Dua na iKalawa Voleka Cake vua na i Vakabula

Mai vei Russell T. Osguthorpe

Peresitedi Raraba ni Wilivola ni Sigatabu


Na saumaki sa ikoya na inaki taucoko ni vulica na kosipeli kei na veivakavulici. Na saumaki e sega ni dua ga na ka e yaco. Sa ikoya e dua na vakasaqaqara ni bula taucoko meda yaco vakalevu cake sara meda vakataka na i Vakabula.

Au a vola e dua na ka lekaleka ka basika mai ena Liaona kei na Ensign ena vulai katakata se qai cava ga oqo. A imeli mai vei au na luvequ tagane ka kaya, “Ta, de rawa mo tukuna mai vei keitou na gauna o dau vola kina e dua na ka me na tabaki.” Au sauma lesu, “Au via vakadeitaka ga kevaka o dau wilika tiko na mekasini ni Lotu.” A vakamacalataka lesu mai ni luvena gone yalewa yabaki 10 sa dau “wilika tiko na mekasini ni Lotu. A taura mai na Ensign ena katonimeli, lako mai vale, ka mai wilika. A qai gole mai ena neirau rumu ka vakaraitaka vei keirau na ka o vola.”

E baleta ni vinakata me vuli na makubuqu gone yalewa e dau wilika kina na Ensign. A cakava sara ga vakaikoya mai na vakayagataka na nona galala ni digidigi. A qai vakadonuya walega oqo na Mataveiliutaki Taumada na ivurevure vou ni vuli vei ira na itabagone ka na tokona na gagadre vakatamata ni itaba gone mera vuli, bula, ka wasea na kosipeli. Na ivurevure vou oqo e sa rawa me na raici ena kompiuta. Ena Janueri eda sa na tekivu vakayagataki ira ena valenivuli. (Vulica vakalevu cake na ivurevure vou ni vuli me baleti ira na itabagone ena lds.org/youth/learn.)

Ena veivakavulici ni i Vakabula, e ka bibi duadua na nona galala ni digidigi o koya me vuli. E sega ni vakaraitaka walega o Koya na veika me vakavulici ia na kena vakavulici vakacava. A vakatabakiduataka o Koya na nodra gagadre na via vuli. A vukei ira vakayadua mera raica na dina me baleti ira.1 E dau rogoca o Koya na nodra taro.2

Na ivurevure vou ni vuli oqo ena vukei keda kece sara meda vuli ka veivakavulici ena sala ni i Vakabula ena noda veivuvale kei na noda valenivuli.3 Ena noda vakayacora, eda sa na malele tiko ki na Nona veisureti meda “lako mai, mo muri au,”4 me vaka ga na ivakavuvuli totoka nei Elder Robert D. Hales. Ena kena vakatorocaketaki na ivurevure vou oqo, au raici ira na iliuliu kei na qasenivuli ena veimataisoqoso kei na semineri nodra veivakasalataki vata kei ira na itubutubu me rawa ni ra rawata na nodra gagadre o ira na vuli. Au sa raici ira na gone yalewa ena nodra kalasi, o ira na gone tagane ena nodra kuoramu ni Matabete i Eroni, kei na itabagone ena Wilivola ni Sigatabu nodra vulica mera vakayagataka na nodra galala ni digidigi ka ra lewa na ka mera kitaka.

A lomatarotarotaka e dua na qasenivuli ni Wilivola ni Sigatabu ni itabagone ena nodrau vukei vakacava e rua na gone tagane leqa nodrau vakasama na vakayagataki ni nodrau galala ni digidigi ka cakava vakairau. Ena nona sureti ira na lewenikalasi mera wasea na veika era sa vulica, e sa lomaleqataka de rau na besetaka o rau na gone tagane oqo na nona veisureti. Ia a sega. A tucake e dua ka vakavulica na veika e sa vulica ka qai sureti nona itokani leqa nona vakasama me vukei koya. Ena nona sa tekivu tovolea vakaukauwa o kena imatai, sa tu vata kei koya o nona itokani ka vakasolokakana e daligana me rawa ni vakauqeti koya. E rau a veivakavulici ruarua ena siga o ya. Rau a vakavulica na veika a vakavulica na i Vakabula, ia e rau a veivakavulici tale ga ena mataqali veivakavulici ni i Vakabula. Ena nona veivakavulici na i Vakabula, a cakava o Koya mai na loloma me baleti ira vakayadudua a vakavulici ira tiko o Koya, me vaka ga a cakava o nona itokani vakavuli vei koya nona itokani.5

Ena noda vulica ka vakavulica Nona vosa ena Nona ivakarau, eda sa ciqoma Nona veisureti meda “lako mai, mo muri au.” Meda muri Koya me dua na ikalawa ena dua na gauna. Ena ikalawa vakayadua, eda sa toso voleka cake yani vua na i Vakabula. Meda veisau. E kila na Turaga ni sega ni yaco mai vakatotolo na tubu vakayalo. E lako tiko mai vakamalua. Ena gauna vakayadua eda ciqoma kina na Nona veisureti ka digitaka meda muri Koya, eda sa toso cake sara ena gaunisala ki na taucoko ni saumaki.

Na saumaki sa ikoya na inaki taucoko ni vulica na kosipeli kei na veivakavulici. Na saumaki e sega ni dua ga na ka e yaco. Sa ikoya e dua na vakasaqaqara ni bula taucoko meda yaco vakalevu cake sara meda vakataka na i Vakabula. E tukuna tale vei keda o Elder Dallin H. Oaks na noda “kila” e sega ni rauta. “Meda ‘saumaki’ … o koya e gadrevi kina meda cakava na ka ka rawata sara.6 Na vulici ni saumaki e dua na tomani ni cakacaka ni kila, cakava, ka rawata sara. E tautauvata, na vakavulici ni saumaki e gadrevi kina na idola ni vunau, veisureti ni kena cakacakataki, kei na veivakalougatataki yalataki.7 Ena noda vakavulica na ivunau dina, eda sa vukei koya e vuli me kila. Ena noda sureti ira eso ena kena cakacakataki, eda vukei ira mera cakava vaka kina se bulataka na ivunau. Kei na gauna e lako mai kina na veivakalougatataki a yalataka na Turaga, eda sa veisau. Me vakataki Alama, e rawa ni yaco meda buli vou.8

Na ivurevure vou ni vuli me baleti ira na itabagone e dua tiko na kena inaki tudonu: me vukei ira na itabagone mera yaco mera saumaki ki na kosipeli i Jisu Karisito. Walega oqo au raica e dua na gonetagane ena kalasi ni Wilivola ni Sigatabu ni itabagone nona kunea na dina me baleti koya. Ena noqu kidava na dredre ni nona vakasamataka tiko e dua na ka a sotava mai na nona bula vakaikoya ka semati vata ki na Veisorovaki, au a tarogi koya kevaka e sa bau vakila ena dua na gauna na veivosoti. A sauma lesu mai: “Io, me vaka ga na gauna o ya noqu a vakamavoataka na ucuna e dua na cauravou ena neitou qito soka tiko. Au sa maduataka sara ga. Au lomatarotarotaka se cava meu cakava me vinaka kina na yaloqu. Au a mani gole ki na nona vale ka kerea vua me vosoti au, ia au kila ni gadrevi meu cakava eso tale na ka, au mani qai masu, au sa qai vakila ni Tamada Vakalomalagi e sa vosoti au talega. Kivei au sa ikoya oqo na ibalebale ni Veisorovaki.”

Ena nona wasea ena kalasi ni siga o ya na veika a sotava oqo, a wilika mai na Joni 3:16—“Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura”—ka qai vakadinadinataka na kaukauwa ni Veisorovaki. Na ivunau oqo a sega tale vakadua ni kunei me yali mai vua na cauravou oqo. A yaco me tiki ni nona bula baleta ni a taroga na nona taro ka vakayagataka na nona galala me vakayacora.9

Sa yaco me veisau sara vakalevu na cauravou oqo, ka vaka kina o ira na nona lewenikalasi. Era vakatabakiduataka ena dua na idola ni vunau mai na vulici ni ivolanikalou. Era semata vata na vosa tabu oqori ki na nodra dui bula ka qai vakadinadinataka na veivakalougatataki e lako mai vei ira ena vuku ni kena bulataki na ivakarau ka rau duavata kei na ivunau. Ena noda vakavulica na kosipeli i Jisu Karisito, eda vakatabakiduataka ena ivolanikalou kei na nodra vosa na parofita ni gauna oqo. Eda vakararavi ena tikinivosa tabu me vukea na vakaukauwataki ni vakabauta, tara cake na ivakadinadina, ka vukei keda vakayadua meda yaco me taucoko na noda veisau. Na ivurevure vou ni vuli me baleti ira na itabagone ena vukei ira taucoko era vakayagataka mera kila ka bulataka na vosa ni Kalou.

Ena noqu vakavulici ira tiko na Yalododonu e Costa Rica, au taura cake e dua na ilavelave ni Veituberi, Me iLutua ni Bula ka taroga, “Io, o ni lewe vica sa tiko vei kemuni na ilavelave ni ivolavakarau oqo?” E voleka ni o ira kece era laveliga. Ena matadredredre, au kaya, “Au kila o ni sa wilika tiko ena veisiga yadua.” Au kurabui, e dua na marama ena iyatu e liu a laveliga, vakaraitaka ni sa wilika tiko e veisiga. Au kerei koya me lako cake mai ena itutu ni vunau ka mai vakamacalataka. A sauma lesu, “Ena veimataka au wilika na iVola i Momani. Ia au a qai wilika eso na ka ena Veituberi, Me iLutua ni Bula me rawa kina niu vakavulici ira na luvequ ena veika au sa qai vulica ena kena sala uasivi duadua.”

A vinakata me vulica ka vakavulica Nona vosa ena Nona sala, a mani vulica kina na Nona vosa ena ivolanikalou ka qai vulica me vakavulica vakacava na Nona vosa me rawa kina vei ira na luvena mera veisau. Na nona ituvatuva ni vulici ni kosipeli kei na veivakavulici era a sega ni yaco taucoko vata ga, au vakabauta, ena dua na gauna. A vakatulewataka me cakava e dua na ka. Kei na levu ga ni ka a cakava ena nona kila ni dodonu me cakava, na levu cake ga ni vakaukauwataki koya na Turaga me lako ena Nona sala.

Ena so na gauna na gaunisala ki na veisau e rawa me sa rui yawa ka dredre. Sa luluqa tu ena Lotu na tavalequ ena 50 na yabaki. Me yacova sara nona 60 vakacaca sa qai tekivu me ciqoma tale na veisureti ni i Vakabula me lesu tale mai. E vuqa sara era sa vukei koya tiko. E dua na dauveituberi vakavuvale e dau vakauta vua e dua na itukutuku vakaivola ena meli ena veivula yadua ena 22 na yabaki. Ia me vakatulewataka nona via lesu tale mai. Me vakayagataka na nona galala ni digidigi. E gadrevi vua me taura na imatai ni kalawa—ka mai dua tale, ka dua tale. Ena gauna oqo e rau sa vauci vata vakaveiwatini, ka sa veiqaravi tiko ena matabisopi.

Keitou a vakaraitaka wale ga oqo vei koya na iyaloyalo ka vakatorocaketaki kina nodra vukei na iliuliu kei na qasenivuli mera vakayagataka na ivurevure vou ni vuli. Ni mai cava na sara iyaloyalo, a ravita sobu nona idabedabe o tavalequ ka kaya, me vaka ena yalo e luvuci. “Kevaka beka me a tu na kena oqori vei au ena gauna au se gone kina, ke a sega ni yaco meu luluqa.”

Ena vica na macawa sa oti au sotava e dua na gone tagane ka a leqa vakalevu tu. Au a taroga kevaka e lewe ni Lotu. A kaya vei au ni a vakatitiqataka na Kalou, ia na gauna ni nona bula e liu e a veitokani vata tu kei na Lotu. Ena noqu kaya vua me baleta na noqu ilesilesi ena Wilivola ni Sigatabu kau na vosa tiko ena koniferedi raraba, a kaya, “Oi, kevaka o na vosa tiko, au sa na sarava na soqoni oqori.” Au nuitaka ni sa na sarava tiko nikua. Au kila kevaka e sarava tiko, e sa na vulica eso na ka. Na Vale ni Koniferedi oqo e sa rui vanua kilai tani duadua ni vuli kei na veivakavulici ni saumaki.

Ena noda bulataka na ivakavuvuli era vakavulica mai o ira eda tokona mera parofita, daurairai, ka dauvakatakila, eda vulica ena sala ni Vakabula.10 Eda cavuta e dua na ikalawa voleka sara Vua. Ni sa na mai cava na koniferedi oqo, au sureti kemuni vakayadudua sara o ni rogoca tiko mai na domoqu mo ni cavuta na ikalawa o ya, mo ni ciqoma na veisureti ni Turaga mo “lako mai, mo muri au.” Me vakataki ira na Nifai ena gauna e liu, e rawa meda lesu tale ki na noda “veivale ka vakasamataka e lomamudou na veika … au [sa] tukuna, ia mo dou kerea vei Tamaqu, ena yaca[i Karisito] me [da]vakatakila na kena ibalebale.”11

Eda vinakati ira na tamata gone yadudua mera kila. Eda vinakati ira mera vuli, veivakavulici, ka bulataka na kosipeli i Jisu Karisito ena veisiga yadua. Oqo na ka e vinakata na Turaga me baleti keda kece sara na Luvena. Kevaka o dua na gonelailai, dua na itabagone, se dua na uabula, au sureti iko mo lako ka muri Koya ka muria na Nona ikalawa. Ena noda cavuta vakayadua na ikalawa, au vakadinadinataka ni Turaga ena vakaukauwataki keda. Ena vukei keda o Koya meda lakova na iotioti ni gaunisala. Ena gauna e basika mai kina e dua na veivakataotaki, eda na lako tiko ga. Ni basika mai na vakatitiqa, eda na lako tiko ga. Eda na sega ni lesu tale imuri. Eda na sega vakadua ni lutu tani.

Au vakadinadinataka ni bula tiko na Kalou na Tamada kei na Luvena, o Jisu Karisito. Au vakadinadinataka ni i Vakabula e tomana tiko Nona kerei keda me vaka a cakava ena veigauna e liu meda lako mai Vua. E rawa vei keda kece meda ciqoma Nona veisureti. E rawa vei keda kece meda vuli, veivakavulici ka bulataka na Nona vosa ena Nona sala mai na dua noda ikalawa me voleka cake yani vua na i Vakabula. Ena noda vakayacora, eda na yaco meda veisau vakaidina. Ena yaca i Jisu Karisito, emeni.

Show References

  1.  

    1. Raica na Joni 3:1–7. Ena ilakolako oqo na i Vakabula a sauma na taro a taroga vakaikoya o Nikotimo. A vakavulica me vaka na veika a gadreva o Nikotimo. A vakatarai Nikotimo me vakayagataka na nona galala ni digidigi me vuli. A vukei Nikotimo o Koya me kunea na kena isau me baleti koya.

  2.  

    2. Raica na Joni 3:4; Josefa Simici—iTukutuku Makawa 1:18.

  3.  

    3. Raica na “Teaching the Gospel in the Savior’s Way,”lds.org/youth/learn/guidebook/teaching.

  4.  

    4. Raica na Luke 18:18–22.

  5.  

    5. Raica na 1 Joni 4:19.

  6.  

    6. Dallin H. Oaks, “Na Bolebole Mo Rawata,” Liaona, Janu. 2001, 41: “Na ivakadinadina sa ikoya na kena kilai kei na kena tukuni. Na kosipeli e vakavulica vei keda meda ‘saumaki,’ o koya e gadrevi kina meda cakava na ka ka rawata sara. Kevaka eso vei keda sa vakararavi tu ga ena noda kila ka kei na noda vakadinadinataka na kosipeli, eda sa na wili vata kei ira na kila vakatikina ga ka sa bolei ira tiko o Jisu mera ‘saumaki.’ Eda sa kila tiko e dua e kaukauwa tiko na nona ivakadinadina, ka sega ni cakacakataka me vaka ni sa veisau.”

  7.  

    7. Raica na Eparama 2:11.

  8.  

    8. Raica na Mosaia 27:24–26; 2 Koronica 5:17.

  9.  

    9. Raica na David A. Bednar, “Yadrava Tiko ena Gumatua Kecega,” Liaona, Me 2010, 43: “E daru sa vukei ira tiko beka na luveda mera yaco mera ivakalesilesi ena cakacaka ka vakasaqara mera kila ka ena vuli kei na vakabauta, se daru sa vakavulici ira tiko beka na luveda mera waraka ka vakamumuri wale tu ga? Eda sa vakabibitaka tiko beka o ikeda na itubutubu na ivakarau ni ika vakayalo mera kania, se eda sa vukei ira tikoga mera cakacakataka, ka vulica ga vakai ira, ka tudei tu ka sega ni vakayavalati rawa? Eda sa vukei ira tiko beka na luveda mera maqusa yani ena kerekere, vakasaqaqara, kei na tukituki?”

  10.  

    10. Raica na Dennis B. Neuenschwander, “Parofita, Daurairai, Ka Dauvakatakila,” Liaona, Janu. 2001, 49–51.

  11.  

    11.  3 Nifai 17:3.