E Mafai Ea Ona Outou Lagonaina Nei?

Saunia e Elder Quentin L. Cook

O Le Korama a Aposetolo e Toasefululua


O nisi i le Ekalesia e talitonu e le mafai ona latou taliina le fesili a Alema i se ioe mautinoa. Latou te le o “lagonaina i le taimi nei.”

Peresitene Monson, matou te alolofa, faamamalu, ma lagolagoina oe! O lenei faasilasilaga maoae faaletalafaasolopito e faatatau i le galuega faafaifeautalai, e musuia. Ou te manatuaina le sagisagi fiafia i le 1960 ina ua tuu mai i lalo le matutua e faamisiona ai alii talavou mai le 20 tausaga i le 19. Sa ou taunuu atu i le Misiona i Peretania, o se faifeau faatoa valaauina i le 20 tausaga le matua. O le uluai faifeautalai e 19 tausaga le matua i la matou misiona o Elder Jeffrey R. Holland, o se faaopoopoga maoae. Sa na o ni nai masina lona matamuli i lona 20. Ona mavae lea o se tausaga, ua tele atu le ta’i 19 ua taunuu mai. O i latou o ni faifeautalai usiusitai ma faamaoni ma sa agai i luma le galuega. Ua ou mautinoa o le a tele atu se seleselega o le a maua a o tautino atu nei faifeautalai amiotonu e faataunuu le poloaiga a le Faaola e folafola atu Lana talalelei.

I la’u vaai ia te outou o le tupulaga faia’e, ua sili atu lo outou saunia nai lo soo se tupulaga ua mavae. Ua sili atu lo outou silafia o tusitusiga paia. Peitai, o luitau o loo feagai ma la outou tupulaga a o outou sauniuni mo le galuega, e tutusa lava foi ma luitau o loo feagai ma tagata uma o le Ekalesia. Ua tatou iloa uma lava le aganuu i le tele o le lalolagi e le ogatasi ma le amiotonu po o le tautinoga faaleagaga. I le talafaasolopito atoa, o loo lapataia ai lava e taitai ia tagata ma aoao mai ai le salamo. I le Tusi a Mamona, sa matua popole lava Alema le Itiiti e uiga i le amioletonu ma le leai o ni tautinoga, o lea na ia faamavae ai mai le avea ma faamasino sili, o le taitai o le nuu o Nifae, ae taulai atoa atu ana taumafaiga i lona valaauga faaperofeta.1

I se tasi o fuaiupu sili ona loloto i tusitusiga paia uma, o loo folafola mai ai e Alema e faapea, “Afai ua oo ia te outou se liuga o le loto, ma afai ua outou lagona le fia pepese i le pese o le alofa togiola, ou te fia fesili atu, e mafai ea ona outou lagonaina nei?”2

Ua lipotia mai e taitai o le Ekalesia i le lotoifale i le salafa o le lalolagi e faapea pe a tagai i ai o se itutino atoa, o tagata o le Ekalesia, aemaise lava o o tatou talavou, e le i i ai lava se taimi ua sili atu ai le malolosi nai lo le taimi nei. Ae toetoe lava i taimi uma latou te ta’ua ai ni popolega se lua: muamua, o le luitau o le faateleina o le amioletonu i le lalolagi ma le, lona lua, o le le popole ma le leai o se tuuto o nisi o tagata o le ekalesia. Latou te sailia le fautuaga e uiga i auala e fesoasoani ai i tagata ia mulimuli i le Faaola ma ausia se liua loloto ma le tumau.

O lenei fesili “E mafai ea ona outou lagonaina nei?” o loo tagitagi mai pea i le gasologa o seneturi. Faatasi ai ma mea uma ua tatou mauaina i lenei tisipenisione—e aofia ai le Toefuataiga mai o le atoaga o le talalelei a Iesu Keriso, le sasaa tele mai o meaalofa faaleagaga, ma faamanuiaga le mafaafitia a le lagi—e lei i ai lava se isi taimi ua sili atu ai le taua o le lu’i a Alema nai lo le taimi nei.

I le taimi lava na faatoa maea ai ona valaauina Ezra Taft Benson o se Aposetolo i le 1943, sa fautua mai ai Peresitene Siaosi Alapati Samita3 e faapea, “O lau misiona … o le … lapatai atu i tagata … i se ala sili ona agalelei e te mafaia ai ina ia avea ai le salamo ma vaifofo e tasi mo gasegase o lenei lalolagi.”4 O le taimi na faia ai lea saunoaga, sa matou i ai i le lotolotoi o fetauaiga o le Taua Lona Lua a le Lalolagi.

O aso nei ua matua faateleina le agasala. Sa fai mai talu ai nei se tusitala lauiloa, “Ua iloa uma e tagata e matautia le aganuu, ma e leai ma se tasi o faamoemoe e suia lena mea.”5 O le faaalia faifai pea o uiga malolosi ma le ola le mama i musika, faafiafiaga, ata, ma isi ala o faasalalauga i a tatou aganuu faaonapo nei, ua matua uiga ese. Sa faamatalaina manino lenei mea e se failotu e matua faaaloalogia o le Lotu Papatiso ina ua ia faapea mai, “O le tulaga faaleagaga o le aiga o tagata e tetee atu i le leaga ua afaina.”6

E le o se mea e faateia ai e faapea o nisi i le Ekalesia e talitonu e le mafai ona latou taliina le fesili a Alema i se ioe mautinoa. Latou te le o “lagonaina i le taimi nei.” Latou te lagonaina ua latou matelaina faaleagaga. O isi ua feitai, tiga, pe le fiafia. Afai e faatatau nei faamatalaga ia te oe,7 e taua la le iloilo pe aisea e te le o “lagonaina ai i le taimi nei.”

O le toatele o loo i ai i se matelaina faaleagaga ma ua leai se tuuto, e le faapea ua aafia i ni agasala po o ni soligatulafono matuia, ae ua latou faia ni filifiliga e lē atamai. O nisi e le o manatu mamafa i le tausiga o a latou feagaiga paia. O isi ua tele atu o latou taimi e faaalu i mea e itiiti le taua. O nisi ua faatagaina ia manatu faaleaganuu ma faaupufai e faavaivaia ai lo latou faamaoni i le talalelei a Iesu Keriso. O nisi ua faaaafia i latou lava i mea faainitoneti ua soona fai, pe faamamafa ai, ma, i nisi tulaga, ua faatupu ai ni tala o ni mea sese a uluai taitai o le Ekalesia. Ona latou faia lea o ni faaiuga le sa’o lea e mafai ona aafia ai le molimau. O soo se tasi sa faia nei filifiliga e mafai ona salamo ma toe faafouina faaleagaga.

O le faatofuina i tusitusiga paia e taua lea mo le faafaileleina faaleagaga.8 O le afioga a le Atua e musuiaina le tuuto atu ma galue o se pulu pāsama mo lagona ua faamanualia, ita, po o le le fiafia.9 Pe a faaitiitia lo tatou tuuto atu mo soo se mafuaaga, o se vaega o le vaifofo o le salamo.10 O le tuuto atu ma le salamo e fesootai faatasi.

O C. S. Lewis, o se tusitala Kerisiano e galue malosi, sa ia tusia e uiga i lenei mataupu i se ala malosi. Sa ia ta’ua e faapea e ta’u atu e le Faa-Kerisiano i tagata ina ia salamo ma folafola atu ia i latou le faamagaloga; ae seiloga e iloa e tagata ma lagona ua latou manaomiaina le faamagaloga, e le uunaia lava i latou e le Faa-Kerisiano. Sa ia taua, “Pe a e gasegase, e te faalogo i le fomai.”11

Sa faailoa mai e le Perofeta o Iosefa Samita e faapea a o lei faia lou papatisoga, e mafai ona e i ai i se tulaga le mautonu i le va o le lelei ma le leaga. Ae “ina ua e auai i lenei Ekalesia ua e ioe atu e te auauna i le Atua. Ina ua e faia lena mea sa e tuua le vaega o tagata sa le mautonu, ma e le mafai lava ona e toe [foi] i tua.” O lana fautuaga sa faapea mai e le tatau lava ona tatou fulitua i le Matai.12

O loo faamamafa mai e Alema e faapea e ala mai i le Togiola a Iesu Keriso “o loo faaloaloa mai pea aao o le alofa mutimutivale” ia i latou e salamo.13 Ona ia fesili mai lea i ni fesili auiliili ma le taua e pei o le: Pe ua tatou saunia ea e fetaiai ma le Atua? Pe o tatou tausia ea i tatou lava ina ia le pona? E tatau ona tatou mafaufau uma i nei fesili. O le aafiaga o Alema lava ia i lona le mulimuli i lona tama faamaoni ma sosoo ai ma lona malamalama manino i le tele o lona manaomiaina o le faamagaloga ma le uiga o le pepese i le pese o le alofa togiola lea e mamana ma lē mafaafitia.

E ui ina tatau ona mafaufau i taunuuga o soo se mea e faaitiitia ai le tuuto atu, ae e lua ni luitau fitoitonu e taatele ma iloga. O le mea muamua o le agaleaga, o le māteletele, ma sauaga i aiga. O le lona lua o feusuaiga le mama ma mafaufauga eleelea. O mea nei e masani lava ona muamua mai ma o le faapogai lea o filifiliga ia faaitiitia le tuuto atu.

O le auala tatou te taulimaina ai i latou e sili ona tatou vavalalata e matuai taua lava. O le māteletele, faasaua, le migao, ma le le faaaloalo i totonu o le aiga e le taliaina—e le taliaina mo tagata matutua ma e le taliaina foi mo le tupulaga faiae. Sa lei toaga lo’u tama i le Lotu ae o se faataitaiga maoae lelei, aemaise i lona taulimaina o lo’u tina. E masani lava ona ia fai mai, “O le a faamasinoina e le Atua ia tane mo loimata uma e maligi o a latou ava.” O loo faamamafaina mai foi lenei manatu faavae i le “O Le Aiga: O Se Folafolaga i le Lalolagi.” E faitauina, “[O i latou] e faasaunoa i taitoalua po o fanau … o le a i ai se aso tou te tutu atu ai e tali atu i luma o le Atua.”14 E tusa lava po o le a le aganuu o loo tatou ola ae ai, pe sa faasaua pe leai foi o tatou matua ia i tatou, e le tatau lava ona tatou faasaua atu i soo se tasi i le faaletino, faalelagona, po o faaupuga.15

O le manaoga mo le faaaloalo i malo e lei i ai lava se taimi ua sili atu ai le taua nai lo le taimi nei. O le faavae o le agalelei ma le faaaloalo e amata i o tatou aiga. E le o se mea e faateia ai le faaitiitia o uiga faaalia o tagata lautele i le taimi lava e tasi e faamalepeina ai le aiga. O le aiga o le faavae lea o le alofa ma le faatumauina o le faaleagaga. O le aiga e siitiaina se siosiomaga lea e mafai ai ona faatupulaia ia faatinoga faalelotu. E moni lava e “matagofie mea uma pe a i ai le alofa i le aiga.”16

O feusuaiga le mama ma mafaufauga eleelea e solia ai tulaga faatonuina na faavaeina e le Faaola.17 Sa lapataia i tatou i le amataga o lenei tisipenisione e faapea o feusuaiga le mama atonu o le a avea ma luitau aupito sili lea.18 O ia amioga, a aunoa ma le salamo, o le a mafua ai se matelaina faaleagaga ma le leai o se tautinoga. O ata tifaga, TV, ma le Initoneti e tele lava ina faasalalau mai ai savali ma ata leaga. Sa ma i ai ma Peresitene Dieter F. Uchtdorf talu ai nei i se nuu i le vaomatua o Amasone ma matauina ai ni satelite i fale e oo lava i nisi o tamai fale faatauvaa. Sa ma fiafia i le maua ai o faamatalaga matagofie i lenei nofoaga maotua. Sa ma iloaina foi e toetoe lava a leai se nofoaga i lenei lalolagi e le o mafai ona aafia i ata faatuinanau, le mama, ma faaosofia ai feusuaiga. O le tasi lea o mafuaaga ua avea ai ponokalafi ma se mala i o tatou aso.

Talu ai nei sa fai ai se ma talanoaga ‘anoa ma se alii 15 tausaga e umiaina le Perisitua Arona. Sa ia fesoasoani mai ia te au ia malamalama i le faigofie i lenei vaitau o Initoneti mo tagata talavou e toetoe lava a le mafaufauina le matamata i ata mataga ma ponokalafi. Sa ia faailoa mai e mo le tele o mataupu faavae o loo aoaoina e le Ekalesia, o loo i ai lava se faailoaga i malo i se tulaga aoao e faapea o le solia o nei mataupu faavae e mafai ona i ai ni aafiaga faataumaoi i le soifua maloloina ma le ola manuia. Sa ia ta’ua le ulaina o sikareti, faaaogaina o fualaau oona, ma le inuina o le ava malosi e tupulaga talavou. Ae sa ia matauina e le o i ai se faitioga leotele faapea po o se lapataiga iloga faalauaitele mai le malo e uiga i ponokalafi po o le ola le mama.

Ou uso e ma tuafafine pele, e sao lelei le auiliiliga a lenei alii talavou. O le a le tali? Ua autausagā o aoao mai pea perofeta ma aposetolo i le taua o faatinoga faalelotu i le aiga.19

Matua, e taua lou toaga e auai i sauniga ma polokalama a le Ekalesia faatasi ma lou aiga. Peitai, e le o toe lava lea e faataunuu ai lou tiute paia o le aoao o lau fanau ia ola i ni olaga mama ma amiotonu, ma savavali ma le sao i luma o le Alii. O le faasilasilaga a Peresitene Monson i lenei taeao, e taua le faataunuuina o lenei mea ma le faamaoni i totonu o le aiga aua o nofoaga ia o le sulufaiga lea o loo i ai le agalelei, faamagaloga, upumoni, ma le amiotonu. E tatau ona i ai i matua le lototele e faamama pe mata’ituina le faaaogaina o le Initoneti, televise, ata tifaga, ma musika. E tatau ona i ai i matua le lototele e fai atu ai leai, puipui le upumoni, ma tuu atu se molimau mamana. E manaomia ona iloa e lau fanau e i ai lou faatuatua i le Faaola, e te alofa i lou Tama Faalelagi, ma lagolagoina taitai o le Ekalesia. O le faatagata matua faaleagaga e tatau ona uluola i totonu o o tatou aiga. Ou te faamoemoe e leai se tasi o le a tuua lenei konafesi e aunoa ma se malamalama o faafitauli o le amio mama o o tatou aso e tatau ona talanoaina i totonu o le aiga. Epikopo, taitai perisitua ma ausilali e manaomia ona outou lagolagoina aiga ma ia mautinoa o loo aoaoina ia mataupu faavae faaleagaga. E mafai foi ona lagolagosua i ai ma faiaoga o aiga ma faiaoga asiasi, aemaise lava i fanau a matua nofotoatasi.

Sa fesiligia ma le naunautai e le alii talavou lea sa ou ta’ua pe silafia e Aposetolo po o le a le vave i le olaga e tatau ona amata puipuia ma aoao ai e tetee atu i ponokalafi ma mafaufauga eleelea. Faatasi ai ma le faamamafa na ia ta’ua e faapea, i nisi nofoaga e le faapea ua vave tele ona fai a o lei faauu le autalavou mai aoga tulagalua.

O talavou na aafia i ata le mama a o itiiti lava ua matatau faapea ua latou le faaagavaaina i latou lava mo auaunaga faamisiona ma feagaiga paia. O se taunuuga, e mafai ona matua faaitiitia lava lo latou faatuatua. Ou te manao e faamautinoa atu ia te outou le autalavou, e pei ona aoao mai e Alema, e ala i le salamo e mafai ai ona e agavaa mo faamanuiaga uma o le lagi.20 O le uiga atoa lena o le Togiola a le Faaola. Faamolemole talanoa i ou matua po o se faufautua faatuatuaina, ma fefautuaai foi ma lou epikopo.

Pe a oo mai i le ola mama, e talitonu nisi tagata matutua e faapea o le usitai i se galuega taua ma agaalofa po o se mataupu faavae e aveesea ai le manaomia ona mulimuli i aoaoga a le Faaola. Latou te faapea ifo ia i latou lava o amioga sese faalefeusuaiga o sina agasala itiiti … [pe afai o au] o se tagata agalelei ma agaalofa.”21 O ia mafaufauga o se pepelo matuia lea e te ta’uina ia te oe lava. Sa faailoa mai ia te au e nisi talavou e faapea, o la tatou filosofia i le taimi nei, e le “moomia” le soona taumafai malosi i le tele o itu, e aofia ai le ola tonu e tusa ma mataupu faavae amiotonu.22 Faamolemole aua nei outou pauu atu i lenei mailei.

I le papatisoga tatou te folafola atu ai e tauave i o tatou luga “le suafa o [Iesu] Keriso, ma maua [le] naunautaiga e auauna atu ia te ia e oo i le iuga.”23 O sea feagaiga e manaomia ai se taumafaiga lototele, tuuto, ma le amiosao pe afai e ao ona tatou faaauau e pepese i pese o le alofa togiola ma tumau i le liua moni.

O se faataitaiga lauiloa o le tuuto ina ia malosi ma le le mafaagaeetia mo soo se tagata lava sa faaalia e se Tagata Taalo Olimipeka mai Peretania sa tauva i le Olimipeka i le 1924 i Pale, i Farani.

O Eric Liddell o se atalii o se faifeautalai Sikotilani na talai i Saina ma o se alii lotu e tuuto. Sa ia faaitaina le taitaiga a Peretania o le Olimipeka i lona musu lea e tamoe i se tuuga faataitai 100 mita sa faia i le Aso Sa, e ui sa matua faamalosia o ia. Mulimuli ane sa manumalo o ia i le tuuga 400 mita. O le faataitaiga a Liddell o le musu e tamoe i le Aso Sa na patino lava le musuia.

O ata ma maafaamanatu e faamamaluina ai o ia ua faasino atu i upu musuia mai le Isaia, “A o ē faatalitali ia Ieova, e toe faafouina lo latou malosi; latou te sii ae apaau e pei o aeto; latou te [taufetuli], a e le vaivai; latou te savavali, a e le [matapogia].”24

O le amio lelei a Liddell sa matua aafia ai lava le faaiuga a lo ma atalii aupito laitiiti ia le auai i taaloga i le Aso Sa ma o le mea na sili atu ona taua o le tuueseina lea o ia lava mai le amioletonu ma amioga faalelalolagi. Sa ia faaaogaina le upusii mai ia Isaia e fai ma ona sao i le tusi o le tausaga a le aoga. Sa tuua e Eric Liddell se faataitaiga mamana o le naunautaiga ma le tuuto i le mataupu faavae.

A o mulimuli a tatou talavou i le fautuaga a Peresitene Monson e ala i le saunia e faamisiona, ma pe a tatou ola uma i mataupu faavae na aoao mai e le Faaola ma saunia e fetaiai ma le Atua,25 o le a tatou manumalo i se tuuga e sili atu ona taua.26 O le a tatou maua le Agaga Paia e fai ma o tatou taiala mo le taitaiga faaleagaga. Mo soo se tasi lava e le o faatulagaina tatau lona olaga, ia manatua, e le o tuai lava le faia o le Togiola a le Faaola e avea ma faavae o lo tatou faatuatua ma olaga.27

I upu a Isaia, “e ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe.”28

O lau tatalo faamaoni ia faia e i tatou uma taitoatasi se faatinoga talafeagai ia lagona ai le Agaga i le taimi nei ina ia mafai ai ona tatou pepese i le pese o le alofa togiola ma o tatou loto atoa. Ou te molimau atu ai i le mana o le Togiola a le Faaola i le suafa o Iesu Keriso, amene.

Mostrar las referencias

  1.  

    1. Tagai Alema 4:15–19.

  2.  

    2.  Alema 5:26.

  3.  

    3. O Siaosi Alapati Samita sa avea i le taimi lena ma Peresitene o le Korama a Aposetolo e Toasefululua, a o lei avea ma Peresitene o le Ekalesia i le aso 21 Me, 1945. (Tagai Deseret News 2012 Church Almanac [2012], 98.)

  4.  

    4. George Albert Smith, i le Sheri L. Dew, Ezra Taft Benson: A Biography (1987), 184.

  5.  

    5. Peggy Noonan, “The Dark Night Rises,” Wall Street Journal, July 28–29, 2012, A17.

  6.  

    6. Dr. R. Albert Mohler Jr., president, The Southern Baptist Theological Seminary, presentation to religious leaders, New York City, Sept. 5, 2012.

  7.  

    7. Tagai 2 Nifae 2:27.

  8.  

    8. Tagai Ioane 5:39; Amosa 8:11; tagai foi James E. Faust, “A Personal Relationship with the Savior,” Ensign, Nov. 1976, 58–59.

  9.  

    9. Tagai Alema 31:5.

  10.  

    10. Tagai Alema 36:23–26.

  11.  

    11. C. S. Lewis, Mere Christianity (1952), 31–32. O Lewis o se Tagata Faauu mai le gagana Faa-Peretania i le Iunivesite o Oxford ma sa mulimuli ane avea ma taitaifono o le Medieval and Renaissance English i le Iunivesite o Cambridge.

  12.  

    12. Tagai Aoaoga a Peresitene o le Ekalesia: Iosefa Samita (2007), 324; tagai foi Faaaliga 3:15–16.

  13.  

    13.  Alema 5:33.

  14.  

    14. “O Le Aiga: O Se Folafolaga i le Lalolagi,” Liahona, Nov. 2010, 129.

  15.  

    15. Tagai Richard G. Scott, “Removing Barriers to Happiness,” Ensign, May 1998, 85–87. O nisi mea taua faaleaganuu o loo feteenai ma aoaoga a le Faaola ma e mafai ona taitaiese ai i tatou. A o ou i ai i le Pasefika i Saute, sa ma feiloai ai ma se alii sa sailiili i le Ekalesia mo le tele o tausaga. Sa ia lipoti mai e faapea na tuia lava lona loto ina ua aoao mai se taitai o le Ekalesia i se konafesi faaleperisitua e faapea, “O lima na sa e fasia muamua ai lau fanau e ao ona faaaogaina e faamanuia ai lau fanau.” Sa ia mauaina ni lesona a faifeautalai, sa papatisoina, ma ua avea ma se taitai maoae.

  16.  

    16. “A i ai i le Aiga le Alofa,” Viiga, nu. 181.

  17.  

    17. Tagai Alema 39.

  18.  

    18. Tagai Ezra Taft Benson, “Cleansing the Inner Vessel,” Ensign, May 1986, 4.

  19.  

    19. Sa faalauiloa mai e Peresitene Gordon B. Hinckley le “O Le aiga: O se Folafolaga i le Lalolagi” i le sauniga aoao a le Aualofa ia Setema 1995. Sa pulefaamalumalu ia Peresitene Thomas S. Monson i le suia o le mataupu muamua o le Tusitaulima 2: Taitaiina o le Ekalesia (2010), “O Aiga i le Ekalesia i le Fuafuaga a le Atua.”

  20.  

    20. Tagai Alema 13:27–30; 41:11–15.

  21.  

    21. Ross Douthat, Bad Religion: How We Became a Nation of Heretics (2012), 238; see also Alma 39:5.

  22.  

    22. Aua nei faatagaina se aganuu ua faatumulia i fetauaiga ma le ola le mama ma ua lamatia ai i latou o loo ola i mataupu faavae na aoaoina e le Faaola e faaleagaina lou faatuatua.” E pei ona tusia ma le agamalu e le tusisolo o Wordsworth, “Fafaga [lou mafaufau] i manatu lelei, lea o le a le malo ai lava gutu tautatala leaga, faamasinoga le lelei, e oo i ‘ata lemigao a tagata manatu faapito … pe faaleagaina [lou] faatuatua fiafia” (“Lines Composed a Few Miles above Tintern Abbey,” i le The Oxford Book of english Verse, ed. Chistopher Ricks [1999], 346).

  23.  

    23.  Moronae 6:3; faaopoopo le faamamafa; tagai foi Mosaea 18:13.

  24.  

    24.  Isaia 40:31; tagai Robert L. Backman, “Day of Delight,” New Era, June 1993, 48–49.

  25.  

    25. Tagai Alema 34:32.

  26.  

    26. Tagai 1 Korinito 9:24–27.

  27.  

    27. Tagai Helamana 5:12. Sa fautua mai Oliver Wendell Holmes, “Ou te maua le mea sili i lenei lalolagi, e le o le mea tatou te tutu ai, ae o le itu tatou te agai i ai. Ina ia taunuu i le uafu i le lagi, e tatau ona tatou folau atu i nisi taimi faatasi ma matagi ma o nisi taimi e faasaga i ai,—ae e tatau ona tatou folau atu, ae aua nei see ese, pe mau ai lava i le taula” (The Autocrat of the Breakfast-Table ([1858], 105).

  28.  

    28.  Isaia 1:18.