Ke Auli ac Eklac Wo

Sel President Dieter F. Uchtdorf

Mwet in Kahsruh Ahkluo ke Prestuhnsi Se Met


Yohkiyen miniyuck lasr in suk ke ma muhtahl ac engan uh, kuht ac fah tiac fahsr ke inkacnek luhn auli.

Ke Auli

Prestuhn Monson, kuht luhngse kom. Kuloh ke mwe fahkwack ma mokleyuck ac wolacna ke muhsah luhn tempuhl sasuc ac kuhlwacnsap luhn misineri. Ke srihpen ma inge, nga etuh na pwacye lah mwe insewowo yohk ac fah tuhkuh nuh yohrohsr ac nuh sin fihl pucspucs tohkoh.

Tamuhlwel ac tahmtahel sacohk wiyuck, kawuck sacohk wiyuck! Kuht nuh kwewa moul. Nga finsrak ma inge in tiac ahklutye kuhtwena mwet.

Wacngihn sesr ac fah muhta arlac paht fin facluh. Oasr kuhtuh yac yohk srihpac lasr, suc, ke liye luhn ma pahtpaht, oacna sie sahrlah luhn muhta.

Na kuht som. Nguhnasr som nuh ke lohm sin God suc use moul lasr.1 Kuht fihliyac mahnosr nuh inkuclyuck uh ac kuht som liki ma luhn facluh ke kuht som nuh ke acn se tohkoh luhn inkacnek pwacye lasr.

Ke kuht fuhsr uh, oacna in luhman kuht ac moul pahtpaht. Kuht nuhnkuh lah oasr lwen pucspucs in tuhkuh, ac ma soenna sikyak luhma oacna inkacnek suwohs lah tiac ahksahfyelah.

Tuhsruhktuh, ke kuht mahtuhlah, kuht muhtwacwacack in akihlen ac ahklutyeyuck ke fototoiyacn inkacnek uh. Kuht motko lah yac uh sa som fuhkah. Ac kuht muhtwacwacack in nuhnkuh ke sulwaclah lasr kuht orwaclah ac ma kuht orwaclah tari. Ke ma inge, kuht esam pacl wowo ma use ahkfucsrfucsryeyuck nuh nguhnasr ac engan nuh insiyacsr. Tuhsruhktuh kuht oacyacpac esam auli uh—ma kuht finsrak kuht in kuh in fohlohk ac ekuhllah.

Nurse se suc karihngihn mwet suc ac misac fahk lah el kwacna siyuck kihsen siyuck fihsracsr se ke mwet mas lal suc ahkoeyucklac in som liki moul se inge.

“Oasr kuhtwena alui lom?” el ac siyuck.2

In oasr fototo nuh ke lwen sahflah luhn moul uh kwacna use ahknwacsnwacsyeyuck ke nuhnak uh ac liyeyuck wo. Na ke mwet inge siyuckyuck ke auli lalos, elos ikacslah insiyaclos. Elos esamwack ke ma elos ke ekuhllah elos fin kuh in fohlohkihn pacl uh.

Ke nga motko ke ma elos fahk uh, nga lut ke ohiyacn ip yohk ke wosasuc luhn Jisus Kraist kuh in oruh fahsr luhn moul lasr nuh ke ma wo, kuht fin ac oruh ma inge.

Wacngihn ma lukmac ke ip yohk luhn wosasuc. Kuht lutlutkihn ke ma suhmuhslah, kuht sramsramkihn ke Sacnri Skul, ac kuht lohng tari sin mwet sramsram nuh sesr. Ip yohk ac ohiyac wo ma tuhkuh lucng me pa suwohswohs ac kahlwem; elos kahto, yohk, ac fokoko; ac elos kuh in kahsrwe kuht in wacngihn auli ke moul lasr uh.

Nuhmuhna Ngan Sislah Pacl Yohk yurin Mwet Nga Luhngse

Sahp inkaiyacn auli ma mwet mas muhnahslah uh fahk uh pa elos nuhmuhna elos in sislah yohk pacl lalos yurin mwet elos luhngse.

Mwet uh ahkkahlwemye puhla luhn ahsor se inge: elos “auli yohk ke elos sislah pacl yohk lalos lwen nuh kwewa nuh ke inkacnek luhn … orekma.”3 Puhs selos wacngihn pacl wo la in eis mwe esam sacohk ma tuhkuh ke sislah pacl la yurin sucu ac kawuck lalos. Elos tiac eis pacl wo in muhsahi sie kuhpahsr wo nuh sin mwet suc yohk kalmeyac nuh selos.

Yac tiac pwacye lah kuht kwacna kahfofo? Ac, mwe ahsor in fahk lac, kuht ahkfuhlwactye kahfofo lasr uh, oacna kahfofo, nuh se sifacna, pa sie ma orek wo kuh akucl luhn moul wolacna.

Pwacye?

Nga nuhnkuh ke Leum ac Mwe Srihkasrak Wowo, Jisus Kraist, ac moul fototo Lal yurin mwet Galilee ac Jerusalem. Nga srihke in motko Elan suhlahklahk inmahsrlon miting kuh ke kain in oruh ma suhlahklahk ma oasr ke tahk in ma in oreklac.

Nga tiac kuh in liyacack.

Sahyacna nga liye pahkotwen ac luhngse Wen nuhtin God moulkihn ke kais sie lwen ke sie srihpac. Ke El muhtwacta yurin mwet Siskacl, elos puhla yohk srihpac ac luhngse. El etuh ma yohk srihpac nuh sin mwet suc El ohsun nuh se. El ahkinsewowoyaclos, ac karuhnguhnuhlos. El sruhkuhlosyak, ac ahkkweyaclos. El sang mwe sang sacohk luhn pacl Lal.

Ke pacl lasr uh, fihsracsr in oruh in muh kuht sislah pacl yurin mwet sahyac. Ke itucngyac luhn computer uh kuht kuh in “tuhkweni” yurin tausin ke “kawuck” in tiac angwetwacni nuh sin kais sie selos. Technology kuh in ma wolacna se, ac wo nuh ke pacl ma kuht tiac kuh in fototo nuh yurin mwet kuht luhngse an. Nga ac muhtwacn kiyuck uh muhta loessuhlah liki mwet ke sucu sacohk lasr; kuht etuh ohiyacn ma inge. Tuhsruhktuh, nga luhlahlfongi lah kuht tiac fahsr ke inkacnek suwohs, kais sie ac in ekihn sie u, ke kuht in ohsun yurin sucu ac kawuck lasr uh pa in sruhkwack petsac tahfuhn kahs nuh ke internet, tahfwelah nuh selos sahyac email wacngihn srihpac tuh tahfuhn kahs, kuh sang mwet kuht luhngse an nuh ke site luhn Internet. Nga muh oasr acn ke mukwikwi se inge, tuhsruhktuh puhtahkah pacl kuht ke sislah kac uh? Kuht fin tiac sang pacl yohk lasr sifacna ac tiac orwaclihk pacl nuh ke ma yohk srihpac na pwacye nuh sesr uh, sie lwen kuht ac auli kac.

Lwelah kuht in orwaclah in ahkfuhlwactye mwet suc kuht luhngse, sislah pacl yohk kalmeyac nuh selos, oruh ma tuhkweni, ac orwaclah mwe esam wowo.

Nuhmuhna Ngan Moulkihn Kuhiyuck ah

Sie pac mwe auli luhn mwet pa elos tiac sun mwet se elos puhla elos kuh ac enenuh in oruh. Ke elos nuhnkuh ke moul lalos, elos akihlen lah elos tiac moulkihn nuh ke ma elos kuh, lah ma pucspucs tiac ahksahfyeyucklac.

Nga tiac sramsram inge ke fanuhkyacn mwe fan luhn orekma wo ke orekma lasr. Orekma se inge, finne luhman yohk ke facluh se inge, pa ma srihk ke kowos liye fuhfahsryucsr luhn ma pahtpaht ma soano kuht.

Tuh, nga sramsramkihn in sun mwet se ma God, Pahpah tuhmasr Inkuhsrao, el kena kuht in sun.

Kuht tuhkuh nuh facluh se inge, oacna mwet sihm se fahk, “us wolacna yohk”4 ke sie facluh met ah.

Pahpah tuhmasr Inkuhsrao el liye ma kuht kuh in oruh. El etuh ma nuh kwewa kacsr finne ma kuht nihkihn. El kai kuht ke moul lasr in ahkfalye moul lasr, in moulkihn sie moul wowo, ac fohlohk nuh ye Muhtahl.

Na, efuh, kuht sang yohk pacl ac kena lasr nuh ke ma lusrohngtwen, ma srihk, ac ma suhloal? Kuh kuht sruhnga liye ke kuht oasr ke inkacnek lusrohngtwen ac tiac yohk srihpac?

Yac e tiac lahlmwetmwet in “elohsack mwe kahsruhp nuh suwos [inkuhsrao], yen watihl ac ras [tiac] kuhnaoslah, ac mwet pihsrapasr elos [tiac] kuhnaoslah acn ma oan we ac pihsraclah”?5

Kuht oruh ma inge fuhkah? Ke ukwe srihkasrak luhn Mwet Lahngo, in moulkihn mwe luti Lal ke moul lasr uh lwen nuh kwewa, ac luhngse suwohs God ac mwet tuhlan lasr.

Kuht tiac kuh in sun mwet tuhma lutlut kuht fin tohrkahskahs ke ma kuht enenuh in oruh uh, kuh motko ke pacl uh.

Ke moulkihn wosasuc an, kuht enenuh in tiac oacna tuhlihk mukul se ma isongyac kufun niyacl ke kof an ac fahk muh el som kofkof. Ke srihpen kuht pa tuhlihk nuhtin Pahpah tuhmasr Inkuhsrao, kuht kuh in oruh yohk likina. Ke ohingacn, luhngse oruh uh suhfal. Kuht enenuh in oruh. Yohk srihpac likina inge, kuht enenuh in oacna ma Pahpah Lucng El kena kuht in oruh uh.

Fahkwack luhlahlfongi lasr ke wosasuc pa wo uh, tuhsruhktuh moulkihn sie srihkasrak suwohs ke wosasuc fohlohkihnyuckyak pa wo likina. Finsrak in luhlahlfongi yohk ke olwelah lasr uh pa wo; tuh in oaru ke olwelah muhtahl—wi moulkihn moul nwacsnwacs, moli sie tahfuh singucul, karihngihn Kahs in Lahlmwetmwet, ac kuhlwacnsap nuh sin mwet suc enenuh pa wo likina. Fahkwack lah kuht ac sang pacl yohk nuh ke pruhe in sucu, lutlut ke ma suhmuhslah, ac oruh mukwikwi pwacr yurin sucu pa wo; tuhsruhktuh in oaru in oruh na pwacye ma inge ac fah use mwe insewowo luhn inkuhsrao nuh ke moul lasr uh.

Mwet tuhma lutlut pa srihke in oasr ohiyac muhtahl ac engan. Pa sie inkacnek nuh ke ohiyacsr suwohs ac engan.

Lwelah kuht in sulwaclah in ukwe Mwet Lahngo ac oaru ke orekma in sun mwet se kuht orweyucklac in oacna. Lwelah kuht in lohng ac ahkos mokleyuck luhn Nguhn Muhtahl. Ke kuht oruh ohinge, Pahpah Lucng lac fah ahkkahlwemye nuh sesr ma kuht nihkihn kacsr sifacna. El ac ahkkahlwemye inkacnek uh ac kol kuht in liye ma kuht nihkihn ac sahp talan ma tiac motkweyuck.

Ke kuht sang pacl yohk nuh ke sokwack luhn ma muhtahl ac engan, kuht tiac fahsr ke inkacnek luhn auli. Luhpan luhlahlfongi lasr ke kuhlwacng luhn Mwet Lahngo, pa luhpah se kuht ac puhla kuht oasr kac ke inkacnek soko ma Pahpah tuhmasr Inkuhsrao kena kuht in fahsr kac.

Nuhmuhna Ngan Lwelah Ngan Engan Likina Met Ah

Sie pac mwe auli se sin mwet suc etuh elos ac misac sahp ac fah ahklutye kuht. Elos nuhmuhna elos in lwelah elos in engan likina met ah.

Kuht kwacna nuhnkuh lah oasr ma se soanwekuht ke pacl fahsr uh lah ac fah use engan yohk: ohiyacn sucu wo likina, ohiyacn ip luhn mani ma wo likina, kuh sahflahiyacn srihke luhn ma upac.

Ke kuht mahtuhlah, kuht liye moul lasr uh ac akihlen lah ma sikyak raunikuhtlac tiac yohk srihpac kuh oruh engan lasr uh.

Kuht yohk srihpac.Kuht sulwaclah engan lasr uh.

Kowos ac nga pa mwet suc sulwaclah engan lasr sifacna uh.

Muhtwacn kiyuck, Harriet, ac nga luhngse kahsruhsr ke pwacskuhl okwacsr ah. Ma na wolacna se in liye kahtoiyacn acn uh. Oasr inkacnek ma kuh luhngse na pwacskuhl kac, tuhsruhk kuht tiac lohacng nuh kac lah fuhkah loesiyac ac muhiyacn kahsruhsr lasr uh liki na mwet pwacskuhl sahyac ah.

Tuhsruhktuh, kuhtuh pacl uh nga nuhnkuh kuht in akuhtuhn. Nga muh kuht kuh in ahkfototoye pacl lasr uh kuht fin lihksreni kahsruhsr. Na kuhtuh pacl uh nga tahfonglac fahk nuhnak se inge nuh sin muhtwacn wolacna se kiyuck.

Atacn topukyac sel ke ohiyac se inge kuhlwacng, kahlwem, ac suwohs nuh pwacye pacl nuh kwewa. El isracsr srihsrihk ac fahk, “Dieter, tiac akuhtuhn se; fuhfahsryucsr se. Engankihn pacl uh.”

Fuhkah pwacyeiyacl!

Kuhtuh pacl uh ke moul uh, kuht lohacng yohk in ahksahfyelah sie ma oruh kuht tiac konwacack engan ke fuhfahsryucsr uh. Nga tiac som wi muhtwacn kiyuck ah pwacskuhl ke srihpen nga rahrah in ahksahfyelah. Nga som ke srihpen puhlakihn se in weluhl uh wo ac pwacr.

Yac tiac atacn lahlfon in tiac puhlakihn mukwikwi pwacr ac engan ke srihpen kuht tiac tui ke tuhpanyacn pacl se e sahflah uh?

Kuh kuht lohng on kahto in soano nuh ke not sahflah in ahksahfyelah tukun kuht engankihn na pwacye uh? Moh. Kuht lohng ma selacna ke on uh, ac engankihn on nohfohn an.

Kuh kuht fahk pruhe lasr uh ke “amen” muhkwena kuh sahflah ke nuhnak lasr uh? Kuht tiac. Kuht pruhe in fototo nuh yurin Pahpah tuhmasr Inkuhsrao, in eis Nguhn Lal ac puhla luhngse Lal.

Kuht tiac enenuh in soano in puhla engan ne ke na kuht sun kuhtuh srihpac tok an, in konwacack lah engan uh oasr tari—pacl nuh kwewa! Tiac kalmeyacn moul uh pa in luhngkihn in nuhnkuh ke ma somlah. “Pa inge lwen se suc Leum God El orwaclah … ,” Mwet Suhmuhslah sihmihs. “Lwelah kuht in engan ac ahkfuhlwactye.”6

Tamuhlwel ac tahmtahel, tiac yohk srihpac ke ohiyacsr, kuh mwe srihfe kuh upac lasr, oasr sie ma ke kais sie lwen in engankihn ac luhngse. Oasr sie ma ke kais sie lwen ma use srui ac engan kuht fin liye nuh ac luhngse ma sacn.

Sahp kuht enenuh in tiac liye ke muhtahsr ac yohkiyac ke insiyacsr. Nga luhngse mwe fahk se: “Mwet se liye suwohs ke at lal muhkwena. Ma yohk srihpac tiac kuh in liyeyuck ke muhta.”7

Kuht sapkihnyuck in “sang kuloh ke ma nuh kwewa.”8 Na wo likina in liye ke muhtahsr ac insiyacsr ma srihk kuht kuh in kulohkihn kac, likina tiac ahkyohkye ma koluk ke pacl se inge?

Leum el olwelah lah mwet se ma eis ma nuh kwewa in kulohkihn fah ahkfuhlwactyeyuck, ac ma luhn facluh fah ituckyang nuh sel ke pacl siofok yohk liki.9

Tamuhlwel ac tahmtahel, ke mwe insewowo yohk sin Pahpah tuhmasr Inkuhsrao, plwacn kuhlwacng luhn molwelah Lal, ma pwacye yohk ke wosasuc fohlohkihnyuckyak, ac ma kahto pucspucs ke fuhfahsryucsr luhn moul inge, tuh pwacye lah oasr srihpac in engankihn?10

Lwelah kuht in engan, finne ke ohiyac sikyak nuh sesr uh.

Ke Eklac Wo

Sie lwen kuht ac fahsr nuh ke moul tohkoh likina moul se inge ke facluh se inge. Sie lwen kuht ac liye moul lasr uh ac motko kuht fin kuh in oruh wo likina, sulwaclah wo likina, kuht orekmakihn pacl lasr uh wo likina met ah.

In eslah kuhtuh auli yohk inge luhn moul, tuh enenuh in lahlmwetmwet in oruh kuhtuh sulwaclah wo mihsenge. Pwacnwacng, lwelah kuht in:

  1. Akiyac in sislah yohk pacl yurin mwet suc kuht luhngse.
  2. Akiyac in srihke in oaruyak kuhtuh in oruh sie mwet suc God El luhngse kuht in oacna.
  3. Akiyac in sokwack ohiyacn engan, finne ke ohiyac sikyak nuh sesr uh.

Pa fahkwack luhlahlfongi luhk lah puhs sin auli yohk lutu uh kuh in karihngihnyuckyang in ukwe Mwet Lahngo mihsenge. Kuht fin oruh ma koluk kuh tahfonglac—kuht fin orwaclah sulwaclah muh kuht inge auli—oasr mwe sang se ke Iwaclah luhn Kraist, tuh kuht kuh in eis nuhnak muhnahs kac. Kuht tiac kuh in fohlohk nuh ke pacl met ah ac ekuhllah pacl somlah ah, tuhsruhktuh kuht kuh in auliyak. Mwet Lahngo el kuh in eslah puhla lasr luhn auli11 ac eslah ma toasr luhn ma koluk lasr.12 Iwaclah Lal lwelah kuht in som liki ma sikyak tari ac fahsr nuh met ke paho nwacsnwacs, insiyac nwacsnwacs,13 ac moniyuck se in oruh wo liki ac yohkiyac na in wolac.

Ahok, moul se inge muhi; lwen lasr uh atacn sana eflah; ac misac use puhla sahngweng ke kuhtuh pacl uh. Tuhsruhktuh, nguhn lasr fah tahfwelah in moul ac sie lwen fah sulpac moulyak ke mahno suwohs in eis moul ma pahtpaht. Nga fahkwack lah ke srihpen Kraist suc pahkomuhta, kuht ac sulpac moul ma pahtpaht. Ke srihpen Mwet Lahngo ac Mwet in Molwelah lasr, sie lwen kuht ac kahlwemwack na pwacye ac engankihn kalmacn kahs inge kweok luhn misac itucklac sin Kraist.”14

Inkacnek nuh ke ahkfalye wolacna lasr ke tuhlihk nuhtin God pa sie ma pahtpaht. Tamuhlwel ac tahmtahel sacohk wiyuck, kawuck sacohk, kuht enenuh in fahsr ke inkacnek pahtpaht se inge mihsenge; kuht tiac kuh in lwelah sie lwen in wacngihn srihpac. Nga pruhe tuh kuht in tiac soano nuh ke pacl kuht ahkolah in misac met liki kuht etwaclah na pwacye in moul. Ke ine muhtahl luhn Jisus Kraist, amen.

Mostrar referencias

  1.  

    1. Liye Alma 40:11.

  2.  

    2. Liye Susie Steiner, “Top Five Regrets of the Dying,” Guardian, Fepweri 1, 2012, www.guardian.co.uk/lifeandstyle/2012/feb/01/top-five-regrets-of-the-dying.

  3.  

    3. Bronnie Ware, in Steiner, “Top Five Regrets of the Dying.”

  4.  

    4. “Ode: Intimations of Immortality from Recollections of Early Childhood,” The Complete Poetical Works of William Wordsworth (1924), 359.

  5.  

    5.  Mattu 6:20.

  6.  

    6.  Psalm 118:24.

  7.  

    7. Antoine de Saint-Exupéry, The Little Prince, trans. Richard Howard (2000), 63.

  8.  

    8. Liye Mosiah 26:39; liye pac Doctrine and Covenants 59:7.

  9.  

    9. Liye Doctrine and Covenants 78:19.

  10.  

    10. Liye Alma 26:35.

  11.  

    11. Liye Fwackyuck 7:17.

  12.  

    12. Liye Mattu 11:28–30.

  13.  

    13. Liye Psalm 24:4.

  14.  

    14. Liye Mosiah 16:8; liye pac 1 Mwet Korint 15:54.