Oktaktok n̄an Irooj

Jen Elder David A. Bednar

Jen Doulul eo an Jon̄oulruo Rijilōk ro


Jeļā bwe ko̧jpeļ eo ej m̧ool ej juon jetōb in naan in kam̧ool. Oktak ej jokkuun wōt juon ilo m̧ool n̄an ko̧jpeļ eo.

Ennaan eo aō ej pedped wōt ioon kadkad eo ikōtaan bōk juon naan in kam̧ool bwe Jisōs ej Kraist eo im erom rioktak n̄an E im ko̧jpeļ eo An. Ilo m̧ool, jej kōnono kōn unin kōnono ko kōn naan in kam̧ool im oktak rejenoļo̧k im makeļo̧k. Mekarta, jemaron̄ bōk juon jon̄ak em̧m̧an im oktak eo eļapļo̧k ilo ad ļōmņak kōn unin kōnono kein ruo raorōk ippān doon.

Ij jar bwe Jetōb Kwojarjar enaaj katakin im im̧we kōj kajjojo.

Wōn N̄a ilo ami ba?

Jemaron̄ katak elapļo̧k kōn naan in kam̧ool im oktak jān jerbal in kwaļo̧k eo an Rijilōk Piter.

Ke Jisōs eaar ilo̧k n̄an parijet ko ilo Seseria Pilippai, Eaar kajjitōk kajjitōk in eļap, “Wōn N̄a ilo ami ba?”

Piter ekaju an kar uwaak:

“Kwe Ri Kraist, Nejin Anij e mour.

“A Jisōs e uwaak im ba n̄an e, Kwōj m̧ōņōņō, Saimōn, nejin Jona, bwe kanniōk im bōtōktōk raar jab katakin eok kake, a Jema ej pād ilan̄” (Matu 16:15–17).

Āinwōt kam̧ool in uwaak eo an Piter im kōmeļeļe eo an Rilo̧mo̧o̧r eo, juon naan in kam̧ool ej jeļāļo̧kjeņ an juon make kōn m̧ool ilo jetōb kar bōk jān revelesōn. Juon naan in kam̧ool ej juon menin letok jān Anij im ej pād n̄an aolep ajri ro Nejin. Jabdewōt rikappokōt eo em̧ool emaron̄ bōk juon naan in kam̧ool jān kōjerbal “pilin̄ in tōmak” eaikuj ilo Jisōs Kraist n̄an “melijon̄i” (Alma 32:27) im “kajeon̄ jelōt ewānik an naan” (Alma 31:5), n̄an kōtļo̧k “n̄an kareelel ko an Jetōb Kwojarjar” (Mosaia 3:19), im n̄an rujlo̧k n̄an Anij (lale Alma 5:7). Naan in kam̧ool ej bōktok eļapļo̧k eddo an juon make im ej juon unin jibadbad, kallim̧ur, im lan̄lōn̄.

Kappukōte im bōk juon naan in kam̧ool an m̧ool ilo jetōb ej aikuji kajjitōk, kappukōt, im kōļaļļaļ (lale Matu 7:7; 3 Nipai 14:7) kōn juon bōro em̧ool, lukkuun kōttōpar, im tōmak ilo Rilo̧mo̧o̧r (lale Moronai 10:4) Ļamļam ko raorōk an juon naan in kam̧ool rej jeļā bwe Jemedwōj Ilan̄ emour im ej iakwe kōj, bwe Jisōs Kraist ej ad Rilo̧mo̧o̧r, im bwe tallep in ko̧jpeļ em̧ōj an jepļaaktok n̄an laļ in ilo raan kein āliktata.

N̄e Em̧ōj Am̧ Bar Oktak

Ke Rilo̧mo̧o̧r eo eaar katakin ilo Kejota eo Āliktata, Eaar ba n̄an Piter,

“Saimōn, Saimōn, lo, Setan ear kōņaan … liklik eok āinwōt wit:

“A I ar jar kōn eok bwe am̧ tōmak e jāmin jako; im n̄e em̧ōj am̧ bar oktak, kwōn kakajoor ro jeiōm̧ im jatōm̧” (Luke 22:31–32).

Ekaitoktoklim, Rijilōk in ekajoor eaar kōnono im etetal ippan M̧aajta eo, eaar kam̧ool kōn elōn̄ kabwilōn̄lōn̄ ko, im eaar wōr juon an naan in kam̧ool kōn kwojarjar eo an Rilo̧mo̧o̧r eo. Aaet em̧ool Piter eaar aikuj elōn̄ļo̧k katak jān Jisōs kōn oktak im kajoor kwojarjar eo an Jetōb Kwojarjar im eddo eo an n̄an jerbal ilo tiljek.

Pedped eo an ko̧jpeļ eo an Jisōs Kraist ekoba juon oktak eaorōk im indeeo ilo lukkuun paotok eo ad kar kapidodoik kōn Pinmuur eo an Rilo̧mo̧o̧r. Oktak eo em̧ool ej boktok juon oktak ilo tōmak ko, bōro an juon, im mour n̄an bōk im pokake n̄an ankilaan Anij (lale Jerbal 3:19; 3 Nipai 9:20) im ekoba juon kallim̧ur jeļā n̄an erom juon rikaļoran Kraist.

Oktak ej juon ļamļam eaorōk eļapļo̧k, em̧wilaļ ļo̧k, im edepakpak ļo̧k kōn naan in kam̧ool. Ej tōprak in revelesōn jān Anij, itok ippān tok ukweļo̧k an juon make, pokake, im niknik. Jabdewōt rikappukōt eo em̧ool emaron̄ erom rioktak jān en̄jake oktak in bōro eo ekajoor im an bar ļotak ilo jetōb an Anij (lale Alma 5:12–14). Ilo ad kautiej kain̄i ko im bujen ko an lo̧mo̧o̧r im mour indeeo ippān Anij (lale D&C 20:25), “bun̄ m̧aanļo̧k kōn dim ilo Kraist” (2 Nipai 31:20) im niknik ilo tōmak n̄an jem̧lo̧k in (lale D&C 14:7), jej erom menin kōm̧anm̧an ko rekāāl ilo Kraist (lale 2 Korint 5:17). Oktak ej juon menin leļo̧k an juon make jej leļo̧k n̄an Anij ilo kam̧oolol kōn menin letok an naan in kam̧ool eo.

Bok in Mormon ej Waanjon̄ak ko kōn Oktak

Bok in Mormon eobrak kōn bwebwenato ko reim̧we kōn oktak Amaleki, juon bwijjin Jekab, eaar kwaļo̧k: “Ikōņaan bwe kom̧in itok n̄an Kraist, eo ej ri Kwojarjar in Israel, im bōk leen lo̧mo̧r eo An, im kajoor in lo̧mo̧r eo An. Aaet, itok n̄an e, im wujlepļo̧k aolep jetōb ko ami āinwōt juon katok n̄an e” (Omnai 1:26).

Jeļā jen kajoor eo an Jetōb Kwojarjar bwe Jisōs ej Kraist eo eaorōk im emenin aikuj. Ak lukkuun itok n̄an E im leļo̧k aolep ad āinwōt juon menin katok emenin aikuj eļapļo̧k jān ad baj jeļā. Oktak ej aikuji aolepen būruwōd, im aolepen ad maron̄, im aolepen ad ļōmņak im kajoor (lale D&C 4:2).

Armej ro an Kiin̄ Benjamin raar uwaak n̄an katak eo an kōn lam̧ōj, “Aaet, kōmij tōmak aolep naan ko kwaar kōnono n̄an kōm̧; im barāinwōt, kōm jeļā kōn aer jejjet im m̧ool, kōnke Jetōb eo an Irooj Ekajoor Pōtata, eo Eaar jerbali juon oktak ekajoor ilo kōm, ak ilo buruōm, bwe kōmin jab bar itok wōt in kōm̧m̧an nana, ak n̄an kōm̧m̧an em̧m̧an wōt” (Mosaia 5:2). Bōk naan ko kar kōnono kaki, bōk juon naan in kam̧ool kōn m̧ool eo aer, im kōjerbal tōmak ilo Kraist eaar kwaļo̧k juon oktak in bōro eo ekajoor im juon kije eo edim n̄an kōkm̧anm̧anļo̧k im erom em̧m̧an ļo̧k.

Oktak eo an ri Leman ro ilo bok in Hilamōn rej kōmeļeļeik āinwōt “ilo iaļ in ijo koņaer, im rej etetal jim̧we im̧aan Anij, im rej lale n̄an kōjparok kien ko An im kakien ko An im ekajet ko An.

“Im rej kijejeto kōn tiljek ejjab kijeļo̧k bwe re maron̄ bōktok bwe in ro jeier im jatier n̄an jeļā kōn m̧ool eo” (Hilamōn 15:5–6).

Ilo an waanjon̄ak kein alikkar, wāween ko eaorōktata raar pād ilo oktak rej en̄jake juon oktak in bōro eo ekajoor, wōr juon en̄jake em̧wil n̄an kōm̧m̧an em̧m̧an wōt, wōnm̧aanļo̧k wōt ilo iaļ an ijo kuņad, etetal jim̧we im̧aan Anij, kōjparok kien ko, im jerbal ilo ejjeļo̧k kijeļo̧k. Ealikar, jetōb kein retiljek raar lukkuun wūjlepļo̧k aer n̄an Irooj im katak ko An.

Erom Rioktak

Emakijkij an oktak juon jekjek ejjab bōjrak im ejjab juon m̧akūtkūt ej waļo̧k juon kōttan me ej waļo̧k jān juon en̄jake ekajoor ak ejej uwaan. Ļain im bar ļain im kain̄i im bar kain̄i, jidik kōn jidik im nan̄in jab kile kōnaan ko ad, ļōmņak ko ad, naan ko ad, im jerbal ko ad rej erom jokkuun wōt juon ippān ankilaan Anij. Oktak n̄an Irooj ej aikuj jim̧or kije im kijenmej.

Samuel ri Leman eo eaaar kalikar lalem men ko raorōk n̄an erom oktak n̄an Irooj: (1)  tōmak ilo katak ko im kanaan ko an rikanaan ro rekwojarjar āinwōt aer kar ļo̧o̧ki ilo jeje ko rekwojarjar, (2)   kōjerbal tōmak ilo Irooj Jisōs Kraist, (3)  ukweļo̧k, (4)  bōktok juon oktak in bōro, im (5)  erom “pen im dim ilo tōmak” (lale Hilamōn 15:7–8). En̄in ej jon̄ak eo me ej tōl ļo̧k n̄an oktak.

Naan in Kam̧ool im Oktak

Naan in kam̧ool ej juon ijjino in im juon menin aikuj n̄an oktak eo ej wōnm̧aanļo̧k wōt. Naan in kam̧ool ej juon ļōmņak n̄an ijjino, ejjab juon jem̧ļo̧k āliktata. Naan in kam̧ool eo epen ej pedped me oktak eo ej ejaak ioon.

Naan in kam̧ool make ejjab im ejamin naaj bwe n̄an kejparok kōj ilo apan̄ ko ilo raan ko āliktata im nana ilo tōre in jej mour ie. Naan in kam̧ool eaorōk im menin aikuj bōtaab ejjab bwe n̄an letok kajoor eo ilo jetōb im kejparok eo jej aikuji. Jet iaan membōr ro an Kabun̄ in kōn naan in kam̧ool ko kar m̧ōjņoļo̧k im jako aer kobatok n̄an Kabun̄ in. Jeļaļo̧kjeņ ilo jetōb eo aer im kallim̧ur eo aer raar jab bwe n̄an apan̄ ko rej jeļm̧ae.

Juon katak eaorōk kōn ekkejel eo ikōtaan naan in kam̧ool im oktak ej kein kam̧ool ilo jerbal in mijenede ko an lōm̧aro nejin Mosaia.

“Ak jon̄an wōt eo kar bōktok n̄an jeļā kōn m̧ool eo, kōn kwaļo̧k naan an Ammōn im ļōm̧aro jein im jatin, ekkar n̄an jetōb in revelesōn im kanaan, im kajoor eo an Anij ej jerbal men in bwilōn̄ ko ilo ir―aaet, … āinwōt Irooj emour, jon̄an lōn̄ in ri Leman ro raar tōmak ilo kwaļo̧k naan ko aer, im kar oktak tok n̄an Irooj, raar jamin bun̄.

“Bwe raar erom juon armej rewepān; raar likūt ilaļ kein tariņae ko in aer jum̧ae, bwe raar jab ire ņae Anij ļo̧k wōt. …

“Kiiō, er rein ro raar oktak tok n̄an Irooj”(Alma 23:6–8)

Ruo men ko raorōk rej kōmeļeļeik ilo eoon kein: (1)  jeļāļo̧kjeņ eo kōn m̧ool eo,, eo emaron̄ ukōte āinwōt naan in kam̧ool, im (2)  oktak tok n̄an Irooj, eo Ij meļeļe kake āinwōt oktakļo̧k n̄an Rilo̧mo̧o̧r eo im ko̧jpeļ eo An. Kōn menin, koba eo ekajoor jimo̧r an naan in kam̧ool im oktak n̄an Irooj ej kwaļo̧k pen im dim im letok kōjparok ilo jetōb.

Raar jab wōtļo̧k im liļo̧k kein tariņae in jum̧ae ko aer―bwe ren jab bar ire ņae Anij ļo̧k wōt n̄an jidik. N̄an likūt turejet aorōk an “kein tariņae” ko āinwōt kūbboņ, utiej bōro, im jab pokake emenin ļo̧k aikuj jān jidik tōmak im jeļā. Tōmak edim, ettā bōro, ukweļo̧k, im ajeļo̧k rej itok m̧okta jān kakkure kein tariņae ko ad. Kom̧ im n̄a jej dāpij wōt kein tariņae ko ad me rej dāpij kōj jān erom rioktak n̄an Irooj? Eļan̄n̄e āindein, innām jej aikuj ukweļo̧k kiiō.

Kememej bwe ri Leman ro raar jab oktak tok n̄an mijenede ro raar katakin er ak n̄an būrookram̧ ko rōm̧m̧an ilo Kabun̄ eo. Raar jab oktak n̄an m̧wil ko an ritōl ro aer ak n̄an dāpij m̧anit ak iminene ko an ro jemeer. Raar oktak n̄an Irooj—n̄an E āinwōt Rilo̧mo̧o̧r eo im n̄an kwojarjar eo An im katak eo—im raar jab bar bun̄ lo̧k.

Naan in kam̧ool ej juon jeļāļo̧kjeņ ilo jetōb kōn m̧ool eo bōke jān kajoor eo an Jetōb Kwojarjar. Oktak ej wōnm̧aanļo̧k ilo wujlepļo̧k eo ejjab oktak n̄an m̧ool eo kwaļo̧ke jaar bōke—kōn juon bōro me ej m̧ōņōņō im kōn un ko rejim̧we. Jeļā bwe ko̧jpeļ eo ej m̧ool ej juon jetōb in naan in kam̧ool. Oktak ej jokkuun wōt juon ilo m̧ool n̄an ko̧jpeļ eo. Jej aikuj jeļā ko̧jpeļ eo ej m̧ool im m̧ool n̄an ko̧jpeļ eo.

Naan in kam̧ool, Oktak, im Būrabōļ eo an Virgin ro Jon̄oul

Kiiō ikōņaan kōjerbal juon iaan ukook ko rellōn̄ kōn būrabōļ eo an virgin ro jon̄oul n̄an kalikar kadkad eo ikōtaan naan in kam̧ool im oktak. Virgin ro jon̄oul, ļalem iaer raar remāletlet im ļalem iaer raar bwebwe, kar bōk ļaam̧ ko aer im ilo̧k n̄an ioon ļeo pālele. Jouj im ļōmņak kōn ļaam̧ kein kar kōjerbali jen virgin ro āinwōt ļaam̧ in naan in kam̧ool. Virgin ro rebwebwe raar bōk ļaam̧ ko aer in naan in kam̧ool ak raar jab ebbōk oil ippāer. Ļōmņak bwe oil eo eaar āinwōt oil in oktak.

“A ro re mālōtlōt rej bōk oil [in oktak] ilo kein ettein̄ eo aer ņa ippān ļaam̧ ko aer [naan in kam̧ool].

“Ke ļeo pālele e rum̧wij tok, er otemjej rej mejki im kiki.

“Im n̄e elukkuun bon̄, juon lam̧ōj, Lo, ļeo pālele, kom̧in itōn wōnm̧ae e.

“Innām virgin ro otemjej rej jerkak, im kōm̧m̧ani ļaam̧ ko aer [naan in kam̧ool].

“Im ro rebwebwe re ba n̄an ro re mālōtlōt, Kom̧win letok n̄an kōm jān [ ami oil in oktak]; bwe ļaam̧ ko am [naan in kam̧ool eo em̧ōjņo im] re nan̄in kun.

“A ro re mālōtlōt re uwaak, im ba, Bōlen kōm jāmin bwe kake, kom̧win ilo̧k n̄an ippān ro rej wia im wiaik ami.” (Matu 25:4–9).

Virgin ro ļalem raar ke kūbboņ im jab kōņaan ajej, ak raar ke kwaļo̧k ilo jim̧we bwe oil eo an oktak ejjab maron̄ barroik? Kajoor eo ilo jetōb emaron̄ me ej waļo̧k jān pokake eo ejjab oktak n̄an kien ko kar liļo̧k n̄an bar juon armej? Jeļāļo̧kjeņ eo bōke jān ekkatak ilo tiljek im kejōkļo̧kjeņ eo kōn jeje ko rekwojarjar leļo̧k n̄an juon eo ej aikuj? Aenōm̧m̧an eo ilo ko̧jpeļ eo emaron̄ ke bōktok n̄an juon Armej ro Rekwojarjar ilo Raan-ko Āliktata etiljek leļo̧k n̄an juon eo ej en̄jake eppen im apan̄ eļļap? Uwaak eo ealikkar n̄an kajjojo kajjitōk kein ej jaab.

Ilo an virgin ro remeletlet kar kalikkar ilo jejjet, kajjojo iaad aikuj “wiaiki kōn kōj make.” Kōrā rein reim̧we raar jab kōmeļeļeik juon jekjek in pejnej; ijello̧kin, raar kwaļo̧ke eddo eo an juon make n̄an dāpij ļaam̧ in naan in kam̧ool eo ad urur im n̄an bōk kein jipan̄ ko rōbwe an oil in oktak. Oil in eaorōk ej aikuji juon pilin̄lin̄ ilo juon iien―“lain im bar lain [im] kain̄i im bar kain̄i” (2 Nipai 28:30), kijenmej im kije. Ejjeļo̧k iaļ ekadu epād; ejjeļo̧k iien āliktata in ejedimkij n̄an kōppopo.

Irooj eaar kakiene kōj n̄an tiljek im n̄an jar iien otemjeļo̧k, im n̄an kōm̧m̧an bwe (D&C 33:17). Ļaam̧ ko ad ren erreo im urur, im wōr oil ippād, bwe jān maron̄ pojak ilo itok eo an Leo̧ Pālele (lale D&C 33:17).

Naan in kam̧ool

Ij kallim̧ur bwe ilo ad itok n̄an jeļāļo̧kjeņ eo an m̧ool eo im rej oktak n̄an Irooj, jenaaj pād wōt ilo pen im dim im jamin bun̄ lo̧k. Ilo kijoror jenaaj likūt iturājet kein tariņae ko ad. Jenaaj jeram̧m̧an kōn meram emeram jān ļaam̧ in naan in kam̧ool ko ad im kein jipan̄ ebwe an oil in oktak. Im ilo ad kajjojo erom ļo̧k lukkuun oktak, jenaaj kōkajoorļo̧k baam̧le ko ad im ro m̧ōttad. Ij kwaļo̧k kam̧ool bwe Jemedwōj Ilan̄ ej mour im ej iakwe kōj. Jisōs Kraist ej ad Rilo̧mo̧o̧r. Tallep in ko̧jpeļ eo em̧ōj an bar jepļaaktok n̄an laļ in ilo raan kein āliktata. Kōn kam̧ool kein Ij kam̧ool ilo āt eo ekwojarjar etan Jisōs Kraist, amen.