Kanaiehng Me Pid Pein Kumwail

Sang Elder Anthony D. Perkins

En Isiakan


Mihmihte pohn ahl en priesthood sang ni kaloaliala amwail weliakapw oh kakehlailih amwail peneinei. … Dehr lelohng kahpwal sang ni pahsan kilel kan en pali ngehn en “Kanaiehng” me pwilidi nan atail ahl sang Koht oh soukohp akan.

Ni ahi mwahnakapwo, aht peneinei kin diraip kotehla nahna kan en Rocky Mountains nan America pwehn mwemweit rehn ahi pahpa nohno kahlap. Ahlo tepida nan mohs akan en dihpw tekatek meng, uhd dikoudi nan welin tuhke pine, oh kedekedeo pwerda nan welin tuhke aspen oh mohs en pohn nahna wasa me se kak kilengwei inenen doh.

Ahpw ahl lingan wet mie wasa me keper ie. Pali laud en ahlo wiawihda ni keilen nahna ukada. Pwehn sile soun seiloak kan, irail me wiahda ahlo kauwada kehl oh pwilikihdi kilel me nda, “Kanaiehng: Takai Pwumpwupwudi.” Se kilang tohto kahrepen eh mie mehn kaweid pwukat. Takai oh paip laud mihseli nan pillapo dohdihla pahnangin ahlo. Se kin kedekedeo kilang sidohsa mwutpene ni kapin wahuo, karasaras kapwuriamwei en soun diraip kan me sohte kanaiehng.

Kahula oh Inou Sarawi en Priesthood

Riei ohl akan, emenemen kumwail pidolongehr, de kerenieng pahn pidolong, ong nan kahula oh inou sarawi en Priesthood en Melkisedek.1 Inouo pid seiloak lingan ehu me tepikihda alehdi koaros priesthood tikitiko oh me ilehsango, kin doula sang ni kapwaiada pwukoa malipilip kan, oh kin ansou koaros kohkohdahla ong wasahn iroir kaselel de kapai lap kan lao kitail alehdi mehkoaros me Sahmo sapwellimaniki.2

Me eripit-o me wiahda ahl celestial-o kawadahr kilel pwehn kaweidki me keper ong atail seiloak wet. Kahula oh inou sarawi en priesthood audaudiki kaweid me doke ngenitail kan: “I uhd kihieng kumwail kosonned en tetehk duwen pein kumwail.”3

Ia kahrepen Koht eh pahn mahsanihong kitail en kanaiehng? E mwahngih me Sehdan mehlel4 oh kin rapahki en wirahdekihdihla pali ngenitail ong nan lehn nsensuwed.5 Koht pil mwahngih me mie rehn me kol priesthood uhdahn “duwen…aramas”6 me kehieng dohlahsang Koht.7 Eri, soukohp kan kin lukeikitail en pwilikihdi “mour mering”8 oh alehda “mouren Krais”9sang ni pwoson, koluhla, tiahk sarawi kan en komour, oh momourki rongamwahuo rahn koaros.

Dehr Lelohng Kahpwal

Ni eh wie kekeirda pohn ahl en priesthood, sohte lipilipil mwahnakapw de ohl kak en kolkoldi ni pali ngehn ma e sohte pahn kanaiehng. Kumwail pwuriamweikilahier oh nsensuwedikihla mehlel pwupwula sou kasikpe en mwahnakapw kaselel men, misineri me ahpwtehn pwurodo, emen kaun en priesthood me waun, de emen tohn peneinei me komw poakohng?

Soai nan Kadehde Mering en Depit iei karasaras kansensuwed en manaman en priesthood eh wiakaula. Mendahte eh kalowehdi Kolaiad ni eh pwulopwul oh momour sounpar tohto ni mour pwung,10 soukohp-nanmwarki menet pil mengei en lohdi ni pali ngehn. Nan ansou kesempwalo sang pohn imweo e kilangada Padsipa me kaselel wie duhdu, sohte soun sile kesihnen limwah pwehn wer, “Kanahieng, Depit, ke pweipwei!” Ah sohte kanaiehng me pid pein ih11 oh en mwekidki kapehm en Ngehno12 elehieng en salongasang ih ah peneinei soutuk.13

Riei ohl akan, ma lella Depit me kehlail kak en koakoahkweisang pohn ahl kolahng lapalapala, ia duwen atail kak dehr lelohng soahng duwe met?

Tepin padahk silasil kan iei pein atail weliakapw loal oh nanpwungen towe kan en peneinei en kehlail.

Ni eh ese met, Sehdan kin kesehdieng lapalahn takai kan pohn ahl en priesthood me kin kauwehla keirdahn weliakapw loal oh peneinei. Ni kalahngan, Sises Krais oh Sapwellime soukohp akan pwilikihdier kilel kan en “Kanaiehng” pohn atail ahl. Irail kin kehkehlingkiong kitail duwen pohnmwahso14 me kin kauwehla weliakapw oh dihp me kin kauwehla peneinei rasehng lingeringer, noahrok, oh ineng suwed.

Mahs mahso, Moses kaweidki, “kanaiehng pwe kumwail dehr manokehla Kauno.”15 Nan atail mwehiet en kediropw oh diren mehn kemweit, leledo met aramas kin mwadang en manokehla Kauno,… oh wiahda suwed, oh iangala me suwedo eh pahn kahreikitailla.16

Weliakapw Loal oh Kakehlailih Peneinei

Pwehn mihmihte mwahu pohn ahl en priesthood nanpwungen takai kan en kasongosong, I katamankinkitail tepin padahk poahsoan weneu me kin kaloalehla weliakapw oh kakehlailih peneinei.

Keieu, kapakap kin ansou koaros ritingada wenihmw ong sawas sang nanleng pwehn “powehdi Sehdan.”17 Ehuehu ansou me Sises kaweidkinirail me kol priesthood en kanaiehng, pwe Sehdan men song [kumwail], Sises ketin kaweidki me kapakap iei mehn pelian kasongosong.18 President Thomas S. Monson padahngkihier: “Ma mie emen rehtail me pwand en rong kaweido en kin kapakap ansou koaros, sohte ansou mwahusang met en tepida . … Aramas emen sohte kin kesihnenda reireisang ansou me e kin kelepwukihdi.”19

Keriau, onopiki pwuhk sarawi kan en kawao oh mwehiet kin kadokeikitaillahng Koht. Kauno kaweidki towe kan en Mwomwohdiso en kanaiehng duwen arail kesempwaliki soukohp akan pwe re de wiahki mehkot sohte kesempwal, oh elehieng arail lipwoariki, oh dipekelekel oh pwupwudi.20 Pwehn dehr lelohng lipwoar, kitail konehng pwerisekieng wadawad pwuhk sarawi rahn koaros, iangahki makasihn kan en Mwomwohdiso, oh website kan me kin elehieng atail “kin alehdi kaweid ni wiepe me dokehte emen sang [Sapwellimen Kauno] soukohp pilipilda kan.”21

Kesiluh, towehda ni warohng tiahk sarawi kan kin kaunop kitail en kaweidki Ngehn Sarawi.22 Ni Sounkomouro eh kin kaweidkinkitail en kanaiehng pwe kitail de lohdieng likamw, E ketin inouki me kitail sohte pahn ma kitail pahn rapahki ni ngoang kisakis kan en Ngehn Sarawi me keieu mwahu.23 Alehda kamadipw sarawi ni warohng nan ehuehu wihk kin elehieng towe kan ahr warohng “sapwellime Ngehno en ketiket rehrail ansou koaros.”24 Nan kaudok en tehnpas sarawi kitail kak alehdi Ngehn Sarawio ni unsek.25

Kapahieu, kaskasale limpoak mehlel poahsoanehda weliakapwalahn emenemen oh nanpwungen towe kan en peneinei. Nanmwarki Benjamin kehkehlingki, “mwasahn pwe …uhpene” de pwarada nanpwungamwail.26 Dehr manokehla me Sehdan iei “pahpahn uhpene”27 oh kin rapahki towe kan en peneinei en kin “pei oh akamai.”28 Ohl akan, ma kitail kin wiakauwe ni pali en pepehm, lokaia, de doahkehdi sohte lipilipil towe en atail peneinei, de mwomw suwed ong sohte lipilipil aramas, kitail pahn katiasang manaman en priesthood.29 Pilada en kaunda lingeringer. Towe kan en peneinei konehng rong kapai sang ewetail kaidehn lokaiahn keria. Kitail en kin kaweid mehteikan ihte sang ni kangoang, kanengamah, meleilei, karakarahk, limpoak mehlel, kadek, oh limpoak unsek.30

Kelimau, peikiong kosonned en meiroang en eisek kis ehu iei pali kesempwal en pwoson oh minimin nan peneinei. Pwehki Sehdan eh kin doadoahngki noahrok oh repen dipwisou en koahkehsang peneinei pohn ahl celestial, Sises ketin kaweidki, “kumwail kalekeikumwailsang noahrok.”31 Noahrok kin kolkoldi ni atail kin koasoanehdi netinetpen neitail mwohni, pwain meiroang en eisek kis ehu ni pwung oh en kaisihsol ni sapan, koasoanehdi duwen pwain me kitail anahne, dehr pweipwand me sohte anahn, nekinek ong anahn en ehu rahn, oh uhtohrada. Sapwellimen Koht inou ong kitail iei, “Eri, kumwail rapahki mahs Wehin Koht, oh dahme e kin ketin kupwurki, a soahng teikan koaros e ahpw pahn kin ketikihong kumwail.”32

Keweneu, momourki ni unsek kosonned en mour mwakelekel kin elehieng “en kin uh pahn kupwuren Koht” ni “Ngehn Sarawi eh pahn ieiang kitail ansou koaros.”33 Sehdan songosong en kauwehla mour mwakelekel oh pwopwoud sang ni diren me suwed. Ni ansou me Kauno kaweidki sounkamwahl kan en kanaiehng oh mwadang koluhla, Sapwellime kawehwehpen met iangahki kaidehnte mwekido ahpw madamadau kan en ineng me tiengla mwowe.34 Soukohp oh wahnpoaron akan en mwehiet mahsanihier pak tohto oh ni sansal duwen kahpwal en kasdo oh kilel suwed. President Gordon B. Hinckley padahngki: “[Kasdo oh kilel suwed] duwehte melimel doar, kaukauwehla aramas men oh peneinei, kaukauwehla douluhl dahme ansou ieu mwahu oh kaselel. … Ansouo leledohr ong sohte lipilipil kitail me kin wiewie met en waikada pein ih sang nan samino.”35 Ma komw kin kasongosong en kauwehla kosonned en mwakelekel ni sohte lipilipil mwohmw, idawehn ahn Sosep en Isip karasaras, me “tangasang, tangeila liki.”36

Tepin padahk poahsoan weneu pwukat kin sewese me kol priesthood en douluhla pohn ahl sarawio ni keneinei nanpwungen kehl en keilenial mehn doarehla pali ngehn me iei pein weliakapw loal oh nanpwungen tohn peneinei. Mwahnakapw akan, peikiong tepin padahk pwukat pahn kaunop kumwail ong inou kan en tehnpas sarawi, papah en misineri, oh pwopwoud soutuk. Ohl pwopwoud kan oh pahpa kan, momourki tepin padahk pwukat pahn kahrehiong amwail warohng kaunda nan ihmw ni mour pwung, papah ni duwen soun kaweid en pali ngehn nan amwail peneinei, ni amwail iang amwail pwoud ni duwen werek pahrek.37 Ahl en priesthood iei seiloak me audaudki peren.

Staying on the Priesthood Path

Pwuralahng irair kan me I lelohng ni ei mwahnakapw, I taman ehu pako aht kotehla nahna kan en Rocky Mountains. Mwurin aht daulih ehu kilel menda “Kanaiehng: Takai Pwumpwupwudi,” ahi pahpao tehkada rakied oh kisin takai pwumpwupwudi pohn ahlo mwoht. E mwadangete wawaila kerenieng kauhdi sidohsao ni ansouohte me lapalahn takai ehu eh pwupwudi karanih kit. Pahpa uhdi lao mweredien takai kan eh uhdi. Ahi pahpao eh kin wie tetehk ansou koaros oh mwadangete mwekid kahrehieng aht peneinei eh seiloak mwahu lella wasa se kohkohlaie.

Ohl oko, Sehdan “kin song en kauwehla ngehn en aramas.”38 Ma ngenomw wie mwekmwekid kerenlahng keilen me keper ong pali ngehn, uhdi met mwohn omw pahn pwupwudi, oh pwurehng inenla pohn ahlo.39 Ma ke kehn me ngenomw pwupwudihier oh ohlahr ah kaidehn mihmi ile pohn ahl en priesthood pwehki ke pohnsehsehla kilel kan en “Kanaiehng” oh dipadahr, I kadehde me sang ni koluhla mehlel oh manaman en tohnmetei komour en Sises Krais, kumwail kak en pwokpwokda oh kopwurupwurieng pohn Sapwellimen Koht ahl lap sarawi.40

Sises padahngki, “Kumwail kalekeikumwailsang … tiahk mwalaun.”41 Ma kumwail sohte warohng en doadoahngki priesthood, menlau tuhweng amwail pisop, me kak sewesei kumwail koluhla. Dehr peikasal pwe mendahte Sounkomouro eh mahsanihong kitail me kitail, “Kaniehng …, oh dehr wiahda dihp,”42 E pil ketin inouki: “Ngehi, Kauno, pahn mahkehng kumwail.… Eri kumwail kohwei oh dehier wiahda dihp.43

I luke pwutak oh ohl koaros en mihmihte pohn ahl en priesthood sang ni kaloaliala amwail weliakapw oh kakehlailih amwail peneinei. Kapakap kan, pwuhk sarawi kan, oh tiahk sarawi kan kin kaloaliala weliakapw. Limpoak, meiroang, oh mwakelekel kin kakehlailih peneinei. Dehr lelohng kahpwal sang ni pahsan kilel kan en pali ngehn en “Kanaiehng” me pwilidi nan atail ahl sang Koht oh soukohp akan. Nantihieng en idawehn karasaras unsek en Sises Krais, me lokolongki kasongosong kan, ahpw sohte dukieng.44

I inouki me ma ohl akan pahn kolokol inou en priesthood en “kanaiehng me pid pein kumwail,”45 kitail oh atail peneinei kan pahn kak en lella mwahu oh peren wasa lapalap me kitail kohkohlaie nan wehi celestial. I kadehdehki ni mwahr sarawi en Sises Krais, ahmen.

Mostrar referencias

  1.  

    1. Tehk Doctrine and Covenants 84:33–44.

  2.  

    2. Tehk Doctrine and Covenants 84:38.

  3.  

    3. Tehk Doctrine and Covenants 84:43.

  4.  

    4. Tehk Joseph Smith—History 1:16; pil tehk Moses 1:12–22.

  5.  

    5. TehkHelaman 5:12; pil tehk 2 Nephi 1:13; Helaman 7:16.

  6.  

    6.  Mosiah 3:19; pil tehk 1 Korint 2:14.

  7.  

    7. “Come, Thou Fount of Every Blessing,” Hymns (1948), nempe 70.

  8.  

    8. Tehk Kolose 3:8–10; pil tehk Episos 4:22–24.

  9.  

    9.  Kalesia 3:27; pil tehk Rom 13:14.

  10.  

    10. Tehk 1 Samuel 13:14; 17:45–47 .

  11.  

    11. Tehk2 Samuel 11:1–17.

  12.  

    12. “Kumwail sohte pahn wiahda sapwung laud ni amwail sohte pahn keperki mahs sang ni kapehm kan en Ngehno” (Boyd K. Packer, “Counsel to Youth,” Liahona oh Ensign, Nopempe 2011, 18).

  13.  

    13. Tehk Doctrine and Covenants 132:39; pil tehk Bible Dictionary, “David.”

  14.  

    14. Tehk Doctrine and Covenants 23:1; 25:14; 38:39; pil tehk Ezra Taft Benson, “Beware of Pride,” Ensign, Mei 1989, 4–7.

  15.  

    15.  Deuderonomi 6:12; pil tehk Deuderonomi 8:11–19.

  16.  

    16. TehkAlma 46:8.

  17.  

    17. TehkDoctrine and Covenants 10:5.

  18.  

    18. Tehk Doctrine and Covenants 52:12–15; pil tehk Luk 22:31–32; Alma 37:15–17; 3 Nephi 18:18–19.

  19.  

    19. Thomas S. Monson, “Come unto Him in Prayer and Faith,” Liahona, Mahs 2009, 4; Ensign, Mahs 2009, 6.

  20.  

    20. TehkDoctrine and Covenants 90:5; pil tehk Doctrine and Covenants 41:1, 12.

  21.  

    21. Gordon B. Hinckley, “Faith: The Essence of True Religion,” Ensign, Nopempe 1981, 5.

  22.  

    22. Tehk Doctrine and Covenants 45:57.

  23.  

    23. TehkDoctrine and Covenants 46:8; pil tehk Episos 4:14; Doctrine and Covenants 52:14–16; Kolose 2:8.

  24.  

    24. TehkMoroni 4:3; TehkDoctrine and Covenants 20:77; pil tehk 3 Nephi 18:1–11.

  25.  

    25. TehkDoctrine and Covenants 109:15.

  26.  

    26.  Mosiah 2:32.

  27.  

    27. Tehk 3 Nephi 11:29–30.

  28.  

    28.  Mosiah 4:14.

  29.  

    29. Tehk Doctrine and Covenants 121:36–37; pil tehk Doctrine and Covenants 63:61–63.

  30.  

    30. Tehk Doctrine and Covenants 121:41–45.

  31.  

    31.  Luk 12:15; pil tehk Doctrine and Covenants 38:39.

  32.  

    32.  Madiu 6:33; pil tehk 3 Nephi 13:33.

  33.  

    33. TehkDoctrine and Covenants 121:45–46; pil tehk Doctrine and Covenants 67:11; Moses 1:11.

  34.  

    34. Tehk Doctrine and Covenants 63:14–16; pil tehk Madiu 5:27–28; 3 Nephi 12:27–30.

  35.  

    35. Gordon B. Hinckley, “A Tragic Evil among Us,” Liahona oh Ensign, Nopempe 2004, 59, 62; pil tehk Dallin H. Oaks, “Pornography,” Liahona oh Ensign, Mei 2005, 87–90; Jeffrey R. Holland, “Place No More for the Enemy of My Soul,” Liahona oh Ensign, Mei 2010, 44–46.

  36.  

    36.  Senesis 39:12.

  37.  

    37. Tehk Handbook 2: Administering the Church (2010), 2.3.

  38.  

    38. TehkDoctrine and Covenants 10:27; pil tehk 1 Piter 5:8.

  39.  

    39. Tehk Doctrine and Covenants 3:9–10; 1 Korint 10:12–13; 2 Piter 3:17.

  40.  

    40. Tehk Alma 13:27–29; Doctrine and Covenants 109:21.

  41.  

    41.  Luk 12:1; pil tehk Doctrine and Covenants 50:6–9.

  42.  

    42. TehkDoctrine and Covenants 82:2.

  43.  

    43. TehkDoctrine and Covenants 82:1, 7.

  44.  

    44. TehkDoctrine and Covenants 20:22; pil tehk Ipru 2:17–18; 4:14–16.

  45.  

    45. TehkDoctrine and Covenants 84:43; pil tehk Deuderonomi 4:9; Mosiah 4:29–30.