Atonmen

I Kam long Presiden Boed K. Peka

Presiden blong Kworom blong Olgeta Twelef Aposol


Boed K. Peka
Long weaples ol memba mo ol misinari oli save go long hem, mesej blong yumi i wan mesej blong fet, mo hop long Sevya Jisas Kraes.

Mesej blong mi i stap go stret long olgeta we oli stap wetem yumi mo oli stap safa from ol karem ol hevi filing blong stap long sin mo no stap strong, oli harem nogud, mo oli nomo gat hop.

Long 1971, mi gat wok blong go long ol stek konfrens long Wes Samoa, mo blong oganaesem wan niu stek long Upolu Aelan. Afta long ol intaviu, mifala i jatarem wan smol plen i go long Savai aelan blong gat wan stek konfrens longwe. Plen i foldaon long gras long Fahala mo i sapos blong gobak long nekis dei long aftenun blong tekem mifala i go long Upolu aelan.

Long dei we mifala i sapos blong aot long Savai, i bin ren. Mifala i save se plen bae i no save foldaon, mekem mifala i draev i go long wes saed blong aelan from i gat wan ples blong plen we i stap antap long hil ova long so. Mifala i bin wet kasem tudak, be i no gat plen i kam. Long en, mifala i lanem tru long redio se i gat wan strong win, mo plen i no save tekof. Mifala i toktok long redio se bae mifala i kam long bot. Bae wan i mitim mifala long Mulifanua.

Taem mifala i aot long wof long Savai, kapten blong 12 mita bot ia i bin askem long misin presiden sapos hem i gat wan toslaet. Laki nomo, hem i bin gat wan mo i givim olsem presen long kapten. Mifala i go kros long 21 kilometa, i go long Upolu aelan, long solwota we i raf. I no gat wan long mifala i luksave se wan nogud hariken i kasem aelan, mo mifala i stap ron i go stret long hem.

Mifala i kasem ples long Mulifanua. I gat wan smol pasis we mifala i mas pastru long hem folem rif. Wan laet antap long hil antap long solwota mo seken laet we i stap daon, i makem smol pasis ia. Taem wan bot i kam, hem i mas stretem bot folem tufala laet i laen stret blong pas tru long ol ston ia we i wan denja, we oli stap long pasis ia.

Be long naet ia, i gat wan laet nomo. Tufala elda i bin stap long ples ia blong wet long mifala, be mifala i tekem moa taem blong krosem solwota. Afta we tufala i stap wet longtaem blong luk bot, tufala i kam taed mo tufala i silip, mo tufala i nomo onem seken laet, we i stap daon. Long en, blong pastru long rif i nomo klia.

Kapten i stiarem bot olsem we hem i save mekem folem laet we i stap antap long hil mo wan man blong kru i holem toslaet antap mo i stap lukaotem ol ston long fored. Mifala i save harem solwota i brok long rif. Taem mifala i kolosap inaf blong luk ol ston wetem toslaet, kapten i singaot strong blong arier, blong traem lukaotem pasis.

Afta we hem i traem plante taem, hem i save se bae i no posibol blong faenem pasis ia. Bae mifala i mas kasem haba long Apia we i 64 kilometa longwe. Mifala i no save mekem wan samting agensem strong paoa blong win. Mi no tingbaot se mi bin stap long wan dak ples olsem bifo.

Mifala i no muv long fas aoa, nomata enjin i stap long ful spid. Bot bae i go antap long wef, i stop smol mo spel antap long wota wetem ol propela aotsaed long wota. Ol propela ia oli mekem bot i seksek gogo kolosap i brokbrok bifo i glis i go daon long narasaed blong wef.

Mifala i silip flat long kova blong kago, mo stap holemtaet wetem han i holem wan saed mo leg i blok long narasaed blong mekem mifala i no foldaon long solwota. Brata Mak Litelfod i mestem nao solwota i sakem hem agensem aean we i stap daon. Hed blong hem i kil, be aean ia i holemtaet hem i no foldaon long solwota.

Afta mifala i muv i go mo taem delaet i brok mifala i pul i go insaed long haba long Apia. Oli bin fasem ol bot tugeta blong oli sef. Plante bot ia oli blokem wof. Mifala i krosem ol bot ia mo traem blong no wekemap ol man we oli silip long dek blong ol bot. Mifala i faenem rod i kasem Pesenga, mekem klos i drae, mo go long Vailuhutahi blong oganaesem wan niu stek.

Mi no save se huia i bin stap wet long mifala long sanbij blong Mulisanua. Mi no wantem letem olgeta i talem long mi. Be hem i tru se sapos i no bin gat smol laet ia, ating mifala evriwan i lus.

Long hymbuk blong yumi, i gat wan olfala singsing we i gat wan spesel mining long mi:

Hem i saenem sore blong Papa
We i stap long laethaos,
Be yumi, yumi mas lukaotem
Ol smol laet folem sanbij.
Ol smol laet oli mas saenaot
Sendem laet krosem ol wef
Sam siman we oli taed mo hadwok
Bae yu sevem laef blong ol.
Tudak blong sin i stap nomo nao
Ol smok oli kam bigwan.
Ol ae oli stap lukaotem,
Ol laet ia folem sanbij.
Lukaot gud smol laet blong yu brata;
Sam siman, oli fasfas,
Oli traem kasem haba ia,
Sapos no oli lus long dak.1

Mi toktok tedei long olgeta we, ating, oli lus, mo stap lukaotem smol laet ia blong helpem olgeta blong lidim olgeta i gobak.

Stat long stat finis, yumi bin andastanem se long laef ia, bae yumi foldaon mo save stap stret evriwan. Oli no putum se bae yumi laef mo no brekem wan loa nating.

“From man we i folem fasin blong wol i wan enemi blong God, mo i bin olsem stat long taem we Adam i bin foldaon mo bae i stap olsem, blong oltaem mo oltaem, hemia nomo sapos hem i lisin long ol gudfala toktok blong Tabu Spirit, mo i tekem aot man we i folem fasin blong wol, mo kam wan sent tru long atonmen blong Kraes, Lod.” 2

Aot long buk blong Perel we I Gat Bigfala Praes, yumi andastanem se i no gat samting we i no klin we i save stap long kingdom blong God, 3 mo from hemia, i gat wan rod i stap blong evriwan we i mekem sin, blong hem i sakem sin, mo kam klin inaf blong stap long ples blong Papa blong yumi long Heven wan moa taem.

Wan Medel Man, wan Ridima, God i bin jusum; wan we bae i laef stret evriwan, bae i no mekem sin, mo bae i givim “givim hemwan bakegen wan sakrifaes blong sin, blong mekem wanem we loa i askem long olgeta we i gat wan hat we i fulap wetem sore mo wan spirit we i wantem blong sakem sin; mo en blong loa ia i no save kam long olgeta we i no olsem.”4

Long saed blong hamas Atonmen i impoten, long Alma yumi lanem se: “From i nid blong wan atonmen i mas hapen; … sapos no, evri man bae i mas ded nomo.”5

Sapos yu no bin mekem ol mistek, nao yu no nidim Atonmen. Sapos yu mekem ol mistek, mo yumi evriwan i mekem, i smol o i bigwan, nao yu gat bigfala nid blong faenemaot olsem wanem blong rapemaot blong mekem se yu nomo stap long tudak.

“[Jisas Kraes] i laet mo laef blong wol.”6 Taem yumi putum ae blong yumi strong long ol tijing blong Hem, bae Hem i lidim yumi long haba blong stap sef long saed blong spirit.

Nambatri toktok blong bilif i talem: “Mifala i biliv se tru long Atonmen blong Kraes, bae evri man oli save stap sef, taem oli stap obei long ol loa mo olgeta odinens blong Gospel.”7

Presiden Josef F. Smit i tijim: “Man i no save fogivim sin blong olgetawan; oli no save klinim olgetawan from ol risal blong ol sin blong olgeta. Ol man oli no save stop blong sin, mo mekem samting i stret long fiuja; mo sapos wok blong olgeta i stret long fored blong Lod, bae Lod i tingting long olgeta. Be huia bae i stretem ol rong we oli mekem long olgetawan mo long ol narawan, sapos i no posibol blong oli stretem olgetawan? Tru long atonmen blong Jisas Kraes, sin blong man we i sakem sin, i go lus; nomata oli red evriwan , bae oli kam waet olsem wul. [luk long Aesea 1:18]. Hemia i promes we oli givim long yu.”8

Yumi no save stret olsem wanem Lod i bin mekem Atonmen i kamtru. Be yumi save se nogud samting we Hem i bin filim taem oli hangem Hem long kros i wan pat ia nomo blong bigfala harem nogud we i bin stat long Getsemane—tabu ples ia we Hem i bin safa long hem—mo i bin finis long Golgota.

Luk i rekodem:

“Nao hem i go longwe lelebet long olgeta, hem i nildaon, i prea,

“i talem se Papa sipos i stret long tingting blong yu, plis yu tekemaot ol samting ya we i stap mekem mi mi harem nogud. Be yu no mekem olsem we mi mi wantem, yu mekem olsem we yu nomo yu wantem.

“Nao wan enjel i aot long heven i kam, i mekem hem i kam strong bakegen.

“Mo from tingting blong hem i trabol tumas, hem i stap prea i strong moa, mo swet blong hem i stap folfoldaon long graon olsem blad nomo. ”9

Kasem tedei mi save talem nomo se i gat wan stori, wetem ol toktok blong Sevya hemwan we i tokbaot wanem Hem i bin gotru long hem long Garen blong Getsemane. Revelesen ia i talem se

Sevya i bin talem se Hem i bin safa ol samting ia blong evriwan, blong oli no safa sapos oli sakem sin.

Be sapos oli no sakem sin, oli mas safa semmak olsem Hem;

We safaring ia i mekem Hem, we Hem i God, we Hem i hae long evriwan, Hem i seksek from soa long bodi, mo blad blong Hem i ronaot long evri hol blong skin blong Hem.10

Long laef blong yu, ating bae i gat sam taem we yu go long ol ples we yu neva sapos blong go long hem, mo yu mekem ol samting we yu neva sapos blong mekem. Sapos yu tanem baksaed blong yu long sin, bae yu save, wan dei, kam blong save pis we i kam taem wan i folem rod blong ful fasin blong sakem sin.

Nomata wanem sin yumi bin mekem, nomata hamas aksen blong yumi i mekem narawan i harem nogud, rong ia i save go lus. Long mi, ating toktok we i naes moa insaed long evri skripja i taem Lod i talem se taem wan man i sakem ol sin blong hem, Hem, Lod bae i fogivim man ia, mo bae Hem i nomo tingbaot ol sin ia bakegen.11

Hemia nao promes blong gospel blong Jisas Kraes mo Atonmen: blong tekem eniwan we i kam, blong tekem eniwan we bae i wantem joen, mo putum olgeta tru long wan eksperiens blong mekem se long en blong laef blong olgeta, oli save gotru long vel, we oli bin sakem sin blong olgeta finis mo oli kam klin tru long blad blong Kraes.12

Hemia nao wanem ol Lata-dei Sent oli mekem raon long wol. Hemia nao Laet we yumi givim long olgeta we oli stap long tudak mo oli lusum rod blong olgeta. Long weaples ol memba mo ol misinari oli save go long hem, mesej blong yumi, i wan mesej blong fet, mo hop long Sevya Jisas Kraes.

Presiden Josef Filding Smit i bin raetem ol toktok blong hym ia: “Does the Journey Seem Long? (Yu yu luk se Rod ia i Longwan?)” Hem i bin wan gudfala fren blong mi. Long hym ia i gat ol toktok blong leftemap tingting mo wan promes long olgeta we oli stap lukaotem blong folem ol tijing blong Sevya:

Yu yu luk se rod ia i longwan,?
Rod ia i raf mo i stip?
I gat ol nil flaoa mo ol nilgras long rod?
I gat ol sap ston oli katem leg blong yu
Taem yu stap traehad blong klaem
Kasem top blong hil long hot taem blong dei?
Hat blong yu i taed mo harem nogud?
Insaed long sol blong yu i taed
Taem yu wokhad blong stretem trabol blong yu?
Yu harem se i wok i hevi tumas
From se yu mas leftemap yu antap?
I no gat wan blong serem hevi trabol blong yu?
No letem hat blong yu i go daon
Naoia we yu statem rod;
I gat Wan we i stap lukluk yet long yu.
So yu lukluk i go antap wetem glad
Mo tekem han blong hem;
Bae Hem i lidim yu long ol niu ples we oli hae—
Wan graon we i tabu mo klin gud,
Ples we evri trabol i finis,
Mo laef blong yu bae i fri long evri sin,
We i no gat wota blong ae i foldaon,
From se i no gat harem nogud i stap.
Tekem han blong hem mo go insaed.13

Long nem blong Jisas Kraes, amen.

Show References

  1.  

    1. “Brightly Beams Our Father’s Mercy,” Hymns, no. 335.

  2.  

    2.  Mosaea 3:19.

  3.  

    3. Luk long Moses 6:57.

  4.  

    4.  2 Nifae 2:7.

  5.  

    5.  Alma 34:9.

  6.  

    6.  Mosaea 16:9.

  7.  

    7.  Ol Toktok blong Bilif 1:3.

  8.  

    8.  Teachings of Presidents of the Church: Joseph F. Smith (1998), 99–100.

  9.  

    9.  Luk 22:41–44.

  10.  

    10. Luk long Doctrine and Covenants 19:16–18.

  11.  

    11. Luk long Doctrine and Covenants 58:42.

  12.  

    12. Luk long Revelesen 1:5.

  13.  

    13. “Does the Journey Seem Long?” Hymns, no. 127.