Sewese Irail Wiahda Koasoandi Ile

I kalahnganiki mehlel ansou mwahu kiset en pato nan mihting lap wet en priesthood, en karonge padahk oh kadehde kaselel. E kahrehieng I en medewe duwen me I pein lelohng. Kerenieng koaros me I kapwaiada ni duwen emen me kol priesthood iei pwehki aramas me eseie ahr kilang mehkot rehi me I sohte kak kilang.

Ni ansou me I wia pahpa pwulopwul men, I kin kapakapki en ese duwen sawas dah me nei serihkan kakete wia nan wehin Kauno. Ong nei wutangko, I ese me re pahn ahniki ansou mwahu kan en priesthood. Ong serepein ko, I ese me re pahn kihda sawas ni arail weliandi Kauno. Koaros pahn wiewia sapwellime doadoahk. I ese me emenemen irail aramas tohrohr, oh eri Kauno pahn ketikihieng irail kisakis tohrohr me emenemen en kin doadoahngki nan Sapwellime papah.

Eri, I sohte kak ndahieng pahpa koaros oh kaun koaros en me pwulopwul mengihtikpen dahme keieu mwahu kumwail en wia. Ahpw I kak inouki me kumwail pahn kapaiirailda en sewese irail kasawiada kisakis kan en pali ngehn me re ipwikihdi. Aramas koaros wekpeseng oh emenemen ahniki sawas tohrohr en kihda. Sohte me koasoandi en sohte pweida. Ni amwail pahn rapahki kaudiahl en dehdehki kisakis kan me Koht ketin mahsanih rehn irail akan me kumwail kin kaweidih nan priesthood—ni mehlel me pwulopwul kan—kumwail pahn kapaida en kaweidih irail ong doadoahngkan me re pahn kak kapwaiada. Sang ni amwail kaweid, irail akan me kumwail kaweidih pahn kak kilang, inangih, oh kamehlele me re kak pweida ni uwe me re kakohng papah nan wehin Koht.

Ong pein nei serihkan, I kapakapki kaudiahl en ese duwen ei kak sewese emenemen irail kaunop ong ansou mwahu en papah Koht. Oh eri I song en sewese irail en kilang, kasik, oh doadoahk ong met. I parada kisin lepin dinapw ong emenemen pwutak iangahki iren mahsen me kawehwe ah kisakis tohrohr iangahki kilel me wia kilel en kisakis wet. Pahnangin kilelo oh nting ko, I parada ahn emenemen pwutak rahn en pepdais oh kasarawi ong ohpis kan en priesthood, iangahki uwen eh reirei ni ehuehu rahn akan.

I pahn kawehwe duwen lepin tuhke kan me I parada ong emenemen nei pwutak pwehn sewese ih en dehdehki ah kisakis kan en pali ngehn oh dahme e kak sawaskihda nan doadoahk en Kauno. Kumwail kak kamarainda en kasawiada, duweie, kisakis tohrohr kan oh ansou mwahu wekpeseng kan ong emenemen me pwulopwul me kumwail poakohng oh kin kaweidih.

Ni ansou me nei meseniho wiahla dihken oh Eagle Scout, kilel en ikel kohdohng ahi madamadau ni ei medewe ih oh ah mour kohkohdo. Se koukousoan nan Idaho karanih Nahna en South Teton, wasa me se kin patpene alu ie oh kilang ikel kan pipihr. Kilelo nan moangeie kihieng ie en medewehda mahsen en Aiseia:

“E kin ketin kakehlahda me luwet oh me pwangadahr kan.

“Pil me pwulopwul kan kak luwetala oh mwahnakapw kan kak pwupwukihdi eh sohla angirail.

“Ahpw irail kan me kin koapworopworki Kauno pahn onehda sapahl ar kehl. Re pahn kin kehlail, rasehng ikel kan; ni ar pahn kin tang, re sohte pahn pwangada; ni ar pahn alu, re sohte pahn luwetala.”¹

Ni mehlel, ong nait pwutak keieu laudo, se uhdi aht alu pahnanginte kadoken South Teton pwehki nei pwutako pwangada. E men uhdi. E nda, “I pahn kin nsensuwed erein ahi mour pwehki atail sohte leldahla ni kadokeo? Ipa, douluhlwei—I sohte men ken nsensuwed pahi.”

I sapengki, “I sohte douluhl pahn nsensuwed pahmw, oh ke pil sohte pahn nsensuwed. Kita pahn tamataman erein ata patpene doudahdo lel wasaht.” Ni kadoken lepin dinapwo, I parada ikel men oh lepin mahsen “Pohn Pehn Ikel.”

Nan sounpar akan kohkohdo, nei pwutako pweida ni duwen misineri laudsang me I medewe nan ei ouraman. Nan kahpwal kan en nan misin, ekei dahme e sohpai mwomwen sipele dah me e kakehng. Ong pwutako me ke pahn sewese, mwein e kakete, duwehte ong nei pwutako, me Kauno ketin pwokada ih ilehsang me I kak lemehda ni eh kin kalohk rongamwahuo ni lokaia ehu me apwal. Ma ke pahn song pehmada dahme emen mwahnakapw sohte lipilipil kak kapwaiada nan priesthood, I inoukihienguhk me Kauno pahn ndahieng uhk uwen me ke anahne. Mwein pwutako pahn ahniki koahiek daulih dahme Kauno pahn kapwarehionguhk. Sewese ih en dauliala pein ah kehl.

Mwein pwutak me ke kin wie kangoange kak mwomwen nohn namenek en wia sounpapah kehlail nan priesthood. Emen tohrohr nei pwutangko uwen eh namenek e sohte kak aluhlong nan sidohwa oh lokaiahieng soun netinet. I kin pwunodiki me e nohn masepwehk oh kin kapakapiki duwen ah mour en priesthood ehu rahn. I kin medewe duwen ih nan misin—met mwomwen sohte pahn mwahu. I kaweidlahng ehu iren pwuhk sarawi nan Lepin Padahk Audapan Kan: “Aramas suwed kin tangdoaui mehnda ma sohte me pwakipwakih, ahpw aramas lelepek kin kommwad duwehte laion.”²

I parada “Kommwad duwehte Laion” pohn nah dinapwo, pahnangin kilel en moangen lapalahn laion men me kihkihda ngile. Nan ah misin oh pil sounpar akan me doula mwuri, e kapwaiada kasikpen me I paradao. Nei pwutak me kin nameneko kalohk rongamwahuo ni ngoang laud oh sohpai keper kan ni kommwad. E kakehlailda nan ah pwukoa en wia weliepen Kauno.

Met kak wiawi ong mwahnakapw men me komw kawkaweidih. Komw anahne kalaude ah pwoson me Kauno kak wekidala ih ong sounpapah me ahpwete soupeikasalsang pwutak namenek me komw kilang met.

Kitail ese me Kauno kin wiahda Sapwellime sounpapah kan en kommwad. Mwahnakapw Joseph me kilangada Koht Sahm oh Sapwellime Iehros Sises Krais, nan welin tuhke ieu weliakapwalahng ohl me kehlail ni pali ngehn. Parley P. Pratt kilang met ni ansou me Soukohp Joseph Smith lipwoare sounsilasil mour suwed pwuko me kolokol ih. Elder Pratt ntingihdi:

“E wiahkintehieu kesihnenda, oh mahsen ni ngilen nansapwe, de rasehng ngilen laion, ndahla, ni uwen keren me I kak taman, lepin lokaia pwukat:

“‘DEHR LOKAIA, kumwail akan me towe nan ehl. Ni mwaren Sises Krais I lipwoareikumwail, oh ndahieng kumwail en nennenla; I sohte pahn mour erein minit ehu oh rong soangen lokaia kan. Katokehdi amwail lokaia kan, pwe ma soh kumwail de ngehi pahn mehla ANSOU KISET TE!’”

Duwen irair wo, Elder Pratt ntingihdi, “Waun oh lapalap I kilangidi pak ehu te, ni eh kesihnen nan sihn, ni likopen pwong, nan wasahn sensel nan kisin kahnihmw sohte ndand en Missouri.”³

Kauno pahn ketikihieng Sapwellime sounpapah kan me mour pwung ansou mwahu en kin kommwad duwehte laion, ni arail pahn kin lokaia ni Mware oh ni ar wia sounkadehde en Sapwellime priesthood.

Pil emen nei pwutak, lella ni eh kisin pwutak, kin ahniki kompoakapah tohto me kin men patehng. E kin mwadang en kompoakapahki aramas. Ni ei kapakap oh song en kilangada dahme e kak kihda ong wehin Koht, I pehm me e pahn ahniki manaman en kihpene aramas ni limpoak oh minimin.

Met kaweidiehlahng ire nan Doctrine and Covenants me kawehwe duwen doadoahk kan en elder kan en priesthood en kauwada Saion nan Missouri pahn kaping en tohnleng kan me kilang arail nantihieng oh arail doadoahk kan. Met anahne lapalahn meiroang. Kaudiahlo nan Doctrine and Covenants mahsanih me kitail kin kapaida pwehki atail kadehde me kitail kin kihda oh atail kadehde me kileldi nanleng pwe tohnleng kan en wadek ni keneinei; oh tohnleng kan kin popohl pwehki kumwail, oh dipatail kan mahklahr.⁴

Pohn nein nei pwutako dinapwo, I parada “Tohnleng Kan Kin Popohl Pwehki Kowe.”

Ahn nei pwutak menet koahiek laud en kihpene oh kaweidih aramas doula mwurin ah sounpar akan en sukuhl. Ni eh iang ienge tohn priesthood kan, e koasoanehdi kemwekid kan en stake me kihieng me pwulopwul kan nan ah wasa pwoson en dadaur oh pweida nan irair apwal akan. Ni eh kakairada pwoson rehn mwahnakapw oh peinakapw pwukat, e sewese kauwada kisin pwihn kan en towe kan en Saion nan kahnihmw kan en America. Nan me I paradao, I wiahda tohnleng kan pepeuk koronihda, me mwein sohte duwehtehte me tohnleng kin wia, ahpw parada koronihda mengeisang parada ngilen weriwerki popohl.

Tohnleng kan kin popohl ni kaun kan en priesthood nan sampah pwon ahr kin kauwada Saion nan arail ward kan, stake kan, oh misin kan. Oh irail pahn popohliki mwahnakapw oh peinakapw kan me ke kin sewese en kauwada Saion sohte lipilipil wasa me re mihie oh nan irair sohte lipilipil me re mih loale. Saion iei wahn aramas me miniminkipene inou kan oh limpoak. I lukeikumwail en sewese noumwail me pwulopwul kan en patehng.

Ong emen nei pwutak kan, I alehdi kapehm en parada ketipin—me iei, ketipin nan lahng—oh mahsen en Sapwellimen Sounkomouro Kasakaski Mehteikan: “Met Iei Mour Soutuk.” Karanih imwin Sapwellime mwein kalohk pohn sampah, Sounkomouro kapakapkihong Sahmo:

“Oh iet mour: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.

“I kasaledahr sapwellimomwi lingan nin sampah; oh I kaimwisekalahr doadoahk kan me komw ketin kilelehiong ie.”⁵

Nei pwutako kidahr papah en priesthood nan lepin sahpw lap siluh ahpw me keieu kesempwal wiawi nan pein imwe oh nan ah peneinei. Ah mour poahsoankihda irail. E kin doadoahk karanih nihmweo, oh kin kalapw pwurala patehng ah pwoud oh nah seri pwulopwul kan ni kommoal en souwas. Ah peneinei kousoan karanih Sister Eyring oh ngehi. Re kin apwalih likin imwato likamwete me pein arail. Pwutak menet kin momour kaidehnte pwehn warohng mour soutuk ahpw en pil mour kapilkipene poatoapoat towe kan en peneinei me kin kalahnganiki me e kin kihkihpene pwehn kapil ih.

Mour poatoapoat iei miniminpene, nan peneinei kan, rehn Sahmo, Naho, oh Ngehn Sarawi. Mour soutuk kin pweida ihte sang ni kih kan en priesthood en Koht, me kopwurupwurdo sang Soukohp Joseph Smith. Kangkangoangehki me pwulopwul me komw kin kaweidih en kasik oh doadoahklahng mour soutuk iei kisakis lap ehu me komw kak kihieng irail. Komw pahn wia met keieu sang ni karasaras nan pein ahmw peneinei. Mwein irail akan me komw kin kaweidih sohte ahniki peneinei nan Mwomwohdiso, ahpw I kapwukoahkinkumwail en sewese irail en kehn limpoak en peneinei ni pali kan koaros en irepen sampah oh lahng.

Kisin tuhke kan me I kawehwehda iei wiepe ehute en sewese me pwulopwul kan en kilangada wahu lapalap me Koht kin ketin mahsanihada rehrail oh arail mour ehu rahn oh soangen doadoahk tohrohr me E ketin kaunopongirailehr en kihda. E pahn seweseiuk en kilang duwen omw pahn wia met ong pein noumw serihkan de ong me pwulopwul teikan me komw kin kaweidih. Ahpw ni omw kapakapki oh rapahki en pein wehwehki dahme kohkohdo, oh en kalelehki aramas pwulopwulo ni ehuong emenemen, komw pahn esehda me Koht ketin mwangih oh poakohng emenemen Sapwellime serihkan nin duwen emenemen eh wia aramas tohrohr oh kin mahsanih kisakis lap oh tohrohr rehn emenemen irail.

Ni ahi wia pahpa men, I kapaida pwehn kilang mour kaselel kan me kohkohdo nan Wehin Koht ong nei serepein kan duwehte nei pwutak kan. Ni ahi rapahki kaweid ni kapakap, I kilangada ahl pwoat me nei serepein kan pahn kak weidla ie pwehn kasawiada likilik me Koht ketikihieng pohrail ni duwen sounpapah kan me kak kauwada Sapwellime wehi.

Ni ansou me nei serepein kan pwulopwul, I kilang me se kak sewese mehteikan en kehn limpoak en irail me mehlahr akan, nan dih tohto kan. I ese me limpoak kin kohdo sang doadoahk en papah oh kin kihda koapwoaroapwoarpen mour soutuk.

Eri se parada dinapw en wiahda pilawa me se kihieng lopwon en pilawa me se umwunda oh patpene kohla kihieng aht kisakiso rehn liohdi kan, olohdi kan, oh peneinei kan. Ire me I parada pohn ehuehu dinapw oko nda, “J’aime et J’espere,” lokaiahn France me iei “I kin limpoak oh I kin koapwoaroapwoar.” Lipwen arail kisakis tohrohr kan en pali ngehn pwarada kaidehn te pohn dinapw kan me I parada, ahpw ahpwete sansalla ni aht nehkohng irail akan me anahne, nan arail weirek de nsensuwed, iei kamehlelpen limpoak en Sounkomouro oh me Sapwellime Tomwo kak wahdo marain en koapwoaroapwoar unsek. Met iei mour soutuk, ong nei serepein kan, oh ong emenemen kitail.

A met, mwein kumwail medemedewe, “Brother Eyring, ke ndinda me I anahne esehla duwen parada tuhke?” Ei pasapeng me soh. I esehla periper ihte sang ni sawas en sounpadahk kadek oh mai, me ansouo iei Elder Boyd K. Packer. Kisin koahiek kan me I alehdi iei pwehki ah mai en periper oh ah wia sounpadahk kanengamah. Nanleng te me kak kihda sounpadahk duwehte President Packer. Ahpw mie wiepe tohto me kumwail kak en kaweidih mohngiong en seri mehnda ma kaidehn en parada neirail lepin dinapw.

Ni karasaras, mehn kair kapw kan mweidada ehukihieng mehteikan iren mahsen en pwoson oh koapwoaroapwoar en kotehla mwail kan me ireikitailpeseng, ansouohte oh ni pwei tikitik de sohte pweipwei. Ahi pwoud kin seweseie wia met. Se kin tepida sang ni lokaiahieng nan delepwohn nein nait kan serihkan oh nait kan me se kak koledi. Se kin peki irail en ehukihieng kiht soai kan en arail pweida kan oh arail doadoahk en papah me re kihdahr. Se pil kin luke irail en kadar kilel en kemwekid en rahno. Se kin doadoahngki kilel pwuko pwehn ntingihda kisin ire kei en mahsen. Se kin kapatahieng ire tikitik ehu de riau sang nan Pwuken Mormon. Mwein Nephi oh Mormon sohte pahn wiahki mehkot uwen mwahu en audepe kan me se koledihier de uwen tikitik en doadoahk me anahn pwe sen wiahda dahme se kahdaniki “Pwuken Ketemen en Peneinei: Kisin Pileit Kan.” Ahpw Sister Eyring oh ngehi kin kapaikihda kadoadoahko. Se kin pehm me se kamarainiki pilipil en ire kan en pwuhk sarawi oh ire mwotomwot kan en kadehde me se kin ntingihdi. Oh se kin kilang lipwe nan arail mour en mohngiongirail kan ahr kin sohpeidohng kiht oh ong Sounkomouro oh powe.

Mie pil ekei wiepe tohrohr en ehuong mehteikan; kumwail iangehr wia tohto. Amwail tiahk kan en kapakap en peneinei oh wadekpene pwuhk sarawi pahn wiahda mehn ketemen tengeteng oh wekideklahn mohngiong me ahpwete laudsang me kumwail ahniki met. Lella dene kemwekid kan me sohte pid pali ngehn, me rasehng towehda mwadong de kilang kasdo, kak mie lipwe ong mohngiong en seri. Dahme keieu kesempwal iei kaidehn kemwekido ahpw pepehm ko me kin kohdo ni omw kin wia. I diaradahr mehn kasosohng mwahu pwehn diarada kemwekid kan me kak wiahda wekidekla laud nan mour en me pwulopwul men. Iei me irail pahn pilada kemwekid ehu sang ni pein arail inangih wia pwehki ehu kisakis me Koht ketikihong irail. I ese me met kak pweida sang ni irair me I pein lelohng.

Ni ansou me I wiahla dihken ni sounpar eisek riau, I kin kousoan New Jersey, mwail limeisek (80 km) sang New York City. I kin ouramaniki wia soun iakiiuh ndand. Ahi pahpao pwungkihda weiehla kilang ehu siai nan wasahn mwadong mering oh ndand Yankee Stadium nan Bronx. I kak kilang lel met Joe DiMaggio eh poakihla home run nan wasahn mwohd kan inene center field ni ei pahpao eh mwomwohd limwahi, ansouo iei ihte ansou me se patpene kohla kilang mwadong en major league.

Ahpw ehu rahn tohrohr me I iang ahi pahpao uhdahn wekidala ahi mour kohkohlahte. E weiehla New Jersey ong imwen patriark me kasarawi nan Salt Lake City. I saik kilang ih pak ehu. Ei pahpao pwilikiniehdi ni wenihmwo. Patriarko kahreiehlahng ni sehr ehu, pwilikihdi peh kan pohn moangeie, oh pakairki kapai ehu ni duwen kisakis ehu sang Koht me iangahki pakairpen ineng laud en mohngiongi.

E nda me ngehi emen irail me wia kisehn lepin mahseno, “Meid pai me kin wia doadoahk en kamwahu nanpwungen aramas akan.”⁶ Uwen ei pwuriamweiki aramas me I sehse douluhl eh kakete ese audepen mohngiongi me I duwarpeseng pwehn kilang pereo, wasa me irair kapwuriamwei wet wihwiawi loale. Kapai wo en ese dahme kak pweida rehi kin sewese ahi mour, ahi mour en pwopwoud, oh ahi doadoahk en priesthood.

Sang irair wo oh dahme wiawihier mwuri, I kak kadehdehki me kisakis koaros sohte kin kohieng aramas koaros; pwe mie kisakis tohto, oh aramas koaros kin alehdi kisakis ehu sang Ngehn en Koht.⁷

Sang ni Kauno eh ketin kapwarehiong ie kisakis ieu, I kin kak kasawiada oh kaunopohng ansou mwahu en doadoahngki pwehn kapaiada irail akan me I poakohng oh kin papah.

Koht ketin mwahngih atail kisakis kan. I men kangoange kumwail oh pil pein ngehi en kapakapiki en ese kisakis kan me kohiengkitailehr, en ese duwen kakairada, oh en kasawiada ansou mwahu kan en papah mehteikan me Koht kin ketikihong kitail. Ahpw pohnangin mehkoaros, I kapakapiki me kumwail pahn kamarainda en sewese mehteikan en diarada pein arail kisakis tohrohr kan sang Koht en wia doadoahk en papah.

I inoukihieng kumwail me ma kumwail pahn peki, kumwail pahn kapaida pwehn sewesehda mehteikan en pweida uwen arail kak nan ar doadoahk en papah irail akan me irail kin kaweidih oh poakohng. I kadehde ong kumwail me Koht ketin ieias, Sises iei Krais, met iei priesthood en Koht, me kitail kolokol, oh Koht kaunopkinkitailehr kisakis tohrohr kan en papah Ih dauliala uwen me kitail kin kasik. Ni mwaren Sises Krais, ahmen.