2010–2019
E Uiga i Faanoanoaga ma Filifiliga
Oketopa 2012


E Uiga i Faanoanoaga ma Filifiliga

O le tele lava o lo tatou tuuto atu o i tatou lava i le sailiga ia maua le paia ma le fiafia, o le faaitiitia foi lena o lo tatou i ai i luga o se ala o faanoanoaga.

E Uiga i Faanoanoaga

Peresitene Monson, matou te alolofa ia te oe. Faafetai atu mo le faasilasilaga musuia ma logologoa o le fausiaina o malumalu fou ma le galuega faafaifeautalai. Ona o ia galuega, ou te mautinoa lava o le a oo mai ai faamanuiaga silisili ia i tatou ma le tele o tupulaga i le lumanai.

Uso e ma tuafafine, au uo pele! O i tatou uma o tagata. Ou te faamoemoe e le o se mea lenei e faateia ai se tasi.

E leai se tasi o i tatou o le a umi ona i ai i le lalolagi. E i ai ni o tatou tausaga patino lea, i le vaaiga e faavavau, e le faatusalia i le emo o se mata.

Ona tatou o ese atu lea. O o tatou agaga “e ave atu i fanua i lena Atua o le na ia tuuina ia te i [tatou] le ola.”1 E taatitia o tatou tino i tuugamau ma tuua ai mea o lenei lalolagi pe a tatou laa atu i le isi nofoaga o lo tatou olaga.

A o tatou laiti, e foliga mai o le a tatou ola pea e faavavau. Tatou te manatu o le a le faatapulaaina aso o o tatou olaga, ma e vaai mai le lumanai ia i tatou e pei o se auala e le motusia lea e faaauau atu pea i o tatou luma.

Peitai, o le faasolo lava ina tatou matutua, o le tele foi lena o lo tatou tepa i tua ma maofa i le puupuu moni o lena auala. Tatou te tuufesili pe mafai faapefea ona vave mou atu ia tausaga. Ma amata ai ona tatou mafaufau e uiga i filifiliga sa tatou faia ma mea na tatou faia. I le faagasologa, tatou te manatua ai le tele o taimi fiafia e maua ai e o tatou agaga le mafanafana ma le olioli i o tatou loto. Ae tatou te manatuaina foi ia faanoanoaga—o mea tatou te momoo maimau pe ana mafai ona tatou toe foi i tua ma sui.

Sa saunoa se tamaitai fomai e tausia gasegase ua i ai i ō latou toe taimi, e faapea e tele lava ona ia faia se fesili faigofie i ana gasegase a o latou sauni e tuua lenei olaga.

“O i ai ni ou faanoanoaga?” na te fesili atu ai.2

O le matua latalata atu i lena aso mulimuli o le olaga faaletino e tele lava ina maua ai se manino i manatu ma maua ai se malamalamaaga ma se vaaiga. O lea a fesiligia nei tagata e uiga i o latou faanoanoaga, e tatala mai o latou lagona. Latou te manatunatu i mea semanu latou te suia pe ana mafai ona latou toe faafoi i tua le taimi.

A o ou mafaufau i mea na latou fai mai ai, na ou ofo i le auala e mafai ona faaaafia ai e mataupu faavae autu o le talalelei a Iesu Keriso le taitaiga o o tatou olaga mo le lelei, pe afai o le a tatou faaaogaina.

E leai se mea faalilolilo e uiga i mataupu faavae o le talalelei. Ua tatou suesue i ai i tusitusiga paia, ua tatou talanoaina i le Aoga Sa, ma ua tatou faalogo i ai mai le pulelaa i le tele o taimi. O nei mataupu faavae faalelagi ma mea faatauaina e tuusao mai ma manino; e matagofie, loloto, ma mamana; ma e mautinoa lava e mafai ona fesoasoani ia i tatou e aloese ai mai faanoanoaga o le lumanai.

Maimau Pe Ana Tele Atu se Taimi sa Ou Faaaluina ma Tagata Ou te Alofa i ai

Masalo o le faanoanoaga aupito sili ona taatele o gasegase ua lata i o latou taimi, ua faailoa mai e faapea, maimau pe ana tele atu se taimi sa latou faaaluina ma tagata latou te alolofa i ai.

E patino lava i alii latou te faailoa mai lava lenei faanoanoaga taatele: latou te “matua faanoanoa lava i le tele o lo latou olaga sa faaalu i a latou … galuega i [aso taitasi].”3 E toatele ua misia le tele o avanoa o mea faapitoa e manatuaina ia e sau mai le faaaluina o taimi faatasi ma aiga ma uo. Ua latou misia le atiina ae o se sootaga loloto ma i latou e sili ona taua ia i latou.

Pe le moni ea e faapea o le tele o taimi tatou te pisi ai? Ma, e faanoanoa e fai atu, o loo tatou manatu i lena pisi o se mea faamamaluina, e pei ua avea le pisi lava ia, o se mea taua ua ausia po o se faailoga o se olaga silisili.

A ea?

Ou te mafaufau i lo tatou Alii ma le Faataitaiga Atoa, o Iesu Keriso, ma Lona soifuaga puupuu faatasi ma tagata o Kalilaia ma Ierusalema. Sa ou taumafai e vaai faalemafaufau ia te Ia a o pisi tele i va o fonotaga po o galuega e fai i le taimi e tasi ina ia faataunuu uma ni mea faavavave o loo i Lana lisi o mea e fai.

E le mafai ona ou vaai i ai.

Ae, ou te vaaia le agaalofa ma le popole o le Alo o le Atua i Lona soifua ai ma se faamoemoe i aso taitasi. A o Ia fegalegaleai ai ma i latou e vagaia o Ia, sa latou lagonaina lo latou taua ma le alofaina. Sa Ia silafiaina le taua le mafuatia o tagata na Ia feiloai i ai. Sa Ia faamanuia ia i latou, ma auauna atu i ai. Sa Ia siitiaina i latou ma faamaloloina. Sa Ia tuu atu ia i latou le meaalofa taua o Lona taimi.

I o tatou aso, ua faigofie lava le tau ina na ona faafoliga e faaalu se taimi ma isi. I se kiliki o se mausa e mafai ai ona tatou “fesootai’ ma le fia afe o “uo” e aunoa ma le faafesagai ma se tasi o i latou. O tekinolosi e mafai ona avea ma se mea matagofie tele, ma e aoga tele pe a le mafai ona tatou latalata atu i e pele ia i tatou. Ma te nonofo mamao ese ma lo’u toalua mai i o ma aiga pele; ma te iloaina le uiga o lena mea. Peitai, ou te talitonu tatou te le o agai atu i le itu sao, faaletagata lava ia ma se sosaiete, pe a tatou fesootai ai ma aiga po o uo e tele lava i le toe faasalalau lea o ata malie, auina atu o mea taua ae malie, po o le faafesootai atu foi o e pele ia i tatou i saite i le Initoneti. Ou te manatu o loo i ai se avanoa mo lea ituaiga o gaoioiga, ae o le a se tele o le taimi ua tatou naunau e faaalu ai? Afai tatou te toilalo e tuu atu o tatou lava tagata silisili ma ni taimi le faatuaoia ia i latou e taua moni ia i tatou, o le a i ai se aso tatou te faanoanoa ai [i lena mea].

Tatou filifili e faataua i latou tatou te alolofa i ai e ala i le faaaluina o taimi anoa ma i latou, faifaimea faatasi, ma atiae ni mea taua e manatua ai.

Maimau Pe Ana Ou Ola e Tusa ma Ou Gafatia

O le isi mea faanoanoa ua faailoaina e tagata e faapea sa latou toilalo e avea ma tagata na latou lagona na mafai ma na tatau ona avea ai i latou. Ina ua latou toe tepa i tua i o latou olaga, sa latou iloa ai latou te lei ola lava e tusa ma o latou gafatia, sa matuai tele ni mea na tuua e lei faia.

Ou te le o talanoa atu i i e uiga i le a’ea o le faasitepu o le manuia i a tatou matata faalegaluega eseese. O lena faasitepu, e tusa lava po o le a sona taua tele i lenei lalolagi, o le a itiiti lava se mea e maua ai i le malaga sili e faavavau o loo faatalitali mai ia i tatou.

Ae, o loo ou tautala atu e uiga i le avea ai ma tagata lea o loo faamoemoe le Atua e avea ai i tatou.

Tatou te taunuu mai i lenei lalolagi, e pei ona fai mai ai le tusi solo, “faatasi ai ma ao o le mamalu i o tatou luga”4 mai le muai olaga.

O loo silasila mai lo tatou Tama Faalelagi i o tatou gafatia moni. O loo Ia silafia mea e uiga ia i tatou ia tatou te le iloa e i tatou lava. Na te uunaia i tatou i o tatou olaga e faataunuu le fuafuaga faamoemoeina o lo tatou foafoaga, ina ia ola i se olaga amiotonu, ma ia toe foi atu ai i Lona afioaga.

Aisea la, tatou te tuuto atu ai le tele o lo tatou taimi ma le malosi i mea le tumau, e matua le taua, ma e papa’u? Pe ua tatou mumusu ea e vaai atu i le faavalevalea o le tulitulimatagauina o mea le taua ma lē tumau?

Pe le atamai atu ea mo i tatou le “tolo’a’i [mo i tatou lava] o oa i le lagi, e le o i ai se mogamoga po o se ele e faaumatia ai, e le o i ai foi tagata gaoi e eli atu, ma gaoi ai”?5

E faapefea ona tatou faia lea mea? E ala i le mulimuli i le faataitaiga a le Faaola, e ala i le faaaofia ai o Ana aoaoga i o tatou olaga, e ala i le alofa moni i le Atua ma o tatou uso a tagata.

E mautinoa lava e le mafai ona tatou faia lenei mea i le tatoso o o tatou vae, faitio i le umi o sauniga [po o fonotaga], ma faitio po o a mea e ao ona tatou faia e avea ai ma soo.

Pe a oo mai i le ola ai i le talalelei, e le tatau ona pei i tatou o le tamaitiiti lea na ona faasusu o lona tamaivae ona fai mai lea sa tofu i le vai. I le avea ai ma atalii ma afafine o lo tatou Tama Faalelagi, e tele naua mea e mafai ona tatou faia. I lena tulaga, ua le lava le na ona i ai o ni faamoemoega lelei. E tatau ona tatou faia. E sili atu foi ona taua, le tatau ona tatou avea ma tagata ua finagalo le Tama Faalelagi e avea ai i tatou.

O le folafola atu o a tatou molimau o le talalelei e lelei lea, ae o le avea ai ma se faataitaiga ola o le talalelei toefuataiina, e sili atu ona lelei. O le moomoo ia faamaoni atili atu i a tatou feagaiga, e lelei; o le mea moni o le faamaoni i feagaiga paia—e aofia ai le ola i se olaga mama, totogiina o a tatou sefuluai ma taulaga, tausia o le Upu o le Poto, ma le auauna atu ia i latou o mafatia—e matua sili atu ona lelei. O le faasilasila atu o le a tatou tuuto atili atu se taimi mo tatalo faaleaiga, suesueina o tusitusiga paia, ma gaoioiga anoa faaleaiga, e lelei; ae o le faia moni o nei mea uma o le a tumau ai le aumaia o faamanuiaga faalelagi i o tatou olaga.

O le avea ai ma soo o le taumafai lea ia maua le paia ma le fiafia. O le ala lea i le avea ai ma se tagata silisili ma sili ona fiafia.

Ia tatou filifili ai e mulimuli i le Faaola ma galulue ma le filiga ia avea ma tagata na mamanuina ai i tatou e avea ai. Ia tatou faalogo atu ma usiusitai i uunaiga a le Agaga Paia. Pe a tatou faia ia mea, o le a faaali mai e le Tama Faalelagi ia i tatou mea tatou te lei iloaina e uiga ia i tatou lava. O le a Ia faaali mai ia i tatou le ala i o tatou luma ma tatala o tatou mata ia iloa ai a tatou taleni natia ma atonu e lei mafaufauina lava.

O le tele lava o lo tatou tuuto atu o i tatou lava i le sailiga ia maua le paia ma le fiafia, o le faaitiitia foi lena o lo tatou i ai i luga o se ala o faanoanoaga. O le tele lava o lo tatou faalagolago i le alofa tunoa o le Faaola, o le faateleina foi lena o le a tatou lagonaina o loo tatou i ai i luga o le ala sa fuafuaina e lo tatou Tama i le Lagi mo i tatou.

Maimau Pe Ana Ou Tuu Au Lava Ia Fiafia Atili

O le isi mea faanoanoa mo i latou na iloaina ua lata ina oti atonu e fai si faateia. Sa latou momoo maimau pe ana latou tuu i latou lava ia fiafia atili.

E tele lava taimi tatou te maua ai ni lagona sese e faapea o loo i ai se mea e i tala atu o lo tatou gafatia lea o le a aumai ai ia i tatou le fiafia: o se tulaga faaleaiga lelei atu, se tulaga tau tupe lelei atu, po o le iuga o se tofotofoga faigata.

O le faasolo lava ina tatou matutua, o le tele foi lena o lo tatou tepa i tua ma iloaina ai o tulaga i fafo atu e le afaina tele lea, pe iloa ai lo tatou fiafia.

E taua i tatou. Otatou e fuafuaina lo tatou fiafia.

O oe ma au i le taimi mulimuli o le a tuuaia mo lo tatou lava fiafia.

O ma’ua ma lo’u toalua, o Harriet, e fiafia lava e tietie i a ma uila vilivae. O se mea maoae le o ese atu ma olioli i le matagofie o le natura. E i ai ni a ma auala patino ma te fiafia e tietie i ai, ae ma te le gauai tele atu i le mamao ma te o ai po o le saoasaoa ma te o ai e faatusatusa i isi tagata tietie.

Peitai, mai lea taimi i lea taimi ou te manatu e tatau ona fai si a ma tauvaga laitiiti. Ou te manatu sa mafai ona maua se ma taimi sili atu po o le tietie foi i se saoasaoa tele atu pe afai lena ma te uunaia atili i ma’ua lava. O nisi taimi ou te faia ai se mea sese tele o le ta’u atu o lea manatu i lou toalua lelei.

O lana tali masani lava i au fautuaga o sea ituaiga, e agalelei tele, manino, ma tuusao i taimi uma. E ataata o ia ma faapea mai, “Dieter, e le o se tuuga; o se malaga. Olioli i le taimi.”

E sa’o lava o ia!

O nisi taimi i le olaga tatou te soona taulai atu ai i le tini ae ua tatou le maua ai le olioli i le malaga. Ou te le o alu e tietie uila ma lou toalua ona ou te fiafia e uiga i le tini taunuu. Ou te alu ona o le aafiaga o le i ai faatasi ma ia, e suamalie ma faafiafiaina.

Pe le foliga mai ea e faavalevalea le faaleagaina o aafiaga suamalie ma faafiafiaina ona o lo tatou mafaufau pea i le taimi o le a maea ai?

Pe tatou te faalogologo ea i musika matagofie a o faatalitali mo le nota mulimuli e mou atu ae tatou te lei faatagaina i tatou lava ia olioli moni ai? Leai. Tatou te faalogologo ma fesootai atu i fesuisuiaiga o le fati, pā’ō, ma faigaleo i le musika atoa.

Pe tatou te faia ea a tatou tatalo i le na o le fai atu “amene” po o le faaiuga i le mafaufau? E leai. Tatou te tatalo ina ia tatou latalata atu i lo tatou Tama Faalelagi, ina ia maua Lona Agaga ma lagonaina Lona alofa.

E le tatau ona tatou faatalitali ina ia fiafia seia tatou oo atu i se vaega i le lumanai, ae tei ua iloa sa avanoa lava le fiafia—i taimi uma! E le talisapaiaina le olaga i le tau ina na ona mafaufau i mea ua tuanai. O le aso lenei na faia e Ieova … ,” sa tusia ai e le Fai-Salamo, “E olioli ma fiafia i ai.”6

Uso e ma tuafafine, e tusa lava po o a o tatou tulaga, po o a o tatou luitau po o tofotofoga, o loo i ai pea se mea i aso taitasi e olioli atoa ai ma faamemelo ai. O loo i ai se mea i aso taitasi lea e mafai ona aumaia le lotofaafetai ma le olioli pe afai o le a tatou vaaia ma talisapaia.

Masalo e tatau ona faaitiiti lo tatou vaai i o tatou mata ae ia faateleina i o tatou loto. Ou te fiafia i le upusii: E na o le loto e mafai ona vaai manino ai se tasi. Soo se mea taua lava o le a le vaaia e mata.”7

Ua poloaiina i tatou “e tuu atu le faafetai i mea uma.”8 Pe le lelei atu ea la ona tatou vaai i o tatou mata ma loto e oo lava i mea iti ia e mafai lava ona tatou faafetai ai, nai lo le taulai atu i tulaga le lelei i o tatou tulaga o i ai nei?

Ua folafola mai e le Alii, “O ia o le e taliaina mea uma ma le faafetai o le a faamamaluina; ma o mea o le lalolagi lenei o le a faaopoopoina ia te ia, i le sautuaselau lava.”9

Uso e ma tuafafine, faatasi ai ma le anoanoai o faamanuiaga a lo tatou Tama Faalelagi, Lana ata o le faaolataga agalelei, o upumoni faalelagi o le talalelei toefuataiina, atoa ai ma le tele o mea matagofie o lenei malaga faaletino, “pe le ua i ai ea ia te i tatou se pogai tatou te olioli ai?”10

Ia tatou filifili e fiafia, e tusa lava po o a o tatou tulaga.

E Uiga i Filifiliga

E i ai se aso o le a tatou laa atu ai i lena laasaga le maalofia ma laasia ai mai lenei lalolagi faitino i le isi olaga. E i ai se aso o le a tatou toe tepa ai i tua i o tatou olaga ma tuufesili pe na mafai ea ona tatou lelei atu, faia ni faaiuga lelei atu, pe sa faaaogaina ma le atamai sili atu o tatou taimi.

Ina ia aloese mai nisi o faanoanoaga aupito tiga o le olaga, o se mea atamai le faia o nisi o filifiliga i le taimi nei. O le mea lea, ia tatou:

  • Filifili e faaalu se taimi sili atu ma i latou tatou te alolofa i ai.

  • Filifili ia tauivi sili atu ma le naunautai ia avea ma tagata ua finagalo le Atua e avea ai i tatou.

  • Filifili e saili le fiafia, e tusa lava po o a o tatou tulaga o i ai.

O lau molimau e mafai ona taofia le tele o faanoanoaga aupito sili ona tiga o a taeao e ala i le mulimuli i le Faaola i le asō. Afai ua tatou agasala pe fai ni mea sese—afai ua tatou faia ni filifiliga ua tatou salamo ai nei—o loo i ai le meaalofa taua o le Togiola a Keriso, lea e mafai ai ona faamagaloina i tatou. E le mafai ona tatou toe foi i tua i le taimi ma suia le tuanai, ae e mafai ona tatou salamo. E mafai e le Faaola ona soloiesea o tatou loimata o le faanoanoa11 ma aveesea le avega o a tatou agasala.12 O Lana Togiola ua faatagina ai i tatou ia tuua ma faagalo mea o le tuanai ma agai i luma ma lima mama, ma se loto mama,13 atoa ai ma se naunautaiga e fai ia lelei atili ma avea o ni tagata sili atu.

Ioe, e vave lava ona mou atu lenei olaga; ua foliga mai e vave ona mou atu o tatou aso; ma foliga mai ai ua taufaafefe le oti i nisi taimi. E ui i lea, o le a faaauau pea ona ola o tatou agaga ma o le a i ai se aso e toe faatasia ai ma lo tatou tino toetu ina ia maua ai le mamalu tino ola pea. Ou te molimau atu ma le paia ona o le alofa mutimutivale o Keriso, o le a tatou toe ola uma ai ma faavavau. Ona o lo tatou Faaola ma Togiola, e i ai se aso o le a tatou malamalama moni ai ma olioli i le uiga o upu “ua tofatumoanaina ia Keriso, le tui o le oti.”14

O le ala e agai atu i le faataunuuina o lo tatou taunuuga faalelagi o ni atalii ma ni afafine o le Atua, o se ala e faavavau. Uso e ma tuafafine, uo pele, e tatau ona tatou amata e savavali i lena ala e faavavau i le taimi nei; e le mafai ona tatou faamaimauina se aso se tasi. Ou te tatalo ina ia tatou le faatalitali lava seia tatou sauni e oti ae tatou te lei aoao moni lava e ola. I le suafa paia o Iesu Keriso, amene.