Kirel a Ouchel me a Telbiil

Mla er a President Dieter F. Uchtdorf

Ongeru el Counselor er a First Presidency


Sel bek el dechoit a temed el kirel a klikiid me a deureng, eng diak el sal mo sebeched el mo ngar sel rael er a ouchel.

Kirel a Ouchel

President Monson, ng betik a rengmam er kau. Ke kmal mesaul er a ulekrael me a mora reksi el chais el kirel okedecherul a beches el templo me a mo mesiou el mesionari. A ikaia uchul, e ak medengei el ungil klengeltengat a merkid me a merael mei el telecheroll.

Betik er a renguk el rodam me a rodos, kemiu el sechelik! Kede rokui el di chad. A kuureng me tia diak el kibetiekl er ngii a rebebil er kid.

Ng diak a ta er kid el mo ngar tial beluulechad el mo meketeket. Kede mla ngmai a mekreos el rak er kid er tial beluulechad, el denguu er ngii, lomes er a diak a ulebengelel, ng diak el ua kelteketel sel lobusech a medad.

E sola mo merael. Ea delbenged “a mengai el mo er a Dios el milskid a klengar.”1 Kede mechei a bedenged er a debull e mechei a kloklel tial beluulechad e kuk mo omakes el mo er a tara dauch er a klengar.

Sel de mekekerei, eng uaia di dechad el mo cherechar. Kede omdasu el kmo ngdi ngarngii a ngesechel a sils el di ngara bital eanged, ea ngar medad el klebesei a diua domes ra rael el diak a telemellel el blerk el diak a ulebengelel er ngar medad.

Eng di, sel dorael mo uodel, e kede blechoel lomes ra ngaramong e mechas a rengud er a kldebengel a rael. Kede melebedebek er a ikal rak el meral mle mereched. E mocha omuchel lomdasu a dullilt me a tekoi el de riruul. Me tiang, e kede mo dobedebek a betok el ungil taem el rullid el mo ungil a rengud. Eng di kede dirrek el mo dobedebek a douchel el tekoi—aikel tekoi el doureng el lmuut el mo ngmodech.

A nurs el omekerreu er a chad el metkung a melekoi el kmo ng blechoel loker ra kmal beot el ker el mo er a tirkal smecher sel longedmokl er tir el mo soiseb er sel kuk ta er a klengar.

“Ngar ngii om kora ouchel kirel?” ngoker.2

Sel de sal kmeda er a ulebongel a sils er a klechad eng blechoel meskid a bleketakl el uldasu me a klemedengei. Me tirka el chad se ra loker a louchel tekoi, e te ulebok a rengrir louchais.Te ulemdasu a ikel sorir el mo melodech alsekum eng sebecherir el muut el mong.

Sera kumdasu a ikal blal dung, e ak mlo mechas a renguk el kmo a ikal dodai er a osisechakl er a ebangkelio er a Jesus Kristo a sebechel ngar ngii a le ngedechii er a rolel a klengar er kid, alsekum e kede ousbech.

Ng diak a ongasireng er a ikal osisechakl er a ebangkelio. Kede mla suub er a chedaol llechukl, e mla mesaod er a Sandei Skuul, e mla remenges er a miting er a ikelesia el betok el taem. A ikal chedaol osisechakl me a omeruul a bleketakl; e klebokel, e dmolech, e mesisiich; e kmal sebechel ngosukid el imiu er a ikel bo douchel er a ngarmedad.

Ulekum Ak Chiloit a Betok el Temek el obengterir a Rebetik er a Renguk

Sel locha kot el blechoel louchel er ngii a rsmecher el metkung el chad a ouchais el kmo te oureng ulekum e te chiloit a betok el taem lobengterir a re betik er a rengrir.

A rsechal a blechoel el mesaod er tial kngtil a rengrir: te “kmal ouchel el chiloit a betok el temir er a [bek el sils] er a … urerir.”3 Ng betok a mla metom er a ungil techall el bo lolbedebek el mengai er a cheloit el taem lobengtetir a telungalek ma resechelei. Te metom er a ulekerulel a dmolech el deleuill lobengterir a meklou a ultutelir el mo er tir.

Ng diak el klemerang el de sal kmal mo mechesang? E, mekngit el dolekoi, e le kid a meral mechesengong, meng dikea doruul a ungil tekoi, el ngii, a mla mocholt malechub eng olengchelel a ngarbab el klengar.

Tiang uaisei?

A kumdasu er a Rubak e Okesiu, el Jesus Kristo, me a kedeb el klengar er Ngii lobengterir a rechad er a Galilee er a Jerusalem. Ak blechoel melasem lomes er Ngii el orreched er a delongelel a miting malechub eng meruul a betok er a osisiu el taem me bol sebechel a blechobech e orechudel el ureor el mekedmokl.

Ng diak el sebechek el mesang.

Ak bai, mesa ubechub el chad e bekokouii el Ngelekel a Dios el kiei el ngarngii a moktek er ngii er a bek el sils. Sel lobengterir a riliuekl er Ngii, e te mlo melchesiu el klou a belkrir e mui er a beltik el reng. Ng medengelii a diak desa el klungiolel a chad er a le kebetech Ngii me tir. Ng ulemekngeltengat er tir, olisechakl er tir. Ngilsuterir, ulemekungil er tir. Ng milsterir a mekreos el Temel.

Chelecha el temed, eng beot el leko kede meral chemoit a temed lobengterir a rechad. Meng di klik er a mouse e kede “moak” er a dertelael el “sechelei” e diak a di ta el taem el de kaseues. A beches el klekedall a sebechel lungil tekoi, e kmal klou a ultutelel sel lak el sebeched el mo kmeed er a rebetik er a rengud. A bechik me ngak a kiei er cheroid er a re mekreos el chad er a telungalek er kemam; a ki medengelii a choua tiang. Eng di, a kuumerang el kmo ng diak dorael bedul a mera el rael, a derta er kid me a beluu, e le blechoel doruul el omak er a telungalek malechub a resechelid a omelecha otebedechur el siasing, e oldurokl a de ngilai el diak a ultutelel el tekoi, malechub e kede omak er tir el mora site er a Internet. A kumdasu eng locha kirel ngarngii choua tia el tekoi, eng di ng ua iidisel a ngera el taem a de choit el ngarngii? Alsekum eng diak el sebeched el mo duum e mesterir a temed el mor tirkel meklou a ututelir el merkid, e a ta er a klebesei e kede mo ouchel kirel.

Mei me bol blak a rengud el urrekodel er tirka el betik ra rengud e dobengterir, el chemoit a ungil taem, lomekdubech a mekreos el taem el mo medechel ra uldesued.

Ulekum Me Ak Mlo Kiei el Mo er sel Kot Er Bab el Sebechek

A rebebil er a rouchel e millekoi el kmo te dimlak el bol tirke el chad el tir a mle sebechir e kirir el mouaitir. Me sel lomes er a klengar er tir, e te mlo medengei el kmo te kiliei el dimlak el bo er sel tkul rebab el sebecherir, e betok el tekoi a cheloit el di mlak el merkui.

Ng diak ngar tia el mesaod er a mo ngoriakl er a deruchelled er a kakerous el ureor. Tial ngoriakl, a diak el iior el kmo ng ngarbab er tial beluulechad, tia a bai diak a belkul er a klou e diak a ulebenglel omerael el mengiil er kid.

Ak bai, mesaod er a merael el mo ngkel chad el Dios, el Demad er a Babeluades a mle soal a bo de uai ngii.

Kede mle er tia el beluulechad, el di ua poet el kmo, “klebkall er a eanged lokiuelel”4 el mla er a klengar ruchei er a beluulechad.

A Chedam er a Babeluades a mes a sebeched. Ng medengei a rokui er kid el diak dodengei. Ng oldubech er kid er tial klengar el mo rukui a ikel rokui el ngii a kired, e mo kiei er a melemalt el klengar, e mo lmuut el mo er a Ngii.

Me ngera uchul, e kede, chemoit a betok el temed me a klisiched el kirel a tekoi el diak el meketeket, diak a belkul, e diak el merang? Kid ng diak de kengei el mes a ikal klebelung el doruul el diak a ultutelel me a belkul el di mo nguemed?

Ng diak el bai lungil kired el mo “chemudel el mei er [kid] a ilteet er a eanged, el diak a charm ng ngerang el mo tomall, e diak a merechorech el sebechel el mor ngii e ruchorch.”?5

Ng mekera doruul er tiang? Kede mo oltirakl okesiul Osobel, olsiseb a Osisecheklel er a klengar er kid er a bek el sils, e mo meral loubeltik el reng er a Dios me a rebebil er kid.

Ng kmal diak el sebeched el rulii a dongurs-ochid, omes-a-klok-er-kid, e-mengiremrum el teletael er a oltirakl.

Sel denguu er a otireklel a ebangkelio, eng diak el kired el ua ngkel buik el uldelbii a bechos er chochil e kmu ng mlo mengedub. Ele kid el ngelekel a Demad er a Babeluades, meng sebeched el remuul a lmuut el kmal betok. Ma leuaisei, ea ungil luldasu a diak el dil ngii el sebechel.. Ng kired elmeruul. A lmuut el klou a belkul, a kired el mo merael el mo er sel ngii a soal a Chedam er a Babeluades a bode uai ngii.

A melekoi a klaumerang er kid ra ebangkelio a ungil, eng di a kiei lokesiul a mla moluut el ebangkelio a lmuut lungil. Oureng el muut el mo blak a rengud er a telbiieled a ungil; a meral oltirakl—er a Llach er a Omelisiich er a Bedenged, melecha ongeltacher me a tenget, e mesiou er tirkel ousbech a ngeso a—lmuut el ungil. Ouchais el kmo kede mo chemoit a temed er a nglunguuch er a telungalek, chedaol llechukl, me a ungil omeruul er a telungalek a ungil, eng di sel bai doruul a ikal rokui a meskid a klengeltengat er a babeluades.

A oltirakl a blak el reng er a mo klikiid e ngara deureng. Ng rael el mo er sel kid a kot el mo ungil e dmeu a rengud.

Mei me bol blak a rengud el oltirakl er a Osobel e oureor el blak a rengud el merael el mo chad el kid a milkedmokl el kirel. Mei me bo dorrenges e doltirakl odbechel a Chedaol Reng. E sel doruul el uaisei, ea Chedam er a Babeluades a mo ocholt a tekoi el ngii a dimlak dodengei el kired. Ng mo mekrolid e mok osenged er a dimlak dodengei el dechad.

Sel bek el dechoit a temed el kirel a klikiid me a deureng, eng diak el sal mo sebeched el mo ngar sel rael er a ouchel. Sel de blechoel el ultuil er a krazia er a Osobel, e kede mo omelchesiu er kid el kmo kede ngara mera el rael el Chedam er a Babeluades a soal a de ngar ngii.

Ulekum Me Ak Milechikak el Mengai el mo Ungil a Renguk

A tara louchel er ngii tirke el metkung a kora mechas a rengud er ngii. Te oureng ulekum me te milchititerir me te lmuut el ngara deureng.

A le bebil er a taem e kede soiseb er a uldasu el kmo ngarngii a sebeched el nguu el ngarsei el mo meskid a deureng: el ungil teletael er a telungalek, ungil tekingel a kerruul, malechub a terbengel a meringel el ongarm.

Sel dorael el mo klou, e kede mo blechoel lomes ra ngara mong e mo medengei el kmo a omeruul el ngara ikred a diak a belkul malechub el lomeskid a deureng.

Kida klou a belkud. Kid a melilt er a mo deuil a rengud.

Kau me ngak a oungerachel er a deureng el mei er kid.

A bechik, er a Harriet, me ngak a somam el ngara rrat. Ng mera lungil sel detobed e doldeu a rengud er a klebekelel a beluulechad. Ng ngarngii a rael el somam el ngara rrat er ngii, eng di ng diak ki momes el kmo ng ua ngera cherridam malechub a rretam er tirka el bebil er a rengara rrat.

Eng di, sel bebil er a taem ea kumdasu el kmo ng kiram el mo kaidesachel. A kumdasu eng sebecham el mo ungil a temam malechub a ki mo bekerurt alsekum aki mo telkib el blak a rengmam—kmal di telbib el sisichemam. E okor, e sel bebil er a taem e ak mecheuid e dulii tial uldasu el mo er ngika el ungil bechik.

A blechoel el teletelel er a choua tial tekoi a blechoel el ungil, kmal bleketakl, e kmal melemalt. Ng mo klikm e kmo, “Dieter, tiang a diak el klaidesachel; ng omerael. Me moldeu er a rengum.”

Ng meral tekoi a lolekoi!

Bebil er a taem er a klengar er kid, e kede mo blak a rengud el meruul a doruul e mo diak de betik er a deureng er a omerael. Ngak a diak ngara rrat lobengkel a bechik ele ak semeriar er a mo merek. Ak mong le omeruul el obengkel a ungil a rengud er ngii.

Ng diak el sal klebelung sel diak de ues a ungil me a deureng er a doruul ele kede blechoel el kerekikl lomes er a taem eng momerek?

Sel dorrenges a ungil chelitakl e kede mengiil mesel bol merek e kede mocha mera loldeu el kirel? Ng diak. Kede orrenges e omtab a derta el teletelel, hu, ongak, me a tekoi er tia el chelitakl.

Kid kede melekoi a nglunguched el di kmu “amen” malechub e kerdi omdasu er sel resel? Ng kmal diak. Kede meluluuch el mo kmeed er a Chedam er a Babeluades, el mo nguu a Reng er Ngii e mo melchesuar a beltik el reng er Ngii.

Ng diak el kired el mengiil el mo ungil a rengud sel debo er a ngermedad el taem, sel debong e kede mocha medengei el kmo a deureng a mla er ngii—er a rokui el taem! A klengar a diak el belkul a kmo kede mo mui er a saul el di kirel a mla mo merek. “Tiaikid a sils el Rubak a rirellii … ,” el Psalmist a lilechesii. “Moldeu e bo lungil a rengum el kirel.”6

Rodam me a rodos, ng diak el iior er a teletael de ngar ngii, malechub a ringel me a ongarm, ng ngarngii a kmo ngerang er a bek el sils el sebeched loldeu el kirel e molab. E ngarngii a kmo ngerang ra bek el sils el meskid a saul ma deureng e sebechel alsekum kede mes e mo oureng a saul el kirel.

A ltang kired el mo omes el diak desal lousbech a medad e bai rengud. Ng soak tia el tekoi el kmo: “A chad a bleketakl el mes loba rengul. Ngii di el meklou a ultutelel a diak el meues ra mad.”7

Kede mla modurch el mo “oureng a saul er a rokui el tekoi.”8 Me tia ng diak lungil a domes el olab a medad me a rengud molmuut er a ikel mekekerei el tekoi a sebeched el oureng a saul el kirel, er a bai domes a kngtil a tekoi er a ikel kid a ngar ngii?

A Rubak a mla yaksok el kmo tirke el mla ngmai a rokui loba omereng el saul a mo mekebkall ea ikel ngar tial beluulechad a mo medechel el mo er ngii, el dart a iidisel malechub eng betok.”9

Rodam me a rodos, me a ikal kmal betok el klengeltengat er a Chedam er a Babeluades, me a kmal bekokouii luldasu er a mo suobel, me a chedaol el klemerang er a mla moluut el ebangkelio, me a betok el klebekelel tial rael er a klechad, “Ng diak a moktek er kid el mo outkeu?”10

Mei mebo dolilt el mo ngara deureng, el diak el iior er a teletael el de ngara chelsel.

Kirel a Telbiil

A tara klebesei e kede mo imuul er tial klengar el mo er sel kuk tara klengar. A tara sils e kede mo omes er a mle klengar er kid e mo omdasu el kmo altang mle sebeched el liluut el mo ungil, meruul a ungil uldasu, malechub e kede ulesbech a temed lungil.

A bo dechoit aikel bebil er a ouchel reng er a klengar, eng kmal lungil a bo doruul a telbiil er chelechang. Maleuaisei, e de:

  1. Tibir el mo chemoit a betok el temed lobengterir a doubeltik el reng er tir.
  2. Tibir el mo oureor el blak a renguk el mo ngkel ngii a Dios a soal kid a bo de uai ngii.
  3. Tibir el mo osiik a deureng, el diak el iior er a teletael el de ngarngii.

A kuuchais el kmo a ikel betok el bo douchel er ngii er a ngarmedad a sebeched el torob er chelecha sel bo doltirakl er a Osobel. Aksekum meke de mla ruebet er a klengit malechub a chelbirukel—alsekum e kede millilt e chelecha e ke douchel—e ngarngii a mekreos el sengk er a Tngakireng er a Kristo, lokiu ngii eng sebeched el mo mousubes. Ng diak el sebeched el lemuut el ngmodech a mla memong, ng bai sebeched el mo ouchel a kngtid. A Osobel a sebechel smuld a mlo mekngit 11 e nguubet a berraod er a kngtid 12 A Tngakireng er Ngii a ngosukid el mo choitii a mechut el klengar e merael mo ruchei el klikiid a chimad, rengud,13 me a blak el reng el mo meruul el mo ungil e merael el mo ungil.

Oi, tial klengar a mereched el imiu; a sils er kid a uaia dil mereched el ngomedang; e a kodall a mo dakt a lebebil er a taem. Ng uaisei, eng di a reng er kid a melemolem el ngar e sel sils a mei el bol modak er a mla mekiis el bedenged el mo nguu a klebkall er a diak el mad. Ak sioning el kmo a uchul a chubechub er a Kristo, e kede rokui el mo kiei el diak a ulebengelel. E le uchul a Osobeled, ea ta er a klebesei e kede meral mo ungil medengei e outkeu ele ringelel a kodall a mla mo mechitechut er a Kristo.”14

A dokiu ngii el mo kudmeklii a chedaol el moktek er kid el ngelekel a Dios a diak a ulebengelel. Rodam me a rodos, resechelik, ng kired lomuchel merael er tial rael er chelechang; ng diak el sebeched el choitii a di imo el sils. Ak meluluuch el kmo ng diak dongiil el mo er sel taem el de bochu er a kodall e bo de meduch er a mera el klengar. Loba ngklel a Jesus Kristo, amen.

Show References

  1.  

    1.  Alma 40:11.

  2.  

    2. Mesa Susie Steiner, “Top Five Regrets of the Dying,” Guardian, Feb. 1, 2012, www.guardian.co.uk/lifeandstyle/2012/feb/01/top-five-regrets-of-the-dying.

  3.  

    3. Bronnie Ware, er a Steiner, “Top Five Regrets of the Dying.”

  4.  

    4. “Ode: Intimations of Immortality from Recollections of Early Childhood,” The Complete Poetical Works of William Wordsworth (1924), 359.

  5.  

    5.  Mateus 6:20.

  6.  

    6.  Psalm 118:24.

  7.  

    7. Antoine de Saint-Exupéry, The Little Prince, trans. Richard Howard (2000), 63.

  8.  

    8.  Mosiah 26:39; dirrek el mesa Doctrine and Covenants 59:7.

  9.  

    9. MesaDoctrine and Covenants 78:19.

  10.  

    10.  Alma 26:35.

  11.  

    11. Mesa Ocholt 7:17.

  12.  

    12. Mesa Mateus 11:28–30.

  13.  

    13. Mesa Psalm 24:4.

  14.  

    14.  Mosiah 16:8; dirrek el mesa 1 Korint 15:54.