Pinmuur Eo

Jān Būreejtōn Boyd K. Packer

Būreejtōn eo an Doulul eo an Jon̄oulruo Rijilōk ro


Jabdewōt jikin membōr ro im mijenede ro ad remaron̄ ilo̧k ie ļo̧k, ennaan eo ad ej kōn juon tōmak im kōjatdikdik ilo Rilo̧mo̧o̧r Jisōs Kraist.

Ennaan eo aō ekajju n̄an ro ilubwilijid me rej en̄taan, edodo kōn bōd im m̧ōjņo̧ im likjab, būrom̧ōj, im ebbwer.

Ilo 1971, kar jitōn̄ eō n̄an kweilo̧k ko an stake ilo Western Samoa, ekoba kajutak juon stake kāāl ilo ānen Upolu. Ālkin intōrpiu ko kōm kar jataik juon baļuun jidikdik n̄an ānen Savai’i n̄an kōm̧m̧ane kweilo̧k ko an stake ijo. Baļuun eo eaar jok ilo juon meļaaj eujoojoj e ilo Faala im kar bar ro̧o̧l tok ālkin raelep eo n̄an bōk kōm ļo̧k n̄an ānen Upolu.

Raan eo kōm kar tōn ro̧o̧l jān Savai’i, eaar wōt. Jeļā bwe baļuun eo ejjab maron̄ jok ioon meļaaj eo etutu, kōm kar ettōrļo̧k n̄an jabōn turear in āne eo, ijo ewōr juon āinwōt pij aidik eļā me ej kōjpel dān ko. Kōm kar kōttar m̧ae emarok, bōtaab baļuun eo eaar jab itaktok. Āliktata, kōm kar jeļā kōn radio bwe eaar wōr juon ļan̄, im baļuun eo eaar jab maron̄ keļo̧k. kōm kar welej ļo̧k bwe kōm naaj kar etal ilo wa. Juon eaar tōn ioon kōm ilo Mulifanau.

Ke kōm kar em̧m̧akūt jān ob eo ilo Savai’i, kapen eo an wa eo 40 ne (12 m) kar kajjitōk ippān mijen būreejtōn eo eļan̄n̄e ewōr juon an ten̄ki. Jeram̧m̧an, eaar wōr im kar leļo̧k n̄an kapen eo. Kōm kar jerak 13-m̧ail (21 km) jibadōkļo̧k ānen Upolu ilo lojet eo en̄n̄at. Ejjeļo̧k iaam eaar kile bwe ļan̄ eo enana eaar tōpar āne eo, im kōm kar kaiookļo̧k.

Kōm kar itakļo̧k ilo ob eo ilo Mulifanua, eaar wōr juon to eaidik kōm aikuj in kar deļo̧n̄e itōrerein pedped eo. Juon tōm̧a ilo juon bat ilōn̄ in bārijet eo im juon tōm̧a ettāļo̧k kar kōkalleik to eo eaidik. N̄e juon wa eaar kōmooļ bwe tōm̧a ko ruo raar juon ilōn̄ in eo juon, wa eo aikuj jejjet n̄an an jejjet an m̧wear ilo kauwōtata ko an dekā ko me rej pād tōrerein to eo.

Bōtaab bon̄ōn eo eaar juon wōt tōm̧a. Elder ro ruo raar pād ioon āne eo kōttar n̄an ioon kōm, bōtaab jerakļo̧k eo eaar bōk aitok ļo̧k jān iminene kake. Ālkin pukōt ium̧win awa ko kōkaļļe ko kōn wa eo waam, elder ro raar m̧ōk im mejki, an jab ebbōl tōm̧a eo kein karuo, tōm̧a eo ettā. Āinwōt juon tōprak, to eo ilo pedped eo eaar jab alikkar.

Kapen eo eaar kōmooļe wa eo jon̄an wōt eo emaron̄ m̧aanļo̧k n̄an juon tōm̧a ioon parijet ilo an jeļa eo jibwe ten̄ki eo kar barooki im̧aan wa eo, n̄an kappok dekā im̧aan. Kōm maron̄ ron̄ ainikien ņoo bun̄ ioon pedped eo. Ke kōm̧ kar bwe am epaakļo̧k n̄an loi kōn ten̄ki eo, kapen eo eaar kajoor an lam̧ōj pāāk im kar pāāk likļo̧k n̄an bar kajieon̄ n̄an pukōt to eo.

Ālkin elōn̄ kajieon̄ ko, eaar jeļā enaaj kar pen n̄an pukōt to eo. Men eo kōm maron̄ kar kōm̧m̧ane eaar kajieon̄ n̄an tōpar jikin po eo 40 m̧ail ko (64 km) ettoļo̧k jān Apia. Ejjeļo̧k men kom̧ maron̄ kar kōm̧m̧ane ņae kajoor eo eļap an lan̄ eo. Ijjab kememej n̄an jidik ia eo eaar kanooj marok.

Kōm kar jab wōnm̧aanļo̧k ium̧win awa eo kein kajuon, em̧ool engine eo eaar maat jon̄an. Wa eo eaar kakkōt lōn̄ ļo̧k ilo ņo ko rōutiej innām bōjrak ioon ņo ko kōn an pikpik ko ļōn̄jak jān dān jidik. Udiddid eo an pikpik ko raar kajoor aer kōm̧akūtkūt wa eo jon̄an enan̄in kar rup m̧okta jān ļe n̄an rejet eo juon.

Kōm kar babu leplep ilo kein kalbubuik aj eo, kōdāpdep kōn peiim ilo turejet eo juon im kōn jantin neem ilo turejet eo juon n̄an dāpij kōm bwe ren jab ļukut kom̧ jān ioon wa eo. Brother Mark Littleford eaar rōļo̧k im kar patōkļo̧k ņae aen eo. Eaar m̧wijm̧wij bōran, bōtaab aen eo kar bōbrae jān aer lukutļo̧k.

Āliktata, kōm kar jerak m̧aanļo̧k im epaake an emeramram kōm kar itakļo̧k ilo jikin po eo ilo Apia. Wa ko raar loklok ippān doon n̄an jab jorrāān. Ob eo eaar penjak kōn wa ko. Jidik wōt am kar etal ikōjaer, kajieon̄ jab kakure aer ro rej kiki ioon wa. Kōm kar etal n̄an Pesega, kar kōm̧rāik nuknuk am, im jibadōkļo̧k Vailuutai n̄an ejaake stake eo ekāāl.

Ijjab jeļā wōn eo ekar kōttar kōm ilo parijet in Mulifanua. Iaar m̧akoko bwe ren ba n̄an eō. Bōtaab em̧ool bwe ilo an jako tōm̧a eo ettā, kōm aolep maron̄ kar jōbwābwe.

Epād ilo bok in al eo ad juon al eo ekanooj rūtto im ejakutkut al kake me ekanooj in aorōk meļeļe in n̄an n̄a.

Romaakļo̧k in koon in jouj eo an Jemed
Jān miadi eo an indeeo,
Ak n̄an kōj ej letok kōjparok
Jān meram ko itōrerein parijet eo.
Kōm̧m̧an bwe tōm̧a ko rōttā ren ebbōl;
Romaak ilo aolepān dān eo.
Jet rettā im m̧ōk, em̧m̧aan ro rej kakkōt
Komaron̄ lo̧mo̧o̧r, komaron̄ kōjparok
Marok in bon̄ an jerawiwi em̧ōj an waļo̧k;
Ņo ko reļļap eļap ainikier.
Mej ko rōjebarujruj rej alooj, ajimakeke,
Bwe tōm̧a ko rej pād itōrerein parijet.
Kōjparok ļaam̧ eo ami edik, jeiū im jatū;
Jet jeļa rejeram̧ōļ, ļan̄ ejepelōklōk,
Kajieon̄ kiiō n̄an tōkeāk ilo jikin po,
Ilo maroklep maron̄ jōbwābwe.1

Ij kōnono n̄an ro me remaron̄ jebwābwe im rej pukōt tōm̧a eo ettā n̄an jipan̄ tōļ tok kom̧.

Kar meļeļe kake jān jinoin bwe ilo mour wabanban in jenaaj kar likjab jān weppān. Kar jab kōtmene bwe jenaaj kar mour ilo jab pokake jet kien ko.

“Bwe armej rej ilo lukkuun pikitokin ej ri kōjdat n̄an Anij, im eaar jān wōtlo̧k eo an Adam, im enaaj, indeeo im indeeo, m̧ae an naaj kōtļo̧k e n̄an kareelel ko an Jetōb Kwojarjar, im utikļo̧k armej eo ilo lukkuun pikitokin im erom juon ri kwojarjar kōn pinmuur eo an Kraist Irooj.”2

Jān Pearl of Great Price, jej meļeļe bwe ejjeļo̧k men etoonon emaron̄ jokwe ilo aelōn̄ in kiin̄ eo an Anij,3 im kōn menin juon wāween kar letok n̄an aolep ro rej jerawiwi n̄an ukweļo̧k im erom erreo im̧aan mejān Jemed ilo Lan̄ bar juon alen.

Juon Rijojomar, juon Ripinmuur, kar kālete, juon en enaaj kar mouri mour eo An ilo weppān, jab kōm̧m̧an jerawiwi, im ajeļo̧k “E make juon katok kōn jerawiwi, n̄an uwaake jem̧ļo̧k in kien eo, n̄an aolep ro ewōr aer bōro erup im jetōb ettā; im ejjeļo̧k jabdewōt emaron̄ uwaak jem̧ļo̧k ko an kien eo.”4

Ikkijien aorōk eo an Pinmuur eo, ilo Alma jej katak, “Bwe emenin aikuj bwe pinmuur eo en kar kōm̧m̧an; … n̄e jab aolep armej reaikuj lukkuun jako.”5

Eļan̄n̄e kom̧ij jan̄in kar kōm̧m̧ani bōd ko, innām kom̧ij jab aikuji Pinmuur eo. Eļan̄n̄e emōj ami kar kōm̧m̧an bōd ko, im aolepādwōj em̧ōj, men̄e reddik ak eļļap, innām ekanooj ļap ad aikuj n̄an pukōt ekōjkan aer maron̄ ejjeer bwe kom̧ij jab aikuj in pād wōt ilo maroklep.

“[Jisōs Kraist] ej meram eo im mour eo an laļ.”6 Ilo ad kalimjōk wōt dim eo ad ilo E im katak ko An, naaj tōl kōj n̄an jikin po eo einem̧m̧an ilo jetōb.

Laajrak in tōmak jilu ej ba, “Kōmij tōmak bwe kōn Pinmuur eo an Kraist, aolep armej renaaj mour, kōn pokake kien ko im kain̄i ko an Gospel eo.”7

Būreejtōn Joseph F. Smith eaar katakin: “Armej rejjab maron̄ jeorļo̧k jerawiwi ko aer make; rejjab maron̄ karreoik er make jān kaje ko an jerawiwi ko aer. Armej rejjab maron̄ jān jerawiwi im maron̄ kōm̧m̧an jim̧we jekļaj, im kōn menin [ilo] an jerbal ko aer em̧m̧an im̧aan Irooj [erom] erreo kōn ļōmņak kake. Bōtaab eo enaaj kajim̧we bōd ko em̧ōj aer kōm̧m̧ane n̄an er make im n̄an ro jet, me ej āinwōt epidodo n̄an er n̄an kajim̧we kōn er make? Kōn pinmuur eo an Jisōs Kraist jerawiwi ko an eo ej ukweļo̧k renaaj kwaļi ļo̧k; men̄e rej rōbūrōrō renaaj mouj āinwōt sno [lale Aiseia 1:18]. En̄in ej kallim̧ūr eo kar letok n̄an kom̧.”8

Jejjab jeļā ewi lukkuun in an kar Irooj kōtōprak Pinmuur eo. Bōtaab jejeļā bwe kakkure eo enana an Debwāāl eo eaar m̧ōttan eo wōt kōn metak eo ekōmettak me eaar jino ilo Gethsemane—jikin eo ekwojarjar an en̄taan eo—im kar kadedeļo̧k ilo Golgotha.

Luk ej ļo̧o̧ke:

“Im E make ilo̧k jān er, nan̄in jon̄an kade kōn deka, im bukwelōlō, im jar,

“Im ba, Jema eļan̄n̄e Kwo kōņaan; Kwon bōkļo̧k kab in jān Eō; a en jab ankil Aō a Am̧ wōt.

“Im juon enjeļ ej weaktok n̄an E jān lan̄, im kōkajoor E.

“Im ilo An en̄taan Ej kōļapļo̧k An jar; im An menokadu āinwōt eļap pilin̄lin̄ in bōtōktōk e wōtļo̧kk ioon bwidej.”9

Jon̄an eo imaron̄ kwaļo̧k, ewōr juon wōt bwebwenato in naan ko an Rilo̧mo̧o̧r eo me ej kōmeļeļeik ta eo Eaar dibuki ilo Jikin Kallib Gethsemane. Revelesōn ej ļo̧o̧ke:

Rilo̧mo̧o̧r eo eaar ba bwe Eaar en̄taan kōn men kein n̄an aolep bwe ren jab maron̄ en̄taan eļan̄n̄e rejjamin ukweļo̧k.

Bwe eļan̄n̄e rejjamin ukweļo̧k, rej aikuj en̄taan em̧ool āinwōt Iaar.

Eo en̄taan eo eaar kōm̧m̧an bwe E—em̧ool Anij, eo eļaptata iaan aolep—n̄an wōtlo̧k kōnke kōn metak, to̧o̧r būtōktōk ilo aolepān ānbwinin.10

Ilo aolepān mour eo ami emaron̄ wōr iien ko me kom̧ kar etal n̄an jikin ko kom̧ij aikuj in kar etal n̄ani ak men ko kom̧ kar kōm̧m̧ani komij jab aikuj in kar kōm̧m̧ani. Eļan̄n̄e kom̧ naaj oktakļo̧k jān jerawiwi, kom̧ naaj maron̄ in juon raan jeļā aenōm̧m̧an eo me ej itok jān ļoor iaļ eo an ukweļo̧k edipieo.

Jekdo̧o̧n ta bōd ko kar ad, jekdo̧o̧ņ ewi jon̄an an jerbal ko ad maron̄ kar kōmetak ro jet, bōd eo emaron̄ in karreoik ļo̧k. N̄an n̄a, bōlen naan eo aiboojoj tata ilo jeje ko rekwojarjar ej ke Irooj eaar ba, n̄e juon armej ej ukweļo̧k, Enaaj jeorļo̧k jerawiwi ko im jab bar kememeji.11

En̄in ej jibadbad eo an ko̧jpeļ eo an Jisōs Kraist im Pinmuur eo: n̄an bōk jabdewōt eo me ej itok, jabdewōt eo enaaj koba tok, im likūt er ilo jeļā eo bwe ilo jem̧ļo̧k in mour eo aer, remaron̄ ilo̧k ilo rōn̄ōl eo dedeļo̧k aer kar ukweļo̧k jān jerawiwi ko aer im dedeļo̧k kar karreoik er kōn bōtōktōk eo an Kraist.12

En̄in ej ta eo Armej ro Rekwojarjar ilo Raan-ko Āliktata rej kōm̧m̧ane ipeļaakin laļ in. En̄in ej Meram eo jej leļo̧k n̄an ro me rej pād ilo maroklep im kar jōbwābwe jān iaļ eo aer. Jabdewōt jikin membōr ro im mijenede ro ad remaron̄ ilo̧k ie ļo̧k, ennaan eo ad ej juon tōmak im kōjatdikdik ilo Rilo̧mo̧o̧r Jisōs Kraist.

Būreejtōn Joseph Fielding Smith eaar je naan ko n̄an al eo “Does the Journey Seem Long?” eo epād ie kōketak im juon kallim̧ur n̄an ro me rej pukōt n̄an ļoor katak ko an Rilo̧mo̧o̧r:

Iaļ eo āinwōt ke eaitok,
Iaļ eo epen im ju?
Ewōr ke okar ko im lōklōk ko ilo iaļ eo?
Dekā ko rōkkan̄ rōm̧wijiti ke neem̧
Ilo am̧ kakkōt n̄an jutak
N̄an m̧ōttan ko reutiej ilo iien eo ebwil an raan eo?
Būruwōm em̧ōjņo im būrom̧ōj ke,
Jetōb eo ilowaam̧ em̧ōk ke,
Ilo am̧ jerbal ium̧win eddo eo am̧ kōn kea?
Āinwōt ke jerbal eo eddo
Kiel eok n̄an kotake kiiō?
Ejjeļo̧k juon n̄an jipan̄ eo eddo eo am̧ ke?
Jab kōm̧m̧an bwe būruwōm̧ en m̧ōjņo̧ļo̧k
Kiiō iaļ eo ejjino;
Ewōr Juon me ej kūr wōt eok.
Kōn menin reilōn̄ļo̧k ilo lan̄lōn̄
Im jibwe Pein;
Enaaj tōl eok n̄an m̧ōttan ko reutiej me rekāāl—
Juon āne ekwojarjar im erreo,
Ijo aolep inepatak rej jem̧ļo̧k,
Im mour eo am̧ enaaj anemkwoj jān aolep jerawiwi,
Ijo ejjeļo̧k kōmejaaļaļ naaj to̧o̧r,
Bwe ejjeļo̧k būrom̧ōj ko rej pād wōt.
Jibwe pein im deļo̧n̄ļo̧k Ippā.13

Ilo etan Jisōs Kraist, amen.

Mostrar las referencias

  1.  

    1. “Brightly Beams Our Father’s Mercy,” Al,nō. 335.

  2.  

    2.  Mosaia 3:19.

  3.  

    3.  Lale Moses 6:57.

  4.  

    4.  2 Nipai 2:7.

  5.  

    5.  Alma 34:9.

  6.  

    6.  Mosaia 16:9.

  7.  

    7.  Laajrak in Tōmak ko 1:3.

  8.  

    8.  Tachings of Presidents of the Church: Joseph F. Smith (1998), 99–100.

  9.  

    9.  Luk 22:41–44.

  10.  

    10.  Lale Doctrine and Covenants 19:16–18.

  11.  

    11.  Lale Doctrine and Covenants 58:42.

  12.  

    12. Lale Revelesōn 1:5.

  13.  

    13. “Does the Journey Seem Long?” Al, nō. 127.