Muguy rogon ko Somm’on, Mag Pigpig

Reb e ban’en nib ga’fan nibay rodaed ni fare prophet, President Thomas  S. Monson, e ir facha’ nike dugliy Samol nike fil rogon ninge un u kanawo’en fare Ta’athapeg—ninge ayuweg tata’bea’, bea’ nge bea’. Arodaed nike un nga fithik fare raen ko tawfe e ke michmicheg ningki rin’ ta’aborgon ngak’. Kad michmicheged ning’i “Yib ngan’daed [fare Tathapeg] ma ngad koled falan e motochiyal rok’,” ¹ ya be ga’ar, “Ba’aray e n’en ni nggu ning chiylen ngomed: nge bigimed me t’uf bigimed rok, ni boed rogon ni gimed ba t’uf rog.” ²

Kamguyed rogon e thin rok fare President i Monson niku ta’aborgon nibe yoeg: “Ba liyegdaed e picha’ nigad bt’uf roared, athap rodaed, ayuw rodaed, sumnguy rodaed, nge gol rodaed…. Gadaed paa’ e Samol rodaed u daken e rea fayleng ney, ni thingar da ayuw gad magad chibiy pifak ngalang. Be taga’ ngodaed kubea’ nge bea’.” ³

Kam rung’ag—nibe pong ningad adaged gadaed? Bochi gaed, nibe ayuw fa be machib nag bea’ nge bea’, nibe ‘un u kanawo’en fare Tathapeg, e da’ani moem. Machane ra ‘ud filed rogon, ma ra bagdaed ma rayog ninge boed fare Tathapeg ni fa’an gad ra ayuweg pifak Got. Ra ayuwegdaed ningad adaged gadaed, Gubadag ninggog aningeg e thin: “Muguy rogon ko somm’on, mag pigpig.”

Ke chugur ninge gaman aningeg i ragaag e duw nike pag mag mow yaen e pumo’on rog nga temple ko rebe biyarnis ni midil romow. Kug mabgol gow ni dawori n’uw nap’an, ma gube rus ni bachane ireray e bin l’agruw ngay nap’an fin gu mabgol. Rebe ppin ni walagey nibay u to’beg e gu sna ngay nike nang. Me chugur ngog me kathkath, “Dab mu rus. Bay gu ayuwegem.” Me ba’ud e tamdag rog, me yog nigu falfalaen’ u nap’an e rea temple session nem. Re ppin ney e guy rogon ko sommon, me pigpig.

Gadaed gubin ni yibe pining daed ningad filed kanawo’en fare T’athapeg mang kudfiled ko bochigaed. Rea pong ney e kub mu’un e angelic sisters ngay. Rogon nikug weliy boch mornga’agen e members nikar filed nthingar ra filed rogon ko somm’on, miyaed pigpig, motoyil ko machib rok’ fare T’athapep nibay ur pi’ed.

Bochi tir ni nel’ e duw yangrean e ga’ar: “Nap’an ni turguyeg ninggu pii’ e ayuw ko class rog, ma ku rayog ninggu fek bea’ ningki ayuweg neg. Ere gufek [bochi pagal u class rog ni ma k’aringeg] ni bachane dariy bea’ niba’adag ninge fek. Guba’adag ningguy nike falfalan’.” ⁴

Mange ke fil e rea tir ney? Ke nang rok’ ni facha’ ni ma mak’rang u class e da’anir fek. Mang e rin’ rogon? I fek nrib moem ni nge mang fagear rok’ me ayuweg. T’athapeg e yoeg, “Mu t’ufeged e pi to’ogor romed, ma ngam fal’eged wa’athan e pi’in ni yaed be ger nagmed, ma ngam rin’ed e tin nib mangil ngak’ e pi’in nibe fananikaymed.” ⁵

U reb e ward, Aaronic Priesthood holders e yaed ma guy rogon somm’on, mfin yaed pigpig ni bo’or kanawo’en. Gubin e wik me yib e pagal nib btir nib kamanngeal’ miyaed sak’iy u wuru’ tafen e mu’lung u fithik e n’uw, snow, fa blistering heat, ni yaed be son nag e pi elderly members ko rea ward nem. Yaed ma chibiy e wheelchairs nge walkers nga wuru’ e karo, miyaed pii’ paa’ raed nib gel ni ngan kol, miyaed ayuweg e pi pi’lal nike mat piyan lolugraed nga na’un. Ri yaed be rin’ e maruwel roared ku Got. Yaed ma guy rogon miyaed rin’ rogon, yaed kanawo’en fare Ta’athapeg ni’i yoeg: “Yu ngiyal’ ni um rin’ed e pin’ey ni fan ngak bagayad e pi cha’ney nth’abi sobut’ u fithik’ e picha’ ni pi walageg ney e kam rin’ed ngog.” ⁶ Napan ni m’ay fare program ko btir nib achig, ma owchen e pi btir ney e rra mab ko urngin ban’en nibay nrayog ningar rin’ed nrogon u kanawo’en Yesus Kristus.

Yira guy rogon man rin’ ma bay boche ngiyal’ nima t’uf e ayuw nib gaa’. Immoy bea’ nib ppin ni Alexandria fithngan ni pir’eg bea’ ni walagen ni Madison fithngan ni cha’ney e i moemaw’ rogon ngak’ e tirok’ ban’en nib gaa’ fan ni bachane i gafugow ko autism. Ere Alexandria e ning e ayuw ko pi’in ni ppin ko ward rok’, nibay mat’won e pi tolang rok’ riy, me lemnag ban’en ninge ayuweg Maddy ko tin ndabiyog rok’. Ere ra reb e pi ppin nem me mu’ nag bang ko gin ndabiyog rok’ fa’nem nib m’ar ninge yog ni fek e cha’ney i Maddy e birok’ e medallion.⁷

Pi ppin ni btir ney e ra fel’ e maruwel roared ni yaed ra pi’lal nge ngiyal ni kiyaed ra fakay e bitir nge Relief Society sisterhood ni bachane somm’on e ra guyed rogon, mfin rapigigaed u kanawo’en e t’ufeg.

President Monson e be pugran ngodaed ni t’ufeg, “fare adag rok’ Kristus nib manachalbog”⁸—fa kiy ma ga’ar, guy rogon man pigpig —“e ma m’ug ni fa’an ra yib ngan’daed bea’ nib ppin nike yim’ e pumo’on rok’ magaed fek ko pii mitmit ko ward” nge “nap’an gadaed ra pining walagey nib ppin nibe paer rok’ ni yigo ‘ir ko Relief Society, ‘Moy—ngam paer nga to’bean maed.’”⁹ Fare golden rule e ireray: “Gubin ban’en ni gaba’adag ninge rin’ bea’ ni pumo’on [fa ppin] ngom, e ngkum rin’ ngoraed.”¹⁰

Pumo’on nike mabgol e ma rin’ rogon ni l’agruw kanawo’en nrib gaa’fan. I ga’ar:

“Gu ayuweg e ppin rog reb e Madnom ko Primary class rok’ nib sug ko medlip e duw yangrean nriyaed blingtal. Ere napan ni tabab fare Primary class, mug guy reb fapi btir ni ppin nike palyeg ko chiya rok’ nib ya’an ba ban’en nike buch rok’. Me kathkath fare Kan Thothup ngog nib t’uf e ayuw rok’, ere gu paer nga charean mug fith ngak’ salpen nib munguy. Ma da’ani fulweg …  , ere gu tabab i yoen’ bochi tang ngak’ nib munguy.

“Rea Primary neam e be fil ba tang nib bi’ech, ma fa’an gu tang gaed, ‘Fa’an gura motoyil u gum’ircha’eg mug rung’ag lungun fare Tathpeg,’ Mug tabab i thamiy rog nib gel ba tamilang nge mogwael nibe suguy ngarngoreg. … Ke yib ngog ba michmich ko adag rok’ fare Ta’athpeg ngak’ fachi ppin … nge gag…. kug fil ni gadaed paa’ [fare Tathapeg] ni fa’an gadaed ra ayuweg bea’.”¹¹

Gathi kemus ni biney ni rin’ e rea walagdaed ni pumo’on ney u kanawo’en Kristus ninge ayuweg e ppin rok’ ko class nib sug ko medlip e duw yangrean ni yigo blingtal; Kki ayuweg tata’ bea’ nge btir nib tuf e ayuw rok’. Ke ‘un u kanawo’en fare T’athapeg, ni yoeg, “Pi muruwel ni kam guyed gag ni kug rin’ e ireram e pi muruwel ni ngam rin’ed.”¹²

Ngara’ riy meyaeni buch ba flood mki pii’ boch fare maruwel ko pigchalpen Yesus Kristus ni ngar guyed rogon sommon miyaed pigpig . Pumo’on, ppin, fal’ yangrean, nge btir e ra guyed e pi siyobay nge tabinaw ni kireb miyaed pag e urngin ningar ayuw gaed ko clean nge falfal’eg rogon e pi n’en nike kireb. Boch e guy rogon ninge pii’ e ayuw ko maluk maad. Ma boch e i sasagaleg i falay e pi sassing, babyor nib gaa’fan, tengami, nge kuboch e babyoer nib t’uf, miyaed sasagaleg ngan gilk’aed ni nge yoeg ning kun fana’. Guy rogon mag pigpig e gathi gubin ngiyal’ mab moem ma gathi gubin ngiyal’ ma be yag u puluwdaed.

Mang bang nib fel’ ni yira guy rogon sommon mag pigpig ni boed u tabinaw? Ta’aborogon ko yafas rok’ Elder Richard G. Scott ni be ga’ar:

“Reb e nep’ ma bochi pagal romow ni Richard fithngan, nib m’ar ko gum’ircha’ rok’, e yaeni od nibe yoer. … Orean e ngiyal’ ma ppin rog e ma od me yoeg ninge guy e btir nibe yoer, ma yaeney e gu’ar, ‘bay gu ayuweg.’

“Bachane biney e magawon, napan e ra yoer, ma be pom e gum’ircha’ rok nib papay. Ma sul’ugun nge makalit e maad ko bet rok’. Rea nep’nem mrug kol nga pa’ag nib chugur ngog ninge yag ni miyaw gumircha’en me taleg e yoer mug thilyeg e maad ko bet rok’. Ere gu fek nga pa’ag nge mada’ ko ngiyal’ nike mol. Da’an nug nang ko ngiyal’ nem nra in e pul e ngara’ riy me yim’. Ra iyib ngan’ug ni gubin ngiyal’ e rea nep’ nem ni ug koel nga lan pa’ag.”¹³

Yesus e ga’ar, “Fa’anra ba’adag bigimed ni nge mang ir e ba tolang, ma ir e thangri mang tapigpig romed ni gimed gubin.”¹⁴

Ba boch e ngiyal’ ni ma yib ngodaed ningad rin’ed ban’en u rogon nigad ba’adag ma da’ani t’uf ni ngad rin’ed ni boed nib t’uf ko ngiyal’ nem. Napan ni fil Elder Robert  D. Hales fare principle ko rogon e paer, me weliy mornga’agen bingyal’ ni chuw’iy e tawa’aath ko ppin rok’. I fith e ppin rok’ ngak’, “Gabe chuw’iy ni fan ngom fa nggu fana’?” ¹⁵ Fa’an gadaed ra fil e biney e duwer ngodaed napan gad ra rin’ ban’en me bea’ me fith ir, “Gube rin’ e ren’ey ni fan ko fare T’athapeg fa gube rin’ ni fan ngog?” maruwel rodaed e ra boed ni’i daag fare T’athapeg. Fare T’athapeg e fith, nge ku er rogon gadaed, “Mange gabadag ninggu rin ngom?” ¹⁶

U lane wik nike yaen, ma gube gurgur nge chichigog, ko urngin ban’en ni bay ninggu rin’. Ug athapeg ni ngguwaen nga temple e rofen nem machane gube thamiy ni kay gi yo’or paa’ nga pulwog. Napan ni yib ngan’ug ndabiyog e temple rog ni bachane yo’or paa’ nga pulwog, mug od ngay ni biney e ba gaa’ fan ni nggu rin’. Ere gu chuw u office rog mug waen nga Salt Lake Temple, ni gube lem ko bu’uw rogon mug sulweg rogon e pin’en ni kug digey nga tomur. Rigube og e magaer, ni Somoel e ba gumaen’mab murnguy ma ri fil ban’en ngog e rofen nem.

Napan ni gupar nga but’ ko singgil ni yima mo’olung riy, me lumel reb e ppin ni walagey ngog me kathkath, “Rug be rus. Ireray e bin l’agruw ngay ni kugub e ngaray nga temple. Rayog ni ngam ayuwegeg?” Bu’uw rogon nike nang ni pi thin ney e ri gube athapeg ninggu runga’ag? Da’ani nang, machane chitamangidaed nu tharmiy e manang. Be guy rogon e tin nib t’uf rog. Bt’uf ni nggu rin’ rogon. Ke gagyeg nag e re ppin nib gum’aen ney ni nge rin’ rogon nib t’uf rog nibe piningeg ningkug rin’ rogon nib t’uf rok’. Rayog ni nggog ni i gagromow e kari fel wa’athag.

Gube nang ma gube falfalan’ ko gubin e girdii’ nibe fol u kanawo’en Kristus ma be rin’ rogon e ayuw riy ko tabinaw rodaed ko pi duw nike yaen. Gube og nag e magaer u gum’ircha’eg ko pumo’on rog nge tabinaw, ni yaed be rin’ rogon danir digey bea’ nge adag nib gel.

Ere ngu’ud gayed ni sommon e ngad guyed rogon, magad pigpig. Gad ra rin’, magad be kol falan fare motochiyal, nge maruwel rodaed, niboed President Monson, ningad gagiyal niged kanawo’en daed. Gumnang ni fare Tathapeg e ba fas. Fare Bayul ni rin’ me yag ni ngad pared u fithik e machib rok’. Gumnang ni President Monson e ir e profet rodaed e dabaa’. U fithngan Yesus Kristus, amen.