ຂໍໃຫ້ພຣະເຈົ້າຈົ່ງສະຖິດຢູ່ນຳທ່ານຈົນກວ່າເຮົາຈະພົບກັນອີກ
ໂດຍ ປະທານທອມມັສ ແອັສ ມອນສັນ
ເມື່ອເຮົາຮັບເອົາຂ່າວສານທີ່ໄດ້ຍິນໃນສອງມື້ຜ່ານມານີ້ເຂົ້າໄວ້ໃນໃຈ ແລະ ຊີວິດຂອງເຮົາ, ແລ້ວເຮົາຈະໄດ້ຮັບພອນ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ອີກເທື່ອໜຶ່ງພວກເຮົາໄດ້ມາເຖິງທ້າຍຂອງກອງປະຊຸມໃຫຍ່ທີ່ໃຫ້ການດົນໃຈ. ຂ້າພະເຈົ້າໂດຍສະເພາະໄດ້ຮັບການບຳລຸງລ້ຽງທາງວິນຍານ ແລະ ໄດ້ຖືກເຊີດຊູຂຶ້ນ ແລະ ຮູ້ວ່າທ່ານກໍຮູ້ສຶກເຊັ່ນດຽວກັນນັ້ນ.
ພວກເຮົາຂໍສະແດງຄວາມຂອບໃຈຕໍ່ທຸກຄົນທີ່ໄດ້ມາຮ່ວມບໍ່ວ່າຈະເປັນໃນທາງໃດກໍຕາມ. ຄວາມຈິງຂອງພຣະກິດຕິຄຸນໄດ້ຖືກສັ່ງສອນຢ່າງງົດງາມ ແລະ ເນັ້ນໜັກຕື່ມອີກ. ເມື່ອເຮົາຮັບເອົາຂ່າວສານທີ່ໄດ້ຍິນໃນສອງມື້ຜ່ານມານີ້ເຂົ້າໄວ້ໃນໃຈ ແລະ ຊີວິດຂອງເຮົາ, ແລ້ວເຮົາຈະໄດ້ຮັບພອນ.
ດັ່ງທີ່ເຄີຍເຮັດຜ່ານມາ, ຄຳປາໄສຂອງກອງປະຊຸມນີ້ຈະຖືກພິມໄວ້ຢູ່ໃນວາລະສານ Ensign ແລະ Liahona ສະບັບເດືອນພະຈິກ. ຂ້າພະເຈົ້າຂໍຊຸກຍູ້ທ່ານໃຫ້ອ່ານຄຳປາໄສອີກເທື່ອໜຶ່ງ ແລະ ໄຕ່ຕອງຂ່າວສານຢູ່ໃນນັ້ນ. ຂ້າພະເຈົ້າພົບເຫັນວ່າ ຂ້າພະເຈົ້າໄດ້ຮັບຄວາມຮູ້ເພີ່ມຂຶ້ນຈາກຄຳເທດສະໜາທີ່ດົນໃຈເຫລົ່ານັ້ນ ເມື່ອຂ້າພະເຈົ້າສຶກສາມັນຕື່ມອີກ.
ພວກເຮົາໄດ້ຖ່າຍທອດກອງປະຊຸມໃນທາງທີ່ບໍ່ເຄີຍເປັນມາກ່ອນ, ສາມາດໄປເຖິງທຸກທະວີບ, ຂ້າມນ້ຳຂ້າມທະເລໄປຫາຜູ້ຄົນຢູ່ໃນທຸກແຫ່ງຫົນ. ເຖິງແມ່ນວ່າພວກເຮົາຢູ່ຫ່າງໄກຈາກຫລາຍຄົນໃນພວກທ່ານ, ແຕ່ພວກເຮົາຮູ້ສຶກວ່າໄດ້ຢູ່ໃກ້ ແລະ ຂໍສົ່ງຄວາມຮັກ ແລະ ຄວາມຂອບໃຈມາຍັງທ່ານທັງຫລາຍ.
ຕໍ່ບັນດາອ້າຍນ້ອງຜູ້ໄດ້ຖືກປົດໃນກອງປະຊຸມນີ້, ຂ້າພະເຈົ້າຂໍສະແດງຄວາມກະຕັນຍູຢ່າງລົ້ນເຫລືອສຳລັບການອຸທິດຕົນຂອງທ່ານໃນການຮັບໃຊ້ເປັນເວລາຫລາຍປີ. ຄົນທີ່ໄດ້ຮັບພອນແມ່ນນັບບໍ່ຖ້ວນໂດຍວຽກງານທີ່ທ່ານໄດ້ເຮັດເພື່ອພຣະຜູ້ເປັນເຈົ້າ.
ອ້າຍເອື້ອຍນ້ອງທັງຫລາຍ, ຂ້າພະເຈົ້າຫາກໍໄດ້ສະເຫລີມ ສະຫລອງວັນເກີດຄົບຮອບ 85 ປີ ຂອງຂ້າພະເຈົ້າ, ແລະ ຂ້າພະເຈົ້າມີຄວາມກະຕັນຍູຫລາຍສຳລັບແຕ່ລະປີທີ່ພຣະຜູ້ເປັນເຈົ້າໄດ້ປະທານໃຫ້ຂ້າພະເຈົ້າ. ເມື່ອຂ້າພະເຈົ້າຫວນຄິດເຖິງປະສົບການໃນຊີວິດຂອງຂ້າພະເຈົ້າ, ຂ້າພະເຈົ້າຈະຂອບພຣະໄທພຣະອົງສຳລັບພອນຕ່າງໆທີ່ພຣະອົງໄດ້ປະທານໃຫ້ຂ້າພະເຈົ້າ. ດັ່ງທີ່ຂ້າພະເຈົ້າໄດ້ກ່າວໃນຄຳປາໄສຂອງຂ້າພະເຈົ້າໃນມື້ເຊົ້ານີ້, ຂ້າພະເຈົ້າຮູ້ສຶກວ່າພຣະຫັດຂອງພຣະອົງໄດ້ຊີ້ບອກຂ້າພະເຈົ້າ ໃນຂະນະທີ່ຂ້າພະເຈົ້າພະຍາຍາມຮັບໃຊ້ພຣະອົງດ້ວຍຄວາມຕັ້ງໃຈ ແລະ ຮັບໃຊ້ທ່ານທຸກຄົນ.
ຕຳແໜ່ງຂອງປະທານຂອງສາດສະໜາຈັກເປັນຕຳແໜ່ງທີ່ຫຍຸ້ງຍາກຫລາຍ. ຂ້າພະເຈົ້າມີຄວາມກະຕັນຍູຫລາຍສຳລັບທີ່ປຶກສາທັງສອງຂອງຂ້າພະເຈົ້າ, ຜູ້ຮັບໃຊ້ດ້ວຍຄວາມເຕັມໃຈ ແລະ ມີຄວາມສາມາດຫລາຍໃນວຽກງານຂອງຝ່າຍປະທານສູງສຸດ. ຂ້າພະເຈົ້າກໍຂໍສະແດງຄວາມກະຕັນຍູຕໍ່ບັນດາອ້າຍນ້ອງທີ່ມີກຽດໃນສະພາອັກຄະສາວົກສິບສອງນຳອີກ. ພວກເພິ່ນໄດ້ທຳງານຢ່າງບໍ່ອິດເມື່ອຍໃນອຸດົມການຂອງພຣະອາຈານ, ຮ່ວມກັບສະມາຊິກຂອງສະພາສາວົກເຈັດສິບ ໂດຍການໃຫ້ຄວາມຊ່ອຍເຫລືອທາງວິນຍານແກ່ພວກເພິ່ນ.
ຂ້າພະເຈົ້າກໍຂໍສະແດງຄວາມຍ້ອງຍໍທ່ານອີກຄືກັນ, ອ້າຍເອື້ອຍນ້ອງຂອງຂ້າພະເຈົ້າ, ບໍ່ວ່າທ່ານຈະອາໄສຢູ່ບ່ອນໃດກໍຕາມໃນໂລກ, ສຳລັບທຸກສິ່ງທີ່ທ່ານເຮັດຢູ່ໃນຫວອດ ແລະ ສາຂາ, ຢູ່ໃນສະເຕກ ແລະ ທ້ອງຖິ່ນຂອງທ່ານ. ເມື່ອທ່ານເຕັມໃຈທີ່ຈະບັນລຸການເອີ້ນຂອງທ່ານເມື່ອທ່ານຖືກເອີ້ນໃຫ້ເຮັດ, ແລ້ວທ່ານຈະຊ່ອຍສ້າງສາອານາຈັກຂອງພຣະເຈົ້າຢູ່ເທິງແຜ່ນດິນໂລກ.
ຂໍໃຫ້ເຮົາຈົ່ງດູແລຊຶ່ງກັນແລະກັນ, ຮັບໃຊ້ກັນໃນຍາມຂັດສົນ. ຂໍໃຫ້ເຮົາບໍ່ຮີບຮ້ອນໃນການວິຈານ ແລະ ຕັດສິນຄົນອື່ນ, ແຕ່ໃຫ້ເຮົາອົດທົນ, ແມ່ນແຕ່ເຮັດຕາມຕົວຢ່າງຂອງພຣະຜູ້ຊ່ອຍໃຫ້ລອດເລື່ອງຄວາມຮັກທີ່ອ່ອນຫວານ. ໃນຄວາມຮູ້ສຶກນີ້, ຂໍໃຫ້ເຮົາຈົ່ງເຕັມໃຈທີ່ຈະຮັບໃຊ້ຊຶ່ງກັນແລະກັນ. ຂໍໃຫ້ເຮົາຈົ່ງອະທິຖານຂໍການດົນໃຈເພື່ອຈະໄດ້ຮູ້ເຖິງຄວາມຕ້ອງການຂອງຄົນທີ່ຢູ່ອ້ອມຮອບເຮົາ, ແລະ ຈາກນັ້ນຂໍໃຫ້ເຮົາກ້າວອອກໄປ ແລະ ຊ່ອຍເຫລືອ.
ຂໍໃຫ້ເຮົາຈົ່ງຊື່ນໃຈ ໃນຂະນະທີ່ເຮົາໃຊ້ຊີວິດຂອງເຮົາ. ເຖິງແມ່ນວ່າເຮົາມີຊີວິດຢູ່ໃນຊ່ວງເວລາທີ່ຫຍຸ້ງຍາກ, ແຕ່ພຣະຜູ້ເປັນເຈົ້າຍັງຮັກເຮົາ ແລະ ຮູ້ຈັກເຮົາດີ. ພຣະອົງຈະຢູ່ຄຽງຂ້າງເຮົາສະເໝີ ເມື່ອເຮົາເຮັດສິ່ງທີ່ຖືກຕ້ອງ. ພຣະອົງຈະຊ່ອຍເຫລືອເຮົາໃນຍາມທີ່ເຮົາຕ້ອງການ. ຄວາມຫຍຸ້ງຍາກ, ບັນຫາທີ່ເຮົາບໍ່ຄາດຄິດ ແລະ ສິ່ງທີ່ເຮົາບໍ່ໄດ້ເລືອກຈະມາສູ່ຊີວິດຂອງເຮົາ. ບໍ່ມີໃຜຖືກຍົກເວັ້ນ. ຈຸດປະສົງຂອງຊີວິດມະຕະເປັນຊ່ວງທີ່ມາຮຽນ ແລະ ເຕີບໂຕ ກາຍເປັນເໝືອນດັ່ງພຣະບິດາ, ແລະ ສ່ວນຫລາຍຈະເປັນຕອນທີ່ມີບັນຫາ ທີ່ເຮົາຮຽນຫລາຍທີ່ສຸດ, ເຖິງແມ່ນວ່າບົດຮຽນນັ້ນຈະເຈັບປວດຫລາຍປານໃດກໍຕາມ. ຊີວິດຂອງເຮົາກໍສາມາດເຕັມໄປດ້ວຍຄວາມສຸກຄືກັນ ເມື່ອເຮົາເຮັດຕາມຄຳສອນແຫ່ງພຣະກິດຕິຄຸນຂອງພຣະເຢຊູຄຣິດ.
ພຣະຜູ້ເປັນເຈົ້າໄດ້ແນະນຳວ່າ, “ຈົ່ງຊື່ນໃຈ; ຝ່າຍເຮົາໄດ້ຊະນະໂລກແລ້ວ.”1 ຊ່າງເປັນຄວາມສຸກແທ້ໆໃນຄວາມຮູ້ແຈ້ງນີ້. ພຣະອົງໄດ້ຊົງພຣະຊົນຢູ່ເພື່ອເຮົາ ແລະ ໄດ້ສິ້ນພຣະຊົນເພື່ອເຮົາ. ພຣະອົງໄດ້ຈ່າຍຄ່າບາບເພື່ອເຮົາ. ຂໍໃຫ້ເຮົາຈົ່ງເຮັດຕາມຕົວຢ່າງຂອງພຣະອົງ. ຂໍໃຫ້ເຮົາຈົ່ງສະແດງຄວາມກະຕັນຍູຕໍ່ພຣະອົງໂດຍການຮັບເອົາການເສຍສະລະຂອງພຣະອົງ ແລະ ດຳລົງຊີວິດໃນທາງທີ່ເໝາະສົມ ເພື່ອຈະໄດ້ກັບຄືນໄປຢູ່ກັບພຣະອົງອີກໃນມື້ໜຶ່ງ.
ດັ່ງທີ່ຂ້າພະເຈົ້າໄດ້ກ່າວໃນກອງປະຊຸມເທື່ອຜ່ານມາ, ຂ້າພະເຈົ້າຂອບໃຈທ່ານສຳລັບການອະທິຖານເພື່ອຂ້າພະເຈົ້າ. ຂ້າພະເຈົ້າກໍຕ້ອງການມັນຫລາຍ; ຂ້າພະເຈົ້າໄດ້ຮູ້ສຶກ. ພວກເຮົາ ໃນຖານະທີ່ເປັນເຈົ້າໜ້າທີ່ຊັ້ນຜູ້ໃຫຍ່ກໍຈື່ຈຳທ່ານທຸກຄົນ ແລະ ໄດ້ອະທິຖານຂໍໃຫ້ພຣະບິດາເທິງສະຫວັນປະທານພອນອັນປະເສີດລ້ຳໃຫ້ແກ່ທ່ານ.
ບັດນີ້, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ກອງປະຊຸມຈະຢຸດພັກເປັນເວລາຫົກເດືອນ. ຂໍໃຫ້ພຣະເຈົ້າຈົ່ງສະຖິດຢູ່ນຳທ່ານຈົນກວ່າເຮົາຈະພົບກັນອີກໃນເວລານັ້ນ. ໃນພຣະນາມຂອງພຣະເຢຊູຄຣິດ, ອາແມນ.