Tehkada Kapaikan

Sang President Thomas S. Monson


Samatail Nanleng ketin mwangih atail anahn akan oh pahn kupwurehla kitail ni ahnsou me kitail pahn peki Sapwellime sawas.

Riei kempoakepahi ohl oko oh lih oko, kapokonlap wet, wia kepahisek duwau en pahr sangete ai malipilipda nan Oaktohpe 4, 1963 en towehla Pwihn en Wahnpoaron Ehk-riemeno. Sounpar paisek duwau udahn werei. Ahpw ni soang tohto, ni mehlel, ahnsou kin mwomwen mwotomwot sangete ei kesihnenda nan Tabernacle oh kihda ei tepin kapahrek nan Kapokon lap.

Soahng tohto ehusoahngalahr sangete Oaktohpe 4, 1963. Kitail momour nan ahnsou kaselel nan poadoapoad en sampah. Kitail inenen kapaida ni weh ieu me laud. Apw ihte, ekeipak apwal en dehdehki kahpwal akan oh lamalam saledek kan me kapilkitail ahpw sohte nankapehd tikitikala. I diar me, pwehn deh ahngada soang kan me sohte mwahu, ma kitail pahn kilangala mahs oh song medemedewe kapahi kan nan atail mour, iangahki kapahi tikitik kan me kitail sohte kin nohn tehk, kitail kak diar peren laud.

Ni ei tehksapahl ei mour en sounpahr paheisek duwau-o, mie soang kei me I diarada. Ehu me I diar, me soang tohto me kin wiawiong ie kaidehkin meh kan me aramas pahn pwuriamweiki. Ni mehlel, ahnsou me re wiawi, re sohte mwomwen mehkot kesempwal. Ahpw, ni ei kin tamanda, re inenen kapaiada mour en aramas, oh pil mouri. I pahn kaweidih kumwail en song wie pil duwehte—kumwail en medemedewe mwahu mourimwail kan oh rapahki kapai kan, me laud oh tikitik, me kumwail alehdier.

Ni ei tehksapahl mouri, e kin kakehlakada ei lamalam me mie me kin karonge oh sapeng atail kapakap kan. Kitail eseier padahk mehlelo me mih nan 2 Nephi nan Pwuken Mormon, me mahsanih: “Aramas mie, pwe re en kak ahniki peren.”1 I kadehdehki me palilaud en pereno kin pwarada ni ahnsou me kitail wehwehkida me kitail kak patowahnong Samatail Nanleng sang ni atail kapakap oh mie me pahn karonge oh sapeng kapakap ko—elemwein kiitail sohte pahn alehdi pasapeng ni mwomwen de ahnsou me kitail kasik, ahpw uhdahn kitail pahn alehdi pasapengpe oh e pahn kohsang rehn Samatail Nanleng me ketin mwangih oh poakong kitail unsek oh kin kupwurki kitail en peren. Kaidehn me e ketin inoukiong kitailer mahsanih, “Komw karakarahkla; oh Kauno omw Koht pahn kahluwekinuhk ninlime, oh ketkihong uhk pasapengpen omw kapakap kan”?2

Ahnsou kiset nan ei tungoal padahk, I men ehukihong kumwail irair kei me wiawiong ie nan ei mour me kasalehda pasapeng en aramas ar kapakap kan oh ni ei kin medemedewe, irair pwuko wahdo kapahi kan nan ei mour iangahki mour en aramas teikan. Audepen nei pwuhk en journal me I kin nting loale rahn koaros, sangete mahs, e katamandohng ie oaritik en irair pwukat me mwein I sehselahr ma I sohte ntingidi.

Ni tepin pahr 1965 ih alehda pwukoahn towehda steik conference kei oh kaunda mihting kei ni deke kan nan South Pacific. Ih ei tepin pwarekla wasa ko nin sampah, oh I sohte kak monokehla. Soang tohto wiawi ni palingehn ahnsowo ni ei kin tuhwong sounkaweid kan, soulengkan oh misineri kan.

Ni wihkend en Rahn Kaunop oh Rahn Sarawi, Pepweri 20 oh 21, se mih Brisbane, Australia, wiewia mihting kan en conference ong Steik en Brisbane. Nan aht mihting kan Rahn Kaunop, I kapehse rehn emen district president en wasa ko. Ni ei itik peho, pepehm kehlail kohdohng ie me I anahne lokaiang oh kihda kaweid. Eri, I ahpw peki rehn ohlo en iang ie ni mihting en manda ni menseng en Rahn Sarawio, pwe I en kak tuhwong.

Mwurin mihting en Rahn Sarawio se ahniki ahnsou mwahu en tuhpene. Se koasoia duwen pwukoa tohto me e ahniki nin duwen eh ahniki pwukoahn district president. Ni aht wie koasoakoasoai I ahniki pepehm ieu I en panawihkiong iren kaweid kei pid duwen doadoahken misineri wasa me e kin mih ie. Mwuhr I ahpw diarada me ohl menet kin kapakapki kaweid me pid duwen ire wet. Ohng ohlo aht tupeneo kadehdehiong ih me mie me karonge oh sapeng eh kapakap kan. Sohte mehkot kapwuriamwei duwen aht tupene ahpw I kamehlele e tepisang kamwekid en Ngehn Sarawi oh e sewese district president-o nan eh mour oh eh pwukoah, nan mour en tohn towehkan, oh sewese doadoahken misineri wasao en pweida.

Riei ko, Sapwellimen Kauno doadoahk kin kalapw pweida ni atail kin peikiong kaweid en Ngehn Sarawi. I kamehlele me ni ahnsou me kitail kin mwekidki iren pepehm kan en ngehn sarawi me kin kohdohng kitail, Kauno pahn kalaudehla uwen me e kin ketin likih kitail en kaunsekehla Sapwellime doadoahk.

Duwen me I koasoiahier nan padahk teikan, I esehla me kitail sohte kak pohnsehse kemwekid en Ngehn Sarawi. Pahr tohto samwalahro, I wie pampap ni Deseret Gym nan Salt Lake ni ahnsou me I pehmada me I anahne kohla ni imwin wini pwehn pwarek emen kempoakapahi men, me solahr kak alu pwehki kanser oh pwal me e wia. Ahnsowohte I doudahsangete wasahn pampapo, likouda, oh samwalahr pwehn kohla tuhwong ohlo.

Ni ahnsou me I pedelong nan eh pere, I diarada me sohte towe. Ni ahnsou me I ididehkseli ia ih, I ahpw esehda me I kak diar ih ni wasahn pampap nan imwin winio, iei wasahn kakehlailih aramas. Eri ih wasao me e mih ie. E pein kadahrla pohn were wheelchair-o oh kelekelehpw nan perehn pampapo. E mih palio pihlo, kadkadahr limwahn wasa loallo. I eker ih, ih apw wekidek kohkohdo pohn were wheelchair-o pwehn rahnmwahu ie. Aht koaskoasoai-o me kaperen, I ahpw iangih pwuralahng eh pereo oh ahpw kihong ih kapahi.

Mwuhr I ahpw esehda sang rehn kempoakapahi-o me rahno e toutoukihlahr eh nsensuwed oh e medemedewe en kemehla pein ih. E kapakapki sawas ahpw e tepda pehm me sohte pasapengpen eh kapakapo. E kohla ni wasahn pampapo oh medemedewe me ih mwomwen e kak pitsang eh lokolok—e pahn kadahrdilahng nan pihlo wasa loal. I ahpw pwarada ahnsowohte, pwehn kapwaiada dahme I eseier kamwekid sang powe.

Kempoakapahio momourki sounpahr tohto mwurin ahnsowo—sounpahr kan me direki peren oh kalahngan. Ia uwen ei kalahnganki wie mehn doadoahk en nin limen Kauno ni rahn karuaru-o ni wasahn pampapo.

Oh pil ehu irair, ni ahnsou me ngehi oh Sister Monson tangatang pwurala nihmwato mwurin mwomweit rehn kempoakapaht kan, I pehm me se anahne kohla nandauwn—tangatangki mwail tohto—pwehn pwarek liohdi men me kin mihmi nan aht ward-o mahs. Ede Zella Thomas. Ahnsouo e kin kousoan ni wasahn apwalih me mah kan. Ni souwaso se diar liho ni eh luwetala mehlel wie wonowonohn pohn eh peht.

Zella maskun wereilahr, ahpw e mwadangete kasawiada ngilaht ko. E peki rehi ma I kak kihong ih ehu kapai, oh pil nda me e kaunopadahier mehla ma ih kupwuren Kauno e en pwurala reh. Mie ngenamwahu oh meleilei nan pereo, oh kiht koaros eseier me luwen ahnsoun eh mour pahn mwotomwot. Zella koledi pehiet oh ndahiong ie me e kapakap kehlail ki me I pahn pas reh oh kihong ih kapai. I ndahiong liho me se kohkihdo kamwekid en Samatail Nanleng. I metikih tomwe, ni ei eseier me mwein I sohte pahn pwurehng kilang ih nan mourwet. Oh ih me wiawi, pwe manda e kepilselehdala. Aht kak kihda koaloalamwahu oh popohl ong Zella me kapaiada kiht koaros.

Ahnsoun kapaiada mouren emen kin kalapw pwarada ni seukasikpe. Ni pwong en Rahn Kaunop ehu me inenen kopou mehlel nan ahnsoun lemwelemwer nan pahr 1983, ngehi oh Sister Monson tangatangki mwail tohto kodahla ni imwahto me mih Midway, nan Utah. Uwen lemwelemwer en ni pwohngo kohdi lel degree 24 Fahrenheit panahngin zero (-31°C), oh se men tehk ma soang koaros mwahu nimwaht wasao. Se tehk seli oh diar me soang koaros mwahu, eri se pahn pwurala Salt Lake City. Se apwtehn lel mwail kei kolahng ni ahl laud ni ahnsou me weraht sidohsao kunla. Se tengala douluhl. Pak malaulau me I kehn soangen lemwelemwero, pwohngo.

Ni aht peikasal se ahpw tepda alialu kohla ni kanihmw me keieu keren. Sidohsa kan kin sipisipihd tang daulih kiht. Oapwoat sidohsa ahpw uhdi, oh mwahnakapw men kihda eh sawas. Mwuhr se ahpw diarada me kahsolin nan weraht sidohsao tenla pwehki lemwelemwer, kahrehiong sidohsao sohte douluhl kak mourda. Pwutak kadek menet idankihtla nimwahto Midway. I songen pwainki eh sawas, ahpw e kahng. Dene me ih emen Boy Scout oh e men wie eh kadek te. I ndahiong edei, oh e kasalehda eh kalahnganki eh kak kihda sawas. E mesen sounpahr en misineri, eri I idehk reh ma e koasoanehdier en wia papahn misineri. Dene me e sehse dahme e pahn wie.

Ni menseng Ni Ehd mwurin rahno I ntingada kisin likou ieu ong pwutako oh kalahngankiong eh kadek. Nan kisin likowo I panawihong en wie papahn misineri. I pil kapatahiong ehu pwuhk me I ntingihada oh I ahpw kilelehdi irelaud kan me pid doadoahk en misineri.

Wihk ehu samwa mwuri, en pwutaket nohno kahl ie oh kesehkinie me nah pwutako, pwutak mwahu men ahpw pwehki kasongosong kei nan eh mour, eh ineng en wie papahn misineri wie tikitikala. Liho dene ih oh en pwutako pahpa kaisihsol oh kapakapki me eh mongiong pahn wekidekala. Re kihlong ede nan tehnpas sarawi en Provo Utah pwe aramas en kapakapki. Ira kin koapwoaroapwoarki, me mehkot pahn sairih eh mongiong oh e pahn pwureng ahniki ineng en wie doadoahk en misineri oh wie papah Kauno ni loaloapwoat. Liho mwahuki I en ese me e medemedewe me irair en ni pwohng lemwelemwero iei pasapengpen ar kapakap kan. I ndahieng, “I pwungki me ke ndahn.”

Mwurin sounpwong kei ngehi oh pwutak menet tepda kin dokpene, ngehi oh Sister Monson perenkihda aht iang komwurumwur en misineri mwohn eh kokohla ni Misin en Canada Vancouver.

Depweila ieu me se tuhpene ni pwohng lemwelemwero? I sohte mwahn kamehlele. Ahpw, I kamehlele me ni aht tuhpeneho, me pasapeng en eh nohno oh pahpa ara kapakapki ni ngidingid ong neira pwukato me ira poakohng.

Riei ohl oko oh lih ako, Samatail Nanleng ketin mwangih atail anahn akan oh pahn kupwurehla kitail ni ahnsou me kitail pahn peki Sapwellime sawas. I kamehlele me sohte ehu en atail mehn kapwunod kan nohn tikitik de sohte katepe rehn Koht. Kauno kin ketin mwangih oaritik en mouritail kan.

I men kaimwisengkihla koasoaia duwen ehu irair keren me sairih aramas epwiki kei. E wiawi ni kasarawi en kemwekid en tiahk ong ni tehnpas sarawi en Kansas, sounpwong limau samwalahro. Duwen me kin kalapw wiawi nan mouritail kan, ahnsowo likamwete ehu irair me wiawi me soang koaros mwomwen pweida. Ahpw, ni ahnsou me I esehda duwen soang koaros me wiawi pid duwen kasarawi en kemwekid en tiahk ni soutiko mwohn kasarawialahn tehnpas sarawio, I ahpw wehwehkida me kemwekid en pwongo ehu soang. Uhdahn e kapwuriamwei mehlel.

Rasehngete kemwekid en tiahk koaros me kin wiawi ni ahnsoun kasarawiala tehnpas sarawi kan, pwihn pwulopwul kan en District en tehnpas sarawi en Kansas City nan Missouri, ehuehu pwihn kin wie kakaunop ong kemwekido tohrohrpeseng. Ar koasoandio me irail koaros pahn pokonpene nan lapalahn ihmwen pokon Rahn Kaunopo, ni menseng rahn en kemwekido pwe irail en kak esehla iahd oh ia wasa ehuehu pwihn pahn pedolongla ie, ia wasa me re pahn kesihnen ie, ia wen ar pahn dohpeseng nanpwungarail, ia mwomwen ar pahn pedoila, oh soang kei—oaritik tohto me re anahne koledi ni rahno ni ahnsou me irail akan me kin pwukoahki koasoanehdi pwe ni ahnsou en kasansalda en kak soanamwahu oh koahiek.

Ihte kahpwal laud pwarada rahno. Nan kemwekido pwon re pahn doadoahngki kisin iren kasdo kei me re rekordiher oh me pahn kasalada ni screen lapala ieu me kadaniki Jumbotron. Iren kahsdo kan kesempwal ong kemwekido pwon. Iren kahsdo pwukat pahn kasoanamwahwih pwurokirahmo pwon, oh ehu ehu kisin kasdo pahn elehiong me dahme pahn wiawi mwuri. Oh kisin iren kasdo pwuko pahn kahrehiong kemwekido pwon en wehwe mwahu. Ahpw Jumbotron-o sohte doadoahk.

Tohn doadoahk kei pwururki ar songosong en wiahda pwehn doadoahk, a me pwulopwul ko, meh epwikih kei, wie awiawi, katikatiasang arail ahnsou en kaunopada. Irairo mesen apwal laud.

Soun koasoane kasarawio, Susan Cooper, mwuhr apw kawehwe inda: “Ni aht doula nan plan A kolahng B kolahng Z, se esehier me e sohte kak doadoahk. ... Ni aht kilikilang kuloako, se esehier me se sohte kak wia, ahpw se ese me mie manaman pah rehn pwihn pwulopwul meh silikid me kin pwoson kehlail. Se anahne kodihla oh ndahng irail dahme wiawi oh doadoahngki arail pwoson.”3

Awahte ehu mwohn tohn poudiahl ko pahn tepehr pidolong nan ihmwo, me pwulopwul silikid kelepwkihdi nan tahto oh kapakap. Re kapakapki irail me songosong en kamwahuihala Jumbotron-o ren kak alehdi kamarain en ese dahme ren kak wia pwehn kamwahwiala; re peki rehn Koht Sahm en kupwureirailla pwe ren kak wia arail kemwekido ni eh sohte itar ansou.

Mie emen me mwuhr ntingihada nda, “Kapakap ieu me me pwulopwulko sohte pahn kak manokehla, kaidehn pwehki tahto kekeluwak, apw pwehki ngehn sarawio, arail kak kehn.”4

Sohte pwand emen tohn doadoahngko apw kohdo ndahieng irail me e diarehr dahme kahpwalo oh kamwahwialahr. Dene me re “paiamwahu,” ahpw me pwulopwulko esehier me pasepeng en kapakap mwo.

Ni aht kohlohngala nan ihmwen pokono ni soutiko, se somwahn ese duwen kahpwal kan en rahno. Mwuhr se ahpw esehda duwe. Ahpw dahme se kilang, me lel douluhl, kemwekido soanamwahu—ihme keieu kaselel sang koaros me I kilangehr ko. Ngenen me pwulopwulko lingan oh kehlail oh koaros me iang uhdiahlko kehn. Re mwomwen esehier wasa re pahn pidelongla ie, wasa re pahn kesihnen ie, oh mwomwen ar pahn ehuong me pwulopwul teiko. Ni ansou me I esehda me arail ahnsou en sohngada mahs eh mwomwotala oh pali laud en me re wia irail sohte sohngada mahs ar pahn wiapene. I udahn pwuriamweiki. Sohte me pahn ese. Kauno kupwureirailla oh mendahte e sohte itar arail ansou en sohngada mahs.

Ahnsou koaros I kin pwuriamweikihla mwomwen Kauno kak kamwekid oh kaunda wasa koaros nan Sapwillime wehi oh ahpw miehte sapwellime ahnsouhn ketkihda kamarain pid emen aramas—de ehu kasarawi en tiahk de ehu Jumbotron. Ih me e kak wie, ih me E kin ketin wia, me wie mehn kadehdeh ong ie.

Riei ohl oko oh lih oko, Kauno kin ketin ieiang mouritail koaros. E ketin poakong kitail. E kupwurki kapaikitailda. E ketin kupwurki kitail en rapahki sawas Reh. Ni e ketin kahluweikitail, oh ni e ketin karonge oh sapeng atail kapakap kan, ahnsou wet kitail pahn diar perenohte me E ketin kupwurkihong kitail. Kitail en tehtehk Sapwellime kapahi kan nan mouritail, I kapakapki ni mwaren Sises Krais, atail Sounkomour, ahmen.

Show References

  1.  

    1. Tehk 2 Nephi 2:25.

  2.  

    2. Tehk Doctrine and Covenants 112:10.

  3.  

    3. Susan Cooper, oh Maurine Proctor, “Nothing’s Too Hard for the Lord: The Kansas City Cultural Celebration,” Meridian Magazine, Mei 9, 2012, ldsmag.com.

  4.  

    4. Proctor, Meridian Magazine, Mei  9, 2012.