Faamanuiaga o le Faamanatuga

O le mataupu faavae muamua o le i ai lea o se lagona o le faafetai i le Tama Faalelagi i le taimi o le faamanatuga o le Togiola a Lona Alo. O le tala lenei na faamatalaina e uiga i le tufaina o le faamanatuga:

“O le faamanatuga sa leai tele sona uiga moni ia te a’u seia oo i le Aso Sa sa faauuina ai a’u o se tiakono. O le aoauli lena sa ou tufaina ai le faamanatuga mo le uluai taimi lava. A o le’i oo i le sauniga, sa lapatai a’u e se tasi o tiakono, ‘Vaavaai mo Uso Schmidt. Atonu e ao ona e fafaguina o ia!’ Mulimuli ane na oo mai le taimi ou te auai ai i le tufaina o le faamanatuga. Sa lelei lava lo’u taulimaina o laina muamua e ono. Sa taumamafa tamaiti ma tagata matutua i le falaoa e aunoa ma se mafaufau tele i ai po o se faafitauli. Ona ou oo atu lea i le laina lona fitu, lea e saofai ai i taimi uma ia Uso Schmidt. Ae sa o’u tei. Nai lo le moe sa ala lelei o ia. E le pei o le toatele o isi sa ou auauna atu i ai, sa ia tago i le falaoa ma se agaga sa foliga mai sa manatunatu loloto ma le migao i ai.

“O ni nai minute mulimuli ane, sa ou toe oo atu ai foi ma le vai i le laina lona fitu. O le taimi la lenei sa sa’o lava la’u uo. Sa saofai Uso Schmidt ma lona ulu sa punou ma ona mata Siamani lapopoa sa moeiini. Sa mautinoa lava ua moegapepe. O le a la’u mea a fai pe tautala atu ai? Sa ou tilotilo atu mo sina taimi i ona fulufulumata, ua maanuminumi ma matua mai le tele o tausaga o galuega ma faigata. Sa auai o ia i le Ekalesia a o talavou ma sa oo o ia i le tele o sauaga i lona nuu laitiiti i Siamani. Sa faatele ona ou faalogo i le tala i sauniga molimau. Mulimuli ane, sa ou filifili loa e eueu lemu lona tauau ma le faamoemoe e ala ae ai o ia. A o o’u aapa atu e fafagu, sa ea malie a’e lona ulu. Sa tafe ifo ona loimata i ona alafau ma a o o’u vaai atu i ona foliga, sa ou vaaia ai le alofa ma le olioli. Sa tago ae o ia ma uu le ipuvai. E ui lava sa na o le sefululua o’u tausaga i le taimi lena, ae o loo mafai lava ona ou manatuaina lelei le lagona sa ou maua a o ou tilotilo atu i lenei toeaina malosi o ai ma inu i le faamanatuga. Sa ou iloaina e aunoa ma se masalosalo sa ia lagonaina se mea e uiga i le faamanatuga ou te le’i lagonaina lava. O iina sa ou naunau ai ou te fia manao foi ia ou lagonaina na lava lagona e tasi.”⁴

Sa talanoa Uso Schmidt ma le lagi, ma sa talanoa mai le lagi ia te ia.

O le mataupu faavae lona lua o le manatua lea o loo tatou faafouina a tatou feagaiga o le papatisoga a o tatou taumamafa i le faamanatuga. O nisi o folafolaga tatou te faia, e pei ona tusia i tusitusiga paia, e aofia ai le:

“O mai i le lafu a le Atua, ma ta’ua o ona tagata, … e tauave avega a le tasi, … e faanoanoa faatasi ma e e faanoanoa … , ma tutu o ni molimau a le Atua.”⁵

“O mai i luma ma loto momomo ma agaga salamo, … ua loto e ave i o latou luga le suafa o Iesu Keriso, ua i ai se naunautai e auauna atu ia te ia e oo i le iuga,”⁶ ma manatua pea o Ia ma tausi i Ana poloaiga.⁷

O tatalo o le faamanatuga o se faamanatu o nei feagaiga. A tatou fetagofi atu i le faamanatuga, tatou te faafouina a tatou tautinoga ia ola i nei feagaiga. Ou te talitonu o se mea talafeagai le taulotoina o tatalo o le faamanatuga i o tatou mafaufau ma i o tatou loto. O le a fesoasoani lea ia i tatou e taulai atu ai i le faafouina o a tatou feagaiga o le papatisoga. E tusa lava po o le 8 pe 80 tausaga lo tatou matutua i le taimi na tatou papatiso ai, ou te faamoemoe o le a le galo lava ia i tatou lena aso atoa ai ma feagaiga na tatou osia.

Lona tolu, i le taimi o le faamanatuga, e mafai ona tatou lagonaina ai le faamagaloina o a tatou agasala. Afai na tatou faaaluina se taimi a o le’i oo i le sauniga faamanatuga e salamo ai i a tatou agasala, e mafai ona tatou o ese mai le sauniga faamanatuga ma se lagona mama ma atoatoa. Na saunoa Peresitene Boyd K. Packer: “O le faamanatuga e faafou ai le faagasologa o le faamagaloga. O Aso Sa uma pe a tufaina le faamanatuga, o se sauniga lena e faafou ai le faagasologa o le faamagaloina. … O Aso Sa uma e te faamamaina ai oe lava ina ia, i le taimi e tatau ai, pe a e oti o le a mama lou agaga.”⁸ O le tago atu ma le agavaa i le faamanatuga e mafai ona fesoasoani tatou te lagona ai e pei o tagata o le nuu o le Tupu o Peniamina, o e, “sa faatumuina i le olioli, ina ua latou maua se faamagaloga o a latou agasala, ma latou maua le filemu o le mafaufau.”⁹

O le mataupu faavae lona fa e faapea e mafai ona tatou maua musumusuga mo tali i o tatou faafitauli i le taimi o le sauniga faamanatuga. A o avea au ma se peresitene o le misiona i Polivia, sa ma maua ai ma lou toalua o, Mary Anne le faamanuiaga o le auai atu i le semina a peresitene o misiona faatasi ai ma Peresitene Henry B. Eyring. I lena fonotaga sa ia aoao mai ai e tolu ni auala o i ai e saunia ai ia faamanuiaina mai se fonotaga. E tatau ona tatou o mai ma o tatou faafitauli, ia faamaualalo e pei o tamaiti ua saunia e aoao, ma faatasi ai ma se manao e fesoasoani i fanau a le Atua.

A o tatou o mai ma le faamaualalo i le sauniga faamanatuga, e mafai ona faamanuiaina i tatou ia lagona musumusuga mo tali i o tatou faafitauli o aso taitasi. E ao ona tatou o mai saunia, ia naunau e faalogo, ma ia le faalavelaveina. I tusitusiga paia tatou te faitau ai, “Ae, faauta, ou te fai atu ia te oe, e ao ina e suesue i ai i lou mafaufau; ona ao lea ona e ole mai ia te a’u pe ua sa’o, ma afai ua sa’o o le a Ou faia ia mu lou loto i totonu ia te oe; o lea, o le a e lagona ai ua sa’o.”¹⁰ E mafai ona tatou iloa le mea e tatau ona tatou faia e fofo ai o tatou faafitauli.

O le mataupu faavae lona lima, o le taumamafa ma le agavaa i le faamanatuga, o le a fesoasoani ia i tatou ia faatumulia i le Agaga Paia. I le faatinoina o le faamanatuga i le taimi o Lana asiasiga i sa Nifae, sa fetalai atu ai Iesu, “O ia o le e ai i lenei areto ua ai o ia i lo’u tino mo lona agaga; o ia o le e inu i lenei uaina ua inu o ia i lo’u toto mo lona agaga; ma o le a le fia ai lava pe fia inu lona agaga, ae o le a faatumuina.”¹¹ Sa folafola atu ia i latou afai latou te fia aai ma fia feinu i le amiotonu, o le a faatumulia i latou i le Agaga Paia. O loo folafola mai foi i le tatalo o le faamanatuga afai tatou te ola e tusa ai ma a tatou feagaiga, o le a tatou maua pea Lona Agaga e faatasi ma i tatou.¹²

Na saunoa Elder Melvin J. Ballard: “O a’u o se molimau o loo i ai se agaga e auai i le faataunuuina o le faamanatuga lea e aumaia le mafanafana i le loto mai le ulu seia oo i vae; e te lagonaina le faamaloloina o manu’a o le agaga, ma le aveesea o le avega. O le mafanafana ma le fiafia e oo mai i le loto e mama ma manao moni e taumafa i lenei taumafataga faaleagaga.”¹³