iVakatagedegede ni Valetabu

Mai vei Elder Scott D. Whiting

Ena Vitusagavulu


Na ivakatagedegede cecere ni tara valetabu e vakayagataki ena Lotu oqo e dua na kena mataqali ka sa ivakatakarakara ni ivakarau e dodonu me da bulataka kina na noda bula.

Niu sarava tiko na Valetabu na Brigham City Utah ena dua na gauna lekaleka sa oti oqo, au nanuma lesu e dua na ka au a sotava niu qarava voli na itavi vakakodineita ni kena dolavi raraba, vakatabui tale, kei na kena marautaki ena ivalavala vakavanua na Valetabu vakairogorogo mai Laie Hawaii.

Ni vo e vica na vula me vakacavari na cakacaka vakaitamera ni kena vakavinakataki, au a sureti me keitou dikeva wavoki na valetabu vata kei na Dairekita Liu ni Tabacakacaka ni Valetabu, o Elder William R. Walker, kei ira na nona ilawalawa mai na Tabacakacaka ni Valetabu. Me kuria, eratou a tiko talega eso na lewe ni kabani ka nona na konitaraki raraba. Na inaki ni vakadidike oqo, dua, me dikevi na toso kei na vinaka ni cakacaka sa vakayacori. Ena gauna ni vakadidike oqori, e rauta ni 85 na pasede ni cakacaka sa vakacavari.

Ni keimami toso tiko e loma ni valetabu, au vakarorogo ka saravi Elder Walker tiko kei ira na nona ilawalawa ena nodra dikeva na cakacaka ka veivosaki kei na itaukei ni konitaraki. Ena so na gauna au raica e dua na tamata ni na yamoca na lalaga e ligana ni keimami toso mai na dua na rumu ki na dua tale. Ena vica na gauna ni oti na nona cakava vakaoqori, ena masia vata na nona iqaqalo ka qai torova yani na itaukei ni konitaraki ka kaya, “Au vakila na corocorowa ni lalaga oqo. E sega ni ivakatagedegede ni valetabu na corocorowa. Ena vinakati me sanipepa ka vakayagovinakataki na lalaga oqo.” E vola toka ena yalo vakarorogo na itaukei ni konitaraki na vakadidike kece oqo.

Ni keimami vakanamata yani ki na dua na tiki ni valetabu ka na vica walega na mata e raica, a tarovi keimami na turaga vata ga oqo ka dusi keimami ki na dua na katubaleka vou, caka ena iloilo vakauma rairai totoka. Na katubaleka oqo e rauta ni rua na fiti (0.6 na mita) na kena raba ka ono na fiti (1.8 na mita) na kena balavu ka toka kina e dua na ibulibuli levu na yasana ka caka ena iloilo duiroka. A dusia e dua na sikuea lailai rauta ni rua na idi (5 na setimita) ka caka ena iloilo duiroka ka tiki ni dua na ibulibuli rawarawa ka kaya, “E veve tu na sikuea qo.” Au raica yani na sikuea, ka vaka vei au ni sa donu vinaka tu na kena ibiubiu. Ia ni qai laurai vakavinaka ka vakarautaki ena dua na ivakarau, au qai kila ni cala tiko ka ni vakatatiki tu na sikuea lailai oqo rauta ni dua na ikawalu ni idi (3 na milimita). A mani dusimaki na itaukei ni konitaraki ni gadrevi me na sosomitaki na katubaleka oqo baleta ni sega tu ni veidonui kei na ivakatagedegede ni valetabu.

Au vakadinata niu a kurabui ena kena gadrevi me vakaisosomitaki e dua taucoko na katubaleka baleta na cala somidi ka voleka ni sega ni laurai vaka koya. E dina sara, ni rawa ni tawakilai se kunei na katubaleka baleta na vanua vuni e tu kina ena loma ni valetabu.

Niu draiva lesu yani ki vale mai na valetabu ena siga ko ya, au vakananuma lesu na veika au a vulica rawa kau sota kaya–se kena dodonu beka, na veika au nanuma niu a vulica. A sega ni matata vakavinaka sara ena noqu vakasama na veika au a sotava ena vakadidike e liu me yacova ni sa oti e vica vata na macawa ena noqu a sureti meu laki sarava na valetabu ka se qai tara oti toka ga oqo.

Niu curuma yani na Valetabu e Laie Hawaii ena taucoko ni kena vakavoutaki, au vakadrukai ena kena totoka kei na vakasakiti ni kena icakacaka. E rawa ni o ni vakila na noqu nanamaki niu yacova yani na lalaga “corocorowa” kei na katubaleka “cala.” E a sanipepa ka vakayagovinakataka tale beka na lalaga na itaukei ni konitaraki? A vakaisosomitaki dina beka na katubaleka? Niu yacova yani na lalaga corocorowa, au kurabuitaka niu raica na pepa ni lalaga totoka era sa kabi tu kina. Na imatai ga ni ka e votu mai noqu vakasama, “Oi qo bagi na ivakarau e walia kina na itaukei ni konitaraki na corocorowa—e ubia.” Ia e sega, au qai kila ni sa dau kena ivakarau ga me kabi na pepa ni lalaga ena veilalaga oqo. Au taroga se cava soti e leqataki kina na corocorowa lalai voleka ni sega ni laurai, kevaka me dau qai ubi tale ena pepa ni lalaga. Oti au qai goleva yani ena yalo nanamaki na vanua a toka kina na katubaleka cala ka kurabuitaka niu raica e dua na vunikau totoka tei ena vokete ka tara tu na siligi ni dabe sara toka ga ena mata ni katubaleka. Baci votu tale mai noqu vakasama, “Oi qo bagi, na nona iwali ni sikuea veve o la na itaukei ni konitaraki—e vunia.” Niu toro voleka yani, au biliga tani na draunikau ka dredre kubukubu niu raica ni sa vakaisosomitaki dina na katubaleka. Na sikuea lailai ka a vakatatiki tu e liu sa tu oqo vakamatau ka tu donu ena loma ni ibulibuli. Au qai kila ni sa dau kena ivakarau ena tuvatuvalaki e loma ni vale me dau biu e dua na vunikau ena mata ni katubaleka.

Na cava me vakalevu cakacaka se vakaisosomitaki kina e dua na lalaga ka corocorowa vakalalai kei na katubaleka e veve ga vakalailai ka ni vica walega na liga se mata ni tamata ena kila? Na cava e gadrevi kina vua e dua na itaukei ni konitaraki me sotava na ivakatagedegede cecere vaka oya?

Au a kunea na isau ni noqu vakatataro niu curu mai tuba ena vakasama titobu ka dagava cake na tautuba ni vale ka raica na malanivosa oqo: “Sa Tabu Vua na Turaga, na Vale ni Turaga.”

Na veivaletabu ni Lotu oqo era sa ivakadei ni malanivosa oqori. Na veivale vakatabui oqo era sa tara meda vakayagataka, kei na loma ni kedra lalaga sa dau vakayacori kina na veicakacaka vakalotu tabu ni veivakabulai. Ia me kakua ni lomalomaruataki se o cei dina e nona na vale. Ena kena gadrevi na itaratara dodonu me vaka na kena ivakarau me yaco sara ki na kena matailalai, eda sega walega ni vakaraitaka kina na noda lomana ka doka na Turaga o Jisu Karisito, ia eda sa vakatakila talega kina vei ira kece era vakadidike tu ni da rokova ka dau sokalou Vua na kena itaukei.

Ena ivakatakila a soli vua na Parofita o Josefa Simici me tara na valetabu mai Nauvoo, a dusimaka kina na Turaga:

“Dou lako mai, dou kauta mai na nomudou koula, na nomudou siliva, na nomudou vatu talei kei na nomudou iyau kecega; ia me ra lako talega mai ko ira na kenadau, … dou kauta mai … na kau talei kecega e vuravura;

“… Io mo dou tara kina e dua na noqu vale, raica ena mai tiko kina ko Koya sa Cecere Sara.”1

Oqo e muria e dua na ivakarau a tauyavutaka na Tui o Solomoni ena Veiyalayalati Makawa ena nona tara e dua na valetabu me nona na Turaga ka vakayagataki kina na veiyaya vinaka duadua kei ira na kena liga maqosa sara.2 Nikua eda sa vakatotomuria tiko na ivakarau oqori, vata kei na veisau e veiganiti kaya, ni da tara na veivaletabu ni Lotu.

Au vulica ni dina ga ni na sega beka ni raica se vakila na mata se liga vakayago e dua na cala, ia, e kila tiko na Turaga na ivakatagedegede ni noda sasaga, vakakina kevaka eda sa vakayacora na noda maqosa taucoko eda rawata. Sa vakatalega kina ena noda dui sasaga yadua me da bulataka e dua na bula ka veiganiti kei na veivakalougatataki ni valetabu. A veivakasalataki kina na Turaga:

“Raica kevaka era sa tara e dua na noqu vale ena yaca ni Turaga ko ira na noqu tamata, ka ra sega ni vakatara me curu kina e dua na ka tawasavasava me vakadukadukalitaka, ena tiko kina na noqu iserau;

“Io, au na tiko talega kina koi au, raica au na curu ka tiko kina; ia ko ira na yalosavasava era sa curu kina era na raica na Kalou.

“Ia kevaka sa vakadukadukalitaki na noqu vale, au na sega ni tiko kina ka sega talega ni tiko kina na noqu iserau; raica au na sega vakaidina ni tiko ena vale tawasavasava.”3

Me vakataki koya na itaukei ni konitaraki, ni da vakila na veika eso ena noda bula ni sa sega ni duavata kei na ivakavuvuli ni Turaga, ena gauna e lailai kina na noda sasaga mai na kena eda rawa ni uasivita, sa dodonu me da vuki totolo ka vakadodonutaka na veika e cala tiko, ni da kila vinaka ni na sega ni rawa ni da vunitaka na noda ivalavala ca mai vua na Turaga. E dodonu me da nanuma tiko ni “kevaka eda ubia na noda ivalavala ca, … sa na tasogo ko lomalagi; [ka] sa rarawa na Yalo ni Turaga.”4

Au sa vulica talega na ivakatagedegede cecere ni tara valetabu e vakayagataki ena Lotu oqo sa dua na mataqali ka sa ivakatakarakara ni ivakarau e dodonu me da bulataka kina na noda bula. E rawa ni da vakayagataka yadua na ivakavuvuli ni iApositolo o Paula ka a soli ki na Lotu taumada ena nona kaya:

“Dou sa sega beka ni kila ni dou sa vale ni Kalou, ka sa tiko vei kemudou na Yalo ni Kalou?

“Kevaka e dua na tamata sa vakarusa na vale ni Kalou, ena vakarusai koya na Kalou; ni sa savasava na vale ni Kalou, ia sai kemudou oqo.”5

Eda a caka o keda ena iyaya uasivi duadua, ka da sa vua ni cakacaka mana vakamatai vakalou. Ia, ni da lako sivita na yabaki ni vakataulewa ka kalawa yani ki na bucanivalu ni ivalavala ca kei na veitemaki, na noda valetabu sa na gadreva na veisau eso me vakavinakataki kina. E tu beka e lomada eso na lalaga corocorowa ka gadrevi me vakayagovinakataki se katubaleka ni yaloda ka gadrevi me sosomitaki me rawa kina ni da tu ena veivanua tabu. Eda vakavinavinaka, ni ivakatagedegede ni valetabu e gadrevi me da rawata e sega ni o koya me da vinaka sara, e dina ga ni da segata tiko, ia me kena dodonu ena noda muria tiko na ivakaro ka cakava na kena vinaka taucoko eda rawata ka me da bula vakatisaipeli i Jisu Karisito. Sa noqu masu ni da na segata me da bulataka e dua na bula ka veiganiti kaya na veivakalougatataki ni valetabu ena noda cakava sara na kena maqosa, vakavinakataka na noda malumalumu ka vaqeyavutaka na veicala kei na duidui eso ka me rawa ni tiko ga kina e lomada na Yalo ni Kalou. Ena yaca i Jisu Karisito, emeni.