧k ioon laļ in, Ij lewaj naan in kam̧ool eo aō āinwōt an Kraist bwe E ej kūr n̄an kom̧ rainin, “Itok, im ļoor eō.”16 Itok im etetal ilo iaļ eo me ej tōl ļo̧k n̄an m̧ōņōņō indeeo, lan̄lōn̄, im mour eo ejjeļo̧k jem̧ļo̧k in ilo aelōn̄ in kiin̄ eo an Jemedwōj Ilan̄. Ilo etan Jisōs Kraist, ad Rilo̧mo̧o̧r im Ripinmuur, amen.

Mostrar las referencias

  1.  

    1.  Matu 4:18–20.

  2.  

    2.  Mark 1:18.

  3.  

    3.  Mark 8:34.

  4.  

    4.  Mosaia 5:2.

  5.  

    5.  Ether 12:27; kalikkar kar kakobaba.

  6.  

    6.  Jon 21: 3.

  7.  

    7. Lale Jon 21:3–8.

  8.  

    8.  Jon 21:12.

  9.  

    9. Lale Jon 21:15–17.

  10.  

    10.  Matu 4:19:; kalikkar kar kakobaba.

  11.  

    11. Lale “I’ll Go Where You Want Me to Go,” Hymns, , nō. 270.

  12.  

    12. LaleMatu 18:12–14.

  13.  

    13.  Luk 12:7.

  14.  

    14.  Lale Doctrine and Covenants 50:24.

  15.  

    15.  Lale Doctrine and Covenants 93:9.

  16.  

    16.  Luk 18:22.