Tulaga Faatonuina o le Malumalu

Saunia e Elder Scott D. Whiting

O Le Fitugafulu


O tulaga faatonuina maualuluga o loo faaaogaina e lenei Ekalesia e fausia ai malumalu, o se ituaiga ma o se faailoga foi lea o le auala e tatau ona tatou ola ai.

Ao maimoaina talu ai nei le Malumalu matagofie o Brigham City Utah, sa ou toe manatua ai se mea sa tupu ia te au ao avea au ma taitai o le faletatala, toe faapaiaga, ma faafiafiaga faaleaganuu i le talafaasolopito o le Malumalu o Laie Hawaii.

O ni nai masina ao lei faamaeaina le galuega o le toefaafouga, sa valaauliaina au e asiasi atu i le malumalu faatasi ai ma le Pule Faatonusili o le Matagaluega o Malumalu o, Elder William R. Walker, ma lana aufaigaluega o le Matagaluega o Malumalu. Sa faatasi ai foi, ma isi sui o le kamupani konekarate o loo faatinoa le galuega. O le faamoemoega o le asiasiga, i se vaega, o le toe iloiloina lea o le tulaga alualu i luma ma le lelei o le galuega o loo faatinoina. I le taimi o lenei asiasiga, pe a ma le 85 pasene o le galuega ua maea.

Ao matou feoai i totonu o le malumalu, sa ou matamata ma faalogologo ia Elder Walker ma lana aufaigaluega ao latou vailiiliina le galuega ma talatalanoa ma le supavaisa faufale. Sa ou matauina se tasi o alii na faasolosolo lona lima i puipui ao matou feoai mai lea potu i lea potu. A maea sina taimi o faia lenei mea, na te milimiliina faatasi ona tamatamailima ona agai atu lea i le supavaisa faufale ma fai atu, “Ou te lagonaina le talatala o le puipui lenei. E le o se tulaga faatonuina o malumalu le talatala. E tatau ona toe faalamolemole le puipui.” Sa tusitusia ma le usiusitai e le supavaisa ia matauga taitasi.

Ina ua matou latalata atu i se vaega o le malumalu lea e na o sina vaega toalaiti o tagata o le a vaai i ai, sa taofi i matou e lenei lava alii ma faataulai atu le matou vaai i se faamalama matagofie fou faatoa faapipii. O lenei faamalama pe a ma le lua futu (0.6 m) le lautele ae ono futu (1.8 m) le maualuga ma e i ai se tamai tioata lanu ua mamanuina faamanaia. Sa ia tusi atu i se tamai sikuea e lua inisi (5 cm) o le tioata lanu lea o loo avea ma se vaega o le mamanu faigofie ma fai atu, “E pi’o le sikuea le la.” Sa ou tilotilo atu i le sikuea, ma i la’u lava vaai sa foliga mai o loo tutusa. Ae peitai, pe a vaai latalata atu i ai ma faaaoga se fuatoso, o le a iloa ai e i ai se faaletonu ma e sa’o e tasi vae valu inisi (3 mm) le pi’o. Sa tuuina atu se faatonuga i le supavaisa e tatau ona toe sui le faamalama ona o le a le maua ai le tulaga faatonuina o le malumalu.

Ou te ta’u atu sa ou ofo i le suia atoa o le faamalama ona o se tamai faaletonu e tau leiloa. Ioe, ailoga lava e i ai se tasi e iloaina pe matauina ona o le nofoaga lea i le malumalu e le toatele nisi o le a vaai i ai.

Ao ou agai atu i le fale mai le malumalu i lena aso, sa ou toe mafaufau i mea sa ou aoaoina mai lenei aafiaga pe, i se isi itu, o mea sa ou mafaufau sa ou aoaoina. Ae pe ana le mavae lava le fitu vaiaso mulimuli ane ina ua valaaulia au e asiasi i le malumalu ua maea nei, semanu ou te le malamalama atili i aafiaga o lena uluai asiasiga.

Ao ou ulu atu i le Malumalu o Laie Hawaii lea ua maea ona toefaafouina, sa faagaeetiaina au i lona matagofie ma le lelei o le fausiaina. Atonu e te malamalama i lo’u toe fia vaai i puipui “talatala” ma le faamalama lea sa “faaletonu”. Pe na toe faalamolemoleina e le au faufale ia puipui? Pe na toe suia moni lava le faamalama? Ao ou agai atu i puipui talatala, sa ou tei i le vaaia o ni pepa puipui matagofie o faapipii i luga uma o puipui. O le mea muamua lava na oo mai i lou mafaufau, “Ai o le auala lea na foia ai e le au faufale le tulaga talatala—o le ufiufi.” Peitai, e leai, sa ou iloaina o le fuafuaga lava lea sa i ai o le faapipii o pepa puipui i luga o puipui. Sa ou mafaufau pe aisea lava na faataua ai sia tamai talatala e tau leiloa pe a faapea e faapipii i ai se pepa puipui. Ona ou agai atu lea ma le naunautai i le vaega lea sa i ai le faamalama pi’o ma sa ou ofo i le vaaia o se laau teufale matagofie e sau mai le fola e oo i le taualuga le tele o loo tu tonu mai lava i luma o le faamalama. Sa ou toe mafaufau foi, “Oi o le auala la lea na foia ai e le au faufale le tamai sikuea pi’o—o le nanaina.” Ao ou faalatalata atu i ai, sa ou tuleieseina ia lau o le laau ma ataata ao ou vaai atu e moni lava ua uma ona sui le faamalama. Sa tu lelei mai lava ma sao le tamai sikuea lea sa pi’o. Sa ou iloaina o se vaega lava lea o le mamanuina o totonu [o le malumalu] o le i ai o se laau i luma o lenei faamalama.

Aisea lava na manaomia ai e puipui e i ai ni tulaga talatala laiti ma se faamalama e pi’o ia se galuega faaopoopo ma na oo ai lava i le toe suia pe a faapea e na o ni nai lima po o ni mata faaletagata o le a iloaina? Aisea na manaomia ai se tulaga faatonuina maualuga mai le au faufale?

Ao ou aluese mai le malumalu ma mafaufau loloto i ai, sa ou mauaina lau tali ao ou tilotilo atu i le pito i fafo ma vaaia ai upu nei, “E Paia i le Alii, o le Fale o le Alii.”

O malumalu o lenei Ekalesia e faapei lava ona folafola atu. Ua fausia nei fale paia tatou te faaaogaina, ma o totonu o o latou puipui e faatino ai ia sauniga paia ma faaola. Peitai e le tatau ona i ai se masalosalo po o ai tonu lava e ona ia fale. O le manaomiaina o le tulaga tonu o tulaga faatonuina o le fausaga ma e aofia ai vaega uma lava, e le gata ua tatou faaalia ai lo tatou alolofa ma le faaaloalo i le Alii o Iesu Keriso, ae ua tatou faaali atu foi i tagata maimoa uma lava tatou te faamamalu ma tapuai ia te Ia o Le ona le fale.

I le faaaliga na tuuina atu i le Perofeta o Iosefa Samita e fausia se malumalu i Navu, sa poloai atu ai le Alii:

“O mai ia, ma a outou auro uma, ma a outou ario, ma a outou maa taua, ma a outou mea anamua uma; ma faatasi ma i latou uma o e ua i ai le malamalama e uiga i mea anamua, … ma aumai … laau pele uma o le lalolagi;

“… Ma fausia se fale i lo’u igoa, mo le Silisili Ese e afio ai.”1

O loo mulimulitai lenei mea i se mamanu na faia e le Tupu o Solomona i le Feagaiga Tuai i lona fausiaina o se malumalu i le Alii e faaaoga ai na o mea silisili uma mo le fausiaina.2 O loo faaauau pea i le asō ona tatou mulimuli i lenei mamanu, ma faatonutonu ai ma le talafeagai, pe a tatou fausia ia malumalu o le Ekalesia.

Ua ou iloaina e tusa lava pe le vaai pe tagotago foi i ai ni mata ma lima faaletino i se faaletonu, ae ua silafia e le Alii le tulaga o a tatou taumafaiga ma pe o tatou faia le mea sili tatou te mafaia. E faapena foi i a tatou foi taumafaiga patino ina ia ola i se olaga e agavaa ai mo faamanuiaga o le malumalu. Ua fautua mai le Alii:

“Ma o le tulaga e oo i ai e lo’u nuu ona fausia se fale mo a’u i le suafa o le Alii, ma latou le tuua se mea eleelea e sau i ai i totonu, ina ia le faaeleeleaina, o le a to’a ai i ona luga lo’u mamalu;

“Ioe, ma o le a i ai lo’u afioaga iina, ona o le a Ou alu atu i ai i totonu, ma o i latou uma e loto mama e o mai i ai i totonu, o le a vaai i le Atua.

“Ae afai e faaeleeleaina Ou te le alu atu i ai i totonu, ma o le a le i ai foi lo’u mamalu iina; aua Ou te le alu atu i totonu o ni malumalu ua le paia.”3

Faapei o le faufale, pe a tatou iloa ni elemene i o tatou lava olaga e le ogatusa ma aoaoga a le Alii, pe afai o a tatou taumafaiga e le o le mea sili lea tatou te mafaia, e tatau ona tatou galulue vave e faasa’o soo se mea ua le sa’o, ia iloa e le mafai ona tatou nanaina a tatou agasala mai le Alii. E tatau ona tatou manatua lena mea “a tatou taumafai e ufiufi a tatou agasala, … faauta, e aveese e le lagi i latou lava; [ma] e faanoanoa le Agaga o le Alii.”4

Sa ou aoaoina foi o tulaga faatonuina maualuluga o loo faaaogaina e lenei Ekalesia e fausia ai malumalu, o se ituaiga ma o se faailoga foi lea o le auala e tatau ona tatou ola ai. E mafai ona tatou faaaogaina, taitoatasi, ia aoaoga a le Aposetolo o Paulo lea na tuuina atu i le Ekalesia anamua ina ua ia faapea atu:

“Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou?

“Afai e faaleaga e se tasi le malumalu o le Atua, e faaleagaina lena tagata e le Atua; aua e paia le malumalu o le Atua, o outou lava ia.”5

Ua fausia i tatou taitoatasi i mea silisili, ma o i tatou o ni taunuuga faavavega o se fausaga paia. Ae peitai, ao amata ona tatou faatagata matutua ma tali atu mo i tatou lava o le a amata ona tatou tauivi ma agasala ma tofotofoga, ma e mafai ona avea o tatou lava malumalu ma se manaoga o le galuega toefaafouina ma toefaaleleia. Masalo o loo i ai ni puipui i totonu o i tatou lava e talatala ma e manaomia le toe faalamolemoleina po o se faamalama o o tatou agaga e manaomia le suia ina ia mafai ona tatou tutu i nofoaga paia. O le mea e faafetai ai, o tulaga faatonuina o le malumalu o loo talosagaina ai i tatou ina ia faafetaiaia e le o le atoatoa, e ui o loo tatou taumafai atu i ai, ae ia tatou tausia poloaiga ma faia le mea sili tatou te mafaia i le avea ai ma soo o Iesu Keriso. O lau tatalo ia tatou taumafai uma e ola i se olaga e agavaa ai mo faamanuiaga o le malumalu e ala i le faia o le mea sili tatou te mafaia, e ala i le faia o ni faaleleiga e manaomia ma faaitiitia ni faaletonu ma ni le atoatoa ina ia mafai ona nofo le Agaga o le Atua i totonu o i tatou. I le suafa o Iesu Keriso, amene.