Tngakireng

A klemechek a mo er tirkel teloi er kid el tir a ngara ringel, el loberaod er a ouchelreng me a klechitechut, me a mla ruuebt, me a klengitelreng me a chelbuul.

Sera 1971, e ak mlo er a stake conference er a Western Samoa, ea mle uldimukl er a ngerchelek a mlo mengederoder er a beches el stake er a Iuns er a Upolo. Uriur er a cheldecheduch, ea ki ngilasech er a kekerei el skoki el mora Iuns er a Savai’i el kirel a stake conference. Tial skoki kilerd er a kora oberberk elbasio er a Faala e mle kirel lmuut el me melai er kemam er a bol kukuk er a sueleb el muut el mora Iuns er a Upolo.

Sel sils el mle kiram el muut er a Savai’i, eng mle chull. Ma ki medengei el kmo a skoki a diak el sebechel kmerd er a dekimes el basio, ea ki ulmekall el mora dims er tial beluu el mlarngii a kora sebechel bel kerd er ngii a skoki er bita er a tkul a daob. Aki milngiil el mocha milkolk, e dimlak a skoki el mei. A uriul, ea ki mlo medengei lokiu a razio el kmo ng mlarngii a eolt, me a skoki mlo diak el sebechel merael. Aki uldureklii a tekoi lokiu a razio el kmo aki mo ngara bilas. Ng mlarngii a chad el mle kirel mo olsiuekl er kemam er a Mulifanua.

Tia er a ki mtobed er a btelulachang er a Savai’i, ea kabitei er tial okeua el sung (12 m) a klemengetel bilas a uleker er a merreder er a mision el kmo ng mlarngii otelel. Ngungil, ele ng mlarngii meng uldersii er ngikal kabitei. Aki mirrael el teruich me a edei el mile (21 km) er tial debel a Upolo el kmal mle meringel a daob. Ng dimlak a ta er kemam el medengei el kmo a meringel el ses el eolt a mla subechii er tial beluu, e kemam a kmal di merael bedul ngii.

Aki siliseb er a olkerodel er a Mulifauna. Ngarngii a kora kekerei el siseball el doeak ngii el tuobed er a chelemoll. A llomes el ngara bebul a rois me a ongeru el kekerei el llomes a ulecholt er a rael. A ble lungil kleuadel omerollel a bilas me a ikal eru el llomes el tang a ngarbab er a chimong, ea bilas a uaia lemelemalt el soiseb er a delongelel a kengaol bad el mle blechocheb.

Eng di tiaikid el kesus eng di mle chimo llomes. Teru el elders a mlengiil er a olkerodel el memukai er kemam, eng di tial omerael a uaia le sal kemengetang. Uriur er a longiil er a olengchelel tial bilsengam, e tirka el elders a mesikang me te mlo mechiuaiu, e ulebes el mekerdii ongeru el llomes, sel ngariou el llomes. Tia mle uchul, e tial siseball a dimlak el beleketakl.

A kabitei a ulemesiull er a bilas el kmal melasem lomeklemalt er ngii el kirel sel mlar bab el llomes ea chad er a bilas orreked er tial otoel el ngara kuteling lomditm aikal bad. Aki ulerrenges a ngerel a daob sel sbechii er a ikal bad er a chelemoll. Tia er a ki mkedang el sebechemam el mes loba tial otoel, ea kabitei a uleldiu el kmo mluut leko ruriul e mluut el melasem el me soiseb.

Uriur er a betok el omelasem, eng mocha medengei el kmo ng diak el sebechel metik er a rael. Ng di mle sebechemam el mo kmerd er a olkerodel er a Apia el mle okeua el mile (64 km) a cherridel. Ng dimlak a ngera el sebechemam el rullii lomtok er a mesisiich el klisichel a eolt. Ng dirkak a ta mek ngara chelsel a iilkolk el uai tiang.

Ng dimlak a ngera el mekedmokl er a chelsel sel kot el sikang, luldimukl er a kot el ngarbab el rretel a mesil. Tial bilas a meringel ngmasech er a ikal mekedidai el daob e sola meked er bebul ea berobera a ultom er bab el diak el ngara daob. A berobera sel loliuekl e tial bilas a di mo omritel el soal meteruud e sola lmuut el kuk mo meked er bebul a daod.

Aki milchiuaiu er a chelsel a bilas el di ultobed chimomam me a chochemam, lorreked er kemam er a tkul a bilas e mla okes ochemam me lak ki mrebet er a daob. A Brother Mark Littleford a mlo mekemkom a chimal meng silebek el subechii er a deel er a tkul a bilas. Ng ulebeu a bdelul, eng di tial deel a uaia lengilseuir meng dimlak el rebet er a daob.

Ng mlo sebechemam, el mekekokemam el merael el tutungang e kemam a merma er a olkerodel er a Apia. A rokui el bilas a di mle ulak me lak el metemall. Tial olkerodel a mle meseked er a ikal bilas. Aki mocha mekekokemam el melemiakl aikal bilas, el melasem el diak ki molekar er tirkal milchiuaiu a bebul aikal bilas. Aki merola el mora Pesega, e ulmekdirt a bilam e merola el mora Vailuutai el mo mengederoder er a beches el stake.

Ng diak kudengei el kmo ng techa milngiil er kemam er a chelechol er a Mulifanua. Ng diak el soak a louchais er ngak. Ng di ng klemera el tekoi, a lak sel ngariou el llomes, e kemam el rokui a locha di mlad.

Ngarngii a kmal uodel el chelitekled el blechoel dongitakl er ngii eng di kmal ngarngii a tokubets el belkul el mei er ngak.

Chelechal sils eak mengedecheduch el mo er tirkel locha mla remiid e osiik er sel ngariou el llomes el mo ngosuterir el muut el mei.

Kede mle medengei er a uchelel el kmo chelsel tial klengar er a beluulechad eng diak el sebeched el mo cherrungel. Ng dimlak el ngara uldasu a kmo kede mo kiei el diak de temall a bebil er a llach.

“Ele di klechad ra tech a cheraro el mora Dios, el di mla uaisei er a rebetel a Adam el mei, el mo er medad el diak a ulebengelel, el di merekmo bo loltirakl ra okedongel Chedaol Reng, e bol becherei a di klechad e bol santo, lokiu a tngakireng er a Kristo el Rubak.”²

Ngara Pearl of Great Price, e kede medengei el kmo ng diak a diak el klikiid el mo soiseb er a rengedel a Dios,³me a uchul ea rael a milkedmokl el kirir a rokui el chad el ruebet er a klengit el mo ouchel a rengrir me bol klikiid e lluut el mora rengedel a Demad er a Babeluades.

A Mesebechakl, el Osobel a mlengilt, el ngii a mo kiei er a cherrungel el klengar Ngii, el diak a kengtil, “e uldersii el tngakireng er a klengit, el mo nger er a rokui el llach, el mo er tirkel mo ouchel a rengrir e mo ngariou a rengrir; ele ng diak a techang el sebechel mo sumechokl a rokui el llach.”⁴

Ng me a klou aultutelel a Tngakireng, ea Alma ulsisechakl el kmo, “Leng kmal kirel mo er ngii a tngakireng; … le lak ea rokui el chad a di mo remiid.”⁵

Alsekum eng dirkak moruul a chelbirukel, eng diak mousbech er a Tngakireng. Ea lsekum eke mla meruul a chelbirukel, el kid el rokui a mla remuul, a le mekekerei me a loberaod el klengit, eng klou a usbechel bo modengei el kmo ng mekera e mesuld el mo diak me bo lak mngara iilkolk.

“[A Jesus Kristo] a llomes e klengar er a beluulechad.”⁶Sel bo dultebechel er a Osischeklel, e kede mo mukrael el mora olkerodel er a cheledaol selbechakl.

A ongedei el tebechelel a klaumerang a kmo, “Aki oumerang el kmo ngokiu a tngakireng er a Kristo, ea rokui el chad a mo suobel, loltirakl a llach me a chedaol ruoll er a Ebangkelio.”⁷

A President Joseph F. Smith a ulisechakl el kmo: “A chad a diak el sebechel di ngii el lousubes a kngtil; ng diak el sebechir el di tir lomekbeches er tir er a telmellel a klengit. A chad a di sebechel meterrob el meruul a mekngit e mo meruul a llemalt er a ngar medal, ea lsekum a Rubak a kongei a omerellir [ete] mo klikiid. Eng di ng techa mo melabek aikel telemall el tir a rirul el mor tir me a dirrek el bebil e ra rechad, el locha diak el sal sebechir el ditir el sumechokl? Ngokiu a tngakireng er a Jesus Kristo ea kngtil a chad el ouchel a rengul a mo mesuld el mo diak; a kngtim el kmal smiich el bekerekard, a di mo becheleleu el uaia bsechel a sib [mesa Isaia 1:18]. Tiaikid a yakso el bla el beskau.”⁸

Ng diak desal medengei el kmo ng mekera Rubak e kudmeklii a Tngakireng. Eng di kede medengei el kmo sel meringel el kodall er a kerus a di mle tebechedel sel kdekudel el ringel el lulemuchel er a Gethsemane—sel chedaol basio er a ongarm—e mlo er a orokiolel er a Kolkata.

A llechukl er a Lukas a kmo:

“E Ngii a ngilseklii er tir el mo cheroid el ua cherridel a uetech er a bad, e mlo outubuach, a meluluuch,

“Ng dilul kmo, Chedam, a lungil ra rengum, e mnguu tial kob ra ringel el choridii er ngak: eng di motireklii, sel soam, e lak el sel soak.

“Ea tal anghel el mlara eanged a mlo duum er ngii, e millisiich er ngii.

“Meng kmal mlo chuarm ra ringel meng kmal mlo blak a rengul el meluluuch: ma klsbengel a mlo ua ngimech el rasech el olechars er a chutem.”⁹

A chimo el tekoi el sebechek lochotii er kemiu a kmo, ng di chimo el tekingel Osobel a smodii sel teletael el Ngii a kildmeklii er a Sers er a Gethsemane. A ocholt a kmo:

“Ng mla mora ringel el kirir a rokui el chad me luchul e tir lak le bora ringel alsekum ete ouchel a rengrir;

“Eng di alsekum eng diak louchel a rengrir, ete mora ringel el uai Ngii;

“El ngii el ringel a mle uchul e Ngii, el Dios, el ngarbab er a rokui, a mlo omritel er a ringel, e mengerngars a rasech er a bedengel.”¹⁰

Chelsel a klengar er kau, eng locha morngii a taem eke mora basio el locha diak el kirem el mor ngii e remuul a tekoi el diak el kirem el meruul. Alsekum eke obult el choridau er a kngtim, ea ta er a klebesei e ke mo sebechem el medengelii a budech el mei sel moltirakl er a rael er a meral ouchel el reng.

Meng diak el iior er a kngtid el kmo ngerang, ng diak el iior er a mengit el omerelled el mla tomall a rengrir a rebebil, e tiaikid el reng a sebechel mesuld. A denguu er ngak, “e sel locha kot el klebokel el tekoi er a chelsel a rokui el chedaol llechukl a se er a ledu Rubak el kmo, alsekum a chad ouchel a rengul er a kngtil, e Ngii a mo ousubes e diak el lluut el melatk.”¹¹

Tiaikid a yaksok er a ebangkelio er a Jesus Kristo me a Tngakireng: el melai er a ngii dil chad, ngii dil chad el mei, e ngoiteterir sosiseb er a teletael er a omesuub me sel ulebongel er a klengar tir, eng sebechir el soiseb er a kateng el mla ouchel a rengrir er a kngterir e mla merisou el mo beches lokiu a rsechel a Kristo.¹²

Tiaikid a loruul er ngii a Ruriul-klebesei el Santo el meliuekl er a beluulechad. Tiaikid a Llomes el kid oldars er ngii el mo er tirkel ngara iilkolk el dikea le betik er a rolir. Me sel le borngii a rechedal a ikelesia me a remisionari, ea klemeched a oba tal klaumerang me a urunguled el ngara Osobel el Jesus Kristo.

A President Joseph Fielding Smith a liluches a tekoi er tiakid el chelitakl “Does the Journey Seem Long?” Ngika mle ungil sechelik. Ngii a melisiich a reng e yaksok el mo er tirkel losiik el mo oltirakl a osischeklel Osobel:

El ngara ngklel a Jesus Kristo, amen.