2010–2019
Omes er a Rebebil er Sel Mo Teletelir
October 2012


Omes er a Rebebil er Sel Mo Teletelir

Ng kired el mo ungil omes er a rechad er a diak el dil sel teletelir er chelechang ng bai sel tir a sebechir el mo er ngii.

Rodam er ngak, ng eru el taem er a bek el rak e tial Blil Ongdibel a mo mui er a roba priesthood er a Dios sel be de kldibel e dorrenges a chedaol klumech. Ngodech el reng a domelchesiu er ngii er a chelsel tial mitelengir a re priesthood er a Ikelesia. Tial reng a ngar tial Blil Ongdibel e soiseb ra chelsel a bek el basio le kldibel er ngii a rengelekel a Dios el sechal. Kede meral mla melchesuar tial reng er chelechal kesus.

Betok el rak ra memong, ruchei ra bol dechor tial Blil Ongdibel, ea chad el uleldingel ra Temple Square ra Salt Lake City a mlara klou el ongdibel ra chelsel a Tabernacle. Ng ulerrenges a klemechir a Rodam. Ng ulemtab a nglunguuch el mildung. Ng ulerrenges a klebokel el chelitiklir a re ngara Tabernacle Choir. Ng mlo mechas a rengul ra klungel ma klebekelel tial organ el ngara Tabernacle. A bochal merek ongdibel ea rechad a rirngesii el melekoi el mo, “Ak chemoit aikel rokui el kloklek omko ak mo medengei el kmo aikel lullekoi tirkal chad a klemerang.” A meral mle belkul a tekingel a kmo, A belkul a tekingel a kmo, “A kuureng el ulekum eng mlarngii a klaumerang er ngak ra ebangkelio.”

Ng kmal diak a ngii dil ngerang er tial beluulechad el meskemiu a lmuut el ongelaod ma deureng er sel klaumerang er kau ra klemerang. Meng uaisei el kakerous a delchel aikal klaumerang, eng di a kuumerang el kmo a bek el meklou ma remekekerei el sechal el ngar tia er chelechal kesus a ngarngii a klaumerang er tir. Alsekum e komelchesiu el kmo ng dirkak bo mobang tial dmolech el klaumerang, ea kulengit me moureror el kirel tial klaumerang. Ea lsekum eng mesisiich e dmolech, e morkedii. Kede ngeltengat loba llomes ra klemerang.

A klemechek er chelechal kesus, e rodam, a kmo te kmal betook a rechad el kekerei malechub eng diak a klaumerang er tir er chelechang, eng di te sorir el mo nguu tial klaumerang omko ng blak a rengud louchais er sel dobang e ngosuterir el mengodech. A bebil ra taem ekid a sebeched el uchul blakelreng el mengodech. Ak kot el melekoi el kirir tirkel tir a chedal a ikelesia eng di diak el sal mui el blak a rengrir ra ebangkelio.

Beto el rak ra memong, ra mle temel ongdibel ra beluu ra Helsinki, ra Finland, eak rirngesii a mesisiich,el diak kubes er ngii el melisiich a reng el klumech el mildung ra temel ongdibel ra rehedil ma rengelkir redil. Ng dirkak kubes er tial tekoi, el mla mo kmeed el okeua el rak ra kot el rongesii. A bebil ra klemerang el mildung, e ngikal milngedecheduch a dilu el kmo a redil a kirel blechoel remenges el kmo ng klebokel. Ng kirel remenges el mo ng klou a belkul. Ng kirel remenges el kmo ngarngii a ultutelel.

Rodam, ak medengei el kmo a rsechal a kmal di uaia redil er tiaikid el teletael. Ng kired el remenges el kmo kede ngarngii a ultuteled, el sebeched a ngerang e meklou a belkud. Ng kirel mo er ngii a techelled el mesiou. Tirkel tir a chedal a ikelesia el diak el sal mesisiich malechub eng diak el sal sorir el mo mesisiich, a sebeched el ngara nglunguuch el mo ngosuterir. A ongit el mor tir el mo mesiou ra kmo ngerang a locha ngii a sebechel uchul ete lmuut el mo mesisiich. Eng di tirkel oungerachel el uchul okedong el mor tir a locha telkib el kmes el mesterir okedong. Ng kired el medengei el kmo a rechad a sebechir el mengodech. Ng sebechir el mo mechei a mekngit el kse er tir. Ng sebechir el ouchel a rengrir ra kngterir. Ng sebechir el mo klikiid loba priesthood. E sebechir el blak a rengrir el mesiou ra Rubak. Msall e kuuchais a bebil ra okesiu.

Sera ak kot el mo chedal a Chelchad ra Teruich ma Terung el Apostol, eng mlar ngii a techellek lobengkel a President N.  Eldon Tanner, el mle counselor ra President David O. McKay, el mlora stake conference ra Alberta, Canada. Chelsel tial miting, ea merreder ra stake a chiluiu a ngklir a reteua el odam el mla mo sebechir el mechedaol el mora obis ra elder. A President Tanner a mle medengelterir tirkal chad, ele tara taem eng kiliei er tiaikid el basio. Eng di President Tanner a mle medengei teletael ra klengar tir ruchei e dimlak lodengei el kmo te mla mengodech a klengar tir el mo sebechir el mechedaol el mo elder.

A merreder ra stake a chiliuii tial kot el ngakl e ulengit er ngii el mo dechor. A President Tanner a milngelulau er ngak el kmo, “Momes er ngii. Ng dimlak kudengei el kmo ng sebechel.” A merreder ra stake a mocha dulii a ngklel ngika el ongeru el chad, eng mlo dechor. A President Tanner a luueta el kora tibechak el mechas a rengul. Ng mle osisiu el teletael er tirka el teua el odam.

Uriur ra miting, ea President Tanner me ngak a mlo er ngii a techellam el oudkeu er tirkal teua el odam. Te meral ulechotii el kmo a chad a sebechel mengodech.

Sera 1940 el mora 1950, ea chad el ulengerachel ra blil a kelebus ra Merikel, el Clinton Duffy, a mlo merael chisel kirel a blakelreng er ngii el melodech a klengar ra rechad el mlara blil a kelebus. A ta el chad a dilu el kmo, “Ng kirem el medengei el kmo a charm a diak el mengodech a bedengel!”

Ng dula Duffy el kmo, “Ng kirem el medengei el kmo ngak a diak kuureor lobengkel a charm. A kuureror lobengterir a rechad, ea rechad a mengodech ra bek el sils.”1

Betok el rak ra memong eng mlar ngii a techellek el mo merreder ra Canada Mission. Aki mla ra branch el kesai a roba priesthood el chad. Ng mle blechoel el misionari a oungerachel ra branch. Ak mlo omelchesiu ra mesisiich el uldasu el kmo ng kirel mor ngii a chedal a branch er tial beluu el mo oungerachel.

Ng mlar ngii a tal klou el chad el chedal a branch el mle deacon ra Aaronic Priesthood eng di dimlak el sal messiich el sebechel uchul e lengesechekl ra priesthood. Ak mlo omelchesiu el mekodongii el mo merreder ra branch. Ak lotkii sel sils ra kungudecheduch er ngii. Ak dilu er ngii el kmo a Rubak a mla mekrolak el mo mekodongii el mo merreder ra branch. Uriur er a le sal di kotouar, ea bechil le sal melisiich er ngii, eng dula el kmo ng mora omesiou. Ak mocha chemedolii el mo prist.

Ng mle uchelel a beches el sils er ngika el chad. A bechil meng mlo ulterekokl a ngerchelel, e ngii el chad a dula er ngak el kmo ng kmal mo oltirakl a llach el ngii a medengei el kmo ng kirel loltirakl. Sesei el buil ruriul eng milchedaol el mo elder. Ngii ma bechil ma rengelekir a mlora templo e moak el telungalek. A rengelekir a oketa mlora mission e mlo bechiil ra blil a Rubak.

Bebil ra taem ea rodam er kid sel lodengei el kmo te usbechall e meklou a belkrir eng sebechel ngosuterir el nguu a telbakes ra blakelreng e mui el mesisiich. Tia kmal klemerang el mora roba priesthood el diak el iior ra klungel. Ng ngercheled el mesterir a techall el kirel sel tir a kirir el ngarngii. Ng sebeched el ngosuterir el mo mesisiich ra ikel chelitecheterir. Ng kired el diak di domes er tir er chelechang ng bai sel ngii a sebechir el morngii sel lenguu a klaumerang ra ebangkelio ra Kristo.

Ng mle tal kngara miting ra Leadville, Colorado. A Leadville a ngara kora kedidai el kmeed el teruich el telael sak a klemengetel (3,000m). A kmal lotkii tial miting el tial kldidiul tial basio a uchul, e dirrek el lotkii tial miting ra dilubech er sel kesus. Te di mle mekesai el oba priesthood a mlar ngii. Meng di uaia branch ra Canadian Mission, el misionari mle blechoel loungerachel ra branch.

Ng mle klebokel a mitelengam er sel kesus, eng di tia ra ki mongitakl el mocha mengesimer, ea uldasu a mlei er ngak el kmo ng kirel mor ngii a chad er tial beluu loungerachel ra branch. A kulebult el bedul a merrede ra mission e uleker, “Ng diak a ngar tia el sebechel loungerachel—el chad er tial beluu?”

Ng ulenger, “Ng diak a kudengelii.”

Chelsel omengitakl ea kulchemeraech lomes er tirkal sechal dengchokl ra ikel kot el edei el kingall er medal. Ng tilab osengek ra ta er tirkal odam. Ak dula ra merreder ra mission el kmo, “Ng ke ng locha sebechel mo merreder ra branch?”

Ng dula el mo, “Ng diak kudengei. Ng locha sebechel.”

Ak dulang, “President, Ak nguu el mo er sel ta ra delmerab e mengedecheduch er ngii. E kau a mo mengedecheduch ruriul ra chelitakl el di mereko ki mei.”

Tia ra ki mluut el merma soiseb, ea merreder ra mission a mocha merekui ra cheldechedechal. A kuldersii a ngakl er ngika el odam el mo beches el merreder ra branch. Seikid el mel muut er chelechal sils, ea Leadville, Colorado, a ngarngii a chad er tial beluu el oungerachel ra orretel.

Osisiu el teletael, e rodam, a mo er tirkel dirkak el bol chedal a ikelesia. Ng kired el diak di domes er tir er chelechang kede bai omes er sel tir a sebechir el mor ngii sel bocha el chedal a Ikelesia, el oba klaumerang ra ebangkelio, ea klengar tir a ultuil ra osisechakl ra ebangkelio.

Sera rak ra 1961, ea klou el ongdibel ra beluulechad a mlarngii el mora remerredelel a mission, ea bek el merreder ra mission ra Ikelesia a mlora Salt Lake City el mora miting. Ak mlaramission ra Toronto, Canada e sola mlei ra Salt Lake City.

Chelsel a tal miting, ea N.  Eldon Tanner, el ngii a mle Assistant ra Chelechad ra Teruich ma Terung, a kmal dirk ke mlei el ulungerachel aikel mission el ngara Great Britain ma dims ra Europe. Ng ulechais el kirel a tal misionari el kmal mle ungil misionari el bla lesang ra ikel bek el cheldecheduch loruul lobengterir. Ng dilu el kmo sera longedecheduch er ngika el misionari, eng silbedii el kmo, “A kumdasu el kmo tirkel rokui el chad el mla nguu a techolbechelid a locha mlei lokiu a rechedal a Ikelesia.”

Ngkal ngeasek el chad a ulenger, “Ng diak, ng kmal di mle kemam losiik er tir.”

A Brother Tanner a uleker ngii el kmo ngera sel kuk kora ngodech er tial teletael—meng kmal kora bedochel e ungil ea rebebil a dimlak. Ngikal ngeasek el buik a dula el kmo ng milasem el melecholb er tirkel rokui el chad el blol kebetech. Ng dilu el kmo sel lolengod a chesimer e lesa chad el meruul a kall e lolokou a dekool el mechut a bilel e kora diak el soal mesuub a ngerang— oumesingd a tekoi ra klechelid—eng blechoel kora melcheluches ra uldesuel kirel ngkal chad el kmo ng locha mo uangerang ra chelsel a kuk ngodech el teletael. Chelsel a uldesuel eng omes er ngii el telemikl e oubail ra becheleleu el bail ma becheleleu el subong. E ngika el misionari omes er ngii el mengetakl ra chimal mo soiseb ra blil a techolbechelid. Ng dilu el kmo, “Sel kumes ra chad er tiaikid el teletael, eng mo sebechek louchais ra klaumerang er ngak el mo er ngii ra chelsel a teletael el sebechel rutechii a rengul.”

Ngercheled el omes ra resechelid, dekaodengei, ma retonari er kid er tiaikid el teletael. A klmuut, ngercheled el omes ra dersta el chad ra diak dil chelechang ng bai sel sebechir el mor ngii. A kulengit er kemiu me bo momes er tir er tiaikid el teletael.

Rodam, a Rubak a dillii a tal tekoi el kirel a klou el ultutelel tial priesthood el dobang. Ng dilu er kid el kmo kede nguu loltirakl a llach ma telbiil. Ng milskid a llach el kmo ng kirel mo blak a rengud loltirakl aikel dengai, e ngarngii a ngercheled el mo oltirakl er tial telbiil el mora ulebongel. Ea ikel rokui el lolab a Chedam a bo dengai.2

A diak de medakta tekoi el kired el rongesii e nguu el loiia er a renguddiak de medakt el odngakl a ongetikaik, diak de medakt el mekengii a ngered lolchotel a klaumerang el mora rokui el chad el de kebetech, el melatk el kmo a rokui el chad a kirel ngarngii a techellir el rongesii a klumech el dobang. Tia diak el beot el tekoi ra rebetok el chad. Eng di ng sebeched el mo oumerang a tekingel a Paulus el mora Timoti:

“Ele reng el bilskid a Dios a diak el rellid el mo medakt; ng bai meruul er kid el mo mesisiich, e oubeltikelreng, e ulserechakl a rengud.

“Me lak bo merur el omerk a chisel a Rubak er kid.”3

Sera Ongeim el buil ra 1974, ea kulbengkel a Brother John H. Groberg ra Beluu ra Tonga. Ng mle kiram el mo omes ra king ra Tonga, ma ki mlo kebetech ra kuk di tara ongdibel. Aki uledkeu ra ta ma tang. Eng di, uchei ra ki morael, ea John Groberg a dillii a kora ngodech el tekoi. Ng dilu el kmo, “Kau el chetengakl, kau a kirem el mo chad ra Mormon ma dirrek el rechedam, le seikid ea mondai er kau ma mondai er tir a mo mesemechokl.”

A king a mlo klikmechur e ulenger, “John Groberg, ng locha merang.”

Ak lotkii a Apostol Paulus ra le ngara medal a Agrippa. Ak mlo melbedebek ra tekingel a Agrippa el kirel a klaumerang ra Paulus: “Omomdasu eke rullak mak mo Kristiano.”4 A Brother Groberg a dimlak el medakt lochotii a klaumerang er ngii el mora king.

Chelechal kesus ete obdois er kid a ngara omesiou el mora Rubak el misionari er Ngii. Meng nger tir el mora okedong, ete mla mo imikr a rekeblirir, telungalek, sechelei, ma skuul e merael el mo ngara omesiou. Tirkel diak lodengei a locha mo oker: “Ngera uchul me te kmal kldmokl e blak a rengir longer tial okedong?”

A remisionari er kid a sebechir el onger lolab a tekingel a Paulus, el ngii a mle ngaruchei el misionari ra ngara mong el taem: “Ele lsekum a kumerk ra ebangkelio, e tia diak bo luchul omeruul el chisek: ele tiang a kirek el meruul er ngii el tekoi; ak, di kmal, mo chebuul alsekum eng diak kumerk ra ebangkelio!”5

A chedaol llechukl a oba sel kot el mesisiich el tekoi, kot el ngarbab el ngerachel, ma kot el bleketakl el llach el ngii a le bilskid a mla mekiis ra kodall el Rubak ra dmiel ra Galilee el mora reteruich ma ta el chedal. Ng dilu el kmo:

“A rokui el klisiich ra omerreder ra eanged ma beluulechad a bla lebeskak.

“Me chelechang, e morael mora bek el beluu, e molecholb er tir el ngara ngklel a Chedam, ma Ngalek, ma Chedaol Reng:

“Lolisechakl er tir me bo loltirakl aikel rokui el blak du er kemiu: e, oi, Ngak a di obengkemiu, el mol muut ra ulebongel ra beluulechad.”6

Sel chedaol llach, lobengkel a klebokel el yaksok, a dou kerbai er ngii er chelechal sils, el di uaia uchelel. A ureor ra misionari a ngii a dodai ra Ikelesia er a Jesus Kristo er a Uriul-klebesei el Santo. Ng dimla uaisei; e melemolem el uaisei. El uaia tekingel a Profet Joseph Smith: “Aikel rokui el mla medung, e sel kot el ngarbab e klou a belkul el ngerachel a mo omerk ra Ebangkelio.”7

Chelsel a kedeb el eru el rak, ea rokui el misionari el tir a ngara mission er chelechang el teloi er tial klsoldau ra Dios a mo rokir a urerir e lmuut el mo remei ra rekeblirir ma rebetik ra rengrir. Ea re kuk mo omtechei er tir a debetik er tir chelechal kesus ra chelsir a roba Aaronic Priesthood ra Ikelesia. Rengeasek el sechal, kom kldmokl el kongei? Kom blak a rengmiu el mo oureor? Kom kldmokl el mo mesiou?

A President John Taylor a smaod aikakid el teletael: “Tirkel tir a soad a bo lomerk er tial klumech ra ebangkelio a rechad el ngarngii a klaumerang er tir ra Dios; rechad el oumerang ra klechelid er tir; rechad el mengull ra priesthood lobang; … rechad el mui ra Chedaol Reng ma klisichel a Dios[;] … rechad el mui ra omengull, llemalt, kldung ma klikiid.”8

Rodam, a dersta er kid a mla modurch el mo omerk ra ebangkelio ra Kristo. Sel sekum ea klengar kid a oltirakl a llechul a Dios, e tirkel chad el bo de kebetech a diak bo el langel ruriul el kmo: “Ng mla mo merek a temel omeridm, mla mo merek a summer, e kid a dirkak desobel.”9

Ngkel ngarbab el Mengkerengel a chad, el misionari lolsobel ra rechad, a Ngii a milskid tial chedaol tekoi:

“A Osobel a dilu el kmo alsekum e kede oureor ra chelsel aikel rokui el sils er kid lolisechakl ra ouchel el reng el mora rebebil e osebelii a di chimol chad er Ngii, eng mo klou a deureng el dobang lobengkel ra rengedel a Chedam!

“Ea lsekum e kede mo ngara deureng el kirel a di chimol chad el de ngiluu el mora Osobel ra chelsel a rengedel a Chedam, eng kol ua ngera el deuil a reng a bo dobang alsekum e kede ngoiteterir a rebebtok el chad el mo er Ngii!10

Ngii el dilu aikal tekoi, ea kuuchais el kirel a sioning er ngak. Ngii a Ngelekel a Dios, el Lolsobel, e Osobeled.

Meng nglunguchek me lak de medakt el lodersii a chimad el mo ra tang, el blak a rengud el melasm e lmuut el melasm, loba klengariou el reng losiik a ulekrael ra Chedam sel domerk ra ebangkelio. A ngerachel a dobang, e rodam. El ngara ngklel a Jesus Kristo, amen.