2010–2019
“Dou Lako Mai Vei Au Oi Kemudou na Mataqali i Isireli”
Okotova 2012


“Dou Lako Mai Vei Au Oi Kemudou na Mataqali i Isireli”

Ni da sa lako mai vei Jisu Karisito na iVakabula, ka vakasavasavataka na yaloda, eda sa na qai vakayagataki meda iyaya ni cakacaka ni yalayala cecere ena iVola iMomani.

Au a bole meu curu ena Marine Corps ni Amerika ena ivalu mai Vietnam. Oti ga vakalailai noqu yaco yani ena bareki mai Quantico, e Virginia, meu sa laki vuli, sa tukuni meu tucake tu vakadodonu ka tabu yavala ena yasa ni noqu idavodavo, kei na 54 na sotia curuvou. Au a sotava na noqu dauniveivakavulici, e dua na tamata momoqaqa ka sa qaseta na cakacaka kaukauwa vakaivalu, ena nona sa caqeta mai na katuba ki na bareki, ka curu mai ni kailavaka na ivakaro ka vakatawani ena veivosa tawakilikili.

Ni oti na veivakilaitaki vakadomobula o ya, sa qai tekivu mai mua ni bareki ka dua ena nona vakatarogi ira mai na sotia curuvou. Sega ni vakavoca e dua o daunidrili ni na tukuna ga e dua na ka vua na sotia yadua me vakasewasewani ira kina ena domolevu. Toso mai vakamalua ena nodra sauma lesu me vaka e vakaroti mai ena: “Io” se “Sega saka, Satini.” Au sega ni raica vinaka na ka e cakava tiko, baleta ni keimami vakaroti me keimami tucake tu vakadodonu, ka rai ga ki liu. Ia ni sa yaco mai vei au, e a taura na noqu kato dreketi ka vakalala na kenai usana ena dela ni loga e dakuqu. E a vakaraica na ka era tiko e loma, lesu mai, ka mai tucake tu e mataqu. Au sa vakarautaki au ena ka mena cakava. A taura tu e ligana na noqu iVola iMomani. Au sa namaka toka me na karalaki au mai, ia, e qai sega, ka ni a toso voleka mai vei au ka vakasolokakanataka mai vei au, “O iko beka e dua na Momani?”

Au kailavaka lesu me vaka a vakaroti, “Io saka, Satini.”

Au a namaka tale na ka ena tarava. Mani sega, ka ni a tu vakadua, laveta cake na ligana ka taura tu na noqu iVola iMomani ka vosa vei au ena domo rogo lailai sara ka va-ka, “Ko vakabauta li na ivola oqo?”

Au kailavaka tale yani, “Io saka, Satini.”

Ena gauna qo, au a vakadeitaka e lomaqu ni na karalaki au mai ena so na vosa torosobu baleti ira na Momani kei na iVola i Momani, ia e a tucake tu ga ena vakanomodi. A lesu tale ki na noqu loga ka laki biuta vakamalua na noqu iVola i Momani. Sa qai mai tomana na nona ilakolako siviti au ka sega ni cegu ka laki tomana tale na nona vosa karakara tawakilikili vei ira na vo ni sotia vou.

Au se dau vakananuma voli ga na vuna a vakagalalataki au kina na satini momoqaqa ni marini oya ena siga oya. Ia, au vakavinavinakataka ga ni rawa vei au meu kaya ena tabuvakasuka, “Io, au lewena na Lotu i Jisu Karisito ni Yalododonu Edaidai” kei na “Io, Au kila ni iVola i Momani e dina.” Na ivakadinadina oqo, sa dua na isolisoli talei ka soli mai vei au ena kaukauwa ni Yalo Tabu ena veivuke ni rua na daukaulotu kei na dua na daunivakasala ni kuoramu ni bete.

Niu a yabaki 14, erau a vakavulica na noqu matavuvale na daukaulotu o Lee Pearson kei Boyd Camphuysen ena kosipeli vakalesuimai i Jisu Karisito, kau a qai mani papitaiso. Ni oti e rua na yabaki, e qai bolei au na noqu daunivakasala ni kuoramu ni bete o Richard Boren, meu wilika na iVola i Momani. Au a vakadonuya na bolebole o ya, kau qai wilika e ya tini na tabana ena veibogi me yacova niu sa vakaotia.

Ena tabana e tiko kina na ivakamacala, au wilika ni “volai vei ira na Leimani, ni ra kawa mai na yavusa i Isireli, vakakina vei ira na Jiu kei na Matanitu Tani.” Ena ivakamacala taumada ni iVola i Momani: E Dua Tale na iVakadinadina kei Jisu Karisito, e tukuni kina ni o ira na Leimani, “era sa itubutubu qase ni matavuvale ni kai Idia Damudamu.” Niu wilika na iVola i Momani, e vaka vei au, ni oqo na ivolatukutuku baleti ira na wekaqu na kai Idia Damudamu. E tukuna tiko na italanoa ni dua na kawa tamata, ka qai tukuni e muri ni ra Leimani, ka ra lako mai Jerusalemi, ki na dua na “vanua yalataki” (1 Nifai 2:20) ena 600 na.yabaki. E baleta na nona veituberi na Kalou vei ira na tamata era a bula tu e Amerika ena dua na gauna sa oti. E wili kina na ka e yaco ena nona a rairai o Jisu Karisito vei ira ni a Tucaketale mai na mate. Eso na itukutuku e tiko ena iVola i Momani e kaya ni yaco na gauna era a veiseyaki kina e lomai Amerika kei na so na yanuyanu ciri volekata (raica na Alama 63:9–10). Era a kaya na nodra parofita ni ra lewe levu na kai Matanitu Tani, era na lako mai ki na vanua yalataki oqo, ka na samuti ira na Leimani na cudru waqawaqa ni Kalou, ka ra na veiseyaki, vakararawataki ka na voleka sara ni vaqeyavutaki (raica na 1 Nifai 13:10–14).

Na tukaqu vakarua o Echo Hawk, e dua na Pawnee ni Idia, a sucu ena loma ni 1800 ena vanua sa vakatokai tu nikua me o Nebraska. Ni yabaki 19 ga era sa vakaukauwataki na nona mataqali mera solia e rauta ni 23-na milioni na eka (9.3 na milioni na ha) ni qele mera tawana na dewavanua. Ena yabaki 1874 era sa vakau sara na Pawnee me vica vata tale na drau na maile ki na ceva, ki na dua na vanua lailai vagalala ka koto ena Oklahoma Indian Territory. Sa lutu sara na kedra iwiliwili na Pawnee mai na 12,000 ki na 700 ni oti nodra yaco ki Oklahoma. O ira na Pawnee, me vakataka na veiyavusa tale eso, sa ra veiseyaki, vakararawataki ka voleka sara ni vakawabokotaki.

Na iVola i Momani e tiko kina e dua na itukutuku bibi vei ira na kawa i Leimani, e dua na iwase ni kawa i Isireli. E a vakaraitaka na itukutuku oqo o Nifai, ena nona vakadewataka tiko na raivotu nei tamana me baleta na itabagauna oqo: “Ia, era na qai kila ena siga ko ya na vo ni nodatou kawa ni ra sa mataqali i Isireli, ka ra sa tamata ni veiyalayalati ni Turaga; ia era na qai kila na kedra itukutuku na nodra qase, kei na itukutuku vinaka ni nodra iVakabula ka a vakatavulica vei ira na nodra qase ko Koya, ia era na kila kina na nodra iVakabula, kei na usutu ni Nona ivakavuvuli, ka ra kila talega na sala, mera lako mai kina vua ka vakabulai.” (1 Nifai 15:14).

Na iVola iMomani sa ivola tabu. E tiko kina na taucoko ni kosipeli tawacava. E a vola na parofita o Josefa Simici, ni iVola iMomani [sa] ivola ka dodonu duadua vakaoti vei ira na ivola e vuravura, ka sa vatuivakadei ni noda lotu, ka na toro voleka vua na Kalou e dua na tamata ena nona bulataka na kena ivakavuvuli mai na ivola tale eso.” (Nodra iVakavuvuli na Peresitedi ni Lotu; Josefa Simici [2007], 69). Sa tu kina e dua na itukutuku vei ira kece na tamata e vuravura.

Ena gauna au yabaki 17 kina ka wilika na iVola iMomani ena imatai ni gauna, au a vakanamata ki na yalayala i Moronai: “Ia, ni dou sa wilika na itukutuku oqo, mo dou kerea vua na Kalou na Tamada Tawamudu ena yaca i Karisito, me vakatakila vei kemudou se dina se sega, ia kevaka dou sa kerea ena yalodina ena lomamudou taucoko, ka vakabauta na Karisito, ena vakatakila vei kemudou ko Koya ena kaukauwa ni Yalo Tabu ni sa dina” (Moronai 10:4).

Niu sa tekiduru ena masu, au a ciqoma e dua na veivakauqeti kaukauwa vakayalo ni sa dina na iVola i Momani. Na ivakadinadina oya sa vukei au meu tuvana vakamatau na noqu itosotoso ni bula.

Au vakadreti ira kece na tamata mera wilika na iVola i Momani: E Dua Tale na iVakadinadina kei Jisu Karisito.

Au kerei ira vakatabakidua na ivovo ni wiliwili ena mataqali i Isireli, na kawa ivuvu ni tamata mai na iVola i Momani, ena vanua cava ga o ni tiko kina mo ni wilika ka wilika tale na iVola i Momani. Vulica na yalayala ka tiko ena iVola iMomani. Muria na ivakavuvuli kei na ivakaraitaki i Jisu Karisito. Cakava ka maroroya na veiyalayalati kei na Turaga. Vakasaqara ka muria na veituberi ni Yalo Tabu.

Au sa na tinia ena vosa i Amalekai, e dua tale na parofita ena i Vola i Momani: “Oi kemudou na wekaqu lomani, au vinakata mo dou lako mai vua na Karisito, na Yalosavasava ni Isireli mo dou bula ena nona veivakabulai kei na kaukauwa ni nona veisereki. Ia, dou lako mai ka cabora na yalomudou taucoko me isoro kivua, ka ia tikoga na lolo kei na masumasu ka vosota me yacova na ivakataotioti, ia me vaka sa bula na Turaga, dou na bula vakaidina.” (Omanai 1:26).

Ni da sa lako mai vei Jisu Karisito na iVakabula, ka vakasavasavataka na yaloda, eda sa na qai vakayagataki meda iyaya ni cakacaka ni yalayala cecere ena iVola iMomani. Oqo na noqu ivakadinadina ena yacai Jisu Karisito, emeni.