Ak Medengelii. A Kultirakl er Ngii. Ng Soak.

Mla er a Ann M. Dibb

Ongeru el Counselor er a Cherrengelel Omerreder er a Young Women


Kid a oltirakl er a Osobeled, el Jesus Kristo. Tial bult ma klaumerang a olchotel a blakelreng ma meringel el ureor. Ng teletael er a dersta el chad. Ng teletael er a chelsel a klengar.

Ak melchesuar a reng er a ungil okesiu er a remelmalt el chedal a Ikelesia, luldimukl er a rengellitel el ngeasek. Kemiu a meral bekeu lomes el bedul a Osobel. Ko blak a rengmiu, bekongesenges, e klikiid. A klengeltengat el mngai er a ungil omerelliu a diak dil ngar er ngii a le rellii er a klengar kemiu ng dirrek el klengar ngak ma klengar er a rebetok el chad el mesisiich e blechoel el diak dodengelii el teletael.

Sesei el rak er a memong, eak mlara stouang lomechar a klalo. A mla er medak a ngeasek el dil, locha teruich ma elolem a rekil. Ng uaia le kora mle ansing e ungil a rengul. Ak milsa chelchedal a bilel e dikea el sebechek loserchii a renguk e mocha okere er ngii. A kulemuchel, “Kau a chad er a ta er a beluu, ng uaisei?”

Ng mlo mechas a rengul er a kerik e dula el kmo, “Oi, Ng uaisei. Ak chad er a Colorado. Ke mekera medengei?”

Ak dulang, “Ng tial chelchedal a bilem.”Ng mlo klemerang a uldesuek ruriul er a kunguiu a tekoi el llechukl er a bilel el kmo “Ngak a Mormon. E kau?”

Ak millemolem, “Ng soak el subedau el kmo ng mechas a renguk el msal ansing er kau le kengodech e oubail er tial kmal kora bleketakl el tekoi. Ak mesa sel ngii a ngodech er kau, e oureng ma rebek el ngeasek el redil ma bek el chedal a Ikelesia a mo oba osisiu el klaumerang ma kleansing el mobang.” Uriul er a ki bo merek er a stouang, ea ki mle kasmesumech e mo kebii.

Eng di ng mlo melai a klebesei ma buil ruriul er tial teletael, el kmeringel el melbedebek er tiaikid el sils. Ak melbedebek el kmo ng mekra ngika el ngeasek el dil er a Colorado e nguu tial kmal blekebek el teletelel el chedal a Ikelesia er a Jesus Kristo er a Uirul-klebesei el Santo. Ak mlo tmaut lomdasu a kora ungil a belkul tekoi el sebechek el llemuches er a chelchedal a bilek el ngii olchotel a klechelid ma klaumerang er ngak. Ng mlei er a uldesuek, a betok el lomelekoi. E sola, mocha mdesuar a tekoi el soak a le bora bilek: “Ngak a Mormon. Ak Medengelii. A kultirakl er ngii. Ng soak.”

Chelechal sils eng soak a cheldechedechak a lultuil er tiaikid, el tekoi.

A kot el tekoi a sel klaumerang er kid, el diak de kora merur el kirel el kmo: “Ngak a Mormon.” El uai ngkel ngeasek el dil el kilsa er a stouang el diak el medakt lochotii er a beluulechad el kmo ng chedal a Ikelesia er a Jesus Kristo er a Uriul-klebesei el Santo, ea kuureng er kid me lak bo demedakt malechub e debekikl el ouchais el kmo, “Ngak a Mormon.” Ng kired el ansing er kid, el uaia Apostol Paulus er a ledu el kmo, “Le ngak a diak merur er a ebangkelio er a Kristo: ele tiaikid a klisichel a Dios el kirel a mo suobel el mora rokui el loumerang.”1 Me kid el chedal a ikelesia a oltirakl er a Osobel, el Jesus Kristo. Tial bult ma klaumerang a olchotel a blakelreng ma duchelreng. Ngara dertsa el chad. Ng teletael ra chelsel a klengar.

A ongeru er tial tekoi a kmo, “Ak medengelii.” A beluulechad er chelechal sils, a betok a teletael er a omeruul, tekoi, ma kakerous el soad el kaiuechit a temed er a bek el bung er a klok. Ma ikal betok el olibesongel, e ngarngii a klisiched, omerelled, ma blakelreng er kid el melemolem er a ikel tekoi el meklou a belkul? Kid kede ungil medengei a klemerang er a ebangkelio el uaia subeled er a skuul, urered, soad el meruul, malechub a text ma tweets el doruul? Kede blak a rengud losiik a nger er a kerid lokiu a omesubed er a chedaol llechukl ma osischeklir a reprofet? Kede osiik er a odbechel Chedaol reng?

A kloul el belkul omesubel a llomes a diak a ulebengelel osisechakl. A Profet Joseph Smith a “mle soal a llomes el kirel a melemalt el klisichel.”2 Ng dilu el kmo: “A llomes a klou a belkul er a klengar ma kldios. … Morrenges, kemiu el rokiu el odam, tial kiis: a llomes a klisichel a Dios el kirel a mo suobel.”3

A rokui el klemerang ma llomes a meklou a belkul,eng di a olibesongel er a bek el sils, eng kired el kmal mo ungil omtab e melisiich er a llomes er kid er a ebangkelio meng sebeched el mo medengei el kmo ng mekera doltirakl aikal osisechakl er a ebangkelio er a klengar kid.4 Sel lorael mo mesisiich a klemedengei er kid er a ebangkelio, e kid a mo ansing er a klaumera er kid e sebeched el kmo, “Ak Medengelii.”

A ongingil a sel tekoi el kmo “A kultirakl er ngii.” A chedaol llechukl olisechakl el kmo ng kired el mora “omerellel a tekoi, e diak di dorrenges el merekong.”5Kede oltirakl er a ebangkelio e mora “omerellel a tekoi” lokiu a klaumerang er kid, e olngesenges, e ungil mesiou er a rebebil, e oltirakl er a okesiul Osobel. Kede oba llemalt e meruul aikel dodengei el ungil “er a rokui el taem ma rokui el tekoi, er a rokui el basio”6el diak el iior er a kmong techa omes ma lak lomes.

Chelsel tial klengar kid, eng diak a ta er kid el cherrungel. Uldimukl sel blak a rengud el loltirakl er a ebangkelio, e kid el rokui a di mo ruebet er a chelbirukel, e kid el rokui el ruebet er a klengit. Ng klou el ongelaod el tekoi sel dodengei el kmo ngokiu a tngakireng er a Osobel, eng sebeched el mo mousubes e lmuut el mo beches. Tial teletael er a meral ouchel reng ma klausubes a smisichii a klaumerang ma blakelreng er kid el mo olngesenges a llechul a Dios e kiei el oltirakl a llach er a ebangkelio.

Sel kumtab er a tekoi el, “A kultirakl er ngii,” eng mekletkak er a tal ngeasek el dil el Karigan a ngklel. Ng milluches: “Ak mla chedal a Ikelesia el telkib lengelakl er a tal rak. … A denguu er ngak, e sera kusuub, ea tal mle olchotel a kmo tial Ikelesia a klemerang a mlei ele ngak el mlo omelchesiu el mla metik er a ikelesia el olisechakl a klikiid ma ngarbab el llach. Ak mla mes er a medak a mla duubech el mora rechad sel lak loltirakl a llach e lolilt er a ngodech el rael. Ak tilbir er a renguk, er a ngara mong, el mo oltirakl a ngarbab el llach. … Ak kmal omelchesiu er ngak el ngeltengat el mla metik er a klemerang e mla metecholb. Ng kmal ungil a renguk.”7

Sel ulebongel el tekoi er tial tekingek a kmo “Ng soak.” Sel dengai a llomes er a ebangkelio er a Jesus Kristo e le blak a rengud el oltirakl osisechakl er a ebangkelio er a bek el sils eng mekrolterir a rebetok el chedal a Ikelesia el mesisiich a ngerir el kmul kmo, “Ng soak a ebangkelio!”

Tial dolchesuar a mei lokiu a sioning er a Chedaol reng el mei er kid el kmo kid a ngelekel a Chedam er a Babeluades, e Ngii a melatk el kired, e kid a ngara melemalt el rael. A beltkil a rengud er a ebangkelio a mo mesisiich sel bo domelchesiu er a beltikelreng er a Chedam er a Babeluades me sel budech el bla le yaksok er ngii Osobel sel dochotii er Ngii el kmo ngarngii er a rengud a mo olngesenges e oltirakl er Ngii.

Ngarngii a taem er a klengar kid, a dirk dulebult malechub e kede meketeketang el chedal a Ikelesia, e kede mo metik el kmo tial mesisiich el klemeriar reng a uaia le dikeang. Bebil er a taem e tia duubech er a chelsel a meringel el taem meng kirel mo klou a rengud. Ea lebebil er a taem eng duubech er sel kmal kora ungil besud el betok a ngera er kid. Sel bo kumelchesiu er ngak el uaisei, eak medengei el kmo ng kirek el kuk sumechokl a moktek er ngak e melisiich a klemedengei er ngak er a ebangkelio e mo mui el oltirakl a osisechakl er a ebangkelio er a klengar ngak.

A ta er a kot el bedochel eng di lebebil er a taem eng meringel el osisechakl er a ebangkelio a ngariou el reng ma osiik er a soal a Dios. Sel nglunguchel Osobel er a Sers er a Gethsemane, e Ngii a ulechotii er a Chedam el kmo, “Ng diak el sel soak, ng sel soam bol mekedmokl.”8Tia kirel dirrek el mo nglunguched. Ng blechoel, chelsel aikaikid el chelellakl, el taem er a nglunguuch e kede melchesuar a beltikelreng er a Chedam er a Babeluades, ea ikel deureng, ma beltikelreng a deluut el mo omelchesiu.

Se er a kngara miting er a roungerachel er a Young Women er a Eugene, Oregon, eng mla er ngii a techellek el kebetech e mengedecheduch er a Sister Cammy Wilberger. A cheldecheduch el Sister Wilberger a ulechais er ngii er ngak a olchotel a klisichel ma klengeltengat er a chimol ngeasek el dil el ngii a medengei, oltirakl, e soal a ebangkelio.

A teruich ma etiu a rekil redil el ngelekel a Sister Wilberger, er a Brooke, a mlad er a kmong tela el rak er a memong er a taem er a ulengull er a skuul er a kot el rak er ngii er a daingak. A Sister Wilberger a dilung, “Ng mle meringel e klou el klengitelreng er a telungalek er kemam. Eng di, a Brooke a mla meskemam a klou el sengk. Ng dimlak ki mesa tiang er a lorael me klou, eng di a bek el rak er a klengar ngii, ea Brooke a mla meskemam a kot el ngarbab el sengk el ngalek a sebechel msa rechad er a blil. A Brooke a mle melemalt el ngelekel a Dios el redil. … E tiaikid el sengk me sel klisichel a Tngakireng a uchul, e nga er ngii a klisichek, ongelaod, ma budech er a Osobel. Ng diak a kerik el kmo a Brooke ngar ker e mad el dmuil el mo er sel sils el ki mluut el mo dmak.”9

Ngarngii a klaumera er ngak er a uldesuel a Chedam er a Babeluades el kirel a deureng. Ak medengei el kmo Ngii a medengelkid e betik a rengul er kid. Ak medengei el kmo Ngii a mla odureklii a profet, el President Thomas S. Monson, el melisiich er kid e omekrael er kid el muut el mo er Ngii. Nglunguchek ma dersta er kid bol blak a rengud el ansing er kid el kmo, “Ak Mormon. Ak medengelii. A kultirakl er ngii. Ng soak.” Aika kdung el ngara ngklel a Jesus Kristo, amen.

Uleklatk:A lmuut el bebil er a omesubel, ea kulengit me bo monguiu er a Alma 32ma cheldechedechal a Elder Dallin H. Oaks, “The Challenge to Become” (Liahona, ,Jan. 2001, 40–43;Ensign, Nov. 2000, 32–34).

Show References

  1.  

    1.  Rom 1:16.

  2.  

    2. George Q. Cannon, er a Teachings of Presidents of the Church: Joseph Smith (2007), 261.

  3.  

    3.  Teachings: Joseph Smith, 265; dirrek el mesa Martha Jane Knowlton Coray, notebook, Church History Library, Salt Lake City.

  4.  

    4. Dirrek el mesa llomes er sel omeruul el lambang er ngii a 1, Young Women Personal Progress (booklet, 2009), 38.

  5.  

    5.  Jakobus 1:22.

  6.  

    6.  Mosiah 18:9.

  7.  

    7. Di cheldecheduch.

  8.  

    8.  Lukas 22:42.

  9.  

    9. Di cheldecheduch.