Me sa Tikoga kei Kemuni na Kalou

Kemuni na taciqu kei na ganequ lomani, eda sa yacova tale mai na itinitini ni dua na koniferedi raraba veivakauqeti. Au sa vakamamautaki vakayalo ka laveti cake, kau kila ni o ni sa vakila talega na yalo digitaki ni koniferedi oqo.

Eda vakaraitaka na noda vakavinavinaka mai vu ni yaloda vei ira kece sara era sa vakaitavi ena veisala kece sara. Sa totoka na kedra vakavuvulitaki ka taumuri tale na dina ni kosipeli. Ni da tugana ki yaloda kei na noda bula na itukutuku ni rua na siga sa oti, eda na vakalougatataki.

Me vaka na kena ivakarau, ena tabaki tu na veika kece sara e vakayacori ena koniferedi oqo ena itabataba ni Ensign kei na Liahona ka tarava. Au vakayaloqaqataki kemuni mo ni wilika tale na vosa ka vakananuma vakatitobu na itukutuku era tu kina. Au sa raica ena noqu bula ni levu cake sara na ka au rawata mai na ivunau veivakauqeti oqo niu vulica vakatitobu cake.

E sega ni vakatauvatani rawa na kena kaburaki na koniferedi, e kosova na veivanua kei na veiwasawasa vei ira na tamata ena veivanua kecega. E dina ni keimami yawa mai na vuqa vei kemuni, keimami vakila na yalomuni ka vakauta yani na neimami iloloma kei na vakavinavinaka vei kemuni.

Vei kemuni na veitacini o ni sa vagalalataki ena koniferedi oqo, meu vakaraitaka mada na neimami vakavinavinaka mai na vu ni yaloi keimami kece sara ena vuqa na veiyabaki ni nomuni veiqaravi ena yalodina. E sega ni wili rawa o ira era sa vakalougatataki mai na nomuni cau ki na cakacaka ni Turaga.

Kemuni na taciqu kei na ganequ, au se qai marautaka walega ena dua na gauna lekaleka sa oti na ika 85 ni noqu siganisucu, kau sa vakavinavinakataka na veiyabaki yadua sa solia vei au na Turaga. Niu vakananuma na veika au sotava ena noqu bula, au vakavinavinaka Vua ena levu ni Nona veivakalougatataki vei au. Me vaka au a cavuta ena noqu itukutuku ena mataka nikua, au sa vakila na ligana ni dusimaka tiko na noqu sasaga niu tovolea vagumatua meu qaravi Koya ka qaravi kemuni kece.

Na itutu vaka-Peresitedi ni Lotu e levu sara na kena itavi. Au sa vakavinavinaka vakalevu kina vei rau na noqu daunivakasala yalodina, ka rau veiqaravi tiko e yasaqu ka rau sa dau tu vakarau ka rawata vinaka me rau veivuke ena cakacaka e yaco mai ki na Mataveiliutaki Taumada. Au vakaraitaka talega na noqu vakavinavinaka vei ira na turaga dokai ka ra lewena na Kuoramu ni iApositolo Le Tinikarua. Era sega ni guce rawa ena kena cakacakataki na nona inaki na iVakavuvuli, kei ira na lewe ni Veikuoramu ni Vitusagavulu ka ra vakarautaka tiko na veivuke veivakauqeti vei ira.

Au gadreva talega meu vakacaucautaki kemuni, na taciqu kei na ganequ, se na vanua cava ga o ni tu kina e vuravura raraba, ena veika kece sara o ni cakava ena nomuni tabanalevu kei na tabana, nomuni iteki kei na tikina. Ena nomuni tu vakarau mo ni ciqoma na veikacivi ki na nomuni bula, o ni sa veivuke tiko ena kena tarai cake na matanitu ni Kalou e vuravura.

Me da sa dau veiraici tiko vakataki keda, ka veivuke ena gauna ni leqa. Me da kakua ni dau veivakaduiduitaki se vakalelewa, ia me tiko vei keda na yalovosota ka vakatotomuria tikoga na nona ivakaraitaki ni loloma kei na yalovinaka na iVakabula. Ena vakasama oqori, me da sa qai veiqaravi yani vakataki keda ena yalodina. Meda qai masuta na veivakauqeti me da kila na nodra gagadre o ira era tu wavoliti keda, oti me da qai toro yani ka veivuke.

Me da dau marau tikoga ni toso tiko na noda bula. E dina ni da bula donumaka na gauna dredre, na Turaga e lomani keda ka dau nanumi keda tiko. Sa dau tiko ga e yasada ni da cakava tiko na veika dodonu. Ena vukei keda ena gauna ni leqa. E dau yaco mai ki na noda bula na dredre, na leqa eda sega ni namaka ka da sega ni digitaka. E sega ni dua vei keda e vakuwai kina. Na inaki ni bula oqo me da vuli ka tubu cake me da ucuya vakalevu na Tamada, ka sa vakavuqa ni da dau vuli vakalevu cake ena gauna ni dredre, se vakacava ga na mosi ni lesoni. E rawa talega ni vakasinaiti ena reki na noda bula ni da muria na ivakavuvuli ni kosipeli i Jisu Karisito.

Sa veivakauqeti na Turaga, “Mo dou vakacegu; au sa vakamalumalumutaki vuravura.”¹ Sa dodonu me kauta mai vei keda na marau levu na kila oqo. A bula o Koya ena vukuda ka mate o Koya ena vukuda. Sa sauma o Koya na isau ni noda ivalavala ca. Me da vakatotomuria na Nona ivakaraitaki. Me da vakaraitaka na noda vakavinavinaka cecekia Vua ena noda ciqoma na Nona isoro ka bulataka na itovo ena rawa kina vei keda me da lesu tale ka laki bula vata kei Koya ena dua na siga.

Me vaka au sa dau tukuna ena veikoniferedi sa oti, au vakavinavinaka vei kemuni ena nomuni masu ena vukuqu. Au gadreva; au dau vakila. O keimami na Vakaitutu Raraba keimami dau nanumi kemuni ka masuta na veivakalougatataki digitaki ni Tamada Vakalomalagi me sobuti kemuni.

Ia oqo, kemuni na taciqu kei na ganequ, eda sa na mai rube toka me ono na vula. Me sa tikoga kei kemuni na Kalou me yacova ni da qai sota tale ena gauna ko ya. Ena yaca ni noda iVakabula ka Dauveivueti, io ko Jisu Karisito na Turaga, emeni.