Maipanggep kadagiti Pagbabawyan ken Pangngeddeng

Presidente Monson, ay-ayatendaka. Agyamanak iti naparegta ken napnuan pakasaritaan a panangipakaammom maipapan ti panagbangon kadagiti baro a templo ken serbisio iti misionario. Gapu kadagitoy, awan duadua nga umayto dagiti naindaklan a bendision kadatayo ken iti adu a masakbayan a kaputotan.

Ay-ayatek a kakabsatko ken gagayyemko! Mortaltayo amin. Sapay koma ta saan a pakasdaawan daytoy ti asino man.

Awan kadatayo ti napapautto pay nga agbiag iti daga. Adu dagiti napapateg a tawentayo nga, iti agnanayon a pannirigan, kurang la iti apagkirem.

Kalpasanna pumanawtayo. Dagiti espiritutayo ket “maipanda iti balay ti Dios a nangted [kadatayo] iti biag.”¹ Ibatitayo ti bagitayo ken dagiti banag ditoy lubong bayat ti ipapantayo iti sumaruno a lugar ti nakaparsuaantayo.

Idi ubbingtayo pay, kas man la agbiagtayo iti agnanayon. Ipagaruptayo nga awan patinggana ti ileleggak ti init iti tangatang, ket ti masakbayan kasla agnanayon a saan nga agrengngat a dalan iti sanguanantayo.

Nupay kasta, iti panaglakay ken panagbakettayo, ad-adu nga aramidentayo ti tumaliaw ken masdaawtayo iti kinaababa dayta a dalan. Masdaawtayo iti kapardas ti panaglabas dagiti tawen. Ket mangrugi a panunotentayo maipapan kadagiti pili ken bambanag nga inaramidtayon. Kabayatannna, malagiptayo dagiti adu a nasasam-it a kanito a mangted iti bara iti kararuatayo ken rag-o iti puspusotayo. Ngem malagiptayo met dagiti pagbabawyan---dagiti banag a tarigagayantayo a sublian ken baliwan.

Maysa a nars nga agay-aywan iti dumanin matay a masaksakit kunana a masansan a saludsodenna kadagiti pasientena bayat ti panagsaganada a pumanaw itoy a biag.

“Adda kadi pagbabawyam?” saludsodenna.²

Iti kinaasideg unay iti dayta maudi nga aldaw ti kinamortal wenno panagbiag iti daga ket masansan a mangted pannakalawlawag iti panunot ken mangipaay iti pannakaawat ken pannirigan. Isu nga idi nasaludsod kadagitoy a tattao maipapan kadagiti pagbabawyanda, linuktanda dagiti puspusoda. Pinanunotda a naimbag no ania ti kayatda a balbaliwan no maisublida la koma ti oras.

Iti panangamirisko no ania ti kinunada, masdaawak no kasano a maaringan ti pamuon ti pagbatayan ti ebanghelio ni Jesucristo ti turongen ti biagtayo para iti pagimbagan, no aramatentayo la koma dagitoy iti biagtayo.

Awan ti datdatlag maipapan kadagiti pagbatayan ti ebanghelio. Inadaltayon dagitoy kadagiti nasantuan a kasuratan, napagsasaritaantayon dagitoy iti Sunday School, ken naming-adun a nangngegantayon dagitoy iti pulpito. Alisto a maawatan ken nalawag dagitoy a nadiosan a pagbatayan ken ik-ikkan pateg, napintasda, nauneg, ken nabileg; ken awan duadua a makatulongda kadatayo tapno maliklikantayo dagiti pagbabawyan iti masakbayan.

Nalabit a ti kangrunaan unay a pagbabawyan dagiti matmatayen a pasiente ket ti tarigagayda a napapaut koma pay ti kaaddada iti sibay dagiti tao a patpatgenda.

Ad-adda dagiti dagiti lallaki a mangidayyeng iti daytoy a rikna: “pagbabawyanda la unay ti [inaldaw] a panagudaodda iti … trabaho.”³ Adu ti naawanan iti napili a lagip a magun-od manipud iti pannakisinningedda kadagiti pamilia ken gagayyemda. Nalibtawanda ti nangtubay iti singensingedda kadagiti patpatgenda la unay.

Saan kadi nga agpayso a masansan a makumikomtayo unay? Ken, nasakit a sawen, nga usarentayo pay ti pannakakumikomtayo kas tsapa ti pammadayaw, a kas man la a ti pannakakumikom ket maysa a balligi wenno tanda ti kinangatotayo iti biag.

Isu kadi?

Malagipko ti Apo ken Pagwadantayo, ni Jesucristo, ken ti ababa a pannakipulapolna kadagiti tao ti Galilea ken Jerusalem. Pinadasko a pinanunot Isuna nga agdardaras kadagiti mitingna wenno agsusukot dagiti banag nga aramidenna tapno adu ti malpasna.

Diak makita daytoy.

Ngem ketdi nakitak ti manangngaasi ken manangipateg nga anak ti Dios iti inaldaw a panagbiagna. Iti pannakipulapolna kadagiti adda iti aglawlawna, nariknada ti pannakaipategda. Ammona ti awan patinggana a pateg dagiti tao a kapulapolna. Binendisionanna ida, pinagserbianna ida. Intag-ayna ida, inagasanna ida. Inikkanna ida iti napateg a sagut idi panawenna.

Iti panawentayo nalaka ti agpammarang nga adda panawentayo kadagiti dadduma. Iti klik ti maysa a mouse, “maikonektayon” iti rinibribu a “gagayyem” a di masapul a kasinnango ida. Mabalin a nakaskasdaaw a banag ti teknolohia, ken makatulong unay daytoy no adayotayo kadagiti patpatgentayo. Agnaedkami nga agasawa nga adayo kadagiti ipatpateg a miembro ti pamiliami; ammomi no kasano dayta. Nupay kasta, mamatiak a saantayo a maiturong iti umno a turongen, kas tao wenno kagimongan, no makidinnamagtayo iti pamilia wenno gagayyem no kaaduanna nga agiposte kadagiti nakakatkatawa a ladawan, agipatulod iti awan kaes-eskanna a bambanag, wenno iturongtayo dagiti patpatgentayo kadagiti site iti Internet. Panagkunak adda lugar para iti kastoy a kita ti aktibidad, ngem kasano ti kapaut nga aramidentayo daytoy? No ditay maaramid nga ited ti kasayaatan a bukodtayo a bagi ken ti saan a mabingay a panawen kadagiti pudno a napateg kadatayo, iti maysa nga aldaw, pagbabawyantayo daytoy.

Ikeddengtayo koma ti mangipateg kadagiti ay-ayatentayo babaen ti kaaddatayo iti sibayda iti nabuslon a panawen, panagaramidtayo kadagiti banag a kadua ida, ken panangpasantaktayo kadagiti laglagiptayo.

Maysa pay a pagbabawyan nga impeksa dagiti tao ket ti pannakapaayda nga agbalin a tao a nariknada a mabalin ken nasken a pagbalinanda koma. Iti itataliawda iti napalabas a biagda, naamirisda a dida pulos nausar ti paglainganda, nakaad-adu dagiti kanta a dida nakanta.

Diak kayat a sawen ditoy ti yuuli iti pangal ti balligi iti nadumaduma a propesiontayo. Dayta a pangal uray man no kasano ti kadakkelna ditoy daga, ket maysa nga addang laeng iti naindaklan nga agnanayon a panagdaliasat nga agur-uray kadatayo.

Ketdi, agsarsaritaak maipapan iti panagbalin a tao a panggep ti Dios, ti Nailangitan nga Amatayo, a pagbalinantayo.

Umaytayo ditoy lubong, kas iti kinuna ti mannaniw, “agtalaytay kadagiti ulep ti gloria”⁴ manipud iti lugar sakbay daytoy a biag.

Makita ti Nailangitan nga Amatayo ti pudno a kabaelantayo. Ammona dagiti banag maipapan kadatayo a mismo a ditay ammo. Paregtaennatayo bayat ti panagbiagtayo a mangipatungpal iti nakarukodan ti pannakaparsuatayo, agbiag iti nasayaat, ken agsubli iti sidongna.

Apay, ngarud, nga ibukbukboktayo ti adu unay a panawen ken pigsatayo kadagiti banag a saan nga agpaut, awan pategna, ken awan serbina, ken narabaw unay? Ditay kadi kayat a makita ti minamaag iti panangtunton iti awan kaes-eskanna ken saan nga agpaut a banag?

Di kadi nasirsirib kadatayo nga “agurnongtayo [para iti bagbagitayo] kadagiti gupgupit sadi langit, isu a ti sanga ken ti lati dida dadaelen ken isu a dagiti mannanakaw dida kalien ken takawen ”?⁵

Kasano nga aramidentayo daytoy? Babaen ti panangsurottayo iti pagwadan ti Mangisalakan, babaen ti panagtungpaltayo kadagiti pannursurona iti inaldaw a panagbiagtayo, babaen ti pudno a panangipategtayo iti Dios ken iti padatayo a tao.

Awan duadua a ditay maaramid daytoy no ul-ulodentayo ti sakatayo, sangkakitatayo iti relostayo, ken agtantanabutobtayo bayat ti panagbalintayo a disipulo.

No maipapan iti panagbiag iti ebanghelio, saantay koma a kas iti ubing a lalaki a nangisawsaw iti tangan ti sakana iti danum ken imbagana a napan naglangoy. Kas annak ti Nailangitan nga Amatayo, ad-adu ti kabaelantayo. Iti kasta, saan nga umdas dagiti nasayaat a gandat. Nasken nga agaramidtayo. Napatpateg pay, nasken nga agbalintayo iti kayat ti Nailangitan nga Ama a pagbalinantayo.

Napintas ti panangipeksa iti pammaneknektayo iti ebanghelio, ngem napimpintas ti panagbalin a sibibiag a pagwadan ti naisubli nga ebanghelio. Nasayaat ti panagtarigagay nga agbalin a napudpudno iti katulagantayo; ti aktual a panagbalin a napudno kadagiti sagrado a katulagan---agraman ti panagbiag a nasagudayan, panagbayad iti apagkapullo ken datontayo, panagtungpal iti Word of Wisdom, ken panagserbi kadagiti agkasapulan---ket nasaysayaat nga amang. Nasayaat ti panangipakaammo nga ipaaytayo ti ad-adu pay a panawen iti panagkararag a sangapamilia, panagadal iti nasantuan a kasuratan, ken kadagiti naragsak nga aktibidad ti pamilia; ngem ti aktual a panagaramid amin kadagitoy a banag ket mangisangbay kadagiti nailangitan a bendision iti biagtayo.

Ti kinadisipulo isu ti pananggun-od iti kinasanto ken kinaragsak. Daytoy ti dalan mangiturong iti kinasingpet ken kinaragsaktayo.

Ikeddengtayo koma a suroten ti Mangisalakan ket igaendtayo ti agtrabaho tapno agbalintayo a kas iti tao a nakaisangratantayo a pagbalinan. Dumgngeg ken agtungpaltayo koma kadagiti parikna ti Nasantuan nga Espiritu. No aramidentayo daytoy, ipalgakto kadatayo ti Nailangitan nga Ama dagiti banag a ditay pulos ammo maipapan iti bagitayo. Silawannanto nga umuna ti dalan ket luktanna dagiti matatayo a mangkita kadagiti saan nga ammo ken nalabit a saan nga impagarup a talentotayo.

Ti ad-adda a panagipaaytayo iti bagbagitayo a manggun-od ti kinasanto ken ragsak, ad-adda met a mayadayotayo iti dalan nga agturong iti pagbabawyan. Ti ad-adda a panagpannuraytayo iti parabur ti Mangisalakan, ad-adda met a mariknatayo nga addatayo iti dalan nga inranta ti Amatayo iti Langit para kadatayo.

Maysa pay a pagbabawyan dagiti makaammo a mataydan ket nalabit a pagsiddaawantayo. Tinarigagayanda nga ad-adda koma pay a pinaragsakda ti bagida.

Masansan unay a maallilawtayo nga adda maysa a banag a dandanitayon magaw-at a mangted ragsak kadatayo: nasaysayaat a kasasaad ti pamilia, nalaglag-an a panagbiag wenno ti gibus ti maysa a narikut a pannubok.

Ti ad-adda a panaglakay wenno panagbakettayo, ad-adda a tumaliawtayo ken maamiristayo a saan a napateg dagiti kasasaad nga agpaay iti ruar wenno saanda a mangikeddeng iti pagragsakantayo.

Datayo ti napateg.Datayo ti mangikeddeng iti pagragsakantayo.

Datayo met laeng ti akinrebbeng iti bukodtayo a pagragsakan.

Magustuanmi iti asawak a ni Hariet ti agbisikleta. Nakaay-ayat ti rummuar ket mangnanam iti kinapintas ti nakaparsuaan. Adda dagiti kayatmi a rota a pagbisikletaan, ngem saanmi unay nga inkankano no kasano ti kaadayo ti papananmi wenno kasano ti kapardas ti panagbisikletami no idasig kadagiti dadduma pay nga agbisbisikleta.

Nupay kasta, no dadduma panagkunak nasken nga adda bassit karit kadakami. Panagkunak pay a mapasayaatmi ti pardasmi no karitenmi ti bagimi a mangaramid uray no maysa a pedal laeng. Ken no dadduma agbiddutak pay a mangdakamat daytoy a banag iti naimbag nga asawak.

Kanayon a nakasaysayaat, nakalawlawag, ken nakalinlinteg dagiti gagangay a sungbatna kadagitoy kastoy a singasing. Umisem ket kunana, “Dieter, saan a lumba daytoy; panagdaliasat daytoy. Agrag-oka iti daytoy a kanito.”

Husto isuna!

No dadduma iti panagbiag maituontayo iti pannakalpas isu a mapaaytayo a mangsarak iti rag-o iti panagdaliasat. Diak mapan agbisikleta a kaduak ti asawak gapu ta magagaranak a makalpas. Mapanak gapu ta naimnas ken makaliwliwa a makaduak isuna.

Saan kadi a kasla minamaag a masayang dagiti makaay-ayo ken makaliwliwa a padas gapu ta kanayon nga ur-urayentayo ti kanito a panaggibusda?

Dumgngegtayo kadi iti napintas a musika nga ur-urayentayo nga agpinal ti maudi a nota sakbay a pudno a naragsakantayo iti daytoy? Saan. dumngegtayo ken danggayantayo dagiti agduduma a melodia, ritmo, ken harmonia agingga a malpas ti komposision.

Isaotayo kadi dagiti kararagtayo a ti la “amen” wenno ti udina ti pampanunotentayo? Siempre saan. Agkararagtayo tapno mayasidegtayo iti Nailangitan nga Amatayo, tapno mangawat iti Espirituna ken mangrikna iti ayatna.

Nasken a saantayo nga aguray tapno agragsak agingga a madanontayo ti masungad a punto, tapno laeng matakuatan nga addan a magun-od ti ragsak---a kanayon! Ti biag saan a kaipapanan ti pananglagip iti napalabas. “Daytoy ti aldaw nga inaramid ni Jehova  … ,” insurat ti Salmista. “Agrag-o ken agragsakkayo iti daytoy.”⁶

Kakabsat, ania man dagiti kasasaadtayo, ania man dagiti karit wenno pannuboktayo, adda maysa a banag iti inaldaw tapno umarakup ken mangparagsak. Adda maysa a banag iti inaldaw a pagyamanan ken rag-o no makitatay la koma ken mabigbig ti pateg daytoy.

Nalabit a nasken a ditayo unay kumita kadagiti matatayo ket ad-adda a kumitatayo kadagiti puspusotayo. Magustuak ti adaw: “Makitatayo a silalawag iti pusotayo laeng. Ania man a banag a napateg ket saan a makita dagiti mata.”⁷

Nabilintayo nga “agyaman iti amin a banag.”⁸ Saan kadi a nasaysayaat ti kumita iti mata ken puspusotayo uray kadagiti babassit a banag a mabalin a pagyamanantayo, imbes a padakkelentayo ti kasungani iti agdama a kasasaadtayo?

Inkarin ti Apo, “Isu nga umawat iti amin a banag a siyayaman maidaydayawto: ket mainayonto kenkuana dagiti banag iti daytoy a daga, iti maminggasut.”⁹

Kakabsat, addaantayo kadagiti nawadwad a bendision ti Nailangitan ngaa Amatayo, ti nabuslon a plano ti pannakaisalakan, dagiti naindaklan a kinapudno ti naisubli nga ebanghelio, ken ti adu a kinapintas daytoy mortal a panagdaliasat, “di kadi dagitoy ti gapu ti panagrag-otayo?”¹⁰

Ikeddengtayo koma ti agragsak, ania man dagiti kasasaadtayo.

Maysa nga aldaw alaentayo ti saan a maliklikan nga addang ket bumallasiwtayo manipud iti daytoy mortal a lubong nga agturong iti sumaruno nga estado. Taliawentayonto ti biagtayo ket panunotentayo no nakapagbalintayo koma a nasaysayaat, nakaaramidtayo kadagiti nasaysayaat a pangngeddeng, wenno nasaysayaat koma ti panangusartayo iti orastayo.

Tapno maliklikan dagiti sumagmamano a kaunggan a pagbabawyan ti biag, sayaatentayo koma itan ti mangngeddeng, ngarud:

• Ikeddengtayo a yad-adutayo ti oras a kadennatayo dagiti patpatgentayo.

• Ikeddengtayo nga ipaspasnektayo ti agbalin a tao a kayat ti Dios a pagbalinantayo.

• Ikeddengtayo ti mangsarak iti ragsak, iti baet dagiti kasasaadtayo.

Paneknekak a maliklikan ti adu kadagiti kaunggan a pagbabawyan ti masakbayan babaen ti panangsurot itan iti Mangisalakan. No nakabasol wenno nagbidduttayo---no nakaaramidtayo kadagiti pili a pagbabawyantayo itan---adda napateg a sagut ti Pannubbot ni Cristo, a pakapakawanantayo. Saantayo a makasubli wenno mabaliwan ti napalabas, ngem makapagbabawitayo. Mabalin a punasen ti Mangisalakan dagiti lua ti pagbabawyan¹¹ ket ikkatenna ti dagsen dagiti basoltayo.¹² Ti Pannubbotna ti mangipalubos kadatayo a mangpanaw iti napalabas ket agtultuloytayo nga addaantayo iti nadalus nga ima-ima, natarnaw a puso,¹³ ken pangngeddeng nga agaramid iti nasaysayaat ken agbalin a nasaysayaat.

Wen, napardas ti panaglabas daytoy a biag; ken kasla tumayab dagiti aldawtayo; ket kasla nakaam-amak ti patay no maminsan. Nupay kasta, agtultuloyto ti espiritutayo nga agbiag ken iti maysa nga aldaw makitiponto iti nagungar a bagitayo tapno umawat iti immortal a gloria. Napasnek a paneknekak a gapu iti naasi a Cristo, agbiagtayto manen ken iti agnanayon. Gapu iti Mangisalakan ken Mannubbottayo, iti maysa nga aldaw pudno a maawatantayonto ken agrag-otayo iti kaipapanan dagiti balikas “ti sabidong ni patay alun-onento ni Cristo.”¹⁴

Maysa nga agnanayon ti dalan iti panangipatungpal iti nadiosan a pagtungpalan kas annak ti Dios. Patpatgek a kakabsatko, ay-ayatek a gagayyem, nasken nga irugitayo ti magna iti dayta nga agnanayon a dalanitan; ditayo mabalin nga itantan uray maysa nga aldaw. Sapay koma ta saantayon nga aguray agingga a nakasaganatayon a matay sakbay a pudno a masursurotayo ti agbiag. Iti sagrado a nagan ni Jesucristo, amen.