2010–2019
Ol Samting we Yumi Rigret From Mo Ol Samting we Yumi Disaed blong Mekem
Oktoba 2012


Ol Samting we Yumi Rigret From Mo Ol Samting we Yumi Disaed blong Mekem

Moa yumi givim taem blong lukaotem samting we i tabu mo mekem yumi hapi, moa bae yumi no gat tumas rigret long rod blong yumi.

Long Saed blong Ol Samting we Yumi Rigret From

Presiden Monson, mifala i lavem yu. Tankyu long anaonsmen we i kam tru long insperesen olsem wan histri long saed blong ol niu tempol blong bildim mo misinari seves. From ol samting ia, mi sua se yumi, mo tu, plante jeneresen blong fiuja bae i kasem ol bigfala blesing.

Ol dia brata mo sista blong mi, ol dia fren blong mi! Yumi evriwan bae i ded. Mi hop se hemia i no kam olsem wan sapraes long eniwan.

I no gat wan long yumi bae i stap long wol ia blong longtaem. Yumi gat wan gud namba blong ol impoten yia we, wetem lukluk we yumi gat blong taem we i no save finis, hem i pas kwiktaem nomo.

Mo afta, yumi aot. Spirit blong yumi “i gobak long God we i bin givim laef long [yumi].” 1Yumi putum bodi blong yumi i ledaon i stap, mo livim biaen ol samting blong wol ia, taem yumi muv i go long nekis pat blong laef blong yumi.

Taem yumi yangfala, i luk olsem se bae yumi laef blong oltaem. Yumi ting se bae i gat fulap taem we san i girap mo stap wet biaen long solwota, mo long yumi, fiuja i luk olsem wan rod we i no stop, we i gohed gogo i no gat en long fored blong yumi.

Be, taem yumi kam moa olfala, yumi stap lukluk moa i gobak, mo sapraes blong luk se rod ia, i sot nomo. Yumi askem yumiwan se olsem wanem nao ol yia oli pas kwiktaem. Mo yumi stat blong tingbaot ol joes we yumi mekem mo ol samting we yumi bin mekem. Long ol taem ia, yumi tingbaot plante naesfala taem we i givim gud filing long sol blong yumi, mo glad long hat blong yumi. Be tu, yumi tingbaot ol samting we yumi sore from—ol samting we yumi wantem blong gobak mo jenisim.

Wan nes we i stap lukaotem ol sikman we bae oli ded i no longtaem, plante taem, i bin askem wan simpol kwestin long ol sikman blong hem, taem oli stap rere blong aot long laef ia.

Bae hem i askem: “Yu yu gat eni samting we yu rigret?”2

Taem yumi stap kam klosap long las dei blong laef long wol ia, plante taem, i givim klia tingting mo i givim niu tingting mo niu wei blong luk samting. Mekem se, taem ol pipol ia oli harem kwestin ia abaot wanem nao oli rigret, oli openem hat blong olgeta. Oli tingting long wanem bae oli jenisim sapos nomo, oli save mekem klok i gobak biaen.

Taem mi tingting long wanem oli bin talem, tingting i kasem mi se ol stamba prinsipol blong gospel blong Jisas Kraes, oli save jenisim rod blong laef blong yumi blong mekem gud, be nomo sapos yumi yusum olgeta prinsipol ia.

I no gat samting i defren abaot ol prinsipol blong gospel. Yumi bin stadi long olgeta insaed ol skripja, yumi bin toktok raon long olgeta long Sandei Skul, mo plante taem yumi harem oli tokbaot antap long pulpit. Ol tabu prinsipol mo valiu ia, oli stret nomo mo oli klia; oli naes, oli dip, mo i gat paoa long olgeta; oli save helpem yumi bigwan blong stap longwe long ol samting we bae i mekem yumi sore from long fiuja.

Sapos Nomo Mi Bin Spendem Moa Taem Wetem Ol Pipol we Mi Lavem

Ating, raon long wol, wan samting we olgeta sikman we oli stap rere blong ded oli talem hem i we, sapos nomo oli bin spendem moa taem wetem ol pipol we oli lavem.

Ol man speseli, oli komplen semmak nomo raon long wol: oli “rigret bigwan from se oli spendem tumas taem blong laef blong olgeta long ol wokples blong olgeta.”3Plante oli mestem ol gudfala memori blong spendem taem wetem famle mo ol fren. Oli mestem janis blong developem wan strong rilesen wetem olgeta we i impoten moa long olgeta.

Hem i tru o no, se plante taem yumi stap bisi? Mo, sore blong talem, yumi stap werem fasin blong yumi blong stap bisi, olsem wan baj blong ona, mo ting se blong stap bisi, i wan samting we yumi winim, o wan saen blong wan laef we i moa hae.

I tru?

Mi tingting long Lod mo eksampol blong yumi, Jisas Kraes, mo sot laef blong Hem long medel blong ol pipol long Galili mo Jerusalem. Mi bin traem blong pikjarem Hem we i stap bisi bitwin ol miting mo plante defren wok blong finisim wan lis blong ol impoten samting blong mekem.

Mi no save luk hemia.

Be, mi stap luk Pikinini blong God we i gat lav mo sore, mo i kea, i laef long wan laef folem wan stamba tingting evri dei. Taem Hem i stap go wetem olgeta raon long Hem, oli bin filim se oli impoten mo Hem i lavem olgeta. Hem i bin save bigfala praes blong ol pipol we Hem i mitim. Hem i bin blesem olgeta, tijim olgeta. Hem i bin leftemap tingting blong olgeta, hilim olgeta. Hem i bin givim bigfala presen ia long olgeta, we i taem blong Hem.

Long dei blong yumi tedei, hem i isi blong stap priten nomo blong spendem taem wetem ol narawan. Wetem wan klik long kompiuta, yumi “konektem” yumi wetem taosen blong ol “fren” we yumi no nid blong luk fes blong eniwan long olgeta. Teknoloji i wan gudfala samting, mo hem i gud ia nao taem yumi no save stap klosap long olgeta we yumi lavem. Waef blong mi mo mi, i stap longlongwe long ol spesel memba blong famle; yumi save hemia i olsem wanem. Be, mi biliv se yumi no stap go folem wan rod we i stret, olsem wanwan man mo woman, mo olsem wan sosaeti, taem yumi stap konek wetem ol famle mo ol fren plante taem tru nomo ol fani pikja, sendem ol samting we i no impoten, o sendem ol adres blong ol intanet websaet long olgeta we yumi lavem. Mi ting se i gat wan ples blong kaen aktiviti ia, be hamas taem nao yumi glad blong spendem long hem? Sapos yumi no givim bes taem blong yumiwan mo plante moa taem long olgeta we oli impoten tumas long yumi, wan dei, bae yumi rigret.

Bambae yumi mekem tingting blong lukaotem gud olgeta we yumi lavem, taem yumi spendem sam taem we i gat mining wetem olgeta, mekem samting tugeta, mo stap gat ol gudfala memori.

Sapos Nomo Mi Bin Yusum Ful Paoa blong Mi

Wan nara filing blong rigret, we oli stap talem, i we oli no kam kaen man o woman ia we oli filim se oli sapos blong kam. Taem oli lukbak long laef blong olgeta, oli luksave se oli neva yusum ful paoa blong olgeta, mekem se i gat fulap samting yet i stap blong mekem.

Mi no stap tokbaot long ples ia fasin blong klaem lada blong sakses long ol defren wok blong yumi. Lada ia, nomata i hae olsem wanem long wol ia, i no kasem nating wan singgel step long longfala rod blong laef we i no save finis we i stap wet long yumi.

Be, mi stap tokbaot blong kam kaen man o woman we God, Papa blong yumi long Heven, i wantem yumi blong kam.

Yumi kam long wol ia, olsem man we i raetem poem i talem, “wetem sam fasin blong glori” 4 we i kam long laef bifo laef long wol ia.

Papa blong yumi long Heven i luk ril paoa blong yumi. Hem i save ol samting abaot yumi we yumi no save yumiwan. Hem i pusum yumi, long laef blong yumi, blong kasem mak blong kriesen blong yumi, blong gat wan gud laef, mo gobak long ples we Hem i stap long hem.

Nao, from wanem yumi givim tumas taem mo paoa blong mekem ol samting we oli stap blong smol taem, oli no impoten tumas, mo oli emti nomo? Yumi no wantem stap luk se i krangke wok blong stap go from ol kaen samting ia?

Bae i no wan moa waes tingting blong stap “hivimap ol rij samting blong yumi long heven, long ples we krakrus i no kakae mo rosta i no spolem samting, mo ples we ol stilman oli no kam blong stil?”5

Olsem wanem nao yumi mekem olgeta samting ia? Taem yumi folem eksampol blong Sevya blong yumi, yusum ol tijing blong Hem insaed long laef blong yumi evri dei, taem yumi lavem God mo ol narafala man wetem tru fasin.

I tru, bae yumi no save mekem hemia sapos yumi wokbaot sloslo, sapos yumi stap lukluk hanwaj blong yumi oltaem, mo stap komplen oltaem long wok blong stap wan disaepol.

Taem i kam blong laef folem gospel, yumi no mas stap olsem boe ia we i mekem ol fingga blong leg blong hem nomo i tajem wota, mo afta, i talem se hem i go swim. Yumi, olsem ol boe mo gel blong Papa long Heven, yumi save mekem plante moa long hemia. Blong mekem hemia, ol gud tingting i no inaf. Yumi masmekem samting. Moa impoten long hemia, yumi maskamwanem we Papa long Heven i wantem yumi blong kam.

Blong talemaot testemoni blong yumi long saed blong gospel, i gud; be blong stap wan eksampol we i laef folem gospel ia we i kambak, i moa gud yet. Blong stap wantem nomo blong stap fetful long ol kavenan blong yumi, i gud; be blong stap fetful long ol tabu kavenan—we i blong laef long klin fasin, pem ol taeting mo ofring, obei long Tok blong Waes, mo givhan long olgeta we oli stap long nid—i moa gud yet. Blong talem nomo se bambae yumi givim moa taem long famle prea, skripja stadi, mo gud famle aktiviti, i gud; be blong mekem evri samting ia, evri taem, bae i tekem ol blesing blong heven oli kam long laef blong yumi.

Fasin blong stap wan disaepol, i blong lukaotem fasin blong stap tabu mo stap hapi. Hem i rod blong mekem bes blong yumi mo stap hapi insaed.

Bae yumi mas mekem tingting blong folem Sevya mo wok strong wetem strong tingting blong kam man o woman ia we Hem i wantem yumi blong kam. Bae yumi lisin mo obei long ol toktok blong Tabu Spirit. Taem yumi mekem hemia, Papa long Heven bae i talemaot long yumi, ol samting we yumi neva save abaot yumiwan. Bae hem i saenem rod long fored mo i openem ol ae blong yumi blong luk ol talen we yumi no luk mo yumi neva ting se yumi gat.

Moa yumi givim taem blong lukaotem samting we i tabu mo mekem yumi hapi, moa bae yumi no gat tumas samting blong rigret from long rod blong yumi. Moa yumi dipen long gladhat blong Sevya, moa bae yumi filim se yumi stap long rod ia we Papa blong yumi long Heven i putum blong yumi.

Sapos Nomo, Miwan, Mi Bin Letem blong Mi Stap Moa Hapi

Wan nara samting we olgeta we oli save se bae oli ded oli stap rigret long hem, i defren smol. Oli talem se sapos nomo oli bin letem olgeta blong stap moa hapi.

Plante taem, yumi fas long giaman tingting ia se, i gat wan samting we yumi save mekem we bae i mekem yumi hapi—wan hapi famle situesen, wan moa gud bajet, o en blong wan bigfala tes.

Moa yumi kam olfala, moa yumi lukbak mo luksave se ol situesen aotsaed oli no impoten tumas o mekem se yumi hapi.

Hem iyuminao.Yumimekem se yumi hapi.

Yu mo mi, antap long evri samting, hapines blong yumitu i stap long han blong yumitu.

Waef blong mi, Hariet, mo mi, i laekem blong ron long baeskel. Hem i gud blong go aot mo lukluk ol naes ples raon. Mitufala i gat sam rod we mitufala i laekem blong folem, be mitufala i no wari tumas se mifala i ron i go longwe moa, o mifala i spid bitim ol narafala man we i ron long baeskel.

Be, samtaem, mi ting se i gud blong yumi kompit smol moa. Mi stap ting tu se yumi save gat wan taem we i moa gud, o ron spid moa sapos nomo yumi pusum yumiwan smol moa i go. Mo afta samtaem, mi stap mekem bigfala mistek ia blong tokbaot hemia long gudfala waef blong mi.

Toktok blong hem from samting ia, oltaem i kaen, i klia, mo i stret wantaem. Bae hem i smael, mo talem, “Dita, hemia i no wan resis; i wan wokbaot. Stap glad long taem ia we yumitu gat naoia.”

Hem i talem stret gud!

Samtaem, long laef, yumi kam blong lukluk nomo long en blong laen blong resis, mekem se yumi nomo tingting blong faenem glad long rod. Mi no go ron long baeskel wetem waef blong mi from se mi wantem blong kasem en kwiktaem. Mi go, from eksperiens ia blong stap wetem hem, i swit mo mi laekem tumas.

Yu luk se i wan krangke wok blong spolem ol swit mo gud eksperiens from se nomo, oltaem, yumi stap tingting nomo se taem ia bae i finis wetaem?

Yumi stap lisin long naes miusik mo wet long en blong singsing bifo yumi letem yumi glad long miusik ia? No. Yumi lisin mo joenem ol defren pat blong miusik, spid, mo tiun long ful singsing.

Yumi talem prea blong yumi from nomo yumi tingting long “amen” we bae i kam long en blong hem? No, i no olsem. Yumi prea blong stap kolosap long Papa long Heven, blong kasem Spirit blong Hem mo filim lav blong Hem.

Yumi no mas wet blong stap hapi kasem taem yumi kasem sam poen long fiuja, blong faenem nomo se hapines i bin stap finis—evri taem! Laef i no blong yumi stap glad long hem nomo taem yumi lukbak. “Hemia i dei we Lod i bin mekem … ,” man blong raetem Ol Sam i bin raetem. “Stap glad mo stap hapi long laef ia.”6

Ol brata mo sista. Nomata wanem situesen blong yumi, nomata wanem jalenj o tes blong yumi, i gat wan samting long evri dei blong mekem mo stap glad from. I gat wan samting long evri dei we i save mekem yumi talem tangkyu mo gat glad, sapos nomo, yumi luk mo stap glad long hem.

Ating i gud moa sapos yumi no stap lukluk long ae blong yumi nomo, be moa wetem hat blong yumi. Mi lavem kwot ia: “Wan i lukluk klia nomo wetem hat blong hem. Eni samting we i impoten, ae i no save luk.”7

Yumi kasem komanmen blong “Talem tangkyu long saed blong evri samting.”8So olsem wanem? I gud moa blong luk wetem ol ae mo hat blong yumi ol smol samting we yumi save talem tangkyu from, be i no blong mekem ol nogud samting blong laef i kam bigwan moa?

Lod i promesem, se wan man we i akseptem evri samting wetem fasin blong talem tangkyu, bambae i mekem hem i gat glori; mo ol samting blong wol ia, bambae i ademap long hem, we i wan handred taem.9

Ol brata mo sista. Wetem ol bigfala blesing blong Papa blong yumi long Heven, gudfala plan blong Hem blong fasin blong sevem man, ol bigfala trutok blong gospel we i kambak, mo plante naes samting blong rod blong laef ia, “ol samting ia i no mekem yumi glad?” 10

Bae yumi mekem tingting ia blong stap hapi, nomata situesen blong yumi.

Long Saed blong Ol Samting we Yumi Disaed blong Mekem

Wan dei, bae yumi mekem step ia we yumi no save ronwe long hem, mo krosem wol ia i go long nekis wol. Wan dei, bae yumi lukbak long laef blong yumi, mo askem yumiwan sapos yumi bin save mekem i gud moa, save mekem ol desisen we i gud moa, o yusum taem blong yumi wetem moa waes.

Blong stap longwe long ol bigfala samting we bae yumi rigret long laef, bae yumi waes blong mekem sam tingting tedei. From hemia,:

  • Yumi mekem desisen blong spendem moa taem wetem olgeta we yumi lavem.

  • Yumi mekem desisen blong traehad moa blong kam kaen man o woman ia we God i wantem yumi blong kam. Yumi mekem desisen blong faenem glad nomata wanem jalenj yumi stap fesem.

  • Yumi mekem desisen blong lukaotem fasin blong stap hapi, nomata situesen blong yumi.

Hem i testemoni blong mi, se plante long ol bigfala samting we bae yumi save rigret long olgeta tumoro, bae yumi save blokem taem yumi folem Sevya tedei. Sapos yumi bin sin o mekem ol mistek—sapos yumi bin mekem ol joes we naoia, yumi stap rigret from—i gat bigfala presen blong Atonmen blong Kraes i stap; tru long hem, yumi save kasem fogivnes. Yumi no save gobak long taem mo jenisim samting we i pas, be yumi save sakem sin. Sevya i save karemaot ol krae blong ol samting we yumi rigret from11 mo tekemaot ol hevi sin long yumi. 12 Atonmen blong Hem i letem yumi blong lego laef we i pas i stap biaen mo muv fored wetem ol klin han, wan klin hat,13 mo wan strong tingting blong mekem gud moa mo kam gud moa.

Yes, laef ia i pas kwiktaem nomo; dei blong yumi i go lus kwik; mo ded i kamaot, we yumi fraet long hem samtaem. Be, spirit blong yumi bae i gohed blong stap laef, mo bae wan dei, i joen wetem bodi blong yumi we i laef bakegen blong kasem glori ia blong nomo save ded. Mi testifae se from Kraes ia we i gat sore, bae yumi evriwan i laef bakegen mo hem i blong oltaem. From Sevya mo Ridima blong yumi, wan dei, bae yumi andastanem fulwan mo stap glad long mining blong ol toktok ia: “harem nogud blong ded i lus long Kraes.”14

Rod we i go blong yumi mekem tabu fiuja blong yumi i hapen olsem ol boe mo gel blong God, i blong taem we i no save finis. Ol dia brata mo sista blong mi mo ol dia fren. Yumi mas stat blong wokbaot long rod ia we i no save finistedei; yumi no save tingting nating long wan dei ia we i stap pas. Mi prea se bae yumi no wet kasem taem yumi rere blong ded blong lanem blong laef fulwan. Long tabu nem blong Jisas Kraes, amen.