Iwaclah Sac

Pweng luhk uh ma nuh selos inmahsrlosr suc kweoklac, toasrlac ke inse koluk ac muhnahs ac upac nuh se, ahsor, ac muhkahimtacl.

Ke yac 1971, nga srihsrngiyucki in wi toeni luhn stek fin acn Western Samoa, weacng u se ke stek sasuc se ke tuhka Upolu. Tukun nga oruh kuhtuh lohlngohk ah kuht ohtoiyac oaksohk srihsrihk soko nuh ke tuhka Savai’i in oruh toeni luhn stek sac we. Oaksohk soko ah tohwi ke acn mwesahs mahmah se Faala ac enenuh in fohlohk ke tahfuhn lwen tok ke lwen tok ah nuh ke tuhka Upolu.

Lwen se kuht plwacni in fohlohk nuh Savai’i ac, afyak. Etuh lah oaksohk uh tiac kuh in tohwi ke acn sroksrok uh, kuht stosah som nuh lwacyacn rohtoh ke tuhka sac, ma oasr atacn sie acn in kahsruhsr luhn oaksohk uh ma oreklac mihnini fin eka uh. Kuht tuhpan ne ke losrwacni, tuhsruhk wacngihn oaksohk fihli we. Sahflahiyac ah, kuht etwacack ke retio ah lah oasr pahkah se, ac oaksohk soko ah tiac kuh in sohkwack. Kuht retiolac muh kuht ac wi reoa som. Mwet se enenuh in sun kuht Mulifanua.

Ke kuht mukwilac Savai’i ac, kacptin se ke reoa fit 40 (mita 12) soko ah siyuck sin misin prestuhn sac lah oasr tengki se. Wolac ohiyac, oasr sel ac el sang nuh sel kacptin. Kuht kahsruh mael 13 (kilo mita 21) nuh ke tuhka Upolu ke koluk inkof ah. Wacngihn sesr akihlen lah eng na upac sac sun tuhka sac, ac kuht kahsruhsr suwohswohs nuh kac.

Kuht ai ke wohf Mulifanua ah. Oasr inywac oasrihksrihk soko kuht enenuh in kahsruhsr kac siskacn eka ah. Lahm se ke inging soko fin puhk ah ac lahm se ahkluo ten ah mahkiyac inywac oasrihksrihk soko ah. Ke reoa soko ah kuhfkuhf in muh lahm ah sie in oan fin sie, reoa ah in muh suwohswohs in ahluhkwelah yot luhlahp ma lainiyac inywac ac.

Tuhsruhk fong sac lahm sefanna. Elder luo muhta tuhpan in sun kuht, tuhsruhk yucme sac paht kuhtuh liki pwacyeiyac ah. Tukun elos ngwetngwet liye reoa okwacsr ah ke oa puhs, elder luo ah tohtohlah ac mutullac, macnsis kuhnlah in tiac ahkosack lahm se ahkluo ah, lahm se ten ah. Oruh inywac soko ah tiacna kahlwem.

Kacptin sac kihfucs reoa soko ah ke kuhiyacl ukwe lahm se lucng ah fin lihk ac ke mwet orekma ke reoa ah sruok tengki paroiyucklac sac tu muhtuhn reoa ah, tol in liye yot met ah. Kuht kuh in lohng noa ah ke toki ke eka ah. Ke kuht apkuhran in liyacltahlwack ke tengki ac, kacptin sac lihksreni wolac in fohlohki reoa ah ac sulpac srihke in sokwack inywac ah.

Tukun kuht srihke pacl puhkantwen ah, el etuh lah e upac in sokwack inywac soko ah. Pwacna ma kuht kuh in oruh pa in srihke in sun wohf se Apia ah suc mael 40 (kilo mita 64) nuh we. Kuht lihp ke fokokoiyacn eng upac sac. Nga tiac esam ke nga muhta ke acn na lohsrlohsr ah.

Kuht tiac mukwi nuh met ke ao se met ah, insin soko ah finne sang kuhiyac. Reoa soko ah iwe noa luhlahp ah ac tui ke lohrengreng ah loangyak e fin kof ah. Rarrar luhn lohrengreng ah usruk reoa ah upac oruh kuhrwacn na kihpatlah met liki ac puhtat nuh lwacyacn sahyac nuh ten ah.

Kuht ohnkiyucki orwaclihk pahosr ac niyacsr ke acn in sruh ke kafa ke yen kahko ah, sruokwacni ke pahosr ke la ac sruhmasrlah kufun niyacsr ke la kuht in tiac puhtatlac nuh inkof ah. Tamuhlwel Mark Littleford el fuhlweack ac srihngsrihnglac nuh ten ke kalkal osra ten ah. Insifacl kihneta, tuhsruhk kalkal osra ah sruokilyac oruh el tiac puhtatlac nuh inkof ah.

Kahkahsrihsrihk na ne, kuht kihluck nuh met ac apkuhran in lwenwelihk sahflahiyac ah kuht yucyak nuh ke wohf Apia ah. Reoa ac kapihri nuh sie in tiac pahtlah. Wohf pahtpaht ah kosreyucklac ke oal inge. Kuht orahk fin oak inge srihke in tiac tuhkahsruh nuh sin mwet mutul kac ah. Kuht sun acn Pesega, ahkpahoyelah nuknuk lasr ah, ac som nuh Vailuutai in akiyac stek sasuc sac.

Nga tiac etuh lah suc sanwe kuht ke lihk se Mulifanua ah. I sruhnga elos in fahk nuh sihk. Tuhsruhk pwacye lah fin wacngihn lahm se ten ah, kuht nuh kwewa luhkuhn misac.

Oasr ke puk in on nahtuhsr uh on na mahtuh ac suhkwac onkihnyuck on soko ma oasr kalmeyac yohk srihpac se nuh sihk.

Nga sramsram mihsenge nuh selos suc ma sap tuhlac ac suk ke akucl kahlwem sac in kahsruh kohlohlos fohlohk.

Kahlwem ke muhtwacwacyac ah lah ke moul uh kuht kuh in puhtatlac ke moul in srihke lasr. Tiac motkweyuck tuh kuht in moul ac tiac orekma lain kuhtuh masap uh.

Ke Puk luhn Mormon Tohkohsrah Benjamin el fahk lah ohiyacn mwet uh pa mwe lokoalok se luhn God ac muhtwacwacack e ke puhtatlac lal Adam ah. Tohkohsrah Benjamin el sensenkihn lah ke ohiyac lalos, kuh puhtatlac sac, kais sie mwet e oruh mwe lokoalok luhn God ne tok ne ke na elos liye ke oruh luhn Nguhn Muhtahl ac fihliyac ohiyacn mwet uh ac orwaclah sie Mwet Luhlahlfongi ke iwaclah luhn Leum.²

Ke puk in Pearl of Great Price, kuht kahlwem lah wacngihn ma fohkfohk kuh in ilyak nuh ke tohkohsrahi luhn God,³3 ac oruh ohiyac se utuckuh nuh sin mwet nuh kwewa suc oruh ma koluk in auliyak ac oruh in sulpac nwacsnwacs nuh ye muhtuhn Pahpah tuhmasr Inkuhsrao.

Sie Mwet Ahol kuht nuh sin Leum, Mwet in Molwelah se sollac, mwet se ma e moulkihn moul wo Lal, tiac orekma koluk, ac Jisus Kraist lac isaclwacng sifacna in oa mwe kihsac se nuh ke ma koluk uh in topuk sahflahiyacn masap uh nuh selos kwewa ma oasr muhsahllah luhn insiyac ac auliyak luhn nguhn. Lehi el fahk lah sahflahiyacn masap uh tiac kuh in topukyuck sin kuhtwena sahyac.⁴

Nuhnkuh ke yohk srihpaciyacn Iwaclah uh, ke Alma el luti lah e fal tuh iwaclah se in kuh in oreklac; fin tiac mwet nuh kwewa tiac kuh in tiac sun misac.⁵

Kowos fin tiac orwaclah ma tahfonglac, na kowos tiac enenuh Iwaclah. Kowos fin orwaclah ma tahfonglac, ac kuht nuh kwewa orwaclah, finne srihk kuh yohk, na oasr enenuh yohk se lowos in sokwack lah e iyucklac fuhkah kowos in tilac muhta ke lohsr.

“[Jisus Kraist] pa kahlwem ac moul luhn facluh.”⁶ Ke kuht lohacng nuh ke mwe luti Lal uh, kuht ac kolyuck nuh ke wohf in monglac ke ip luhn nguhn.

Ip yohk se ahktolu fahk, “Kuht lah ke Iwaclah luhn Kraist, mwet nuh kwewa kuh in moullac, in ahkostwen ke masap ac akwuck ke Wosasuc.”⁷

Prestuhn Joseph F. Smith el luti: “Mwet uh tiac kuh in sifacna nuhnak muhnahs nuh ke ma koluk lalos; elos tiac kuh in ahknwacsnwacsyaclos liki mwactan ma koluk lalos. Mwet uh kuh in tui ke ma koluk uh ac kuh in oruh ma wo ke pacl fahsruh uh, ac oruh [ke] mukwikwi lalos uh fal nuh ye muhtuhn Leum uh [muhtwacwacack] nwacsnwacslah in nuhnkweyuck. Tuhsruhk suc ac ahkwoyelah tahfonglac elos orwaclah nuh selos uh ac nuh sin mwet sahyac, suc atacn upac nuh selos in ahkwoyelos sifacna uh? Ke iwaclah luhn Jisus Kraist ma koluk luhn mwet auliyak se fah owolac; ma koluk uh ne sruhsrah fohkfok ac kuh in ahkfasrfasryeyucklac oacna unen sip [liye Isaiah 1:18]. Pa inge olwelah se utuckot nuh yurum ac.”⁸

Kuht tiac etuh na pwacye lah Leum el orwaclah fuhkah Iwaclah sac. Tuhsruhk kuht etuh lah ahkkohs koluk ke srihpsrihpyak sac tiac pa ip sefanna ke ngal koluk se ma muhtwacwacack Gethsemane—acn muhtahl se ke kweok sac—ac ahksahfyeyucklac Golgotha.

Luk el suhmuhslah:

“Na el fahsr luhkwelos ke lusac se ma mwet se ac kuh in sislah sie yot nuh we, ac el sikuckmuhtuhntei ac pruhe,

“El fahk, Pahpah, fin ou luhngse se lom, eslah kup in kweok se inge likiyuc: tuhsruhktuh, in tiac ou luhngse luhk, ac lwelah ma luhngse lom in orek.

“Sie lihpufacn inkuhsrao sikme nuh sel ac ahkkweyacl.

“Ke arulacna yohk kweok lal ke nuhnkweyac, el kwacfweacng na in pruhe, ac fioh kacl uh tultul oacna srah nuh fin fohk uh.”⁹

Ne inge ke nga kuh in fahk uh, oasr sramsram soko fanna ke kahs lal Mwet Lahngo sifacna ma ahkuhtweyac lah El muhtweng ke Imac Gethsemane ac. Fahkyuck uh sihmlac:

Mwet Lahngo el fahk lah el kweokkihn ma inge nuh sin mwet nuh kwewa elos in tiac kweok elos fin auliyak.

Tuhsruhk elos fin tiac auliyak, elos ac kweok oacna ke El oruh ah;

Suc ma kweok sang mwactal, finne God, fuhlwact liki nuh kwewa, in rarrar ke srihpen ngal, srah sohrohr ke pat kwewa kacl.¹⁰

Ke moul lowos uh ac kuh in oasr pacl ma kowos som nuh acn kowos tiac enenuh in som nuh we ac oruh ma kowos tiac enenuh in oruh. Kowos fin forlah liki ma koluk, kowos ac kuh in sie lwen etuh mihs ma tuhkuh ke ukweyacn inkacnek luhn auliyak pwacye.

Oacna sie ma kuht oruh koluk, oacna sie luhpan mukwikwi lasr ma kuh in ahkngalye mwet sahyac, puhla koluk sacn kwewa kuh in iyucklac. Nuh sihk, sahp pohloh fahk se ma kahto emet ke ma suhmuhslah nuh kwewa uh pa ke Leum el fahk, Fin mwet se auliyak, El ac nuhnak muhnahs ke ma koluk lalos ac muhlkuhnlah.¹¹

Pa ingacn olwelah ke wosasuc luhn Jisus Kraist ac Iwaclah uh: in eis mwet nuh kwewa ma tuhkuh, mwet nuh kwewa ma ac weacng, ac esacltahlwacng in puhlakihn in muh sahflahiyacn moul lalos uh, elos kuh in som nuh ke lihsrlihsr sac in auliyak ke ma koluk lalos ac ahknwacsnwacsyeyucklac ke srahn Kraist.¹²

Pa inge ma Mwet Luhlahlfongi oruh fin facluh nohfohn. Pa Kahlwem se ma kuht sang nuh selos suc muhta in lohsr ac tuhlac. Acn nuh kwewa mempucr ac misineri lasr uh som nuh we, pweng lasr uh pa sie luhlahlfongi ac finsrak ke Mwet Lahngo Jisus Kraist.

Prestuhn Joseph Fielding Smith el suhmuhslah kahs ke on soko “Kuh Fuhfahsryucsr uh Atacn Loes?” Kawuck na wowo se luhk. Oasr mwe ahkkweye kac ac sie olwelah nuh selos suc suk in ukwe mwe luti luhn Mwet Lahngo:

Ke inen Jisus Kraist, amen.