E Mafai Ea Ona Outou Lagonaina Nei?

Peresitene Monson, matou te alolofa, faamamalu, ma lagolagoina oe! O lenei faasilasilaga maoae faaletalafaasolopito e faatatau i le galuega faafaifeautalai, e musuia. Ou te manatuaina le sagisagi fiafia i le 1960 ina ua tuu mai i lalo le matutua e faamisiona ai alii talavou mai le 20 tausaga i le 19. Sa ou taunuu atu i le Misiona i Peretania, o se faifeau faatoa valaauina i le 20 tausaga le matua. O le uluai faifeautalai e 19 tausaga le matua i la matou misiona o Elder Jeffrey R. Holland, o se faaopoopoga maoae. Sa na o ni nai masina lona matamuli i lona 20. Ona mavae lea o se tausaga, ua tele atu le ta’i 19 ua taunuu mai. O i latou o ni faifeautalai usiusitai ma faamaoni ma sa agai i luma le galuega. Ua ou mautinoa o le a tele atu se seleselega o le a maua a o tautino atu nei faifeautalai amiotonu e faataunuu le poloaiga a le Faaola e folafola atu Lana talalelei.

I la’u vaai ia te outou o le tupulaga faia’e, ua sili atu lo outou saunia nai lo soo se tupulaga ua mavae. Ua sili atu lo outou silafia o tusitusiga paia. Peitai, o luitau o loo feagai ma la outou tupulaga a o outou sauniuni mo le galuega, e tutusa lava foi ma luitau o loo feagai ma tagata uma o le Ekalesia. Ua tatou iloa uma lava le aganuu i le tele o le lalolagi e le ogatasi ma le amiotonu po o le tautinoga faaleagaga. I le talafaasolopito atoa, o loo lapataia ai lava e taitai ia tagata ma aoao mai ai le salamo. I le Tusi a Mamona, sa matua popole lava Alema le Itiiti e uiga i le amioletonu ma le leai o ni tautinoga, o lea na ia faamavae ai mai le avea ma faamasino sili, o le taitai o le nuu o Nifae, ae taulai atoa atu ana taumafaiga i lona valaauga faaperofeta.¹

I se tasi o fuaiupu sili ona loloto i tusitusiga paia uma, o loo folafola mai ai e Alema e faapea, “Afai ua oo ia te outou se liuga o le loto, ma afai ua outou lagona le fia pepese i le pese o le alofa togiola, ou te fia fesili atu, e mafai ea ona outou lagonaina nei?”²

Ua lipotia mai e taitai o le Ekalesia i le lotoifale i le salafa o le lalolagi e faapea pe a tagai i ai o se itutino atoa, o tagata o le Ekalesia, aemaise lava o o tatou talavou, e le i i ai lava se taimi ua sili atu ai le malolosi nai lo le taimi nei. Ae toetoe lava i taimi uma latou te ta’ua ai ni popolega se lua: muamua, o le luitau o le faateleina o le amioletonu i le lalolagi ma le, lona lua, o le le popole ma le leai o se tuuto o nisi o tagata o le ekalesia. Latou te sailia le fautuaga e uiga i auala e fesoasoani ai i tagata ia mulimuli i le Faaola ma ausia se liua loloto ma le tumau.

O lenei fesili “E mafai ea ona outou lagonaina nei?” o loo tagitagi mai pea i le gasologa o seneturi. Faatasi ai ma mea uma ua tatou mauaina i lenei tisipenisione—e aofia ai le Toefuataiga mai o le atoaga o le talalelei a Iesu Keriso, le sasaa tele mai o meaalofa faaleagaga, ma faamanuiaga le mafaafitia a le lagi—e lei i ai lava se isi taimi ua sili atu ai le taua o le lu’i a Alema nai lo le taimi nei.

I le taimi lava na faatoa maea ai ona valaauina Ezra Taft Benson o se Aposetolo i le 1943, sa fautua mai ai Peresitene Siaosi Alapati Samita³ e faapea, “O lau misiona … o le … lapatai atu i tagata … i se ala sili ona agalelei e te mafaia ai ina ia avea ai le salamo ma vaifofo e tasi mo gasegase o lenei lalolagi.”⁴ O le taimi na faia ai lea saunoaga, sa matou i ai i le lotolotoi o fetauaiga o le Taua Lona Lua a le Lalolagi.

O aso nei ua matua faateleina le agasala. Sa fai mai talu ai nei se tusitala lauiloa, “Ua iloa uma e tagata e matautia le aganuu, ma e leai ma se tasi o faamoemoe e suia lena mea.”⁵ O le faaalia faifai pea o uiga malolosi ma le ola le mama i musika, faafiafiaga, ata, ma isi ala o faasalalauga i a tatou aganuu faaonapo nei, ua matua uiga ese. Sa faamatalaina manino lenei mea e se failotu e matua faaaloalogia o le Lotu Papatiso ina ua ia faapea mai, “O le tulaga faaleagaga o le aiga o tagata e tetee atu i le leaga ua afaina.”⁶

E le o se mea e faateia ai e faapea o nisi i le Ekalesia e talitonu e le mafai ona latou taliina le fesili a Alema i se ioe mautinoa. Latou te le o “lagonaina i le taimi nei.” Latou te lagonaina ua latou matelaina faaleagaga. O isi ua feitai, tiga, pe le fiafia. Afai e faatatau nei faamatalaga ia te oe,⁷ e taua la le iloilo pe aisea e te le o “lagonaina ai i le taimi nei.”

O le toatele o loo i ai i se matelaina faaleagaga ma ua leai se tuuto, e le faapea ua aafia i ni agasala po o ni soligatulafono matuia, ae ua latou faia ni filifiliga e lē atamai. O nisi e le o manatu mamafa i le tausiga o a latou feagaiga paia. O isi ua tele atu o latou taimi e faaalu i mea e itiiti le taua. O nisi ua faatagaina ia manatu faaleaganuu ma faaupufai e faavaivaia ai lo latou faamaoni i le talalelei a Iesu Keriso. O nisi ua faaaafia i latou lava i mea faainitoneti ua soona fai, pe faamamafa ai, ma, i nisi tulaga, ua faatupu ai ni tala o ni mea sese a uluai taitai o le Ekalesia. Ona latou faia lea o ni faaiuga le sa’o lea e mafai ona aafia ai le molimau. O soo se tasi sa faia nei filifiliga e mafai ona salamo ma toe faafouina faaleagaga.

O le faatofuina i tusitusiga paia e taua lea mo le faafaileleina faaleagaga.⁸ O le afioga a le Atua e musuiaina le tuuto atu ma galue o se pulu pāsama mo lagona ua faamanualia, ita, po o le le fiafia.⁹ Pe a faaitiitia lo tatou tuuto atu mo soo se mafuaaga, o se vaega o le vaifofo o le salamo.¹⁰ O le tuuto atu ma le salamo e fesootai faatasi.

O C. S. Lewis, o se tusitala Kerisiano e galue malosi, sa ia tusia e uiga i lenei mataupu i se ala malosi. Sa ia ta’ua e faapea e ta’u atu e le Faa-Kerisiano i tagata ina ia salamo ma folafola atu ia i latou le faamagaloga; ae seiloga e iloa e tagata ma lagona ua latou manaomiaina le faamagaloga, e le uunaia lava i latou e le Faa-Kerisiano. Sa ia taua, “Pe a e gasegase, e te faalogo i le fomai.”¹¹

Sa faailoa mai e le Perofeta o Iosefa Samita e faapea a o lei faia lou papatisoga, e mafai ona e i ai i se tulaga le mautonu i le va o le lelei ma le leaga. Ae “ina ua e auai i lenei Ekalesia ua e ioe atu e te auauna i le Atua. Ina ua e faia lena mea sa e tuua le vaega o tagata sa le mautonu, ma e le mafai lava ona e toe [foi] i tua.” O lana fautuaga sa faapea mai e le tatau lava ona tatou fulitua i le Matai.¹²

O loo faamamafa mai e Alema e faapea e ala mai i le Togiola a Iesu Keriso “o loo faaloaloa mai pea aao o le alofa mutimutivale” ia i latou e salamo.¹³ Ona ia fesili mai lea i ni fesili auiliili ma le taua e pei o le: Pe ua tatou saunia ea e fetaiai ma le Atua? Pe o tatou tausia ea i tatou lava ina ia le pona? E tatau ona tatou mafaufau uma i nei fesili. O le aafiaga o Alema lava ia i lona le mulimuli i lona tama faamaoni ma sosoo ai ma lona malamalama manino i le tele o lona manaomiaina o le faamagaloga ma le uiga o le pepese i le pese o le alofa togiola lea e mamana ma lē mafaafitia.

E ui ina tatau ona mafaufau i taunuuga o soo se mea e faaitiitia ai le tuuto atu, ae e lua ni luitau fitoitonu e taatele ma iloga. O le mea muamua o le agaleaga, o le māteletele, ma sauaga i aiga. O le lona lua o feusuaiga le mama ma mafaufauga eleelea. O mea nei e masani lava ona muamua mai ma o le faapogai lea o filifiliga ia faaitiitia le tuuto atu.

O le auala tatou te taulimaina ai i latou e sili ona tatou vavalalata e matuai taua lava. O le māteletele, faasaua, le migao, ma le le faaaloalo i totonu o le aiga e le taliaina—e le taliaina mo tagata matutua ma e le taliaina foi mo le tupulaga faiae. Sa lei toaga lo’u tama i le Lotu ae o se faataitaiga maoae lelei, aemaise i lona taulimaina o lo’u tina. E masani lava ona ia fai mai, “O le a faamasinoina e le Atua ia tane mo loimata uma e maligi o a latou ava.” O loo faamamafaina mai foi lenei manatu faavae i le “O Le Aiga: O Se Folafolaga i le Lalolagi.” E faitauina, “[O i latou] e faasaunoa i taitoalua po o fanau … o le a i ai se aso tou te tutu atu ai e tali atu i luma o le Atua.”¹⁴ E tusa lava po o le a le aganuu o loo tatou ola ae ai, pe sa faasaua pe leai foi o tatou matua ia i tatou, e le tatau lava ona tatou faasaua atu i soo se tasi i le faaletino, faalelagona, po o faaupuga.¹⁵

O le manaoga mo le faaaloalo i malo e lei i ai lava se taimi ua sili atu ai le taua nai lo le taimi nei. O le faavae o le agalelei ma le faaaloalo e amata i o tatou aiga. E le o se mea e faateia ai le faaitiitia o uiga faaalia o tagata lautele i le taimi lava e tasi e faamalepeina ai le aiga. O le aiga o le faavae lea o le alofa ma le faatumauina o le faaleagaga. O le aiga e siitiaina se siosiomaga lea e mafai ai ona faatupulaia ia faatinoga faalelotu. E moni lava e “matagofie mea uma pe a i ai le alofa i le aiga.”¹⁶

O feusuaiga le mama ma mafaufauga eleelea e solia ai tulaga faatonuina na faavaeina e le Faaola.¹⁷ Sa lapataia i tatou i le amataga o lenei tisipenisione e faapea o feusuaiga le mama atonu o le a avea ma luitau aupito sili lea.¹⁸ O ia amioga, a aunoa ma le salamo, o le a mafua ai se matelaina faaleagaga ma le leai o se tautinoga. O ata tifaga, TV, ma le Initoneti e tele lava ina faasalalau mai ai savali ma ata leaga. Sa ma i ai ma Peresitene Dieter F. Uchtdorf talu ai nei i se nuu i le vaomatua o Amasone ma matauina ai ni satelite i fale e oo lava i nisi o tamai fale faatauvaa. Sa ma fiafia i le maua ai o faamatalaga matagofie i lenei nofoaga maotua. Sa ma iloaina foi e toetoe lava a leai se nofoaga i lenei lalolagi e le o mafai ona aafia i ata faatuinanau, le mama, ma faaosofia ai feusuaiga. O le tasi lea o mafuaaga ua avea ai ponokalafi ma se mala i o tatou aso.

Talu ai nei sa fai ai se ma talanoaga ‘anoa ma se alii 15 tausaga e umiaina le Perisitua Arona. Sa ia fesoasoani mai ia te au ia malamalama i le faigofie i lenei vaitau o Initoneti mo tagata talavou e toetoe lava a le mafaufauina le matamata i ata mataga ma ponokalafi. Sa ia faailoa mai e mo le tele o mataupu faavae o loo aoaoina e le Ekalesia, o loo i ai lava se faailoaga i malo i se tulaga aoao e faapea o le solia o nei mataupu faavae e mafai ona i ai ni aafiaga faataumaoi i le soifua maloloina ma le ola manuia. Sa ia ta’ua le ulaina o sikareti, faaaogaina o fualaau oona, ma le inuina o le ava malosi e tupulaga talavou. Ae sa ia matauina e le o i ai se faitioga leotele faapea po o se lapataiga iloga faalauaitele mai le malo e uiga i ponokalafi po o le ola le mama.

Ou uso e ma tuafafine pele, e sao lelei le auiliiliga a lenei alii talavou. O le a le tali? Ua autausagā o aoao mai pea perofeta ma aposetolo i le taua o faatinoga faalelotu i le aiga.¹⁹

Matua, e taua lou toaga e auai i sauniga ma polokalama a le Ekalesia faatasi ma lou aiga. Peitai, e le o toe lava lea e faataunuu ai lou tiute paia o le aoao o lau fanau ia ola i ni olaga mama ma amiotonu, ma savavali ma le sao i luma o le Alii. O le faasilasilaga a Peresitene Monson i lenei taeao, e taua le faataunuuina o lenei mea ma le faamaoni i totonu o le aiga aua o nofoaga ia o le sulufaiga lea o loo i ai le agalelei, faamagaloga, upumoni, ma le amiotonu. E tatau ona i ai i matua le lototele e faamama pe mata’ituina le faaaogaina o le Initoneti, televise, ata tifaga, ma musika. E tatau ona i ai i matua le lototele e fai atu ai leai, puipui le upumoni, ma tuu atu se molimau mamana. E manaomia ona iloa e lau fanau e i ai lou faatuatua i le Faaola, e te alofa i lou Tama Faalelagi, ma lagolagoina taitai o le Ekalesia. O le faatagata matua faaleagaga e tatau ona uluola i totonu o o tatou aiga. Ou te faamoemoe e leai se tasi o le a tuua lenei konafesi e aunoa ma se malamalama o faafitauli o le amio mama o o tatou aso e tatau ona talanoaina i totonu o le aiga. Epikopo, taitai perisitua ma ausilali e manaomia ona outou lagolagoina aiga ma ia mautinoa o loo aoaoina ia mataupu faavae faaleagaga. E mafai foi ona lagolagosua i ai ma faiaoga o aiga ma faiaoga asiasi, aemaise lava i fanau a matua nofotoatasi.

Sa fesiligia ma le naunautai e le alii talavou lea sa ou ta’ua pe silafia e Aposetolo po o le a le vave i le olaga e tatau ona amata puipuia ma aoao ai e tetee atu i ponokalafi ma mafaufauga eleelea. Faatasi ai ma le faamamafa na ia ta’ua e faapea, i nisi nofoaga e le faapea ua vave tele ona fai a o lei faauu le autalavou mai aoga tulagalua.

O talavou na aafia i ata le mama a o itiiti lava ua matatau faapea ua latou le faaagavaaina i latou lava mo auaunaga faamisiona ma feagaiga paia. O se taunuuga, e mafai ona matua faaitiitia lava lo latou faatuatua. Ou te manao e faamautinoa atu ia te outou le autalavou, e pei ona aoao mai e Alema, e ala i le salamo e mafai ai ona e agavaa mo faamanuiaga uma o le lagi.²⁰ O le uiga atoa lena o le Togiola a le Faaola. Faamolemole talanoa i ou matua po o se faufautua faatuatuaina, ma fefautuaai foi ma lou epikopo.

Pe a oo mai i le ola mama, e talitonu nisi tagata matutua e faapea o le usitai i se galuega taua ma agaalofa po o se mataupu faavae e aveesea ai le manaomia ona mulimuli i aoaoga a le Faaola. Latou te faapea ifo ia i latou lava o amioga sese faalefeusuaiga o sina agasala itiiti … [pe afai o au] o se tagata agalelei ma agaalofa.”²¹ O ia mafaufauga o se pepelo matuia lea e te ta’uina ia te oe lava. Sa faailoa mai ia te au e nisi talavou e faapea, o la tatou filosofia i le taimi nei, e le “moomia” le soona taumafai malosi i le tele o itu, e aofia ai le ola tonu e tusa ma mataupu faavae amiotonu.²² Faamolemole aua nei outou pauu atu i lenei mailei.

I le papatisoga tatou te folafola atu ai e tauave i o tatou luga “le suafa o [Iesu] Keriso, ma maua [le] naunautaiga e auauna atu ia te ia e oo i le iuga.”²³ O sea feagaiga e manaomia ai se taumafaiga lototele, tuuto, ma le amiosao pe afai e ao ona tatou faaauau e pepese i pese o le alofa togiola ma tumau i le liua moni.

O se faataitaiga lauiloa o le tuuto ina ia malosi ma le le mafaagaeetia mo soo se tagata lava sa faaalia e se Tagata Taalo Olimipeka mai Peretania sa tauva i le Olimipeka i le 1924 i Pale, i Farani.

O Eric Liddell o se atalii o se faifeautalai Sikotilani na talai i Saina ma o se alii lotu e tuuto. Sa ia faaitaina le taitaiga a Peretania o le Olimipeka i lona musu lea e tamoe i se tuuga faataitai 100 mita sa faia i le Aso Sa, e ui sa matua faamalosia o ia. Mulimuli ane sa manumalo o ia i le tuuga 400 mita. O le faataitaiga a Liddell o le musu e tamoe i le Aso Sa na patino lava le musuia.

O ata ma maafaamanatu e faamamaluina ai o ia ua faasino atu i upu musuia mai le Isaia, “A o ē faatalitali ia Ieova, e toe faafouina lo latou malosi; latou te sii ae apaau e pei o aeto; latou te [taufetuli], a e le vaivai; latou te savavali, a e le [matapogia].”²⁴

O le amio lelei a Liddell sa matua aafia ai lava le faaiuga a lo ma atalii aupito laitiiti ia le auai i taaloga i le Aso Sa ma o le mea na sili atu ona taua o le tuueseina lea o ia lava mai le amioletonu ma amioga faalelalolagi. Sa ia faaaogaina le upusii mai ia Isaia e fai ma ona sao i le tusi o le tausaga a le aoga. Sa tuua e Eric Liddell se faataitaiga mamana o le naunautaiga ma le tuuto i le mataupu faavae.

A o mulimuli a tatou talavou i le fautuaga a Peresitene Monson e ala i le saunia e faamisiona, ma pe a tatou ola uma i mataupu faavae na aoao mai e le Faaola ma saunia e fetaiai ma le Atua,²⁵ o le a tatou manumalo i se tuuga e sili atu ona taua.²⁶ O le a tatou maua le Agaga Paia e fai ma o tatou taiala mo le taitaiga faaleagaga. Mo soo se tasi lava e le o faatulagaina tatau lona olaga, ia manatua, e le o tuai lava le faia o le Togiola a le Faaola e avea ma faavae o lo tatou faatuatua ma olaga.²⁷

I upu a Isaia, “e ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe.”²⁸

O lau tatalo faamaoni ia faia e i tatou uma taitoatasi se faatinoga talafeagai ia lagona ai le Agaga i le taimi nei ina ia mafai ai ona tatou pepese i le pese o le alofa togiola ma o tatou loto atoa. Ou te molimau atu ai i le mana o le Togiola a le Faaola i le suafa o Iesu Keriso, amene.