2010–2019
A Kot e Momtab, E bo Mosiou
October 2012


A Kot e Momtab, E bo Mosiou

Ngokiu omeruul, ea dersta er kid a sebeched el merael mo uaia Osobel sel dosiou er a rengelekel a Dios

A ta er a klou el olchotel a kmo ngika el betik er a rengud el profet, el President Thomas S. Monson, a ngellitel el mesiungel a Rubak a kmo ngii a mla melilt el oltirakl er a okesiul Osobelel—el mesiou, er a dersta el chad. Tirkel uai kid el mla nguu a techolbechelid a mla yaksok el mo meruul er a osisiu el teletael. Kede mla yaksok “el mo belchoel melbedebek er a Osobel e oltirakl a llechul”1 E Ngii a mla kmu el kmo, “Tiakid a llechuk, el Kemiu a mo kaubeltikelreng, el uai ngak loubeltikelreng er kemiu.”2

Ka momes osisiu el tekingel a President Monson el melekoi er a osisiu el teletael: “Kid a iiliuekle er a rousbech a ngeso, omelisiich, me a ulengeseuid, ongelaod, me a ungil omerelled. … Kid a chimal a Rubak er tial beluulechad, el ngercheled el mesiou e mesebechakl er a Rengelekel. Ngii ousbech er a dersta er kid.”3

Kom rirengesii—ongit el mo kaubeltikelreng? Bebil er a rechad, el mesiou malechub e te olngeseu er a redersta el chad, loltirkal er a okesiul Osobel, e diak el beot el mei. Eng di doruul, ea dersta er kid a sebeched el merael mo uaia Osobel sel dosiou er a rengelekel a Dios. Me a mo uchul e kede mo kaubeltikelreng, eng soak el mo kmu eua el tekoi el mo dolbedebek: “A kot e momtab, e bo mosiou.”

Kmeed el okeua el rak er a mla memong, ea bechik me a ngak a mlo er a templo er a mle klebesei er a Ongeim el ureor. A ki dirk mlo kaubuch, e ngak a uaia blek bekikl le tia uaia ble longeru el taem er ngak. A odos, el dilengcholk er bita er ngak a locha mlo medengei. Ng mle kmeed er ngak e mengelulau, “Lak ko bekikl. Ak mo ngosukau.” Ng mlo diak sal bekikl, meng mlo sebechek el ngara chelsel a templo. Ngii a mle kot el omtab, e sola mle mesiou.

Kid a mla mokedong el mo oltirakl osischeklel me a omesiungel Osobel el mora rebebil. Tial ongit a diak a telkelel el mora rodos. Me chelecha el kuuchais a bebil er a okesiu er a rechad el tir a ulemtab e sola mesiou, e morrenges osischeklel a Jesus el tir ocholt.

A elolem a rekil el ngalek er a Primary a dilu el kmo: “Se er a kmengilt el mo olngeseu er a klas, eng mle sebechek el ngiltii a sechelik el ki mdak el oureor. Ak ngileltii a [buik er a klas el kmal soal omecheracheb er ngak] ele ngii el diak a melilt er ngii. Ng mle soak el rullii el mo ungil a rengul. ”4

Ngera ng miltebengir ngika el ngalek? Ng mlo medengei el kmo ngika lomecheracheb el buik a blechoel diak el mengilt. Ngera ng rirellii el omesiou? Ngileltii el mo sechelil el le kaingeseu er a klas. A Jesus a ulisechakl, “Moubeltikelreng er a recherreuem, momekngeltengat er tirkel mekngit er kau, e moruul a ungil er mo er tirkel louketui er kau.”5

A kuk ta er a ward, ea oba Aaronic Priesthood a mle kot lomtab e chelecha ngungil mesiou. Bek el sandei ea rengeasek el sechal a dechor rikl er a ikelesia, a lechull, snow, malechub a le sal mekeald, el mengiil er a remechuodel el chedal a ward er tir. Te mengider a wheelchair me a skors loltobed er a mlai, e mengebsabs, e mengetakl er tirkal chebellang el mechuodel el me soiseb er a ikelesia. Te meral meruul a ngerchelir el mora Dios. Me sel lomtab, e mereko losiou, e tir oltirakl okesiul a osischeklel Osobel. “Alsekum e kom mla rullii el mo er a ta er tirkal ngariou el chedak, e kom mla rullii el mei er ngak”6 Me sel beches el beldeklel osisechakl er a rengeasek el mla tmaut, e tirkal ngeasek el sechal a mo mteik a lmuut el techall el mo mesiou el uaia Kristo.

A omtab me a omesiou a le bebil er a taem eng ousbech er a blakelreng. A mlukrael el ngeasek el dil el ngklel a Alexandria a milsa chedal er a Madison el dimlak el sebechel di ngii el rokir a Personal Progress er ngii el eng mlo er ngii a secherel a bdelul. A Alexandria milngidb er a rengeasek el redil er a ward er ngii, e milngedecheduch er a roungerachel, e mle soal rullii a kmo ngera el mora Maddy el ngii a dimlak el sebechel di ngii el rullii. A dertsa er tirkal ngeasek el dil a ulmtechei er a Maddy e remuul a bebil er a ikel omeruul er a chelsel a Personal Progress meng mlo sebechel nguu a ngkedel. 7

Tirkal ngeasek el redil a ngara omerollir el mo chedil e ngara klodos er a Relief Society ele tir el mesuub el omtab, e mesiou loba beltikelreng.

A President Monson a mla omeklatk er kid el kmo a beltikelreng, “a klikiid el beltikelreng er a Kristo”8—malechub, eng omtab e mesiou —“sel sekum a mla melakl el chuodel el chad a deletkii e nguu el mora ikel omeruul” me a “dirrek alsekum a odos el di ngii el tang el dengchokl er a Relief Society a de siotai er ngii el kmo, ‘Mei—e mdengchokl er bitar kemam.”9 Sel ngarbab el llach a de betik er ngii er tiang: “Aikel soam a chad [malechub a redil] a ruul lekor kau, me dirrek el moruul el mor tir.”10

A sekutab el buch a mesiou er a eru el meklou el teletael. Ng kmo:

“A kullengeseu er a bechik er a mleta el Sandei er a klas er ngii er a Primary el mui er a rodikel a bedengir el euid a rekrir ngalek. A lomechelang a olchotel a suobel er a Primary, eak milsa ta er a ngalek er a klas el mla mechaet er a kingellel e diak el sal ungil a teletelel. A Chedaol Reng a milngelulau er ngak el kmo ngousbech ongelaod, mak mocha dengchokl er bitar ngii e ulekr el kmo ng klsakl. Ng dimlak longer … , mak mocha mekekokak el mengitakl el mor ngii.

“A re Primary milsuub er a beches el chelitakl, me a ki milngitakl er a, ‘If I listen with my heart I hear the Savior’s voice,’ eak mocha omelchesiu er a mesisiich el llomes me a mekekeald el reng er a renguk. … Ak ngiluu klaumerang el kmo a Osobeled a betik a rengul er ngii … me angak. … Ak silubi el kmo kid a chimal [Osobel] sel dosiou er a a tang.”11

Ng kal uaia blekerdelel a Kristo el odam a dimlak di lesa techall el mesiou er a bechil er a chelsel a klas el mui er a rodikel el euid a rekrir el ngalek; ng dirrek el milesiou er a ngalek el lulusbech a ngeso. Ng ultirakl er a Osobel, el ulisechakl el kmo, “A ureor el bla mesekak el meruul bo moruul el dirrek.”12

Ng dirk ke tekoi el iielb a mlo uchul a betok el techall el mo er tirkel oltirakl er a Jesus Kristo el mo kot e te omtab e sola mo meisou. Remeklou el chad, redil, ngeasek, me a rengalek a miles a siobai, obliil el metemall me te milechei a urerir e mlo olngeseu el mengedmokl e omekbeches a telemall. A rebebil a milsa techall le mo olngeseu el kirel omeselkel a selokel. Ea rebebil a milsuld a siasing, meklou a belkul babier, tengami, me a lmuut el bebil er a meklou a belkul babier e liluut el ngmai el tucherakl lomekdirt el mengereomel aikel mle sebechir el koreomel. A omtab e mesiou a diak el beot e belchoel duubech er a ikel diak el ungil temed.

Ng kol ngera ngodech el klebokel basio el domtab e mesiou er a chelsel a rekeblid el klou a techall er ngii? A okesiu er a klengar er a Elder Richard   G. Scott a ochotii:

“A tal kesus ea kekerei el ngelekam el sechal er a Richard, el mle mekngit a chaidirengul, a milkiis e lmangel.… Ng blechoel bechik a mekiis el mo mesa lmangel el ngalek, ng di tiaikid el taem eak dilu el kmo, ‘Msall ek bo kisang.’

“Tial secherel a uchul, e sel bol langel, ea chaidirengul a kmal mesisiich el lomomb. Ng blechoel el lomudech el di mo kikiongel a dukellel. Tiaikid el kesus ea kurrekedii e melasm el mengellakl er a rengul e bo lak el langel e kuleuiud er ngii ek lecha beches el dekedekel a dukellel. Ak mle urrekodel er ngii e ngelmuut el mocha mechiuaiu. Ng dimlak kudengei er tiaikid el taem el kmo ng kmal di kesai el buil eng mo dibus. Ak melemolem el melbedebek er ngii er seikid el kesus el kurrekodel er ngii.”13

A Jesus a dilu el kmo, “Ng kel ngii a ngarbab er kemiu el rokui, be lemesiungiu.”14

A lebebil er a taem e ngmo soad el mo mesiou er a chelsel a teletael el ngii a soad el diak el sal kmal klou el usbechall er sel taem. A Elder Robert  D. hales a ulsisechakl el kirel osisechakl er a di kid le mesiou er kid, eng uluchais er a okesiu er ngii er a lomechar er a omiange er ngii el mora bechil. Ng uleker, “Kau ke omechar tiang el kirek a lechub eng kirem?”15 Omko ke de mo chellakl e omtab er tial ker me sel rengud ra omesiou e oker kid, “Ngak ak meruul er tiang el mora Osobel, a lehcub ak meruul er ngii el kirek?” ea omesiou el doruul a locha sebechel mo uaia omesiungel Osobel. A Osobel a uleker, me kid meng kired loker, “Ngera soam a bok rellii lekor kau?”16

Sesei el sandei er a memong eak meral mle mechesang, el betok el beldukl el bo kuruul. Ak ulemdasu a mora templo er tial sils eng di kmal mle betok a kuruul. Tial uldasu er a kmal mechesang meng diak a temek el mora templo er a lsiseb er a uldesuek, eng uaia lulkerengak el kirel aikel kmal kirek el meruul. Ak di mle mereched el tuobed er a obis er ngak e merael el mora Templo er a Salt Lake, el omdasu el kmo ak mekerang e mor ngii a temek er a ikel kirek el mo meruul. Kuureng a saul, el Rubak a klou a rengul e chubechub e ulsisecheklak er a klou el suobel er tiaikid el sils.

Tia er a kdengchokl er a chelsel a session, ea ngeasek el odos a mle kmeed er ngak e mengelulau, “Ak kmal bekikl. Tia ongeru el taem er ngak el ngara templo. Ng sebechem el ngosukak?” Ng mekera medengei el kmo aikal tekoi a ksal lousbech el remenges? Ng dimlak lodengei, eng di a Chedam er a Babeluades a mle medengei. Ngii a mla mesa sel kot el ngarbab el kuusbech er ngii. Ng mle kirek el mo mesiou. Ngii a ulemekrael er ngika el ngariou a rengul ngeasek el odos el mo mesiou er ngak lokiu ongtil me bo kusiou er ngii. A kuuchais er kemiu le kmo ngak a bai mlo ngeltengat.

Ak ngara dmolech el omereng el saul el kirir tirkel betok el uaia blekerdelel a Kristo el chad el tir a mla mesiou er a telungalek er kemam er a betok el rak. Ak kmal oureng a sulel a bechik me a telungalek er ngak, el mui el mesiou loba dmolech el beltikelreng.

Mei e dosiik el kot el omtab, e sola bo dosiou. Sel bo deuaisei, e kede oltirakl a telbiil, me a omesiou el de ngarngii, el uaia President Monson, e kede mo olchotel a oltirakl. Ak medengei el kmo a Osobel a ngar. A Tngakireng er ngii e ngosukid el mo oltirakl Osisecheklel. Ak medengei el kmo a President Monson a profet er kid er chelechang. El ngara ngklel a Jesus Kristo, amen.

Uleklatk

  1. MesaDoctrine and Covenants 20:77.

  2. Johnanes 15:12.

  3. Thomas S. Monson, “What Have I Done for Someone Today?” Liahona, Nov. 2009, 86.

  4. Canyon H., “A Good Choice,” Friend, Jan. 2012, 31.

  5. Mateus 5:44.

  6. Mateus 25:40.

  7. Mesa “For Madison,” lds.org/youth/video/for-madison.

  8. Moroni 7:47.

  9. Thomas S. Monson, “Charity Never Faileth,” Liahona, Nov. 2010, 125; dirrek el mesa Daughters in My Kingdom: The History and Work of Relief Society (2011), 101.

  10. 3 Nephi 14:12.

  11. Al VanLeeuwen, “Serving the One,” Liahona, Aug. 2012, 19; dirrek el mesa Sally DeFord, “If I Listen with My Heart,” 2011 Outline for Sharing Time, 28.

  12. 3 Nephi 27:21.

  13. Richard G. Scott, “The Eternal Blessings of Marriage,” Liahona, May 2011, 96.

  14. Mateus 20:26.

  15. Robert D. Hales, “Becoming Provident Providers Temporally and Spiritually,” Liahona, May 2009, 9.

  16. Mateus 20:32.