Tasi le Laa e Faalatalata Atili atu ai i le Faaola

O le taumafanafana na tea nei sa faalauiloa atu i le Liahona ma le Ensign se tusiga puupuu sa ou tusiaina. Sa imeli mai lou atalii ia te au ma fai mai, “Tama, atonu e lelei lou tau maia ia i matou pe afai e i ai sau tusiga o le a faalauiloa mai.” Sa ou tali atu, “Na ou manao lava e vaai pe tou te faitauina ia mekasini a le Ekalesia.” Sa ia toe tusi mai ma faamatala mai sa “pasia le suega [a lona afafine e 10 tausaga le matua]. Sa ia aumaia le Ensign mai le pusameli, sau i le fale, ma faitau i ai. Ona ia sau lea i lo ma potu ma faaali mai ia i maua le tusiga.”

E faitau e le afafine o lou atalii le Ensign aua e fia aoao. Sa ia faatinoa lona lava faitalia. Talu ai nei na faamaonia ai e le Au Peresitene Sili ni punaoa faaleaoaoga mo talavou lea o le a lagolagoina ai se naunautaiga masani a tupulaga talavou e aoao, ola ai, ma faasoa atu le talalelei. O le a maua nei punaoa mo le iloiloina i le initoneti. O Ianuari o le a amata ai ona tatou faaaogaina i totonu o potuaoga.

Ao aoao mai le Faaola, e taua le faitalia a le tagata suesue. Na Ia faailoa mai ia i tatou e le gata i mea e aoao atu ae faapea foi le auala e aoao atu ai. Na Ia taulai atu i manaoga o le tagata suesue. Na Ia fesoasoani atu i tagata taitoatasi ia iloaina e i latou lava le upumoni.¹ Na te faafofoga e le aunoa i a latou fesili.²

O nei punaoa faaleaoaoga o le a fesoasoani ia i tatou uma ia aoaoina ai ma aoao atu i le ala a le Faaola i totonu o tatou aiga faapea ma o tatou potuaoga.³ Pe a tatou faia lenei mea, o le a tatou tali atu i Lana valaaulia ia “sau, mulimuli mai ia te au.”⁴ faapei lava ona aoao mai ma le matagofie ia Elder Robert D. Hales. Ao fatuina nei punaoa fou, sa ou vaaia taitai ma faiaoga i ausilali ma le seminare o fefautuaai faatasi ma matua ina ia latou taulimaina manaoga o a latou tagata suesue. Ua ou vaai i tamaitai talavou i totonu o a latou vasega, alii talavou i a latou korama o le Perisitua Arona, ma talavou i le Aoga Sa o faataitaia o latou lava faitalia ma fai mo i latou lava.

Sa mafaufau se tasi o faiaoga o le autalavou i le Aoga Sa pe faapefea ona fesoasoani i ni alii talavou se toalua e vaivai o laua mafaufau ina ia galulue mo i laua lava. Ina ua ia valaauliaina tagata o le vasega e faasoa mai ni mea sa latou aoaoina, sa popole o ia nei teena e nei alii e toalua lana valaau. Ae leai. Sa tu i luga le toatasi e aoao atu mea sa ia aoaoina ona valaau atu lea i lana uo a’oga e tutusa o laua vaivaiga e fesoasoani ia te ia. A amata ona faavaivai lea na muamua, ona faalatalata atu lea o lana uo ma musumusu atu i lona taliga ina ia ona lagonaina le tulaga faamanuiaina. Sa faia’oga uma i laua i lena aso. Na la aoao atu mea na aoao mai e le Faaola, ma sa la aoao atu foi i le auala na aoao mai ai le Faaola. Pe a aoao mai le Faaola, Na te faatinoina i le alofa atu mo le tagata o loo Ia aoaoina, faapei lava ona faia e lenei uo aoga mo lana uo.⁵

A tatou aoao mai ma aoao atu Lana upu i Lana ala, ua tatou taliaina Lana valaaulia ia “sau, mulimuli mai ia te au.” Tatou te mulimuli ia te Ia i le tasi le laa i le taimi. O laa taitasi, tatou te faalatalata atili atu ai i le Faaola. O le a tatou suia. Na silafia e le Alii e lei tupu le tuputupu ae faaleagaga i le taimi e tasi. Na oo lemu mai. O taimi uma lava tatou te talia ai Lana valaau ma filifili e mulimuli ia te Ia, ua tatou agaigai i luma i le ala o le liua atoatoa.

O le liua o le sini faamoemoeina lea o le aoao mai ma le aoao atu o le talalelei. O le liua e le tasi se taimi e tupu ai. O se sailiiliga i le avea atili ai faapei o le Faaola. Na faamanatu mai e Elder Dallin H. Oaks ia i tatou “o le iloa” e le na o le pau lea. “O le ‘liua’ … e manaomia ai lo tatou faia ma le avea ai.”⁶ O lea o le aoaoina ia liua o se faagasologa faifaipea o le iloa, faia, ma avea ai. Faapei foi, o le aoao atu mo le liua e manaomia ai ia aoaoga faavae autu, valaaulia e faatino, ma faamanuiaga folafolaina.⁷ Afai tatou te aoao atu le aoaoga faavae moni, ua tatou fesoasoani i le tagata suesue ia iloa. Afai tatou valaaulia isi e faatino, ua tatou fesoasoani ia i latou i le faia pe ola ai i le aoaoga faavae. Ma pe a oo mai faamanuiaga na folafola mai e le Alii, ua tatou suia. Faapei o Alema, e mafai ona avea i tatou ma tagata fou.⁸

O le punaoa fou faaleaoaoga mo talavou e tasi se sini taua: o le fesoasoani lea i talavou ia liua i le talalelei a Iesu Keriso. Sa ou vaai talu ai nei i se alii talavou i se vasega a le autalavou o le Aoga Sa o ia iloaina mo ia lava le upumoni. Ina ua ou iloaina o loo faafaigata ia te ia le fesootai atu i le Togiola i lona olaga, sa ou fesili atu ia te ia pe na te lei lagonaina i se taimi le agaga faamagalo. Sa ia tali mai: “Ioe, e pei o le taimi lea sa gau ai ia te au le isu o se alii ao matou taaalo soka. Sa ou lagona le faanoanoa. Sa ou mafaufau po o le a se mea e tatau ona ou faia e maua ai se lagona lelei. O lea sa ou alu ai i lona fale ma talosagaina lana faamagaloga o au, peitai sa ou iloaina e tatau ona ou faia nisi mea, o lea sa ou tatalo ai, ma o lea sa ou lagona ai ua faamagaloina foi au e le Tama Faalelagi. O le uiga lena o le Togiola ia te au.”

Ao ia faasoa maia i le vasega i lena aso lenei aafiaga, sa ia faitauina le Ioane 3:16—“Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi”—ona molimau mai lea i le mana o le Togiola. Sa lei toe avea lenei aoaoga faavae o se matupu ua toesea mai lenei alii talavou. A ua avea ma se vaega o lona olaga aua na ia fesiligia o ia lava ona ia faatinoina lea o lona faitalia e faia ai.⁹

Sa atili ona liua lenei alii talavou, ma sa faapea foi ma ana uo aoga. Sa latou taulai atu i se aoaoga faavae autu e ala i le suesueina o tusitusiga paia. Sa latou faatatauina na upu paia i o latou lava olaga ona molimau mai lea i faamanuiaga na oo mai ia i latou o se taunuuga o le ola ai i le aoaoga faavae. Afai tatou te aoao atua le talalelei a Iesu Keriso, ua tatou taulai atu i tusitusiga paia ma upu a perofeta o ona po nei. Ua tatou faalagolago atu i tusiga paia ina ia faamalosia le faatuatua, fausia ni molimau, ma fesoasoani i tagata uma ia liua atoatoa. O le a fesoasoani ia punaoa fou faaleaoaoga mo talavou ia i latou uma o le a faaaogaina ina ia malamalama ma ola ai i le afioga a le Atua.

Ao ou faiaoga ai i le Au Paia i Costa Rica, sa ou uuina i luga se kopi o le O Le Aoao Atu, E Leai Se Isi Valaauga E Sili Ai ma fesili atu, “E toafia outou o i ai se kopi o lenei tusi lesona?” Na toeitiiti lava o tagata uma na sii le lima. Faatasi ai ma se ataata, sa ou fai atu, “Ou te matea o loo outou faitauina i aso uma.” Sa ou tei i le siiina o le lima o se tuafafine sa nofo i le laina i luma, ma faailoa mai o loo ia faitauina i aso uma. Sa ou fai atu ia te ia e sau i le pulelaa ma faamatala mai. Na ia tali mai, “Ou te faitauina le Tusi a Mamona i taeao uma. Ona ou faitaua lea o se mea i le O Le Aoao Atu, E Leai Se Isi Valaauga E Sili Ai ina ia mafai ona ou aoao atua lau fanau i le auala sili lava e uiga i mea faatoa ou aoaoina.”

Sa ia manao ia aoaoina ma aoao atu Ana upu i Lana ala, o lea sa ia aoao ai i Ana upu i totonu o tusitusiga paia ona suesue lea i le auala e aoao atu ai Ana upu ina ia mafai ai ona liua atoatoa lana fanau. Ou te talitonu, e lei tupu faafuasei lana mamanu o le aoaoina ma le aoao atu o le talalelei. Sa ia faia se filifiliga e faia se mea. Ma o le tele o lona faia o mea sa ia iloa e tatau ona ia faia, sa faamalosia ai o ia e le Alii ina ia savali i Lona ala.

O nisi taimi o le ala i le liua e mafai ona umi ma faigata. Sa le toe toaga i le lotu mo le 50 tausaga le tuagane o lou toalua. Pe ana le oo lava i lona vaitausaga o le 60 e le amata ona ia taliaina le valaau a le Faaola e toe foi mai. E toatele na fesoasoani ia te ia i luga o le ala. Na auina atu ia te ia e se tasi o faiaoga o aiga se kata e lafo atu i le meli i masina uma mo le 22 tausaga. Peitai o ia e tatau ona filifili pe fia toe foi mai. E tatau ona ia faatinoa lona faitalia. E tatau ona fai le laasaga muamua—sosoo ai ma le isi.” O le taimi nei ua faamauina faatasi i laua ma lona toalua ma o loo i ai o ia i le au epikopo.

Na matou faaalia ia te ia talu ai nei ni vitio ua mamanuina e fesoasoani i taitai ma faiaoga i le faaaogaina o punaoa fou faaleaoaoga. Ina ua uma ona ia matamata i vitio, sa ia faalagolago i tua o lona nofoa ma fai mai, ma le faagaeetia, “Masalo pe ana ou mauaina na mea ao ou talavou, semanu ou te le faavaivai.”

Sa ou feiloai atu i se alii talavou i ni nai vaiaso ua tea o loo faia se tauiviga. Sa ou fesili i ai po o ia o se tagata o le Ekalesia. Na ia tau mai ia te au o ia e le talitonu i le Atua, peitai sa i ai se taimi i lona olaga sa ia faamasani ai i le Ekalesia. Ina ua ou tau atua ia te ia lo’u valaauga i le Aoga Sa ma o le a ou lauga i le konafesi aoao, sa fai mai o ia, “Afai e te lauga, o le a ou matamata i lena sauniga.” Ou te faamoemoe o loo ia matamata mai i lenei aso. Ou te iloa afai o matamata o ia, ua ia aoaoina se mea. O le Maota Autu mo Konafesi o se nofoaga tulaga ese lea o le aoaoina ma le aoao atu mo le liua.

Afai tatou te ola i mataupu faavae o loo aoaoina mai e i latou ua tatou lagolagoina o ni perofeta, tagatavaai, ma talifaaaliga, ua tatou aoao i le ala a le Faaola.¹⁰ Ua tatou faia se laa se tasi e faalatalata atili atu ai ia te Ia. Ao lata ina faaiuina lenei konafesi, ou te valaauliaina outou uma o faalogologo mai i lou leo ina ia faia lena laa. Faapei o sa Nifae anamua, ia tatou o atu i o tatou “fale, ma mafaufau i mea ia na … fai atu ai, ma ole atu i le Tama i le suafa o [Keriso], ina ia [tatou] malamalama.”¹¹

Matou te mananao ia malamalama tagata talavou uma. Matou te mananao ia i latou ia aoaoina, aoao atu, ma ola ai i le talalelei a Iesu Keriso i aso uma. O le finagalo lea o le Alii mo Ana fanau uma. Pe o oe o se tamaitiiti, o se talavou, po o se tagata matua, ou te valaaulia outou e o mai ma mulimuli i Ona tulagavae. Ou te molimau atu, o laa taitasi tatou te faia o le a faamalolosia ai i tatou e le Alii. O le a Ia fesoasoani ia i tatou ina ia tatou o mai i le atoaga o le ala. Ma afai o le a oo mai faafitauli, o le a tatou faaauau pea. Pe a oo mai masalosaloga, o le a tatou faaauau pea. O le a tatou le toe liliu lava i tua. O le a tatou le pauu ese lava.

Ou te molimau atu o loo soifua le Atua le Tama ma Lona Alo o, Iesu Keriso. Ou te molimau atu o loo faaauau pea ona valaau mai le Faaola ia i tatou e pei lava foi ona Ia faia i taimi ua mavae e o mai ia te Ia. E mafai e i tatou uma ona taliaina Lana valaaulia. E mafai e i tatou uma ona aoao mai, aoao atu, ma ola ai i Ana upu i Ona ala e ala i le faia o se laa se tasi e faalatalata atili atu ai i le Faaola. Pe a tatou faia lenei mea, o le a liua moni i tatou. I le suafa o Iesu Keriso, amene.